19
Paulo Efeso neḡano
1 Apoloꞌa Korinto neḡano radiunuteꞌe madaḡano, Paulo ani maḡa habaꞌa tihitihine onamadu, Efeso neḡano feuriro. Eꞌea Zuhiꞌa Boro tahiꞌa nu hidadu,
2 ḡadiziro, raenaꞌa, “Za, Iesu mazao fiiroteꞌe zamaḡano, Vine Zaḡoḡaniꞌa zae vaḡe ovairo hehe?”
Ze naenaeninaꞌa, “Mene! Eme, Vine Zaḡoḡa raꞌeteꞌe zuni mene igiro.”
3 Eꞌanoꞌo Pauloꞌa ḡadizenaꞌa, “Za nagi bapatizo meiro?” reirotene, zeꞌa naenaeninaꞌa, “Ioane bapatizo meiro.” reiro.
4 Pauloꞌa raenaꞌa, “Ioaneꞌa bapatizozirotaꞌaꞌe, zaeꞌa zamaze ḡihunadu, haḡai sauꞌa modoga. Ebu ani zinaꞌa, 'Eḡe ḡaruna onaiteꞌe vazeḡa mazao fioꞌi! Aꞌe Iesu.' rae reiro.”
5 Ze ḡoere eꞌe igirotene, Zuhiꞌa Boro Iesu niḡano bapatizo meiro.
6 Ebu Pauloꞌa ꞌevoꞌa zeḡe rana tirotene, Vine Zaḡoḡaniꞌa zeḡe vaḡe ovairo, ebu ze ago ꞌahoga ꞌahogano ḡoeriro, ebu Badiꞌaꞌa ihoziroteꞌe ḡoeꞌa rae fureniro.
7 Eꞌe zamaḡanoꞌe, ohoze gaubanana zu aheu fare (12) heuḡaniꞌa radiro.
8 Ebu Paulo ani, Iuda azaḡa kuru neḡa diuḡadu, eꞌea bato uḡidu inare haramido. Ebu Badiꞌaꞌa zuhiꞌaziteꞌe ḡoeꞌa Iuda azaḡa teite ḡihau ḡoꞌaniro, zeḡe zuni Iesu mazao fioga veize.
9 Rehano Iuda azaḡa nuꞌe, teḡa riranadu, Paulo ḡoere hezaho haro, ebu vaze ḡehaḡa ubumao Zuhiꞌa Boro ibi sausaune ḡoeriro. Eꞌanoꞌo Pauloꞌe Iuda azaḡa kuru neḡa mode buanadu, Zuhiꞌa Boro tahiꞌa tahiꞌa zamaze onamiro. Ebu vaze ꞌahoga niḡa Turanu, aneꞌa ihozeꞌeteꞌe neḡa onamadu, mada niduꞌa eꞌea ḡoꞌane ihozido.
10 ꞌOuge haḡae onamoo, muri aheu meiro. Eꞌanoꞌo Iuda azaḡa zu Giriki azaḡa Asia habaꞌano radiuꞌeteꞌeꞌa niduꞌa, Zuhiꞌa Boro ḡoere igiro.
Sikeva ubuga duḡuruꞌa vine sauꞌa hegone bune nuriro
11 Badiꞌa ani, Paulo gauonoꞌo gigiꞌa haḡaiḡa iḡaiḡa mene horoneꞌeteꞌe haḡaido.
12 Vaze nuꞌe, Pauloꞌa odohe raudoteꞌe mukoḡa zu vidau gauidoteꞌe dabuaḡa afaꞌa madu, ugi azaḡa ranao tidotene, ugizeꞌa manorido, zu vine sauꞌaniꞌa buaudo.
13 U Iuda azaḡa nu haba ꞌahoga ꞌahogano ragaveꞌenaꞌa, vaze mazaonoꞌo vine sauꞌa hegoze buzeꞌeteꞌeꞌa, ze Zuhiꞌa Boro Iesu ni rae nuriro. Ze vine sauꞌa zinu, raenaꞌa, “Iesu ni, Pauloꞌa rae harameꞌeteꞌe, eꞌe niḡano ḡaꞌohe. Vaze mazaonoꞌo buanoꞌi!” rae reiro.
14 Dibuꞌo hauꞌeteꞌe boro ꞌahoga, niḡa Sikeva, ane ubuga fuꞌo zu aheu fare (7) zuni eꞌuge haḡairo.
15 ꞌOugirotene, vine sauꞌaniꞌa naenaezinaꞌa, ꞌahige reiro. “Iesu eḡe edeḡa, zu Paulo eḡe edeḡa, u zaꞌe iniu?”
16 ꞌOuge radu eꞌe vineḡa sauꞌaniꞌa radiuꞌeteꞌe vazeḡaniꞌa, zeḡe rana rafatiro, ebu ani inaraꞌe zeḡe teite mene idaḡa ꞌahine, zeḡe niduꞌa raharahaziro. Eꞌanoꞌo tahiꞌa tahiꞌaꞌe firina zu ahirize ruauꞌenaꞌa, neonoꞌo ferau buaro.
17 Efeso neḡano Iuda azaḡa zu Giriki azaḡaniꞌa eꞌe hariḡa igirotene, zeḡe niduꞌa ḡiḡaroziro, ebu Zuhiꞌa Boro Iesu ni nigune ḡihiniro.
18 Ebu Zuhiꞌa Boro mazao fiiroteꞌe azaḡa ḡehaḡaniꞌa onaadu, aneane haḡai sauꞌa rae fureniro.
19 Nabone azaḡa ḡehaḡaꞌe zeḡe murava bukaḡa odohe onaadu, vaze niduꞌa ubumao hufi haoniro. Hufi haoniroteꞌe bukaḡa naeḡa niduꞌa meꞌode nuꞌonirotene, siliva moniḡa 50,000 reiro.
20 ꞌOugeꞌenaꞌa, Zuhiꞌa Boro ḡoereꞌe gigiꞌeita bororu onamiro zu inare onamiro.
Efeso neḡano hara boroꞌa fureraro
21 Efeso neḡano ꞌuguḡaniꞌa fureraroteꞌe ḡarugano, Vine Zaḡoḡaniꞌa Paulo ibito hanadu, ani Makedonia zu Akaia habaꞌa onamiꞌuduꞌu, Ierusalema neḡa onamiꞌuma rae zamariro, ebu raenaꞌa, “Ierusalema neḡa onamiteꞌe ḡarugano, Roma neḡa zu onamiꞌuma.” reiro.
22 Eꞌanoꞌo Pauloꞌe, ane dana vazeḡa aheu, Timoteo zu Erasto Makedonia habaꞌano ibite tuḡuziro, u aniꞌe mada nu Asia habaꞌano radiunu.
23 Eꞌe madaḡa heuḡano, Efeso neḡano aduga boroꞌa Zuhiꞌa Boro Ibi mae ḡihineꞌeteꞌe azaḡa moneo fureraro.
24 Eꞌe haḡaiḡaꞌe ꞌahige fureraro. Eꞌea vaze ꞌahoga, niḡa Demetrioꞌa radiunu. U Efeso roḡae badiꞌaḡa niḡaꞌe Atemisi. Demetrioꞌe, siliva hina eꞌe badiꞌaḡa dibuꞌo neḡa kobefe idane haḡaeꞌeteꞌe gauḡa odohe durido, ebu tahiꞌa ḡehaḡaniꞌa ane ꞌuꞌuḡano gauadu, moni boro meido.
25 Demetrioꞌe, ane gau azaḡa zu ane gau heuḡa haḡaeꞌeteꞌe azaḡa nuꞌozadu ziro, raenaꞌa, “Nego, zae edeḡa, emeꞌe gau ꞌadi haḡaadu moni boro maꞌohe.
26 Za, Efeso neḡano zu Asia habaꞌa niduꞌa zamaḡano Pauloꞌa vaze ḡehaḡa zamaze anadu, tutuze veꞌoziroteꞌe horoniro, zu igiro. Ani raenaꞌa, 'ꞌEvore hina haḡaeꞌeteꞌe badiꞌaḡaꞌe mene badiꞌa.' raꞌohe.
27 Nougine eme gau niḡaniꞌa sautaꞌuma, zuni Atemisi, roḡae badiꞌaḡa boro, ane dibuꞌo neḡa zuni vazeꞌa huga oꞌoꞌa reꞌuma. Zu roḡae badiꞌaḡa, ani niḡa ḡihiꞌa raꞌeteꞌeꞌa dauḡiꞌuma. Asia habaꞌa zu haba ꞌahoga ꞌahogano vaze niduꞌaꞌa kurano hauꞌe rehano, ꞌougiꞌuma.”
28 Nuꞌoraroteꞌe azaḡaniꞌa eꞌe igirotene, maḡune rudaro ebu hounaꞌenaꞌa, “Efeso azaḡa roḡae badiꞌaḡa, Atemisiꞌe niḡa boro bagaḡa!” reiro.
29 Ebu Efeso neḡa azaḡa niduꞌaꞌa hounaꞌadu harae ḡuzuhe huniro. Ebu Makedonia habaꞌanonoꞌo Paulo ḡatine onairoteꞌe azaḡa, Gaio zu Aristako, ze oboze teadu, ahaseꞌenaꞌa, zeḡe niduꞌa Efeso nuꞌonuꞌo habaꞌa idaḡa dure diuḡiro.
30 Paulo ani, vaze ḡuḡuvaḡa ḡorezihi radu zeḡe ḡunuḡano diuḡihi reiro rehano, Zuhiꞌa Boro tahiꞌa duḡuruꞌa garariro.
31 Zuni Asia habaꞌa gavamanio gaueꞌeteꞌe azaḡa nuꞌe Paulo vaze. Zeḡe zuni umide ḡoere tuḡurenaꞌa, “Nuꞌonuꞌo habaꞌa ago diuḡoꞌi!” reiro.
32 Ebu Efeso nuꞌonuꞌo habaꞌanoꞌe, vaze ḡuḡuvaḡa niduꞌa harae ḡuzuhido. Ze ḡoere ꞌahoga ꞌahoga rae hounaꞌido, rehano eꞌe zamaḡano vaze ḡehaḡaꞌe aḡuꞌa, nagini uꞌano diuḡirotaꞌaꞌe.
33 Iuda azaḡa nuꞌa, vaze ꞌahoga, niḡa Alesana, ani vaze ḡuḡuvaḡa zamao duine moneneadu, nougiꞌuma rae ihoniro. Aneꞌa eꞌea edarotene, haraꞌa zuhutanoga veize ꞌevoꞌa ḡihiniro, ebu vaze ḡuḡuvaḡa ḡorezihi reiro.
34 Rehano Alesanaꞌe Iuda vazeḡa. Vaze ḡuḡuvaḡaniꞌa eꞌe ederirotene, ze niduꞌa ago tibano huauꞌenaꞌa, “Efeso azaḡa roḡae badiꞌaḡa Atemisiꞌe niḡa boro bagaḡa!” reiro. Ḡoere tiba eꞌe daꞌo barebare rae harae onamo, mada aheu (2 hours) meiro.
35 Ne gavamaniḡa veize seketeri gauḡa haḡaeꞌeteꞌe vazeḡa ꞌahoganiꞌa vaze ḡuḡuvaḡa hara garariro, ebu zeḡe niduꞌa sifu radirotene, ani zinaꞌa, “Efeso azaḡa, vaze niduꞌa edeḡa, Efeso neḡaꞌe roḡae badiꞌaḡa boro Atemisi dibuꞌo neḡa taufe radiuꞌohe, zuni Atemisi iraḡa hadiḡa adureonoꞌo ovairoteꞌe zu taufeꞌohe.
36 Eꞌebanoꞌo Efeso azaḡaniꞌa ꞌougeꞌetaꞌaꞌe, haḡai hugahuga. Eꞌanoꞌo za ago haraoꞌi! Ḡurizabuo ḡau ꞌahoga ago haḡae tauḡoꞌi!
37 Za vaze aheu ꞌadi zamaze onaa rehano, ze emeḡe kuru neḡano ḡau ꞌahoga mene ḡonotaneha, zu emeḡe roḡae badiꞌaḡa niḡa mene sausaune ḡoereha.
38 Demetrio zu ane gau tiba azaḡaꞌe vaze ꞌahoga ꞌutihi reineꞌe, kota onamine manoḡa. Kotaꞌe bohaꞌa, zu eꞌea gavana azaḡaniꞌa radiuꞌe ꞌahine, eꞌe habaꞌano ḡoere aduga ane mazao riꞌinine manoḡa.
39 Ga zae mazao ḡoere ꞌahoga eꞌe reine, Efeso gavamani goroḡano ne azaḡaniꞌa nuꞌoruꞌeteꞌe zamaḡano ḡoꞌanine manoḡa.
40 Emeꞌe, izidi ꞌada harae ḡuzuhateꞌe haḡaiḡa uꞌano, nougineꞌe gavamani azaḡaniꞌa emeḡe rana aduga tiꞌuma. Emeꞌa haraataꞌaꞌe mazaḡa oꞌoꞌa ꞌahine, emeꞌe emeḡe moneo ḡoeroga mene idaraꞌuma.
41 Ani ꞌouge ḡoeradu, vaze ḡuḡuvaḡa tuḡuze ḡouriro.