15
A kakailai kai Moses
1 Ma Moses ma ra tarai Israel dia ga kakaile go ra kakailai tadav ra Luluai, ma dia ga biti dari:
Ina kakailai tadav ra Luluai, tago i tar tut ma kana minamar;
I tar vue tar ra os ma ra tena ki os ta ra ta.
2 A Luluai kaugu kakailai ma ra dekdekigu,
Ma ia ra varvalaun piragu;
Kaugu dekdek na God ma ina pite pa ia;
A God kai tamagu, ma ina vangala pa ia.
3 A Luluai a tena vinarubu;
A iangina — ra Luluai.
4 A kiki na vinavana kai Parao ma kana loko na tarai na vinarubu i tar vue tar diat ta ra ta;
Ma kana lavur vakak na luluai na vinarubu dia tar dudu ta ra Ta Meme.
5 A luluruna i tuba diat;
Dia tar dudu ta ra marumian da ra vat.
6 Luluai, a limam tuna i mong ma ra ongor,
Luluai, a limam tuna i pamar gigi ra ebar.
7 Ma ta kaum peal minamar u vue pukue vue diat dia tut na vinarubu ure u.
U tar vaarike kaum kankan, ma i en vue diat da ra timul i ra kunai.
8 A ngala na vuvu na bilaum i vatut ra tava,
Ma ra lovon ta i tur da ra buana.
A lamanana i dekdek ta ra bala na ta.
9 A ebar i ga biti:
Ina korot mur diat, ina tadav diat, ina tibe ra tabarikik di ga ra pa ia.
A balagu na gugu ta diat,
Ina ele pa kaugu pakat na vinarubu, ma ra limagu na kamare vue diat.
10 U ga vuvu ma kaum ubar, ma ra ta i taun diat;
Dia ga dudu da ra bol ta ra ngala na ta.
11 Luluai, ia ta diat ra umana god ba amur a vardada me?
To ia amur a varogop me ta ra minamar i ra mangamangana gomgom,
I enana ra maukuam, dia pite pa ia ma ra kakailai, ma u pait ra papalum na padapada varvo?
12 U ga tulue ra limam tuna,
Ma ra pia i konom pa diat.
13 U tar rap lue kaum tarai ma ra varmari, nina diat u tar valaun diat.
U tar agure diat ma ra dekdekim tadav ra lia na kubam.
14 A tarai dia ga valongore, ma dia ga ururian;
A kinadik i tar tadav ra tarai ta ra gunan Pilistia.
15 I bilua ra nuknuk i ra umana luluai kai Edom.
A dadadar i kinim vake ra umana luluai Moab,
Ma ra tarai par dia ki Kanaan panie ra dekdek i diat.
16 A ngala na bunurut ma ra dadadar i tadav diat;
Ure ra dekdek na limam dia ki mut da ra vat,
Tuk tar ta nam ra bung ba kaum tarai, Luluai, dia tar vana alu,
Tuk tar ta nam ra bung ba kaum tarai dia tar vana alu, nina u tar kul kapi diat upi kaum.
17 Una agure vaolo boko diat ma una vaki diat ta ra luana ta kaum gunan,
Nam ra gunan, Luluai, u ga pait ia upi una ki tana,
Ra pal i gomgom, Luluai, nina a limam i ga vatur ia.
18 A Luluai na varkurai pa na mutu.
19 Tago ra lavur os kai Parao dia ga vana ta ra ta ma kana lavur kiki na vinavana, ma kana lavur tarai na os, ma ra Luluai i ga valilikun ra ta taun diat, ma ra tarai Israel dia ga vana ta ra pia i ge, ta ra bala na ta.
20 Ma Miriam, a propet, tai Aron, i ga vatur tika na kudu ta ra limana; ma ra vaden par dia ga mur ia ma ra umana kudu ma ra umana malagene.
21 Ma Miriam i ga kakailai pire diat dari;
Avat a kakailai tadav ra Luluai, tago i tar tut ma ra minamar.
A os ma nina i ki tana, i vue tar dir ta ra ta.
A mapak na tava aro Mara
22 Ma Moses i ga agure pa ra tarai Israel kan ra Ta Meme, ma dia ga vana ta ra bil, a iangina Sur; ma dia ga vana a utul a bung ta ra bil, ma pa dia ga tikan tadav ta tava.
23 Ma ba dia ga tadav Mara, i ga dekdek upi diat a momo ta ra tava Mara, tago i ga mapak; kari di ga vatang ra iangina Mara.
24 Ma ra tarai dia ga tata na urur ure Moses, dia ga biti: Ava avet a mome?
25 Ma i ga kail tadav ra Luluai, ma ra Luluai i ga vateten tar tika na davai tana, ma i ga vue tar ia ta ra tava, ma ra tava i ga kalami.
Ma ra Luluai i ga tul tar tika na varkurai ma tika na vartuluai ta diat, ma i ga valar diat ie;
26 ma i ga biti: Ona u valongore bulu ra nilai ra Luluai kaum God ma ona u pait nam i takodo ta ra luaina matana, ma una torom ta kana lavur vartuluai, ma una mur kana lavur varkurai, pa ina tulue nam ra lavur minait piram ba iau ga tulue pire ra tarai Aigipto; pata, tago iau ra Luluai, nina iau valagar u.
27 Ma dia ga pot aro Elim, nina a vinun ma a ura mata na tava tana, ma lavurua na vinun na inaina lama; ma dia ga ki abara pire ra tava.