18
Ḡozobaꞌa Bare Bare Uminiroteꞌe Hari Idaidaḡa
1 Mada ꞌahogano Iesu ane tahiꞌatahiꞌaꞌa kuruo iḡaiḡa kuranoga zu mene ahetoga veize hari ꞌahoga idaniro.
2 Ani raenaꞌa, “Haba ꞌahogano kota ibitohauꞌeteꞌe vazeḡa ꞌahoganiꞌa radiunu. Aniꞌe Badiꞌa mene rihoninu zu vaze mene gubazinu.
3 Eꞌe habaꞌano ḡozoba ꞌahoganiꞌa zuni radiunu. Ani mada niduꞌa bare bare kota ibitohauꞌeteꞌe vazeḡa vaḡe onamadu niro, raenaꞌa, 'Eḡe agire vazeḡaꞌa eḡe mazao haḡairoteꞌe haḡaiḡaꞌe mene duduḡa. Eꞌanoꞌo ḡa ani mazao naginiꞌe haḡai duduḡa ihonoꞌi!'
4 Kota ibitohauꞌeteꞌe vazeḡa ani faḡa hune ḡozoba eꞌe dananoga mene uratiro. Rehano vesuꞌu ani aneꞌa bare raenaꞌa, 'E Badiꞌa mene rihoneꞌohe zu vaze mene gubazeꞌohe.
5 Rehano ḡozoba adaꞌa, e ufeta ḡunuḡuheꞌohe! Eꞌanoꞌo e ani kota abitiꞌuma ebu aniꞌe duduḡa rae niꞌuma. ꞌOuge mene haḡaine, ani bare bare onaadu ihiꞌuma ebu e fuḡofuḡohe ruhiꞌuma!'”
6 Ebu Zuhiꞌa Boroꞌa raenaꞌa, “Kota ibitohauꞌeteꞌe vazeḡa ani zuni mene duduḡa vazeḡa. Rehano aniꞌa nagini raꞌeteꞌe faine abitoꞌi!
7 Badiꞌaꞌe, aneꞌa ohotiroteꞌe azaḡaniꞌa ohere zu madai ani uminine, ani zogone nagini duduḡa raꞌeteꞌe ḡauḡa ziniꞌuma ebu danazogaꞌe mene sasiꞌuma.
8 E ziꞌohe, Badiꞌaꞌa nagini duduḡa raꞌeteꞌe ḡauḡa ḡarihe ziniꞌuma. Rehano eḡe, Vaze Ubuganiꞌa bare onaiꞌuma madaḡano, Badiꞌa mazao fieꞌeteꞌe vaze nu horoziꞌuma ga mene?”
Farisea Vazeḡa zu Takesi Ufeꞌeteꞌe Vazeḡa
9 Iesuꞌa zeḡeꞌa zeḡe bare duduḡa rae raꞌeteꞌe zu vaze edeze ḡahizeꞌeteꞌe azaḡa mazao hari ꞌahoga idaniro.
10 Ani raenaꞌa, “Mada ꞌahogano vaze ꞌaheu, Farisea vazeḡa zu takesi vazeḡaniꞌa kuranoḡa radu kuru neḡa itiro.
11 Ebu Farisea vazeḡaniꞌa edanadu ꞌahige kuraro, raenaꞌa, 'Badiꞌa, manoḡa tauḡi! Mazaḡa eꞌe vaze sauꞌazeta nu, aꞌe ḡonore azaḡa, haḡai sauꞌa azaḡa ebu ubuma ḡezo azaḡa mene heuḡa. Takesi ufeꞌeteꞌe vazeḡa omo zu mene heuḡa!
12 Fura tiba zamaḡano, e ḡae ꞌaheu zaḡozaḡeꞌohe zu eꞌe hideꞌeteꞌe ḡauḡa niduꞌa zamaḡano gaubanana tiba ḡa ḡaneꞌohe.'
13 U takesi vazeḡa ani faḡano edaro. Ani adure ḡoha zu mene ite ehamanadu ꞌuꞌuga faꞌofaꞌoneꞌenaꞌa kuraro, raenaꞌa, 'Badiꞌa, eꞌe sauꞌa vazeḡa, vetuḡahoꞌi!'”
14 Ebu Iesuꞌa raenaꞌa, “E ziꞌohe, Badiꞌaꞌa Farisea vazeḡaꞌe mene duduḡa reiro. Rehano takesi vazeḡa ani duduḡa radu ani neḡa onamiro. Iniu vaze aneꞌa bare niḡa mae itine, Badiꞌaꞌa niḡa mae ovoiꞌuma, rehano iniu vaze aneꞌa bare niḡa mae ovoine, Badiꞌaꞌa niḡa mae itiꞌuma.”
Iesu zu Tahiꞌa Komeꞌa Komeꞌa
(Mataio 19:13-15, Mareko 10:13-16)
15 Mada ꞌahogano vaze nuꞌa zeḡe tahiꞌa komeꞌa komeꞌa tutuze Iesu vaḡe ariro, mazaḡa Iesuꞌa ꞌevoꞌa zeḡe rana touga uratiro. Rehano ani tahiꞌatahiꞌaꞌa tutuze ariroteꞌe azaḡa roziro.
16 Rehano Iesuꞌa tahiꞌa komeꞌa komeꞌa huziro ebu vaze eꞌea zinaꞌa, “Tahiꞌa komeꞌa komeꞌa eḡe vaḡe tuḡuzoꞌi, zu ago gararoꞌi! Mazaḡa Badiꞌaꞌa ibitohauꞌeteꞌe vazeḡaꞌe, tahiꞌa komeꞌakomeꞌa teige Badiꞌa ḡoere igiꞌeteꞌe vazeḡa.
17 E hube hune ziꞌohe. Tahiꞌa komeꞌa teige, iniuꞌa Badiꞌaꞌa ibitohauꞌeteꞌe mene mae ḡihinine, ani Badiꞌaꞌa ani mene ibitohaꞌuma.”
Maꞌora Vazeḡa
(Mataio 19:16-30, Mareko 10:17-31)
18 Iuda azaḡa ibitoziniꞌeteꞌe vazeḡa ꞌahoganiꞌa Iesu ḡadiniro, raenaꞌa, “Ihore vazeḡa manoḡa, e nagini haḡaine ḡabone tuḡutuḡu hidiꞌuma?”
19 Iesuꞌa niro, raenaꞌa, “Ḡa nougadu e manoḡa rae huheꞌohe? Badiꞌa ane daꞌo huga hune manoḡa, u vaze ꞌahogani zu mene hune manoḡa.
20 Rehano ḡa ḡadimu moneo naenaeꞌihi. Mose goro ḡoeꞌa ḡa edeḡa. Aꞌe ꞌahiꞌeꞌe: Ubuma ago ḡezanoꞌi, vaze ago manoꞌi, ago ḡonotanoꞌi, kota zamaḡano ḡoere veꞌoḡa ago ḡoeroꞌi ebu viꞌu mogo gubazoꞌi! Ḡa goro ḡoeꞌa haḡaiḡa ꞌahi hegoteꞌe ga?”
21 Aniꞌa naenaeniro, raenaꞌa, “E komeꞌanonoꞌo ꞌahi ḡauḡa niduꞌa haḡae huneꞌohe.”
22 Iesuꞌa eꞌe igirotene, ani niro, raenaꞌa, “Ḡa ḡau tiba iḡineꞌohe. Ḡauḡo niduꞌa seronadu zahara azaḡa zenoꞌi! ꞌOugine ḡa radone tuḡutuḡu habaꞌano naeḡa meꞌuma. Ebu aradu eḡe hegotoꞌi!”
23 Aniꞌa Iesu ḡoere igirotene, zamaḡaniꞌa adudu bororaro, mazaḡa aniꞌe ufeta maꞌora vazeḡa ꞌahine.
24 Ebu Iesuꞌa vaze ꞌeꞌe horonadu niro, raenaꞌa, “Maꞌora azaḡaꞌe Badiꞌaꞌa ibitohauꞌeteꞌe vazeḡa rougaꞌe riḡa bagaḡa.
25 Kameroꞌe niduru hoꞌoga diuḡogaꞌe riḡa. Rehano maꞌora vazeḡaꞌe Badiꞌaꞌa ibitohauꞌeteꞌe vazeḡa rougaꞌe ufeta riḡa.”
26 Eꞌe igiroteꞌe azaḡaniꞌa raenaꞌa, “ꞌOugine iniuꞌa daꞌo ḡabone hidiꞌuma?”
27 Iesuꞌa naenaezinaꞌa, “Vazeꞌa haḡaoga mene idaḡa ḡauḡaꞌe, Badiꞌaꞌa haḡaoga idaḡa.”
28 Ebu Peteroꞌa niro, raenaꞌa, “Eme ḡau niduꞌa modadu ḡa ḡaruna hegoteꞌohe.”
29 Iesuꞌa zinaꞌa, “E hube hune ziꞌohe. Vaze ꞌahoganiꞌa Badiꞌaꞌa ibitohauꞌeteꞌe veize, neḡa, inuga, negoḡa, viꞌa moga ga tahiꞌaḡa mode iḡunine,
30 izidi madaḡano ani naeḡa ḡae ḡehaḡa hidiꞌuma, zu zama moneo ḡabone tuḡutuḡu meꞌuma.”
Iesuꞌa Ane Rune Bare Ḡoꞌaniro
(Mataio 20:17-19, Mareko 10:32-34)
31 Ebu Iesuꞌa ane tahiꞌatahiꞌa 12 nuꞌozadu ziro, raenaꞌa, “Zae edeḡa eme Ierusalema habaꞌa iteꞌohe. Eꞌea feurine, peroveta azaḡaniꞌa eḡe, Vaze Ubuga, moneo mirihiroteꞌe ḡauḡaniꞌa hudaꞌuma.
32 Eꞌe Roma azaḡa evora riꞌihiꞌuma. Ebu zeꞌa ḡirihohiꞌuma, mazagarohiꞌuma zu eḡe rana soꞌabidiꞌuma.
33 Ebu masihiꞌuma zu uḡuhiꞌuma, rehano mada uḡiduḡano bare ḡabode iḡuniꞌuma.”
34 Rehano ani ḡoere hugaꞌe ꞌuꞌuruḡa ꞌahine, Iesu tahiꞌatahiꞌaꞌe aniꞌa ziroteꞌe goeꞌa huga mene ederiro.
Iesuꞌa Ubumaḡa Kuruḡa Vazeḡa Fainiro
(Mataio 20:29-34, Mareko 10:46-52)
35 Iesuꞌe Ieriko habaꞌa hanitiro. Eꞌea ubuma kuruḡa vazeḡa ꞌahogaꞌe ibi genaḡano ehoradu vaze mazao moni umidinu.
36 Ani vaze ḡuḡuvaḡaniꞌa harae vitauꞌeteꞌe egadu naginiꞌa fureruꞌeteꞌe ḡadimaro.
37 Zeꞌa ninaꞌa, “Iesu Nazareta vazeḡaniꞌa vitauꞌohe.”
38 Zeꞌa ꞌouge nirotene, ani huau iḡuniro, raenaꞌa, “Iesu, Davida mariga vazeḡa, eḡe vetuḡahoꞌi!”
39 Ebu ibiteꞌeteꞌe azaḡaniꞌa riḡa ḡoreniro. “Ḡa sifu radoꞌi!” Rehano ani ḡihau baḡaga huaunaꞌa, “Davida mariga vazeḡa, eḡe vetuḡahoꞌ!”
40 Iesu ani eꞌe igirotene, tue edanadu ebu zinaꞌa, “Ohoze eꞌe tutune aroꞌi!”
41 Ubuma kuru vazeḡaniꞌa aradu Iesuꞌa ḡadiniro, raenaꞌa, “Ḡa egeꞌa ḡa veize nagini haḡaoga urateꞌohe?” Aniꞌa naenaeninaꞌa, “Zuhiꞌa Boro, e ehamatihi!”
42 Iesuꞌa niro, raenaꞌa, “Nugo ehamanoꞌi! Mazaḡa ḡaeꞌa eḡe mazao fieꞌeteꞌeꞌa manoꞌeha.”
43 Ebu vaze eꞌe ubumaḡaꞌe zogone manoradu ehamu idararo zu Badiꞌa niguneꞌenaꞌa, Iesu ḡaruna hegotiro. Vaze niduꞌa eꞌe horonirotene, zeḡe zuni Badiꞌa niguniro.