15
Mamoeꞌa Dauḡiroteꞌe Hariḡa Idaidaḡa
(Mataio 18:12-14)
1 Mada ꞌahogano takesi azaḡa ebu haḡai sauꞌa azaḡaniꞌa nuꞌoranadu Iesu ḡoere abitinu.
2 Rehano Farisea azaḡa ebu Mose goro ḡoeꞌa ihozeꞌeteꞌe azaḡa ze mene matuiro ebu ufeta ḡoereriro, raenaꞌa, “Iesuꞌe haḡai sauꞌa haḡaeꞌeteꞌe azaḡa mae zouzeꞌohe ebu zeḡe teite ogau tiburuꞌohe.”
3 Ebu Iesuꞌa hari ꞌahoga idaniro.
4 “Zae boꞌaḡano vaze ꞌahogaꞌe mamoꞌeḡa 100, rehano tibaniꞌa dauḡine, aniꞌe mamoꞌe 99 haba bohaꞌa nobeꞌa modadu dauḡoga mamoꞌeḡa vaḡe ragaviꞌuma.
5 Ani horone meine, ani matuꞌe rudanadu mae ane herao tiꞌuma.
6 Ebu ani bare ne onamadu ane vaze, negoḡa zu nabuga huze nuꞌoziꞌuma. Ebu raꞌenaꞌa, 'Eꞌe eḡe mamoꞌe dauḡoga ḡauḡa horoneha, eꞌanoꞌo eḡe teite matuihi!'
7 E ziꞌohe. Hari eꞌe teige, haḡai sauꞌa vazeḡa tibaꞌe ane sauꞌaꞌonoꞌo ḡihurine, adureo ani mazao ufeta matuꞌiꞌuma. Sauꞌaꞌonoꞌo ḡihuriꞌuma haḡaiḡa oꞌoꞌa raꞌeteꞌe duduḡa azaḡa 99 vitiziꞌuma.”
Moniꞌa Daugiroteꞌe Hari Idaidaḡa
8 Iesuꞌa hari ꞌahoga idaniro, raenaꞌa, “Roḡae ꞌahogaꞌe moniḡa niduꞌa 10, rehano tibaniꞌa dauḡine, ani nagini haḡaiꞌuma? Ani ihureḡa tinadu ne fodeꞌenaꞌa, haba niduꞌa faine ḡiane vaḡiꞌuma.
9 Ebu horone meine, ane vaze, negoḡa zu nabuga huzadu zinaꞌa, 'Eḡeꞌa dauniroteꞌe moni tiba vaḡe horoneha, eꞌanoꞌo eḡe teite matuꞌihi!'
10 E za ziꞌohe. Eꞌe teiḡe, Exhaḡai sauꞌa vazeḡa tibaniꞌa ane sauꞌaꞌonoꞌo ḡihurine, Badiꞌa tuḡure vigaꞌe matuꞌiꞌuma.”
Ubuganiꞌa Dauḡiroteꞌe Hari Idaidaḡa
11 Ebu Iesuꞌa hari ꞌahoga bare idaniro. “Vaze ꞌahoganiꞌa ubuga ꞌaheu teite radiunu.
12 Mada ꞌahogano ubuga veḡaniꞌa moga niro, raenaꞌa, 'Mama, ḡae toheḡo zamaḡano einiꞌuma ḡau niduꞌa ꞌai enoꞌi!' Ebu moganiꞌa ane ḡau ubuga ꞌaheu veize aꞌanadu ziniro.
13 Mada nu ḡarugano, ubuga veḡaniꞌa ḡauḡa niduꞌa nuꞌonadu haba faḡa vaḡine onamiro. Ebu eꞌea ani mene faine zamaradu moniḡa au tauḡeꞌenaꞌa niduꞌa modiro.
14 Ani moniḡa niduꞌa mode hauḡirotene, eꞌe habaꞌano zahara boroꞌa buaro ebu ani vinine runiro.
15 Eꞌanoꞌo ani gauoga veize eꞌe habaꞌa vazeḡa ꞌahoga vaḡe onamiro, ebu vazeḡaniꞌa ani haba bohaꞌano aba taufeꞌeteꞌe gauḡa haro.
16 Ani eꞌea vinine runadu ani ura boroꞌe aba ogomu atihi reinu, rehano vaze ꞌahoganiꞌa ogomu ꞌahoga mene haro.
17 Ḡonagano zamaḡaniꞌa bohatanadu ani ane bare reiro, raenaꞌa, 'Eḡe mama veize gaueꞌeteꞌe azaḡaꞌe ogomuze ḡehaḡa bagaḡa, u eꞌe ahama vinihe ruheꞌohe.
18 E mama vaḡe bare onamiꞌuma ebu ꞌahige niꞌuma. “Mama, eꞌe ḡa zu Badiꞌa mazao haḡai sauꞌa haḡaeha.
19 Eꞌanoꞌo e ḡae ubugo rae ago huhoꞌi, rehano ḡae veize gaueꞌeteꞌe azaḡa teige huhoꞌi!”
20 ꞌOuge rae zamaradu ani iḡunadu moga vaḡe bare onamiro.
Ani ize faḡano onairotene, moganiꞌa horoniro. Aniꞌe vetuḡaneadu ani ubuga ꞌuꞌa dure onamiro ebu ahainadu furaꞌiniro.
21 Ubuganiꞌa moga niro, raenaꞌa, 'Mama, eꞌe Badiꞌa zu ḡa mazao haḡai sauꞌa haḡaeha, eꞌanoꞌo e ḡae ubugo rae ago huhoꞌi!'
22 Rehano moganiꞌa tuḡure azaḡa zinaꞌa, 'Dabua manoḡa ḡarihe odohe aradu vidanohanoꞌi! ꞌEvore adiriḡa redohanoꞌi, zu tamaka redohanoꞌi!
23 Ebu boromakau modohuḡa iga reiteꞌe odohe aradu manoꞌi! Eme au matuꞌiꞌhi!
24 Mazaḡa e ubude ꞌahiꞌe rudaro ebu bare ḡabodeha, ani dauḡiro ebu bare horone maha!' Eꞌanoꞌo tuḡure azaḡaniꞌa aniꞌa reiroteꞌe ḡauḡa niduꞌa haḡairo. Ebu mui boro haḡadu zeḡe niduꞌa matue tiburaro.
25 Eꞌe zamaḡano ubuga ibiꞌaniꞌa mebao gaue radiunu. Ani ne uꞌa bare onamadu uhiḡano feurirotene, muie haraoḡa igiro.
26 Ebu ani tuḡure vazeḡa ꞌahoga hunadu naginiꞌa fureranateꞌe ḡadiniro.
27 Tuḡure vazeḡaniꞌa naenaeninaꞌa, 'Negoḡo ani manoḡa bare feureha, eꞌanoꞌo mogoꞌa boromakau modohuḡa iga manadu mui boro haḡaeha.'
28 ꞌOuge reirotene ubuga ibiꞌa ani maḡune rudaro ebu ne zamaḡa diuḡoga mene uratiro.
Ebu moganiꞌa buanadu uminiro, raenaꞌa, 'Ne diuḡadu eḡe teite muio matuiꞌhi!'
29 Rehano aniꞌa naenaeninaꞌa, 'Mama, zamaroꞌi! E muri ḡehaḡa tuḡure vazeḡa teige ḡae veize gauꞌe onaeꞌohe zu ḡae ḡoere mene hezahohaunu. Rehano eꞌe eḡe vazehe duḡuru teite matuꞌu veize ḡaeꞌa gouti ubuga tiba zu mene maro.
30 U ubugo ahaꞌa ubuma ḡezo haḡaiḡano ḡae moni mode hauḡadu ne uꞌa bare onatene, ḡa boromakau modohuḡa iga mano haneha!'
31 Ebu moganiꞌa niro, raenaꞌa, 'Eḡe ubude! Ḡa mada niduꞌa eḡe teite radiuꞌohe, eꞌanoꞌo e ḡau niduꞌaꞌe ḡae veize.
32 U negoḡo aniꞌe rudaro ebu bare ḡabodeha, zu dauḡiro ebu bare horoneha. Eꞌanoꞌo emeḡeꞌa mui haḡadu matuꞌiꞌuma!'”