10
1 A tara na turagu, go ra mamainga i tur ta ra balagu, ma kaugu nilul vovo pire God ure ra Israel, ba da valaun pa diat.
2 Tago iau varveai dovot ure diat. ba tikai ra vargat ure God i tur pire diat, ma pa i da ra kabatau.
3 Diat, tago dia tuptup ure ra varvatakodo kai God, ma dia tikan upi diat a vatur vapatuan vake ke kadia mangamangana takodo iat, pa dia ga vamolo tar diat ta ra varvatakodo kai God.
4 Tago Kristo iat ia ra mutuai ra tinata na varkurai upi ra varvatakodo kadiat par dia nurnur.
A varvalaun kai ra tarai par
5 Tago Moses i tutumu ure ra varvatakodo ta ra tinata na varkurai dari: Ba ta tutana i pait ot pa go ra lavur magit na laun ure diat.
6 Ma ra varvatakodo ta ra nurnur i biti dari: Koko u tatike dari ta ra balam: To ia na tutua urama ra bala na bakut? (a kukuraina dari, upi na agure vaba Kristo marama liu);
7 ba: To ia na vana ba ura iat? (a kukuraina, upi na agure vatutua Kristo kan ra minat).
8 Ma i tatike ra ava? A tinata i maravai piram, i ki ka ta ra balam; ia ra tinata na nurnur, nina ave varvai tana;
9 tago ona una varvai dovot ma ra ngiem ure Iesu, ba ia ra Luluai, ma una nurnur tuna ta ra balam ba God i ga vatut pa ia mulai kan ra minat, da ga valaun u;
10 tago a tarai dia nurnur upi ra varvatakodo ma ra bala i diat; ma dia varvai dovot bula ma ra ngie i diat upi ra varvalaun.
11 Tago ra Buk Tabu i biti: Nina iat muka i nurnur tana pa na vavirvir.
12 Tago ra Iudaia ma ra Elenas pa dia enana varbaiai; tago ra kopono Luluai ia ra Luluai i diat par, ma i vapealane ra vartabar tadav diat par dia kail pirana.
13 Tago nina i kail upi ta iang i ra Luluai, da ga valaun pa ia.
14 Ma diat a kail davatane upi nina ba pa dia ga nurnur tana? Ma diat a nurnur dave tai nina ba pa dia ga valongore? Ma diat a valongore davatane ba pa ta tena varveai?
15 Ma gala pa di togue diat, diat a gala varvai dave? Da di ga tumu ia dari: I mariringian ra kau i diat, dia kapkap ra bo na varveai ure ra lavur vakak na magit!
16 Ma pa dia ga torom par ta ra bo na varvai. Tago Iesaia i tatike dari: Luluai, to ia laka i ga kapupi kaveve varvai?
17 Damana ra nurnur i vuna ure ra valavalongor, ma ra valavalongor ure ra tinata kai Kristo.
18 Ma iau biti dari: Dave, pa dia ga valongore laka? Maia pa, a dovotina,
“A nilai diat i tar vana ta ra rakarakan a gunagunan par,
Ma kadia tinata ta ra langlangun i ra lavur vuna gunan mutu.”
19 Ma iau biti dari: Dave ra Israel, pa dia ga nunure laka? Moses i tatike lua dari:
“Ina vangangap avat upi na arikai ra varpin ta vavat ure diat,
Ba vakir diat tika na vuna tarai,
Ma ina vangangal avat ure tika na vuna tarai dia tabobo.”
20 Ma Iesaia i rurung muka, ma i tatike:
“Diat nam ba pa dia ga tikan upi iau, dia ga na tadav iau;
Ma iau ga vaarike iau ta diat, ba pa dia ga titir upi iau.”
21 Ma ure ra Israel i tatike: “A bungbung par iau tar tulue tar ra ura limagu upi ra tarai na varpiam ma ra umana tena varpuai.”