13
Ezone Feune Ḡorauꞌeteꞌe Vazeḡa Hari Idaidaḡa
(Mareko 4:1-9, Luka 8:4-8)
1 Eꞌe madaḡano Iesuꞌa neonoꞌo iḡunadu duꞌura genaḡano ehoriro.
2 Vaze ḡuḡuvaḡaniꞌa ani babaḡano nuꞌorarotene, ani ꞌai ḡasio tiradu zamaḡano ehoriro. Vaze ḡuḡuvaḡa niduꞌaꞌe duꞌura genaḡano edaro.
3 Ebu aniꞌa hari idaidaḡa hina ḡau ḡehaḡa ihoziro, raenaꞌa, “Egoꞌi! Hihi vazeḡa ꞌahoganiꞌa mebaḡano ezone ḡora onamiro.
4 Feune ḡuzuhirotene, nuꞌe ibio rururaro, ebu niniꞌa onaadu au hauḡiro.
5 Nuꞌe hadi habaꞌano rururaro. Rahaḡaꞌe severaḡa. Ezoganiꞌe ḡarihe ḡuhuriro, mazaḡa rahaḡaꞌe mene baruḡa.
6 Ebu madaꞌa hiarotene, ane gigiꞌaḡaniꞌa ḡuhuḡa manadu roraro, mazaḡa taiga oꞌoꞌa.
7 Ezone nuꞌe ve renogano rururaro. Ve renoganiꞌa ḡuhure bororanadu ezone ḡuhuḡa simariniro.
8 U ezone nuꞌe raha manoḡano rururanadu faine ḡuhure bororaro. Ebu nuꞌe huga ḡae 100, nuꞌe huga ḡae 60 ebu nuꞌe huga ḡae 30 hudaro.
9 Teḡaḡeta vazeḡaꞌe faifaine egadu huga ederoꞌi!”
Hari Idaidaḡa Huga Ihoziro
(Mareko 4:10-20, Luka 8:9-15)
10 Ebu ane tahiꞌatahiꞌaꞌa ane vaḡe onaadu niro, raenaꞌa, “Ḡa nougaꞌahi hari idaidaḡa hina ḡoerezeꞌohe?”
11 Iesuꞌa naenaezinaꞌa, “Badiꞌaꞌa ibitoziniꞌeteꞌe moneo ꞌuꞌuru tirotaꞌaꞌe zae mazao fureneha, rehano vaze ꞌahogaꞌahoga mazao mene fureneha.
12 Faifaine zamare igiꞌeteꞌe azaḡaꞌe, Badiꞌaꞌa edeḡa boro zenadu zeḡe edeḡaꞌe ufeta bororaꞌuma. U mene faine zamare igiꞌeteꞌe azaḡaꞌe, Badiꞌaꞌa zeḡe edeḡa zuni mae vaḡiniꞌuma.
13 Eꞌanoꞌo eꞌa hari idaidaḡa hina ihozeꞌohe, mazaḡa,
'Zeꞌe horoneꞌohe rehano, mene hune horoneꞌohe.
Zeꞌe igiꞌohe rehano, mene hune igiꞌohe ga mene hune edereꞌohe.'
14 Aꞌe peroveta vazeḡa Isaiaꞌa reirotaꞌaꞌe hudaro, raenaꞌa,
'Zeꞌe Badiꞌaꞌa nagini raeꞌetaꞌaꞌe igiꞌuma rehano, mene hune ederiꞌuma.
Zeꞌe Badiꞌaꞌa nagini haḡaeꞌetaꞌaꞌe horoniꞌuma rehano, mene hune horoniꞌuma.
15 Zamazeꞌe riḡa uꞌano, teḡaze uꞌadu mene igiꞌohe, zu ubumaze kuranadu mene ehamuꞌohe.
Ze mene ꞌougine, ubumazeꞌe Badiꞌaꞌa haḡaeꞌeteꞌe horoniꞌuma, teḡazeꞌe Badiꞌa raꞌeteꞌe igiꞌuma zu zamazeo Badiꞌa ederiꞌuma,
ebu hena ze Badiꞌa vaḡe aradu aniꞌa ḡaboziꞌuma.'
16 Rehano za Badiꞌa manohugazeta, mazaḡa naginiꞌa fureruꞌetaꞌaꞌe horoneꞌohe zu igiꞌohe.
17 Eꞌa hube hune ziꞌohe. Peroveta azaḡa zu duduḡa azaḡa ḡehaḡaniꞌa, zaeꞌa horoneꞌetaꞌaꞌe ḡianihi reinu, rehano mene horoniro. Ebu zaeꞌa igiꞌetaꞌaꞌe igihi reinu, rehano mene igiro.
18 Ezone feune ḡorauꞌeteꞌe hariḡa idaidaḡa huga ꞌahi egoꞌi.
19 Ezone ibio rururarotaꞌaꞌe ꞌahiguḡa: Badiꞌaꞌa ibitoziniꞌeteꞌe hariḡa vazeꞌa egadu hugaꞌe mene edereꞌeteꞌe uꞌano, Sataniꞌa aradu ani zamao ḡorarotaꞌaꞌe mae vaḡineꞌohe.
20 Ezone hadi habaꞌano rururarotaꞌaꞌe ꞌahiguḡa: Vazeꞌa Badiꞌa ḡoere igiꞌetene matuꞌuzeta zogone mae ḡihineꞌohe.
21 Rehano ze Badiꞌa mazao fieꞌeteꞌe ire taiga oꞌoꞌa heuḡa. Ze mene faḡa edau gigaruꞌohe. Ebu Badiꞌa ḡoere mae ḡihineꞌeteꞌe uꞌano, aduga ḡehaḡa hidiꞌetene, zogone uiteꞌohe.
22 Ezone ve renoga zamaḡano rururarotaꞌaꞌe ꞌahiguḡa: Vazeꞌa Badiꞌa ḡoere igiꞌohe. Rehano raha ḡauḡa zamare aduduꞌohe zu oboneꞌeteꞌe toheḡa ufeta zamareꞌohe. Aꞌe Badiꞌa ḡoere uadu ze mene iniꞌohe.
23 Ezone raha manoḡano rururarotaꞌaꞌe ꞌahiguḡa: Badiꞌa ḡoere igiꞌohe zu eꞌe hugaꞌe edereꞌohe. Ebu hudauꞌenaꞌa, ḡorarotaꞌaꞌe vitineꞌohe, ḡae 100, ḡae 60 ga ḡae 30 iniꞌohe.
Ve Hari Idaidaḡa
24 Iesu'a hari idaidaḡa ꞌahoga ziro, raenaꞌa, “Badiꞌaꞌa Ibitoziniꞌetaꞌaꞌe vaze ꞌahoganiꞌa ani mebao ezone manoḡa ḡoraroteꞌe heuḡa.
25 Rehano vaze niduꞌa bazeꞌeteꞌe zamaḡano, ane agire vazeḡaniꞌa aradu vuidi boꞌaḡano ve ḡoraro ebu vaḡiniro.
26 Vuidiꞌa ḡuhuradu maḡa haḡairotene ve zuni ḡuhuriro.
27 Eꞌanoꞌo meba vazeḡa tuḡure azaḡaniꞌa aradu niro, raenaꞌa, ꞌVaze boro, ḡaꞌa ḡae mebao vuidi ezone manoḡa ḡoraro. Rehano ve eꞌe noumanoꞌo?'
28 Aniꞌa naenaeniro, raenaꞌa, 'Agire vazeḡa ꞌahoganiꞌa ꞌougiro.' Tuḡure azaḡaniꞌa ḡadininaꞌa, 'Ḡaꞌe eme onamadu ve eꞌe ḡoroga uratehehe?'
29 Aniꞌa naenaezinaꞌa, 'Mene, zaꞌa ve ḡurine vuidi zuni ḡuriꞌuma gaogi.
30 Modoꞌi ebu zeḡe tibano ḡuhuriꞌuma oname hiriveꞌeteꞌe madaḡa. Hiriveꞌeteꞌe madaḡano eḡeꞌa hiriveꞌeteꞌe azaḡa ziꞌuma, raenaꞌa, 'Ve geno ibite ḡoroꞌi, ebu tibano utadu hofoꞌi. Hena vuidiꞌe tibano nuꞌonadu eḡe suabao zounoꞌi.'”
Kuava Maḡa zu Isiti Hari Idaidaḡa
(Mareko 4:30-32, Luka 13:18-21)
31 Aniꞌa hari idaidaḡa ꞌahoga ziro, raenaꞌa, “Badiꞌaꞌa ibitoziniꞌetaꞌaꞌe Kuava* maḡa tiba vaze ꞌahoganiꞌa madu nebaḡano ḡoraroteꞌe heuḡa.
32 Aniꞌe maḡa niduꞌa boꞌaḡano komeꞌa fase, rehano ḡuhurine meba ḡauḡa niduꞌa boꞌaḡano ufeta bororanadu ire boro raꞌohe. Ebu butu niniꞌa rafiu are ezagano kamadu neze ogoraꞌuma.”
33 Aniꞌa hari idaidaḡa ꞌahoga ziro, raenaꞌa, “Badiꞌaꞌa ibitoziniꞌetaꞌaꞌe isiti heuḡa. Roḡae ꞌahoganiꞌa isiti tahiḡa madu uvahuḡa ḡehaḡa teite mirune tibuneꞌohe ebu hena uvahu niduꞌaꞌe ubaruꞌohe.”
Hari Idaidaḡa Hina Ḡoeriro
(Mareko 4:33-34)
34 Iesuꞌa hari idaidaḡa hina ḡoere ꞌahi niduꞌa vaze ḡuḡuvaḡa ziro. Aniꞌe hari idaidaḡa hina daꞌo vaze mazao ḡoeriro.
35 Aꞌe, peroveta vazeḡaniꞌa Badiꞌa ḡoere reiroteꞌeꞌa hudaro, raenaꞌa,
“Eꞌe hari idaidaḡa hina ziꞌuma.
Raha ꞌadi haḡairoteꞌe madaḡanonoꞌo ꞌuꞌuru tirotaꞌaꞌe eḡeꞌa fureraꞌuma.”
Ve Hari Idaidaḡa Huga Ihoziro
36 Ebu aniꞌa vaze ḡuḡuvaḡa muhizadu ne zamaḡa diuḡiro. Ane tahiꞌatahiꞌaꞌa hegote diuḡadu niro, raenaꞌa, “Mebao ḡoraroteꞌe ve hari idaidaḡa huga ihofoꞌi.”
37 Aniꞌa naenaezinaꞌa, “Ezone manoḡa ḡoraroteꞌe vazeḡaꞌe eḡe, Vaze Ubuga.
38 Mebaꞌe raha ꞌadi. Ezone manoḡaꞌe Badiꞌaꞌa ibitoziniꞌeteꞌe azaḡa, u veꞌe Satani hegoteꞌeteꞌe azaḡa.
39 Agire vazeḡaniꞌa ve ḡorarotaꞌaꞌe Diabolo. Hiriveꞌeteꞌe madaḡaꞌe mada ḡonaḡa, ebu hiriveꞌeteꞌe azaḡaꞌe tuḡure viga.
40 Mada ḡonaḡaꞌe ve ḡoradu ire rogao hufi haozeꞌeteꞌe teigiꞌuma.
41 Eḡe, Vaze Ubuḡaniꞌa, eḡe tuḡure viga tuḡuziꞌuma ebu zeꞌa, Badiꞌaꞌa ibitoziniꞌeteꞌe azaḡaꞌonoꞌo, vaze ibi sauꞌao tutuzeꞌeteꞌe azaḡa niduꞌa zu haḡai sauꞌa azaḡa niduꞌa rovoze nuꞌoziꞌuma.
42 Zeḡe niduꞌaꞌe ire roga gigiꞌaḡano mae feuzadu eꞌea niaꞌuma zu ḡononeze atitiꞌuma.
43 Ebu duduḡa azaḡaꞌe Mozeꞌa ibitoziniꞌeteꞌe zamaḡano mada teige hiaꞌuma. Teḡaḡeta vazeḡaꞌe egadu faine ederoꞌi!
Ḡau Manomano Uꞌuruga Hari Idaidaḡa
44 Badiꞌaꞌa ibitoziniꞌetaꞌaꞌe mebao ḡau manomano uꞌuruga heuḡa. Vaze ꞌahoganiꞌa horonirotene bare uꞌuranadu matuꞌuḡeta ne onamiro. Ebu ane ḡau niduꞌa seronadu meba eꞌe hoitiro.
45 Bare hena, Badiꞌaꞌa ibitoziniꞌetaꞌaꞌe hadi manomano vaḡeꞌeteꞌe vazeḡa heuḡa. Hadi eꞌe moni boro zu iraḡa manoḡa uꞌano, hoitihi radu ragave vaḡiro.
46 Aniꞌa hadi manomano eꞌe horonirotene, ne onamadu ane ḡau niduꞌa seroniro ebu hadi eꞌe hoitiro.
Reꞌeva Hari Idaidaḡa
47 Bare hena, Badiꞌaꞌa ibitoziniꞌetaꞌaꞌe reꞌeva heuḡa. Davarao einadu ḡozone nunu niduꞌa oḡaro.
48 Reꞌevaꞌe irivaꞌirotene, vazeꞌa mae hesao rehaniro. Ebu zeꞌa ehoradu ḡozone manoḡaꞌe inahe tunahuo mae ufiro ebu sauꞌasauꞌaꞌe mae modiro.
49 Mada ḡonagaꞌe ꞌahiguḡa reꞌuma. Tuḡure viganiꞌa onaadu duduḡa azaḡa mazaꞌonoꞌo sauꞌa azaḡa mae rovoziꞌuma.
50 Ebu zeꞌa ire roga gigiꞌaḡano mae feuzadu eꞌea niaꞌuma zu ḡononeze atitiꞌuma.”
51 Ebu Iesuꞌa ḡadiziro, raenaꞌa, “Zaꞌe eḡe ḡoere niduꞌa hugaꞌe ederahe?” Zeꞌa naenaeninaꞌa, “Oꞌe.”
52 Aniꞌa ziro, raenaꞌa, “Mose goro ḡoeꞌa ihozeꞌeteꞌe azaḡa niduꞌaꞌe Badiꞌaꞌa ibitoziniꞌeteꞌe moneo ederifone, zeꞌe godogo neḡa ḡianeꞌeteꞌe azaḡa ḡihiꞌaḡaḡihiꞌaḡa heuḡa reifo. Zeꞌe godogo zamaḡano ḡau manomano amahiḡa zu ḡau manomano iziga ederadu vaze ihozeꞌohe.”
Nazareta Azaḡaniꞌa Iesu Hezahoharo
(Mareko 6:1-6, Luka 4:16-30)
53 Iesuꞌa hari idaidaḡa eꞌe hauḡirotene eꞌeanoꞌo vaḡiniro.
54 Ebu ane haba, Nazareta neḡa onamadu zeḡe nuꞌonuꞌo neḡano ihoze ḡadahiro. Ze ani ḡoere egadu zaguzagaro, raenaꞌa, “Vaze adiꞌe noumaꞌonoꞌo zamarone manoḡa zu haḡaiḡa gigiꞌa inaraḡa ꞌahi meiro?
55 Ahiꞌe ne ogoruꞌeteꞌe vazeḡa ubuga. Ani viꞌaꞌe Maria, ani negoḡanegoḡaꞌe Iakobo, Iosefa, Simona zu Iuda.
56 Ani ezeḡa niduꞌaꞌe ahao eme teite. Aniꞌa ḡau niduꞌa ꞌahi noumaꞌonoꞌo meiro?”
57 Ebu zeꞌa ani hezahoharo.
ꞌOugadu Iesuꞌa ziro, raenaꞌa, “Haba nunu niduꞌa zamaḡano vazeꞌa peroveta azaḡa gubazeꞌohe, rehano peroveta azaḡa zeḡe habao zu nezeno daꞌo vazeꞌa mene gubazeꞌohe.”
58 Ebu aniꞌa eꞌe neḡano haḡai gigiꞌa ḡehaḡa mene haḡairo, mazaḡa zeꞌe ani mazao mene fiiro.