23
1 Paulo ani kanisoro azaḡa ḡiaze huneꞌenaꞌa, ꞌahige reiro. “Nego nabudi, eꞌe Badiꞌa ubumao zamahe duduḡa hanadu, nagini nagana haḡae onainu.”
2 Eꞌe igirotene, dibuꞌao hauꞌeteꞌe ḡihiꞌaḡa, niḡa Ananiꞌaꞌa Paulo babaḡano edauꞌeteꞌe azaḡa zinaꞌa, “Hebe ꞌue faꞌonoꞌi!” reiro.
3 ꞌOuge reirotene, Pauloꞌa ninaꞌa, “Ḡa, sauꞌaḡo ꞌuꞌuru touga raduni feni ꞌuruḡa hina fenineꞌeteꞌe biriḡa heuḡa! Badiꞌaꞌa faꞌoꞌiꞌuma. Ḡa eꞌea ehoradu, goro ḡoeꞌa ibiḡano aduga iniꞌuma raꞌohe. Rehano ḡaꞌe goro ḡoeꞌa variꞌeꞌenaꞌa, 'Paulo faꞌonoꞌi!' raꞌohe.”
4 Paulo uhiḡano edaunuteꞌe azaḡaniꞌa, Paulo ninaꞌa ꞌahige reiro. “Dibuꞌo hauꞌeteꞌe ḡihiꞌaḡaꞌe Badiꞌaꞌa ohoniro rehano, ḡoere sauꞌa hina ni sausauneꞌe hehe?”
5 Pauloꞌa naenaeninaꞌa, “Nego nabudi, e aḡuꞌa, aniꞌe dibuꞌo hauꞌeteꞌe ḡihiꞌaḡa. E veꞌoreha, mazaḡa buka zaḡoḡano ꞌahige touga. 'Zae zuhiꞌaziꞌeteꞌe vazeḡaꞌe ḡoere sauꞌa ago noꞌi!' ”
6 Ebu Paulo ani, Sadukea zu Farisea azaḡaniꞌa nuꞌonuꞌo zamaḡano radiuꞌeteꞌe horozirotene, zeḡe boꞌaḡano ḡoere ḡiharo, raenaꞌa, “Nego nabudi, eꞌe Farisea vazeḡa, zu Farisea vazeḡa ubuga. Eꞌe, rune vazeḡaniꞌa bare ḡaboditeꞌe zamare guhineꞌeteꞌe uꞌano kota ꞌada edauꞌohe.”
7 ꞌOuge reirotene, Farisea azaḡa zu Sadukea azaḡaniꞌa taꞌiro titiro, ebu nuꞌonuꞌo azaḡa niduꞌa naenae edaro.
8 Sadukea azaḡaꞌe ꞌahige rae raꞌohe. Rune vazeḡaꞌe mene bare ḡabodiꞌuma, zu vazeꞌe viga oꞌoꞌa, ebu tuḡure viga zuni oꞌoꞌa raꞌohe. U Farisea azaḡaꞌe eꞌe niduꞌa mae ḡihineꞌohe.
9 Ebu haraꞌa ufeta hune bororaro. Eꞌe zamaḡano, goro ḡoeꞌa ihozeꞌeteꞌe azaḡa nuꞌe Farisea azaḡa. Zeḡeꞌa edanadu, riḡa taꞌiriro, raenaꞌa, “Vaze ꞌadi mazaoꞌe sauꞌa ꞌahoga oꞌoꞌa. Nougine, vine ꞌahoga ga tuḡure viga ꞌahoganiꞌa ḡoreniro gaogi.”
10 Taꞌirozeꞌa ufeta bororarotene, Pauloꞌe Iuda azaḡaniꞌa hutube oname onaido. Eꞌanoꞌo uti vazeḡa boro ani, Paulo sausauniꞌuma rae rihanadu, uti azaḡa zinaꞌa, “Ovoradu, nuꞌonuꞌo azaḡa mazaonoꞌo Paulo riḡa mae vaḡinoꞌi, ebu uti azaḡa radone neḡano bare mae zounoꞌi!” reiro.
11 Eꞌe oheꞌano, Zuhiꞌa Boroꞌa Paulo uhiḡano edanadu niro, raenaꞌa, “Inare radoꞌi! Ḡaeꞌa Ierusalema neḡano eḡe hari rae fureniroteꞌe teige, Roma neḡano zuni rae fureniꞌuma”
Iuda azaḡa nuꞌa Paulo matihi rae neneḡaniro
12 Irarirotene, Iuda azaḡa nuꞌa nuꞌoranadu, Paulo matihi rae sifu neneḡaniro, ebu Paulo maꞌuduꞌu ogaꞌuma ga gagiꞌuma raenaꞌa, ḡoere riḡa gore ti modiro.
13 ꞌOuge gore ti modiroteꞌe azaḡaꞌe, ḡae ḡazaḡa gaubanana (40) vitinoga.
14 Ze dibuꞌo hauꞌeteꞌe boroboro zu vaze boroboro vaḡe onaadu ziro, raenaꞌa, “Eme ḡoere riḡa ꞌahige gore ti modeha. Mene ogaꞌuma onamo Paulo maꞌuduꞌu.
15 Eꞌanoꞌo za zu kanisoro azaḡaꞌe uti vazeḡa boro uminine idaḡa hehe, zae mazao Paulo bare tuḡunoga? Za soꞌe faifairu bare ḡadiniꞌuma roꞌi! ꞌOugine ani ꞌize ꞌizema feurogano ibio maꞌuma.”
16 Rehano Paulo ezeḡa ubuganiꞌa Paulo ganato hauꞌeteꞌe hariḡa igiro. Eꞌanoꞌo Roma uti azaḡa radone neḡa onamadu Paulo niro.
17 Eꞌanoꞌo Pauloꞌa uti azaḡa ibito ziniꞌeteꞌe vazeḡa ꞌahoga hune onaadu niro, raenaꞌa, “Tahiꞌa ꞌadi, uti vazeḡa boro vaḡe tutune onamine idaḡa hehe? Ani hari ꞌahoga rae fureno hatihi raꞌohe.”
18 Eꞌanoꞌo tahiꞌa eꞌe uti vazeḡa boro vaḡe tutune onamiro.
Uti azaḡa ibito ziniꞌeteꞌeꞌa, boro ninaꞌa, “Ḡuꞌano radiuꞌeteꞌe vazeḡa, Pauloꞌa huhe onamadu umideha. 'Tahiꞌa ꞌadi uti vazeḡa boro vaḡe tutune onamoꞌi!' raha. Mazaḡa aniꞌe hari ꞌahoga rae fureno ḡanihi raꞌohe.”
19 Uti vazeḡa boroꞌa tahiꞌa eꞌe genaḡa abine onamadu ḡadiniro, raenaꞌa, “Ḡa nagini ihihi raꞌohe?”
20 Aniꞌa ninaꞌa, “Iuda azaḡaniꞌa ḡoere idanadu, ohoḡore Pauloꞌe Kanisoro azaḡa mazao tutune onamoga rae umiꞌiꞌuma raꞌohe. Zeꞌe soꞌe Paulo faifairu bare ḡadinihi reꞌuma.
21 Eꞌanoꞌo ḡoereze ago egoꞌi. Mazaḡa ḡae ḡazaḡa gaubanana (40) vitinoga azaḡaniꞌa ibio ganate radiꞌuma. Zeꞌe ḡoere riḡa ꞌahige gore ti modeha. Ze mene ogaꞌuma ga mene gagiꞌuma onamo Paulo maꞌuma. Izidi ꞌadi zamaḡano, zeꞌe ḡa ḡoere guhineꞌohe.”
22 Uti vazeḡa boroꞌa ninaꞌa, “Ḡaꞌa ihohiꞌ arateꞌe moneo, vaze ꞌahoga ago noꞌi!” Ebu tuḡune onamiro.
Paulo Kaisarea neḡano tuḡuniro
23 Ebu uti vazeḡa boroꞌa uti azaḡa ibito ziniꞌeteꞌe vazeḡa aheu huze onaadu ziro, raenaꞌa, 'Uti azaḡa maḡa aheu (200) huze nuꞌozoꞌi, ebu veine hina utiteꞌeteꞌe azaḡa maḡa aheu (200) zu hosi ranaonoꞌo utiteꞌeteꞌe azaḡa ḡae fuꞌo zu aheu fare gaubanana (70) huze nuꞌozoꞌi! Ebu izidi ohere 9 koroko zamaḡano iḡunadu, Kaisarea neḡa ovoroꞌi!
24 Paulo veize hosi nu moꞌi, ebu gavana vazeḡa Feliki vaḡe fairu tutune onamoꞌi!'
25 Uti vazeḡa boro ani, gavana vazeḡa veize miriho ḡoeꞌa tiro, raenaꞌa,
26 'Eḡe Klaudia Lusiaꞌa, ḡihiꞌa vazeḡa manoḡa, gavana vazeḡa Feliki mazao manoḡa tauḡi raꞌohe.
27 Vaze ꞌahiꞌe Iuda azaḡaniꞌa obone teadu matihi reiro, rehano eḡeꞌa uti azaḡa nu teite onamadu, Iuda azaḡa mazaonoꞌo mae vaḡiniro, mazaḡa ani Roma mone vazeḡa rae reiroteꞌe igiro ꞌahine.
28 Ebu eꞌe nagini uꞌano Iuda azaḡaniꞌa maḡuniroteꞌe ederihi radu, Kanisoro azaḡa nuꞌonuꞌo zamao vaze ꞌahi ohoniro.
29 Ebu eḡeꞌa ederirotaꞌaꞌe, aniꞌa Iuda azaḡa goro ḡoeꞌa variꞌiroteꞌe uꞌano maḡuniro. ꞌUguḡa haḡaiḡaꞌe ḡuꞌano mene ohoniꞌuma, zu runeo mene tuḡuniꞌuma ḡauḡa.
30 E izidi Iuda azaḡaniꞌa ani matihi rae neneḡaniroteꞌe ega ꞌahine, ḡae vaḡe zogone tuḡuneꞌohe. Ebu Iuda azaḡa zuni zeha, zeḡe zu ḡae vaḡe ovamadu, ḡae zamao aniꞌa haḡairoteꞌe haḡaiḡa rae furenoga veize.”
31 Eꞌanoꞌo eꞌe oheꞌano uti azaḡa ze, ziroteꞌe idunaḡano, Paulo tutune ovoadu, Antipatri neḡano onamiro.
32 Irarirotene, hosi ranaonoꞌo utiteꞌeteꞌe azaḡaniꞌa daꞌo Paulo tutune Kaisarea neḡa ovoiro. U uti azaḡa odao onamirotaꞌaꞌe, Ierusalema neḡa bare itiro.
33 Uti azaḡa hosi ranaonoꞌo utiteꞌeteꞌeꞌa Kaisarea neḡano feurirotene, gavana vazeḡa Feliki miriho ḡoeꞌa haro, ebu Paulo ani ꞌevorao tiro.
34 Ebu gavana vazeḡaniꞌa miriho eꞌe meꞌodiro, ebu Paulo ḡadiniro, raenaꞌa, “Ḡa noꞌe vazeḡa?” Pauloꞌa, “Kilikia habaꞌa” reirotene,
35 gavana vazeḡaniꞌa raenaꞌa, “Ḡae ꞌutiroteꞌe azaḡaniꞌa feuriꞌuduꞌu, ḡaeꞌa nagini haḡainuteꞌe ḡoeꞌa igiꞌuma.” reiro. Ebu uti azaḡa zinaꞌa, “Pauloꞌe Kini Heroda ne, ane ḡabogano ogoraroteꞌe neḡano ḡuꞌa gadizeꞌeteꞌe azaḡa ꞌevorao toꞌi!” reiro.