12
|iVaini|r* mebaḡa ḡianeꞌeteꞌe azaḡa hariḡa idaidaḡa
(Mataio 21:33-46, Luka 20:9-19)
1 Iesuꞌa hari idaidaḡa hina ḡoreziro. 'Vaze ꞌahoganiꞌa |ivaini|r mebaḡa ḡoraro, ebu hadi ḡabiriḡa meraro. |iVaini|r maḡa edene gigeꞌeteꞌe iduḡa hadi rana huꞌiro. Ehamuꞌeteꞌe taruhaḡa hitanao hadi hina haḡairo. Ebu eꞌe mebaḡa, meba ḡianeꞌeteꞌe azaḡa ziniro, ane veize gauoga veize. Ebu avoꞌa habaꞌa onamiro.
2 |iVaini|r maḡa hiriveꞌeteꞌe madaḡa feurirotene, tuḡure vazeḡa meba ḡianeꞌeteꞌe azaḡa vaḡe tuḡune onamiro, |ivaini|r maḡa nu mouga veize.
3 Rehano zeꞌa obone teadu bouniro, ebuni evoꞌa isoḡa tuḡune baroniro.
4 Tuḡure vazeḡa ꞌahoga hena bare tuḡuniro. Rehano zeꞌa vadigano maro, ebu mazagarone runiro.
5 Hena ꞌahoga tuḡuniro, rehano mau runiro. Vaze ḡehaḡa zuni tuḡuziro, rehano nu bouziro, nu zimi ruziro.
6 Ane mazao ize tiba daꞌoꞌeꞌe, ane ubuga zamarone. Ḡonagano, ani tuḡuneꞌenaꞌa, ꞌahige reiro. 'Ani eḡe ubude ꞌahine, ḡoeꞌa egohaꞌuma.'
7 Rehano aniꞌa feurirotene, meba ḡianeꞌeteꞌe azaḡaniꞌa neneḡaneꞌenaꞌa, ꞌahige reiro. 'Tahiꞌa ꞌadiꞌe meba vazeḡa iḡuꞌa meꞌuma vazeḡa. Aro matihi! Mebaḡaꞌe emeḡeꞌa meꞌuma.'
8 Ebu zeꞌa obone teadu, mau runiro, ebuni |ivaini|r mebaḡa enogano modiro.
9 |iVaini|r mebaḡa vazeḡaꞌe nagini nougiꞌuma? Aniꞌe onaadu, meba ḡianeꞌeteꞌe azaḡa zimi hauḡiꞌuma. Ebuni |ivaini|r mebaḡa vaze ꞌahoga ꞌahoga ziniꞌuma.
10 Za buka zaḡoḡa zamaḡano, ꞌahige tiroteꞌe ḡoeꞌaꞌe meꞌodiro ga?
“Ne ogoruꞌeteꞌe azaḡaniꞌa mene uratadu, mae modiroteꞌe hadiḡaniꞌe, gauḡa boro hadiḡa reꞌuma.
11 ꞌAdiꞌe Zuhiꞌa Boroꞌa haḡairoteꞌe haḡaiḡa. Emeḡeꞌa ḡianeꞌetene, manoḡa tauḡi.'
12 Iesu teite ḡoeriroteꞌe azaḡaniꞌa, hari idaidaḡa ꞌahiꞌe zeḡe veize reiroteꞌe ederirotene, ze ura Iesu obone tihi reiro. Rehano vaze ḡuḡuvaḡa rihoziro. Eꞌanoꞌo Iesu modadu onamiro.
Roma zuhiꞌaḡa ani |itakisi moni|rḡa
(Mataio 22:15-22, Luka 20:20-26)
13 Iudea vaze boro boroꞌa, Farisea azaḡa zu Heroda teite rauꞌeteꞌe azaḡa Iesu mazao tuḡuziro, ane ḡoere ḡonaga egoga raduni.
14 Ze ani vaḡe onairo, ebu ꞌahige reiro. 'Ihore vazeḡa, eme edeḡa, ḡaꞌe huga daꞌo raꞌeteꞌe vazeḡa, zuni vaze mazao mene rihauꞌeteꞌe vazeḡa. Mazaḡa ḡa vaze tohe mene ḡianeꞌeteꞌe vazeḡa. Rehano ḡoere huga hina Badiꞌa ibi ihofeꞌohe. Eꞌanoꞌo ḡadimuꞌohe. Roma zuhiꞌaḡa |itakesi moni|rḡa haune, idaḡa ga mene? Eme |itakesi|r naeḡa haꞌuma ga mene?'
15 Rehano Iesu ani edeḡa, ze zamaze nufe zamariro. Zeḡe ḡoere teite mene idaḡa. Ebu ꞌahige reiro. 'Za nougadu soꞌohihi raꞌohe? |iMoni|r hadiḡa odohe aroꞌi, eḡe ḡianifine.'
16 Ze tiba odohe ariro. Iesuꞌa madu ḡadiziro. 'Iniu vine ebu iniu ni ꞌahiꞌeꞌe?' Zeḡeꞌa naenaeniro. 'Roma zuhiꞌaḡa ni ebu viga.'
17 Iesuꞌa ziro. 'Roma zuhiꞌaḡa* |imoni|rꞌe Roma zuhiꞌaḡa ane hanoꞌi, ebu Badiꞌa |imoni|rꞌe Badiꞌa ane hanoꞌi!' Ebu zeḡe huga ani ḡoereonoꞌo zaguzagaro.
Runeonoꞌo bare iḡuniꞌuma ḡoeꞌa
(Mataio 22:23-33, Luka 20:27-40)
18 Sadukea azaḡa* Iesu vaḡe onairo. Zeꞌe ꞌahige zamariro. Rune azaḡaniꞌe mada ḡonagano mene iḡuniꞌuma. Zeḡeꞌa Iesu ḡadiniro. ꞌAhige reiro.
19 'Ihore vazeḡa, Moseꞌa emeḡe veize ꞌahige tiro. “Vaze ꞌahoga negoḡa rudaune, rehano ane inuga ubuga oꞌoꞌa reine, ane negoḡaniꞌa bare meꞌuma, ebu negoḡa veize ubuga fureniꞌuma”
20 Negoḡa niduꞌa fuꞌo tu aheu fare (7) radiudo. Negoḡa ibiꞌaꞌe hahuriro, ebu rudaro, rehano ubuga oꞌoꞌa.
21 Negoḡa aheuḡaniꞌa ḡozobaḡa teite hahuriro. Rehano rudaro, ebu ubuga oꞌoꞌa. Ebu negoḡa uḡiduḡa zuni hahuriro, rehano haḡai idaḡaniꞌa fureraro.
22 Ebu negoḡa niduꞌa fuꞌo tu aheu fareꞌa tiba tiba ḡozoba teite hahuriro, rehano niduꞌa rudau hauḡadu, ubudeze oꞌoꞌa. Hena vesuꞌu ḡozoba zuni rudaro.
23 Runeonoꞌo bare iḡuniꞌuma madaḡano, aniꞌe iniu inuga reꞌuma? Mazaḡa ohoze fuꞌo tu aheu fare teite hahuriro ꞌahine.'
24 Iesuꞌa ꞌahige rae ziro. 'Za hube veꞌoreꞌohe. Buka zaḡoḡa huga mene maꞌohe, zuni Badiꞌa gigiꞌa aḡuꞌa.
25 Runeonoꞌo bare iḡuniꞌuma madaḡano, zeꞌe mene hahuriꞌuma, rehamo zeꞌe adureo radiuꞌeteꞌe aneruḡa heuḡa.
26 Zaꞌe runeonoꞌo iḡuniꞌuma ga mene, ḡadimuꞌehehe? Mose buka zamaḡano butu hariḡaꞌeꞌe. Za eꞌe hariḡa meꞌodiro ga, Badiꞌaꞌa Mose nouge nouge niroteꞌe? Aꞌe ꞌahige reiro. “Eꞌe Aberahamo* Badiꞌa, zu Isako* Badiꞌa, ebu Iakobo* Badiꞌa.”
27 Aniꞌe mene rune azaḡa Badiꞌa, rehamo ḡabone azaḡa Badiꞌa. Ze ahirizeꞌe rudaro, rehano vineze ize ḡaboga. Zaꞌe veꞌoḡa boro bagaḡa.'
Goro ḡoeꞌa ḡihiꞌa
(Mataio 22:34-40, Luka 10:25-28)
28 Mose goro ḡoeꞌa ihozeꞌeteꞌe vazeḡa ꞌahoganiꞌa onairo, ebu zeḡeꞌa ḡoꞌaniroteꞌe igiro. Iesuꞌa faifairu naenaeziroteꞌe igirotene, Iesu ḡadiniro. 'Goro ḡoeꞌa niduꞌa zamaḡano noꞌe goro ḡoeꞌaꞌe ḡihiꞌa?'
29 Iesuꞌa naenaeniro, raenaꞌa, 'Goro ḡoeꞌa ḡihiꞌa huneꞌe ꞌahiꞌeꞌe. “Isaraela* azaḡa, egoꞌi! Zuhiꞌa Boro, emeḡe Badiꞌaꞌe ane daꞌo Zuhiꞌa tibuhuga.
30 Ebu zamaḡo niduꞌa hina, ḡaboneḡo niduꞌa hina, zamaroḡo niduꞌa hina, inaraḡo niduꞌa hina Zuhiꞌa Boro, ḡae Badiꞌa zamaroꞌi!”
31 Goro ḡoeꞌa ꞌahoga, eꞌe hegotogaꞌe ꞌahiꞌeꞌe. “Ḡaeꞌa ḡae bare zamareꞌeteꞌe teige, nabugo zuni zamaroꞌi!” Goro ḡoeꞌa aheu ꞌadiꞌe ḡoere boro. Goro ḡoeꞌa ꞌahoga ꞌahoganiꞌa ḡoere aheu ꞌadi mene vitinoga.'
32 Mose goro ḡoeꞌa ihozeꞌeteꞌe vazeḡaniꞌa naenaeniro, raenaꞌa, 'Manoḡa tauḡi! Ihore vazeḡa, ḡaꞌe hube hugano ḡoereꞌohe. Badiꞌaꞌe tiba. ꞌAhogaꞌe oꞌoꞌa.
33 Ebu zamaḡa niduꞌa hina, edeḡa niduꞌa hina, inaraḡa niduꞌa hina, Badiꞌa zamareꞌeteꞌe, zuni vazeꞌa ane bare zamareꞌeteꞌe teige, nabuga zuni zamareꞌeteꞌe, eꞌe haḡaiḡaꞌe boro bagaḡa. Ḡau nunu Badiꞌa hauꞌeteꞌe haḡaiḡa zaḡoḡaꞌe, eꞌe haḡaiḡaniꞌa vitinoga.'
34 Ebu aniꞌa doḡoꞌani naenaeniroteꞌe, Iesuꞌa igirotene, ꞌahige rae niro. 'Ḡa nariga Badiꞌaꞌa ibitohauꞌeteꞌe vazeḡa raꞌohe.' Eꞌe enogano vaze niduꞌa ani ḡadinoga riharo.
Kerisoꞌe Davida ubuga zu Davida Zuhiꞌa
(Mataio 22:41-46, Luka 20:41-44)
35 Ebu Iesu Badiꞌa ḡahunohauꞌeteꞌe Neḡa zamaḡano ihoziroteꞌea, ꞌahige reiro. 'Nougaꞌahi Mose goro ḡoeꞌa ihozeꞌeteꞌe azaḡaniꞌe ꞌahige raꞌohe, Kerisoꞌe Davida ubuga?
36 Mazaḡa Davida ani, Vine Zaḡoḡaniꞌa edeḡa hanadu, ꞌahige reiro.
“Badiꞌaꞌa eḡe Zuhiꞌa, Keriso ꞌahige rae niro.
Eḡe edaꞌe moneo ehoroꞌi, onamo ḡae teite utiteꞌeteꞌe azaḡa odaḡo ꞌuꞌuḡano edeze ḡahiziꞌuma.”
37 Davida ꞌaneꞌa, eꞌe vazeḡa huneꞌenaꞌa, Zuhiꞌa reiro. ꞌOugine, aniꞌe nouge nouge Davida ubuga?' Ebu vaze ḡuḡuvaḡa matuꞌuzeta Iesu ḡoere igiro.
Iesuꞌa Mose goro ḡoeꞌa ihozeꞌeteꞌe azaḡa haḡai uꞌano haramo ziniro.
(Mataio 23:1-36, Luka 20:45-47)
38 Iesuꞌa ihoziroteꞌe zamaḡano, ꞌahige reiro. 'Mose goro ḡoeꞌa ihozeꞌeteꞌe azaḡa ḡiazoꞌi! Ze niguzoga raduni, dabua faḡa haḡaadu, oname onaeꞌohe, ebu vaze vazeꞌa ne hunio hidine, zuhiꞌa raduni, gubaze ḡorezihi raꞌohe.
39 Iuda kuru neḡa zamaḡano, vaze boro boroꞌa ehoreꞌeteꞌe habaꞌano ehorihi raꞌohe, ebu tiburu ogauꞌeteꞌe habaꞌano zuni, ehoro habaꞌa manoḡano daꞌo ehorihi raꞌohe.
40 Ebu ḡozoba soꞌonadu, toheḡa niduꞌa meineꞌohe, zuni kuru faḡa ḡurire kurauꞌohe. Eꞌanoꞌo zeḡe haḡai sauꞌa, eꞌe naeḡaꞌe boro bagaḡa meꞌuma.'
Ḡozobaꞌa Badiꞌa ḡahunaniroteꞌe |imoni|rḡa
(Luka 21:1-4)
41 Iesu ani, Badiꞌa ḡahunaniꞌeteꞌe |imoni|r mauḡaḡa uhiḡano ehoriro. Vaze ḡehaḡaniꞌa mauḡa zamaḡano |imoni|r ufiroteꞌe ḡiane radiro. Maꞌora azaḡa ḡehaḡaniꞌa |imoni|r boro ufiro.
42 U toheḡa oꞌoꞌa ḡozobaḡaniꞌa onaadu, |imoni|r komeḡa aheu ufiro. Aꞌe toea aheu heuḡa.
43 Ebu Iesuꞌa tahiꞌaḡa huze nuꞌoziro, ebu ꞌahige rae ziro. 'E hubehune ziꞌohe. Toheḡa oꞌoꞌa ḡozobaḡaniꞌa ofataꞌaꞌe, vaze ꞌahoga ꞌahoganiꞌa ofateꞌe teite mene idaḡa. Ḡozobaꞌe boro bagaḡa ofeha.
44 Mazaḡa maꞌora azaḡaniꞌa ofataꞌaꞌe, zeḡe |imoni|r ḡehaḡaonoꞌo tahiḡa daꞌo ofeha. Rehano ḡozoba ꞌadiꞌe ane mazao radiuꞌeteꞌe moniḡa niduꞌa ofeha. Aniꞌa ogomuḡa hoite aꞌuma moniḡa niduꞌa ufi hauḡeha.'