6
Iesu Nazareta neḡa onamiro
(Mataio 13:53-58, Luka 4:16-30)
1 Iesuꞌa haba eꞌe modadu, aneꞌa bororaroteꞌe habaꞌa onamiro. Ane tahiꞌa tahiꞌa zuni ane teite onamiro.
2 Bana Madaḡa madaḡano, Iuda kuru neḡa zamaḡano ihoziro. Ebu vaze ḡehaḡaniꞌa ani haramo igirotene, zeḡe niduꞌa zaguzagaro. ꞌAhige reiro. 'Vaze ꞌadi gigiꞌa niduꞌa noumaonoꞌo meiro? Nagi edeḡa haro? Gigiꞌa inaraḡa haḡaeꞌeteꞌe haḡaiḡa nouge nouge haḡaeꞌohe?
3 Ani ne ogoruꞌeteꞌe vazeḡa. Ani Maria ubuga, Iakobo, Iosefa, Iuda ebu Simona negoḡa. Ani ezeḡa nu zu emeḡe habao ꞌada radiuꞌohe.' ꞌOuge rae radu, ze Iesu ḡoere mene mae ḡihiniro.
4 Ebu Iesuꞌa ziro. 'Peroveta vazeḡaniꞌe gubaneꞌohe, rehano aneꞌa bororaroteꞌe habaꞌano, zu nabuga ubumao, ebu ane neoꞌe, mene gubaneꞌohe.'
5 Eꞌea gigiꞌa inaraḡa haḡaeꞌeteꞌe haḡaiḡa haḡaoga mene idararo. Rehano ugi azaḡa tiba tiba daꞌo ꞌevoreḡa ranao teadu, faiziro.
6 Ani ꞌahige rae zamariro. 'ꞌAhi duḡuru haḡaiꞌe ꞌahiguḡahehe?' Mazaḡa zeꞌe Iesu ḡoere mene mae ḡihiniro.
Iesuꞌa ane tahiꞌa gaubanana aheu fare tuḡuziro
(Mataio 10:5-15, Luka 9:1-6)
Eꞌebuꞌu Iesu aniꞌe eꞌe habaꞌano, neḡa neḡano Badiꞌa ḡoere ihoze ragavido.
7 Ebu aniꞌa vaze gaubanana aheu fare huziro, ebu aheu aheu tuḡuziro. Vine sauꞌa hegoze buzeꞌeteꞌe gigiꞌaḡa ziniro.
8 Ebu ꞌahige rae ziro. 'Zae ragavo madaḡano oꞌoꞌa huga ago moꞌi. |iBeredi|r, tunahu ago moꞌi. |iMoni|r vainao ago odohoꞌi. Rehano tuḡuze daꞌo moꞌi.
9 Tamakazeꞌe haḡaoꞌi. Dabua tiba daꞌo haḡaoꞌi. ꞌAhogani zu ago moꞌi.'
10 Ebu ꞌadige rae ziro. 'Noꞌe habaꞌano ne ꞌahoga diuḡoꞌidene, eꞌea daꞌo radoꞌi, oganoꞌi, ebu bazoꞌi. Onamoꞌi. Ebuni eꞌe habaꞌanonoꞌo iḡunoꞌi.
11 Haba ꞌahogano ne azaḡa mene mae zouzadu, mene ego zenoꞌidene, haba modoꞌi, odaze huꞌuruḡa fode buno zenoꞌi, zeꞌa nagini haḡaateꞌe ederoga veize.'
12 Vaze gaubanana aheu fare (12) onamiro, ebu haramiro vaze vaze zeḡe sauꞌanonoꞌo ḡihuroga.
13 Zeḡeꞌa vine sauꞌa ḡehaḡa hegoze buziro. Ebu ugi azaḡa ḡehaḡa mazao dehoro aso ziniro, ebu faiziro.
Ioane Babatisoꞌa rudaro
(Mataio 14:1-12, Luka 9:7-9)
14 Zuhiꞌa Heroda*ꞌa Iesu hariḡa igiro, mazaḡa Iesu niḡa vaze ḡehaḡaniꞌa ederiro. Vaze nuꞌe ꞌahige reiro. 'Ioane Babatisoꞌa runeonoꞌo bare ḡabodiro. Eꞌebanoꞌo aniꞌa gigiꞌa inaraḡa hina ꞌahige haḡaeꞌohe.'
15 Rehano vaze nuꞌe ꞌahige reiro. 'Aniꞌe Elia.' Ebu vaze ꞌahoga ꞌahogaꞌe ꞌahige reiro. 'Aniꞌe peroveta vazeḡa ꞌahoga. Peroveta ibiꞌa heuḡa.'
16 Rehano Heroda aniꞌa eꞌe igirotene, ꞌahige reiro. 'Eḡeꞌa radu, ꞌunuḡa variꞌe riꞌiroteꞌe vazeḡa, niḡa Ioane, aneꞌa bare ḡabodiro.'
17-18 Ibite Herodaꞌa negoḡa, niḡa Filipo, inuga meiro. Inuga niḡaꞌe Herodia. Ebu Ioaneꞌa ani mazao bare bare niro, raenaꞌa, “Ḡaeꞌa negoḡo inuga meirotaꞌaꞌe Badiꞌa goro variꞌeha.” Eꞌanoꞌo, Herodaꞌa vaze tuḡunadu Ioane obone tiro, ebu ḡuꞌano ohoniro.
19 Eꞌanoꞌo Firifo inuga Herodiaꞌa Ioane maḡunoharo, ebu matihi reiro. Rehano mene idararo.
20 Mazaḡa Herodaꞌe Ioane rihonadu, tuḡaniro. Heroda ani edeḡa, Ioane ani haḡai manoḡa haḡaeꞌeteꞌe vazeḡa, zu gigiꞌa vazeḡa. Eꞌanoꞌo manoga mene uratiro. Heroda ani Ioane haramo igirotene, adaꞌadaniro, rehano matuꞌiro.
21 Rehano madaḡa ai onairo. Herodaꞌa fureraroteꞌe madaḡa zamariroteꞌea, ogomu boro haḡairo. Ebu ne zuhiꞌaḡa zuhiꞌaḡa, zuni uti ḡihiꞌaḡa ḡihiꞌaḡa, ebu Galilea haba vaze boro boro* huziro, onaoga veize.
22 Eꞌe zamaḡano Herodia aboḡaniꞌa diuḡiꞌ onaadu, zavonirotene, Heroda zuni eꞌea ehoriroteꞌe azaḡa matuꞌiro. Ebu Herodaꞌa roḡae tahiꞌaḡa niro. ꞌAhige reiro. 'Ḡa nagini urateꞌeteꞌe toheḡa umidoꞌi! Eḡeꞌa ḡaniꞌuma.'
23 Aniꞌa hubehune raenaꞌa, ꞌahige rae niro. 'Ḡa nagini urateꞌeteꞌe toheḡa umidine, eḡeꞌa ḡaniꞌuma. Eḡeꞌa ḡiane radiuꞌeteꞌe habaꞌa ruga zuni ḡaniꞌuma.'
24 Ebu roḡae tahiꞌaḡa buanadu, viꞌa ḡadiniro. ꞌAhige reiro. 'E nagini umidiꞌuma?' Viꞌaniꞌa raenaꞌa, 'Ioane Babatiso vadiga' reiro.
25 Ebu roḡae tahiꞌaḡaniꞌa Heroda vaḡe ḡarihe bare onamiro. Ebu ꞌahige reiro. 'Ioane Babatiso vadiga siuvao teadu, izidi ꞌada inine manoḡa.'
26 Eꞌe igirotene, Heroda aniꞌe zamaḡa adudaro, zuni zamaḡa ariro. Rehano aniꞌa hubehune rae niroteꞌe uꞌano, zuni eꞌe igiroteꞌe azaḡa uꞌano, ane ḡoere variꞌoga mene uratiro.
27 Ebu ane uti vazeḡa ꞌahoga tuḡuniro, Ioane Babatiso vadini variꞌe reꞌadu, odohe aroga veize. Ani onamadu, ḡuꞌano Ioane ꞌunu variꞌe riꞌiro.
28 Vadigaꞌ e siuvao teadu odohe ariro, ebu roḡae tahiꞌ aḡa hanadu aneꞌ a viꞌ a odohe haro.
29 Ioane tahiꞌa tahiꞌaniꞌa eꞌe igirotene, onamadu, Ioane ahiꞌa meiro. Ebu rune habaꞌa iduḡano teadu hararo.
Iesuꞌa vaze ḡuḡuvaḡa daha fuꞌo (5000) ḡubuziro
(Mataio 14:13-21, Luka 9:10-17, Ioane 6:1-14)
30 Apostolo azaḡa* Iesu vaḡe bare onairo. Ebu zeḡeꞌa nagini haḡairoteꞌe zu vaze vaze ihoziroteꞌe hariḡa niduꞌa meꞌodoharo.
31 Ebu Iesuꞌa rae ziro. 'Eḡe teite aroꞌi! Vaze oꞌoꞌa habaꞌa onamihi! Ebu eꞌea ahirize ohonoꞌi!' rae reiro. Mazaḡa vaze ḡehaḡaniꞌa zeḡe vaḡe oname onairo. Eꞌanoꞌo ogauꞌeteꞌe madaḡa zu oꞌoꞌa.
32 Hena zeḡe daꞌo ḡasi hina vaze oꞌoꞌa habaꞌa onamiro.
33 Vaze ḡehaḡaniꞌa zeḡeꞌa onamiroteꞌe horozadu, ze zeḡe zeḡeꞌa zamariro. Ebu zeḡe niduꞌa zeḡe zeḡe neꞌonoꞌo buaro. Ebu dure dure onamiro. Ebu ibite feuriro, Iesuꞌa tahiꞌaḡa teite onamiroteꞌe habaꞌano.
34 Zeḡeꞌa hebetadu, Iesuꞌa ḡasionoꞌo buarotene, vaze ḡuḡuvaḡa boro horoziro, ebu vetuḡaziro. Mazaḡa zeꞌe mamoe heuḡa. Ḡiazeꞌeteꞌe azaḡa oꞌoꞌa. Eꞌanoꞌo hari ḡehaḡa ihoziro.
35 Ḡoravararotene, Iesu tahiꞌa tahiꞌaniꞌa onaadu, Iesu niro, raenaꞌa, “'Ahiꞌe haba bohaꞌa ebu mada ꞌai zubureha.
36 Vaze ḡuḡuvaḡa tuḡuzoꞌi, ne uhiḡa ꞌahoga ꞌahoga onamadu ogomuze hoitiꞌuma.”
37 Aneꞌa naenaezinaꞌa, ꞌahige reiro. 'Zaeꞌa ogomu zenoꞌi!' Ebu hena zeꞌa niro, raenaꞌa, 'ꞌAhi eme nougiꞌuma? Emeḡeꞌa onamadu, sinahu aheu (200) kina hina |iberedi|r hoitadu, ziniꞌumahehe?'
38 Iesuꞌa ḡadiziro. ꞌAhige reiro. 'Zae mazao |iberedi|r nugu? Onamadu ḡianoꞌi!' Zeꞌa horonirotene, niro. '|iBeredi|r fuꞌo zu ḡozone aheu.'
39 Hena Iesuꞌa ane tahiꞌa tahiꞌa ziro, vaze niduꞌa ve ragano ꞌaꞌane ꞌaꞌane ehoroga rae.
40 Amaḡe vaze vazeꞌa sinahu tiba tiba (100), ebu ḡae fuꞌo gaubanana, ḡae fuꞌo gaubanana (50) ehoriro.
41 Ebu Iesuꞌa |iberedi|r fuꞌo zu ḡozone aheu madu, adure ite ḡianiro, ebu Badiꞌa uminiro, ebu |iberedi|r vahegadu, ane tahiꞌa tahiꞌa ziniro, vaze vaze zenoga veize. Ebu ḡozone aheu zuni vahegadu ḡahugiro.
42 Zeḡe niduꞌa au ubararo.
43 Ane tahiꞌaꞌa tunahuo |iberedi|r ḡahaꞌa ḡahaꞌa zu ḡozone ḡahaꞌa ḡahaꞌa ufirotene, tunahu gaubanana aheu fare (12) irivaꞌoniro.
44 Ogaroteꞌe zamaḡano, ohoze daꞌo meꞌodirotene, daha fuꞌo (5000) hidiro.
Vu rana onamiro
(Mataio 14:22-33, Ioane 6:15-21)
45 Eꞌe enogano Iesuꞌa tahiꞌaḡa ziro, raenaꞌa, “Ḡasio tiradu ibite mone afa fare onamoꞌi” U Iesuꞌa ꞌize eꞌea vaze ḡuḡuvaḡa tuḡuziro.
46 Tuḡuze modiroteꞌe enogano, ani haba maḡa itaduni, Badiꞌa mazao kuraro.
47 Ohereraroteꞌe zamaḡano, ḡasiꞌe duꞌura boro nemaḡano, ebu Iesuꞌe ane daꞌo gabao radiro.
48 Zavara boroꞌa zeḡe zamao hudi onairo ꞌahine, zeꞌe revo revo ḡiziro. Iesuꞌa eꞌe horoniro. Eꞌebuni oheredaꞌo, Iesu ani zeḡe vaḡe duꞌura ragano edau onamiro. Ebu aniꞌa vitize onamihi reiro.
49 Iesuꞌa duꞌura ragano edau onamiroteꞌe horonirotene, ze ꞌane, aniꞌe vine raduni, huaro.
50 Zeḡe niduꞌa horonadu, riharo. Rehano Iesuꞌa ḡarihe ḡoreziro, ebu ꞌahige reiro. 'Zamaze rinedoꞌi! ꞌAhi eḡe. Ago rihanoꞌi!'
51 Aniꞌa zeḡe teite ḡasio ehoriro, ebu zavaraꞌa dauḡiro. Zavaraꞌa dauḡirotene, zeꞌe zaguzagau ḡouriro.
52 Mazaḡa zeꞌe gigiꞌa inaraḡa hina vaze ḡuḡuvaḡa ḡubuziroteꞌe haḡaiḡa huga, mene fairu zamariro. Zeḡe zamaꞌe mene ꞌaꞌadaro ꞌahine.
Ugi azaḡa faiziro
(Mataio 14:34-36)
53 Zeḡeꞌa duꞌura boro farirotene, Genesareta habaꞌano hebetiꞌ onamiro, ebu ḡasi eꞌa ute tiro.
54 Ḡasionoꞌo buarotene, vazeꞌa Iesu iraḡa horoniro.
55 Ebu ze eꞌe haba zamaḡano dure onamiro. Ebu ne azaḡa Iesu hariḡa igirotene, ugi azaḡa farata hina odohe onaido.
56 Ne boro, ne komeḡa niduꞌa, aneꞌa noꞌe noꞌe onamidotene, ugi azaḡa ne hunio tiro. Ebu Iesu uminiro, ani dabua ariḡa tahiḡa zuni obonoga radu. Ebu iniuꞌa oboniroteꞌe azaḡaꞌe manoriro.