7
Uti Azaḡa Ḡihiꞌaꞌa Iesu mazao Firo
(Mataio 8:5-13, Ioane 4:43-54)
1 Iesu ani vazevaze veize eꞌe ḡoeꞌa niduꞌa rae hauḡiroteꞌe enogano, ani ane tahiꞌatahiꞌa teite Kaperanauma neḡa onamiro.
2 Eꞌea Roma uti azaḡa ḡihiꞌa ꞌahoganiꞌa radiunu. Aneꞌa borofe vetuḡaniꞌeteꞌe tuḡureḡa vazeḡaꞌe ugine sausaunadu nariga rudaro.
3 Uti azaḡa ḡihiꞌaꞌe Iesu hariḡa igirotene, Iesuꞌa onaadu ane tuḡure vazeḡa faine ḡabonoga uratiro. Eꞌanoꞌo ani Iuda vaze boroboroꞌa Iesu uminoga veize tuḡuziro.
4-5 Ebu zeꞌe Iesu mazao feuri aradu, zamaze niduꞌa hina uminiro, raenaꞌa, “Uti azaḡa ḡihiꞌa ani manoḡa tauḡi! Mazaḡa ani eme vetuḡafeꞌohe ebu eme veize nuꞌonuꞌo neḡa ogoraro. Ḡa ani dananine manoḡa!”
6 Eꞌanoꞌo Iesuꞌe zeḡe teite uti azaḡa ḡihiꞌa ne onamiro.
Ze ani ne uhigano feurirotene, uti azaḡa ḡihiꞌaꞌa ane vaze nu Iesu vaḡe tuḡuziro. Ebu zeꞌa Iesu mazao aradu niro, raenaꞌa, “Uti azaḡa ḡihiꞌaꞌe ꞌahige raha. 'Zuhia Boro, ḡa e neo diuḡoga rae ago zamaroꞌi, mazaḡa eꞌe mene vaze manoḡa.
7 Eꞌanoꞌo ḡa vaḡe mene ameha. Ḡoere daꞌo roꞌi! ꞌOugine eḡe tuḡure vazeḡaniꞌa manoriꞌuma.
8 Mazaḡa eꞌe vaze ꞌahoga ꞌuꞌuḡano gaueꞌohe, zu uti azaḡa eḡe ꞌuꞌuḡano gaueꞌohe. Eḡeꞌa vaze ꞌahi ninaꞌa, 'Onamoꞌi!' reine, aniꞌe onameꞌohe, ebu ꞌahoga omo ninaꞌa, 'Aroꞌi!' reine, aniꞌe areꞌohe. Eḡeꞌa tuḡure vazeḡa ꞌahoga ninaꞌa, 'ꞌAdi haḡaoꞌi!' reine, aniꞌe haḡaeꞌohe.”
9 Iesuꞌa eꞌe ḡoeꞌa igirotene, ani zaguzagaro. Ebu ani vaetadu ane hegotiroteꞌe azaḡa ziro, raena, “Eḡeꞌa ziꞌohe. Badiꞌa mazao ꞌahige fie gigaruꞌeteꞌe vazeḡaꞌe Isaraela azaḡa zamaḡano ize mene horoneha!”
10 Ebu ze bare uti azaḡa ḡihiꞌa ne onamirotene tuḡure vazeḡaꞌe manoroga haniniro.
Iesuꞌa Ḡozoba Ubuḡa Runeꞌonoꞌo Ḡaboniro
11 Eꞌe enogano, Iesuꞌa ne ꞌahoga niḡa Naina onamiro. Ane tahiꞌatahiꞌa zu vaze ḡehaḡaniꞌa ani ḡatiniro.
12 Ebu ze onamadu ne ḡutuꞌaḡano feurirotene, ne azaḡaꞌe rune vazeḡa herate buni ariro. Aꞌe ḡozoba ꞌahoḡa ubuḡa. Ani tibuhuga eꞌe daꞌo fureniro. Ne azaḡa ḡehaḡa zuni ḡozoba eꞌe teite ariro.
13 Iesuꞌa ḡozoba eꞌe horonirotene, ani vetuḡaniro, ebu ninaꞌa, “Ago nianoi!”
14 Iesuꞌa ꞌouge rae neadu mauḡa heratiroteꞌe azaḡa vaḡe onamadu mauḡa obonirotene ze tue edaro. Ebu ani raenaꞌa, “Ene iziga, eḡeꞌa ḡaꞌohe. Iḡunoꞌi!”
15 ꞌOuge rae nirotene, rune vazeḡaniꞌa iḡune ehoradu ḡoeꞌa ḡadaheniro! Ebu Iesuꞌa bare viꞌa ꞌevoreo modiro.
16 Zeḡe niduꞌa rihau rudaro zu Badia matuo haro, raenaꞌa, “Peroveta boroꞌa eme boꞌaḡano fureraneha! Badiꞌaꞌa ane vaze, emeḡe danafeha!”
17 Ebu Iesuꞌa nagini haḡairoteꞌe hariḡaniꞌa Iuda habaꞌa ebu uhiḡa habaꞌa niduꞌano bororaro.
Iesu zu Ioane Babatiso
(Mataio 11:2-19)
18 Ioane Babatisoꞌe ḡuꞌa neḡano radiuteꞌe zamaḡano tahiꞌaḡaniꞌa ane vaḡe onamadu Iesuꞌa haḡairoteꞌe hariḡa niduꞌa meꞌodo haro. Ebu Ioaneꞌa ane tahiꞌa ꞌaheu huze onaadu ziro.
19 “Zuhiꞌa Boro Iesu vaḡe onamadu ꞌahige ḡadinoꞌi, 'Onaiꞌuma raꞌeteꞌe vazeḡa Kerisoꞌe ḡahe ga eme vaze ꞌahoga guhiniꞌuma?'”
20 Ebu zeꞌe Iesu mazao feurirotene, ani niro, raenaꞌa, “Ioane Babatisoꞌa ḡadinoga veize eme tuḡufeha. Ani raenaꞌa, 'Onaiꞌuma raꞌeteꞌe vazeḡa Kerisoꞌe ḡahe ga eme vaze ꞌahoga guhiniꞌuma?'”
21 Eꞌe madaḡano Iesuꞌa ugi nunu meiroteꞌe vazeḡa ḡehaḡa faiziro, vine sauꞌa sauꞌa hegoze buziro ebu ubuma kuru azaḡa ḡehaḡa bare ehamanoga radu faiziro.
22 Eꞌanoꞌo Iesu ani vaze ꞌaheu eꞌe naenaeziro, raeaꞌa, “Bare onamadu zaꞌe nagini horonateꞌe zu egateꞌe moneo Ioane ihonoꞌi! Ubuma kuru azaḡaꞌe ehamuꞌohe, oda sauꞌa azaḡaꞌe edauꞌohe, lefera azaḡaꞌe manore deheruꞌohe, teḡaze uhuḡa azaḡaꞌe igiꞌohe zu rune azaḡaꞌe bare ḡabozeꞌohe. Ebu zahara azaḡa hari manoḡa haramo ziniꞌohe.
23 Eḡe mazao fi mene modeꞌeteꞌe vazeḡaꞌe manohuga hidiꞌuma!”
24 Ioaneꞌa tuḡuziroteꞌe azaḡaniꞌa iḡunirotene, Iesuꞌa Ioane moneo vaze ḡuḡuvaḡa ziro, raenaꞌa, “Za vaze nagiḡa horonoga veize haba bohaꞌa onamiro? Zavaraꞌa imi veḡa hudi naeninaeniꞌeteꞌe horonoga radu onamirohe? Mene!
25 ꞌOugadu za vaze nagiḡa horonoga veize onamiro? Naeḡa boro dabuaḡa vidauꞌeteꞌe vazeḡahe? Mene! Dabua manomano vidauꞌeteꞌe zu ḡau manomanoḡeta radiuꞌeteꞌe vazeḡaꞌe kini neo radiuꞌohe.
26 ꞌOugadu vaze nagiḡa horonoga veize onamiro? Peroveta vazeḡahe? Oꞌe! Eḡeꞌa ziꞌohe. Peroveta azaḡa niduꞌa vitizeꞌeteꞌe vazeḡaꞌe Ioane.
27 Ioane moneo Buka Zaḡoḡano ꞌahige mirihiro, raenaꞌa
'Ḡianoꞌi! Badiꞌaꞌa ḡae zamao vaze ꞌahoga ibite tuḡuniꞌuma.
Aniꞌe ḡae zamao ḡae ibi ruhibiꞌuma.'
28 Ioaneꞌa Keriso ibi ruhibiroteꞌe uꞌano, aniꞌe rahao ꞌada radiuꞌeteꞌe vazeḡa boꞌaḡano vaze niduꞌa vitineꞌohe. Rehano, Badiꞌaꞌa ibitoziniꞌeteꞌe zamaḡano ḡonaga vazeḡa zu Ioane vitineꞌohe.”
29 Ebu Iesu ḡoere igiroteꞌe azaḡa niduꞌa zu takesi azaḡa raenaꞌa, “Hube, Badiꞌa haḡaeꞌeteꞌe ibiꞌaꞌe duduḡa!”, mazaḡa zeꞌe Ioaneꞌa bapatizozadu ḡihuriro.
30 U Farisea azaḡa zu Mose goro ḡoeꞌa ihozeꞌeteꞌe azaḡaꞌe Ioane bapatizo hezaho hanadu mene ḡihuriro. ꞌOugadu zeḡe veize Badiꞌaꞌa urateꞌeteꞌe haḡaiḡa zu hezaho haro.
31 Iesuꞌa bare raenaꞌa, “Izidi azaḡaꞌe naginio idaziꞌuma? Ze iniu heuḡa?
32 Zeꞌe tahiꞌa komeꞌa komeꞌaniꞌa ne hunio ehoradu araheꞌeteꞌe heuḡa. Ze rovonadu none tahiꞌaḡaniꞌa mone tahiꞌaḡa mazao harae huhuꞌuhiꞌenaꞌa,
'Eme muio zavonoga radu suraꞌi hodeha, rehano za mene zavoneha.
Ebu eme rune habaꞌano niau ḡoinaheha, rehano za mene nianeha.'
33 Ioane bapatizoꞌa onaadu ogomu mene audo zu vaini vuḡa mene gagido. ꞌOugadu za rae modiro, raenaꞌa, 'Ioaneꞌe vine sauꞌaḡeta.'
34 U eḡe, Vaze Ubugaꞌe onaadu ogomu auꞌohe ebu vaini vuḡa gageꞌohe. Rehano za e rae modeꞌohe, raenaꞌa, 'Aniꞌe ogomu fuꞌa zu vaini vuḡa fuꞌa. Ebu ani takesi azaḡa zu haḡai sauꞌa azaḡa teite tiburuꞌohe.'
35 Rehano Badiꞌa hegoteꞌeteꞌe azaḡa huhuzaḡaꞌe eḡe zu Ioaneꞌe duduḡa rae reꞌuma.”
Haḡai Sauꞌa Roḡaeḡaniꞌa Iesu Rana Dehoro Beꞌuniro
36 Mada ꞌahogano Farisea vazeḡa ꞌahoga niḡa Simonaꞌa Iesu ane teite oganoga veize huniro. Ebu Iesu ani Farisea vazeḡa ne onamadu ogaꞌuma habaꞌano taviro.
37 Eꞌe habaꞌanoꞌe haḡai sauꞌa haḡainuteꞌe roḡaeḡa ꞌahoganiꞌa radiunu. Aniꞌe Iesuꞌa Farisea vazeḡa neo ogaueteꞌe ederirotene, dehoro hohoga manoḡa naeḡa boro bio komeꞌa manohuga irivaꞌonadu mae onamiro.
38 Ebu roḡaeꞌa ne diuḡadu Iesu ḡaruḡa onamadu niauꞌenaꞌa, odaḡa babaḡano ḡuḡuriro. Ebu niḡa vuḡaniꞌa Iesu oda rana sore buanadu abune vanirotene, iguḡa hina odaḡa zauhe iminiro. Ebu gubaneꞌenaꞌa, odaḡa furaꞌinadu dehoro beuꞌiro.
39 Iesu oganoga radu huniroteꞌe Farisea vazeḡa Simonaꞌa roḡae eꞌeꞌa ꞌouge haḡairoteꞌe horonirotene, ani ane zamao zamariro, raenaꞌa, “Vaze ꞌadiꞌe peroveta vazeḡa reine, ani roḡae nagiḡaniꞌa oboneꞌetaꞌe ederiꞌuma. Ebu roḡae ꞌahiꞌe sauꞌa rae ederiꞌuma!”
40 Ebu Iesuꞌa niro, raenaꞌa, “Simona, e hari ꞌahoga ḡeꞌuma.” Simonaꞌa ninaꞌa, “Ihore vazeḡa, ehoꞌi!”
41 Ebu Iesuꞌa hari meꞌodo haro, raenaꞌa, “Vaze ꞌaheuꞌa vaze ꞌahoḡa mazao moni gezo madu bare haꞌuma reiro. ꞌAhoganiꞌa moni 500 meiro, aꞌe 500 mada gauḡa moniḡa. U ꞌahoḡaniꞌaꞌe moni 50 meiro, aꞌe 50 mada gauḡa moniḡa.
42 Ebu vaze ꞌaheuꞌe moni vazeḡa mazao moni baronoga mene idararo, eꞌanoꞌo moni vazeḡaniꞌa zinaꞌa, 'Ahiga, ago baronoꞌi!'”
Iesuꞌa hari eꞌe hauḡirotene, Simona ḡadiniro, raenaꞌa, “ꞌOugine, anianine boꞌaḡanoꞌe iniuꞌa moni vazeḡa mazao ufeta zamare borofiꞌuma?”
43 Simonaꞌa naenaeniro. “E zamarone, vaze moni 500 madu moni vazeḡaniꞌa ḡararo haroteꞌe vazeḡa.” Ebu Iesuꞌa ninaꞌa, “Ḡa naenaeꞌe duduga.”
44 Ebu Iesuꞌa roḡae tehe ḡianadu Simona niro, raenaꞌa, “Ḡa roḡae ꞌadaꞌa eḡe mazao haḡateꞌe horonahe? E ḡa ne diuḡatene, ḡaꞌe odahe vuzuꞌoga veize vu mene eneha. Rehano roḡae ꞌahiꞌe eḡe oda ani ni vuḡa hina abunadu iguḡa hina zauhe imineha.
45 Ḡaꞌe mene gubahe furaꞌiheha, rehano roḡae ꞌahiꞌe eḡeꞌa diuḡi arateꞌeꞌanoꞌo odahe mene riꞌiriꞌi furaꞌineha.
46 Ḡaꞌe vadiniheo dehoro mene beuꞌeha, rehano aniꞌa e odao dehoro hohoga manoḡa beuꞌeha.
47 Eꞌanoꞌo eḡeꞌa ḡaꞌohe. Moni 500 madu moni vazeḡaꞌa ḡararo haroteꞌe vazeḡa teige, roḡae ꞌahiꞌe ane sauꞌa ḡehaḡa ꞌai rae modeha, eꞌanoꞌo ani eḡe zamare borofadu ꞌouge haḡaeha. Rehano moni 50 madu moni vazeḡaꞌa ḡararo haroteꞌe vazeḡa teige, sauꞌa ufiḡa haḡaeꞌeteꞌe vazeḡaꞌe ane sauꞌa tahife rae modiꞌuma ebu e tahife zamariꞌuma.”
48 Ebu Iesuꞌa roḡae ninaꞌa, “Ḡa sauꞌa ꞌai rae modeha.”
49 ꞌOugirotene, Iesu teite ogaroteꞌe azaḡaꞌe zamariro, raenaꞌa, “ꞌAhiꞌe iniu? Ani vaze sauꞌa zuni rae modehehe?”
50 Ebu Iesuꞌa roḡae niro. “Ḡaꞌe eḡe mae ḡihiheha, eꞌanoꞌo ḡae sauꞌanonoꞌo ḡabodeha. Zamaḡo roḡenadu onamoꞌi!”