4
Hari idaidaḡa, ezone feune ḡorauꞌeteꞌe
(Mataio 13:1-9, Luka 8:4-8)
1 Iesuꞌa duꞌura boro genaḡano bare ihoziro. Ebu vaze ḡuḡuvaḡaniꞌa ani babaḡano nuꞌorarotene, ani ai ḡasio tiradu, zamaḡano ehoriro duꞌura ragano. Vaze ḡuḡuvaḡa niduꞌaꞌe rahao duꞌura boro genaḡano nuꞌoraro.
2 Ebu aniꞌa hari idaidaḡa hina ḡau ḡehaḡa ihoziro. Ihozeꞌenaꞌa, ziro, raenaꞌa,
3 'Egoꞌi! Hihi vazeḡa ꞌahoganiꞌa mebaḡano ezone ḡora onamiro.
4 Ebu feune ḡuzuhirotene, nuḡone ibio buaro, ebu niniꞌa onaadu, au hauḡiro.
5 Nuꞌe hadi habaꞌano buaro. Rahaḡaꞌe severaḡa. Ezoganiꞌe ḡarihe ḡuhuriro, mazaḡa rahaḡaꞌe mene baruḡa.
6 Ebu madaꞌa hiarotene, ane gigiꞌaniꞌa ḡuhuḡa manadu imiraro, mazaḡa taiga oꞌoꞌa.
7 Ezone nuꞌe ve renogano rururaro. Ve renoga ḡuhure bororadu ezone ḡuhuḡa simariniro, ebu mene iniro.
8 Rehamo ezone nuꞌe haba manoḡano buarotaꞌaꞌe, faine ḡuhuriro. Faine bororaro, ebu faine hudaro. Hudarotene, nuꞌe huga ḡae uḡidu gaubanana (30) haḡairo. Nuꞌe huga ḡae fuꞌo tu tiba fare gaubanana (60) haḡairo. Nuꞌe huga ḡae gaubanana gaubanana (100) haḡairo.'
9 Ebu Iesuꞌa reiro. “Teḡaḡeta vazeḡaꞌe faifaine egadu huga ederoꞌi!”
Nougadu Iesuꞌa hari idaidaḡa reiro
(Mataio 13:10-17, Luka 8:9-10)
10 Neganuꞌu, Iesu ane daꞌo rougano, iniu iniu ane teite rauꞌeteꞌe azaḡaniꞌa ane tahiꞌa tahiꞌa teite Iesu vaḡe onamaduni, hari idaidaḡa reiroteꞌe ḡadimaro.
11 Ebu aniꞌa ziro, “Zaꞌe Badiꞌaꞌa ibitoziniꞌeteꞌe moneo ꞌuꞌuru tiꞌeteꞌe ihozeꞌohe. Vaze ꞌahoga ꞌahogaꞌe hari huga niduꞌa hari idaidaḡa hina daꞌo ihozeꞌohe.
12 Aꞌaꞌe ꞌahiguḡaniꞌa furerafine.
Zeḡe ehamatiteꞌeba, mene horonoga, zeḡe abitiꞌudemo, mene ederoga, Zeḡe zama Badiꞌa mazao mene ḡihuroga veize, ebu Badiꞌaꞌa zeḡe sauꞌa mene rae modoga veize.'
Iesuꞌa ezone hariḡa huga faine rae fureniro
(Mataio 13:18-23, Luka 8:11-15)
13 Ebu Iesuꞌa ḡadiziro. 'Za hari idaidaḡa ꞌahi mene edereꞌehehe? ꞌOugine, hari idaidaḡa ꞌahoga ꞌahoga hugaꞌe nouge nouge ederiꞌuma?
14 Ezone ḡorauꞌeteꞌe vazeḡaniꞌa Badiꞌa hari ḡorauꞌohe.
15 Ibio buauꞌeteꞌe ezogaꞌe ꞌahiguḡa. Ze ḡoere igiꞌeteꞌe zamaḡano, sataniꞌa ḡarihe onaadu, zeḡe zamao ḡoraroteꞌe hariḡa mae vaḡineꞌohe.
16 Ezone hadi habaꞌano rururuꞌetaꞌ e, Badiꞌ a ḡoere igiꞌetene matuꞌuzeta mae ḡihineꞌohe.
17 Rehano ze taiga oꞌoꞌa ꞌahine, mene faḡa radiꞌuma. Badiꞌa ḡoere uꞌano, aduga ḡehaḡa hidiꞌetene, zogone uiteꞌohe.
18 Ezone ve renoga zamaḡano rururuꞌ etaꞌe, ze Badiꞌa ḡoere igiꞌohe.
19 Rehano raha ḡauḡa ufeta zamareꞌohe, oboneꞌeteꞌe toheḡa ufeta zamareꞌohe, ebu ḡau nu ḡehaḡa urateꞌohe. Eꞌanoꞌo Badiꞌa ḡoere ꞌuadu mene iniꞌohe.
20 Rehano ezone raha manoḡano rururarotaꞌaꞌe, Badiꞌa ḡoere igiꞌohe zu mae ḡihineꞌohe. Ebu hudauꞌenaꞌa, nuꞌe huga ḡae 30, nuꞌe huga ḡae 60, nuꞌe huga ḡae 100 iniꞌohe.
Ihure hari idaidaḡa
(Luka 8:16-18)
21 Iesuꞌa hena ziro. ꞌAhige reiro. 'Ihure meineꞌe, siuva ꞌuꞌuḡano ga bazuni naꞌaḡa ꞌuꞌuḡano mene tiꞌuma. Ihure tiꞌeteꞌe habaꞌano tiꞌuma.
22 ꞌUꞌuru radiuꞌeteꞌe toheḡa niduꞌa fureraꞌuma. Ebu ogone tiꞌeteꞌe toheḡa zuni ḡianiꞌuma.
23 Teḡaḡeta vazeḡaꞌe igiꞌuma.'
24 Ebu ziro. 'Igiꞌeteꞌe ḡoeꞌa zamare radoꞌi! Badiꞌa ḡoereꞌe ꞌahiguḡa. Ḡa nouge nouge igiꞌeteꞌe, eꞌe idane, Badiꞌaꞌa ḡaniꞌuma, ebu ḡoere ꞌahoga ꞌahoga zuni ḡaniꞌuma.
25 Igiꞌeteꞌe vazeḡaniꞌe, zamaḡa ꞌaꞌadaꞌuma. Mene igiꞌeteꞌe vazeḡaniꞌe, zamaḡa tahiḡa ꞌaꞌaduꞌeteꞌe zuni, Badiꞌaꞌa mae vaḡiniꞌuma.'
Hari idaidaḡa, ezone, aneꞌa bare ḡuhureꞌeteꞌe
26 Iesuꞌa bare ziro. 'Badiꞌaꞌa ibito ziniꞌuma ibiḡaniꞌe ꞌahiguḡa. Vaze ꞌahoganiꞌa mebao ezone feune ḡorauꞌohe.
27 Ohere bazeꞌohe. Madai ragaveꞌohe. Ebu ezoneꞌa ḡuhureꞌohe, ebu farauꞌohe. Rehamo ḡoranoga vazeḡaniꞌe aḡuꞌa nouge nouge ḡuhuradu, farauꞌohe.
28 Raha aneꞌa bare ḡuhunadu, huga haḡaeꞌohe: Ibite ḡuhureꞌohe, ebu diꞌiruꞌohe. Ebu ḡonagano diꞌiruꞌeteꞌe zizugano huga haḡaeꞌohe.
29 Huganiꞌa hudauꞌetene, kari hina variꞌeꞌohe, mazaḡa hiriveꞌeteꞌe madaḡaniꞌa feuraꞌahi.'
Badiꞌaꞌa Ibitoziniꞌeteꞌe Moneo Ḡoeriro
(Mataio 13:31-32,34, Luka 13:18-19)
30 Ebu Iesuꞌa bare reiro. 'Badiꞌaꞌa ibitoziniꞌetaꞌaꞌe nagini hina idaniꞌuma, ga nagi hari idaḡa hina idaniꞌuma?
31 Aꞌe ire niḡa fufu, eꞌe ezoga heuḡa. Rahao ḡorauꞌeteꞌe zamaḡano, maḡaꞌe komeḡa fase, haba niduꞌa zamaḡano.
32 Rehano ḡoraune, ḡuhuradu faraꞌuma, ebu bororaꞌuma. Ire fouḡa ꞌahoga ꞌahoga vitine faraꞌuma. Ebu ezaga boro boroꞌa faraꞌuma. Ebu eꞌe zauhaḡano niniꞌa onaadu, neze haḡaiꞌuma.'
33 Iesu ani hari idaidaḡa, ꞌahiguḡa ḡehaḡa hina vaze mazao haramiro. Zeḡe edeḡa idane haramiro.
34 Aniꞌe hari idaidaḡa hina daꞌo ziro. Rehamo ane tahiꞌa tahiꞌa teite daꞌo radiroteꞌe madaḡano bone, aniꞌa huga niduꞌa ihoziro.
Iesuꞌa zavara boro ꞌuiro
(Mataio 8:23-27, Luka 8:22-25)
35 Eꞌe madaḡano ḡorava moneo Iesuꞌa ane tahiꞌa tahiꞌa zinaꞌa, “Eme duꞌura mone afa farihi.”
36 Iesu tahiꞌa tahiꞌaꞌa vaze ḡuḡuvaḡa muhizadu, ḡasio ehoriro, Iesuꞌa ehoriroteꞌe ḡasiḡano. Ebu onamiro. Ḡasi nu zuni tibano onamiro.
37 Ebu zavara boroꞌa onairo. Saꞌuꞌa ḡasio kafere diuḡiro, ḡasi hoꞌogano. Ebu vuꞌa ḡasio ꞌariga irivaꞌiro.
38 Rehamo Iesu ani ḡasi ariḡa ḡuzuo evane kobeḡa hina ḡatite baziro. Ebu ze onamadu Iesu evaniro, ebu niro. 'Ihore vazeḡa, ḡa mene zamareꞌehehe, eme ꞌariga rudauꞌetaꞌaꞌe?'
39 Ebu Iesuꞌa evatadu zavara riḡa ḡoeriro, ebu saꞌu niro. 'Ago haḡaoꞌi! Ago hagaroꞌi!' Zavaraꞌa dauḡiro. Hagani oꞌoꞌa ebu ḡokeni oꞌoꞌa.
40 Ebu ziro. 'Za nougadu rihauꞌohe? Za Badiꞌa mazao ize mene fieꞌehehe?
41 Rehano zeꞌe riho boro ebu ḡoretitiro. 'Vaze ꞌahiꞌe nagi vaze? Zavara zu saꞌuꞌa zuni ani ḡoere egohuꞌohe.'