4
Sataniaꞌa Iesu Tuhune Nuriro
(Mataio 4:1-11, Mareko 1:12-13)
1 Iesuꞌe Ioridana vuḡa mode iḡunirotene, Vine Zaḡoḡani'a ane rana inare hune radadu haba boha'a tutune onamiro.
2 E'ea, mada 40 zamaḡano Sataniꞌa Iesu tuhune nuriro. E'e madaḡano ani ogomu 'ahoga mene aro, eꞌanoꞌo mada ḡonagano ani vinine runiro.
3 Ebu Satani'a Iesu niro, raena'a, “Ḡaꞌe Badi'a ubuga ro'idene, hadi ꞌadi neadu ḡihune beredio noꞌi!”
4 Iesu'a naenaenina'a, “Mene! Buka Zaḡoḡano raenaꞌa, 'Vaze'e beredio da'o mene ḡabode radi'uma. Rehano vine ogomuḡano zuni radiꞌuma.'”
5 Ebu Satani'a Iesu tutunadu hitaga haba'a itadu zogone vaze'a ibitohauꞌeteꞌe haba'a boroboro niduꞌa ihoniro.
6 Ebu aniꞌa nina'a, “Eḡeꞌa ḡaꞌe haba boroboro deꞌe ibito ha'uma gigi'aḡa zu manohuga nidu'a ḡani'uma. Aꞌe eḡe enoga ḡauḡa 'ahine, eḡe'a urateꞌeteꞌe vaze hau tauḡoga zuni idaḡa daꞌo.
7 E'ano'o ḡa e mazao kuraune, de'e nidu'a ḡae ḡaniꞌuma!”
8 Ebu Iesu'a naenaenina'a, “Mene! Buka Zaḡoḡano raenaꞌa,
'Zuhiꞌa Boro ḡae Badi'a mazao da'o kurano hano'i, zu ane gau daꞌo haḡaoꞌi!'”
9 Ebu Satani'a zamahanadu Ierusalema habaꞌa onamiro. Ebu kuru neḡa hitaga huneo ohonadu niro, raenaꞌa, “Ḡa Badi'a ubuga ro'idene adaꞌono'o rafato'i!
10 Mazaḡa Buka Zaḡoḡano raenaꞌa,
'Badi'aꞌa dugu'oga veize aneruḡa tuḡuziꞌuma.
11 Ze'a ꞌevoreze hina mae ḡihi'i'uma ꞌahine, ḡae odaꞌe hadio mene tutuhaꞌuma.'”
12 Rehano Iesu'a naenaeniro. “Mene! Buka Zaḡoḡano raenaꞌa, 'Zuhiꞌa Boro ḡae Badi'a ago tuhuno'i!'”
13 Ebu Sataniꞌe Iesu tuhune hauḡirotene, mada manoḡa 'ahoganobu'u bare tuhuniꞌuma radu mode iḡuniro.
Iesuꞌa Galilea Habaꞌano Ihoziro
(Mataio 4:12-17, Mareko 1:14-15)
14 Iesuꞌe Vine Zaḡoḡa gigi'aḡani'a iri'avonadu bare Galilea habaꞌa onamiro. Ebu ane hariꞌe haba nidu'a zamaḡano bororaro.
15 Aniꞌa nuꞌonuꞌo neḡano ihozido ebu zeḡe nidu'aꞌe ani niguniro.
Nazareta Azaḡaniꞌa Iesu Hezahoharo
(Mataio 13:53-58, Mareko 6:1-6)
16 Ebu Iesuꞌe Nazareta neḡa onamiro. Eꞌe Neḡaꞌe ane'a bororarote'e habaꞌa. Bana Madaḡano ane'a iḡaiḡa haḡainute teige, nuꞌonuꞌo neḡano diuḡi onamiro. Ebu Buka Zaḡoḡa meꞌodoga radu iḡune edaro.
17 Iḡune edarotene kuru neḡa ḡianeꞌeteꞌe vazeḡaniꞌa Isaia perovetaꞌa mirihiroteꞌe bukaḡa mae haro. Ebu aniꞌa vavaꞌadu meꞌodiꞌuma habaꞌa horoniro. Aꞌe ꞌahige rae mirihiro.
18 “Zuhiꞌa Boro Vigaꞌe eḡe rana reiro. Zahara azaḡa mazao hari manoḡa haramoga veize aniꞌa eḡe ohotiro.
Ebu Sauꞌaniꞌa batuziroteꞌe azaḡa fuhiꞌe ahetiꞌuma, ubuma kuru azaḡaniꞌa ehamaꞌuma zu aduḡaniꞌa ḡahiziroteꞌe azaḡaꞌe ahete modiꞌuma', rae furenoga veize, Badiꞌaꞌa eḡe tuḡuhiro.
19 Ebu zuni Zuhiꞌa Boroꞌa ane vaze ḡabozeꞌeteꞌe madaḡa momeo furenoga radu tuḡuhiro.”
20 Iesuꞌa buka meꞌode hauḡirotene buka ꞌuadu mae haroteꞌe vazeḡa bare haro ebu ehoriro. Nuꞌonuꞌo neḡa zamaḡano vaze niduꞌa ani ḡiaḡianiro.
21 Ebu Iesuꞌa ḡadaheni ziro, raenaꞌa, “Zaꞌa egateꞌe Buka Zaḡoḡano ḡoeꞌa eꞌe ꞌai izidi ꞌada hudaneha.”
22 Zeḡe niduꞌa ani mae ḡihine ḡoeriro zu ani hebeonoꞌo buaudoteꞌe ḡoeꞌa manoḡa egadu zaguzagaro. Rehano, ze raenaꞌa, “Aniꞌe Iosefa ubuga! Emeꞌe ani ḡoere mene igiꞌuma.”
23 Ebu Iesuꞌa ziro. “E edeḡa zaꞌe eḡe mazao ḡoere ꞌahi raꞌohe, raenaꞌa, 'Gohe vazeḡa, ibite ḡaeꞌa ugiḡo fainoꞌi, ebu vaze ꞌahoga ugi fainoꞌi!' Ebu raenaꞌa, 'Iesu, ḡa Kaperanauma neḡano haḡai gigiꞌa haḡairoteꞌe teige, ḡae haba ꞌadao zuni haḡaoꞌi! ꞌOugine, emeḡeꞌa ḡae ḡoereꞌe mae ḡihiniꞌuma.'
24 E hube hune ziꞌohe. Zaeꞌa eḡe ḡoere mene mae ḡihineꞌeteꞌe teige, peroveta azaḡa zuni zeḡe habao vazeꞌa mene mae ḡihizeꞌohe.
25 Rehano zamaroꞌi! Peroveta vazeḡa niḡa Elia madaḡano, muri uḡidu zu ḡahaꞌa zamaḡano iruguꞌa mene ruꞌaro, eꞌanoꞌo Isaraela habaꞌa niduꞌa zamaḡano zahara boroꞌa buaro. Eꞌe madaḡano ḡozoba ḡehaḡaꞌe Isaraela habaꞌano radiunu.
26 Rehano Elia'e Badiꞌa'a Isaraela ḡozoba azaḡa mazao mene tuḡuniro. Aniꞌe Sidoni haba'a uhiḡano ne 'ahoga niḡa Zarepatio radiunuteꞌe ḡozobaḡa 'ahoga mazao tuḡuniro. Zarepati neḡaꞌe mene Isaraela habaꞌa
27 Ebu peroveta vazeḡa niḡa Elisa madaḡano Isaraela habaꞌano lefera azaḡa ḡehaḡaniꞌa radiunu, rehano ze mene dehene faiziro. U Siria habaꞌa vazeḡa niḡa Na'amani da'o dehene fainiro. Siria habaꞌa zu mene Isaraela habaꞌa. Eḡe zuni adama haḡai gigiꞌa mene haḡaiꞌuma, rehano ne ꞌahoga vaḡe onamiꞌuma, mazaḡa zaꞌe mene mae ḡihiheꞌohe.”
28 Iesuꞌa ꞌouge reirotene, nu'onu'o neḡa zamaḡano vaze nidu'a maḡune rudaro.
29 Zeḡe nidu'a iḡunadu, e'e haba'anono'o ani tuḡune vaḡiniro. Ebu dofarao duine feunoga radu, neze ogorarote'e haba'a hitaga tutune itiro.
30 Rehano Iesuꞌa vaze ḡunuḡano onamadu ane edeḡano dauḡiro.
Iesu'a Vine Sau'a Hegone Buniro
(Mareko 1:21-28)
31 Ebu Iesuꞌa Galilea haba'ano Kaperanauma neḡa ovoadu Bana Madaḡano nuꞌonuꞌo neḡano vaze ihoziro.
32 Vaze nidu'a aniꞌa ihozoga igirotene zaguzagaro, mazaḡa ani ḡoere'e gigi'a, Badiꞌa ḡoere heuḡa.
33 Bana Madaḡa 'ahogano vine sau'aḡeta vazeḡa ꞌahogaꞌe nu'onu'o neḡano radiro. Aniꞌa hounaꞌiro, raenaꞌa,
34 “Iesu Nazareta vazeḡa! Eme ago ḡunuḡunuꞌoꞌi! Ḡa eme ruifoga radu arahehe? Ḡa iniuꞌe e edeḡa. Ḡa'e Badi'a vaze zaḡoḡa!”
35 Iesu'a vine sau'a taꞌiroharo, raena'a, “Hezo'a! Vaze e'e mazaono'o buanoi!” Ebu vine sau'ani'a zeḡe nidu'a boꞌaḡano vaze e'e mae rahao higonadu buau dauḡiro. Rehano vaze a'e mene omatiro.
36 Vaze nidu'a zaguzagaro ebu zeḡe zeḡe'a bare raenaꞌa, “Ani ḡoereꞌe nagiḡa? Aniꞌa inaraḡa zu gigiꞌaḡa hina vine sauꞌa zeatene ze egohanadu buaneha!”
37 Ebu Iesu hariḡaꞌe uhiḡa uhiḡa haba'a niduꞌa bororaro.
Vaze Ḡehaḡa Faiziro
(Mataio 8:14-17, Mareko 1:29-34)
38 Iesu'e nu'onu'o neḡa modadu Simona ne onamiro. De'ea Simona emoḡa roḡaeḡaꞌe ahiꞌaniꞌa gigine runiro, eꞌanoꞌo ani fainoga veize vazeꞌa Iesu uminiro.
39 Ebu Iesuꞌe ani uhiḡano edanadu ahiꞌa gigiꞌa eꞌe ḡoere riga hina hegone buniro. ꞌOugadu ugi e'e'a ani mazaonoꞌo vaḡiniro. Ebu Simona emoḡaniꞌa zogone iḡunadu zeḡe veize ogomu ḡorohe ziniro.
40 Ebu mada'a ovoe'eteꞌe zamaḡano, vazevaze'a ugi iraḡa nunu Iesu vaḡe tutuze onamiro, ebu Iesuꞌa evo'a zeḡe tiba tiba rana teadu manore hauḡiro.
41 Vine sau'a sau'aꞌe Iesuꞌe Keriso rae ederiroteꞌe uꞌano, ze vazevaze mazaonoꞌo buarotene, huaro, raenaꞌa, “Iesu, ḡa'e Badi'a ubuga!” Rehano Iesuꞌe, zeꞌa ani rae furenoga mene uratiro, eꞌanoꞌo ani'a tairo zenadu ḡoereze gararoziro.
Iesuꞌa Harame Ragaviro
(Mareko 1:35-39)
42 Oherebau uzeuze Iesuꞌe ane daꞌo radoga radu vaze oꞌoꞌa habaꞌa onamiro. U vaze ḡuḡuvaḡaniꞌa Iesu vaḡe onaadu mene muhize iḡunoga veize uminiro.
43 Rehano Iesuꞌa ziro, raenaꞌa, “Eꞌe haba ꞌahoga ꞌahogano zuni Badiꞌaꞌa ibitohauꞌeteꞌe habaꞌa hariḡa manoḡa haramiꞌuma, mazaḡa deꞌe uꞌano, eḡe tuḡuhiro.”
44 Ebu ani Iudea habaꞌano nuꞌonuꞌo neḡano harame ragaviro.