5
Ngonn bate a ase ta kɔru ta maketuru
1 Goe te a, dew ke isi ngende-mbay te le, moo maketuru ke n̂-ke to jia te ke kɔl. Duja maketuru me te ddem, gire te ddem. N̂-lete tae, loe siri.
2 Moo mare anji ke nje singa-mɔngu aw ila mber ke singa na: «Na ase ta kɔru ne ke n̂-lete ne ta maketuru neenn ngaa ta teyn wa?»
3 A me dara te, wase dɔ nange te, wase gel nange te, dew kara ke ase teyn maketuru le ta kaa mee koo goto.
4 M-nɔ nya, mba dew ke ase ta teyn maketuru le ta kaa koo goto.
5 A kara le tɔkuje le pa arem na: «E-nɔ ang. Oo, tebeyn ke gel Juda te, ne ke n̂-to dew ke gel Dabbiti te n̂-tete ddɔ, nase ta kɔru ta maketuru ke toke lete loe siri le ddem, ta teyn maketuru le ddem.
6 Maa lo, ngaa moo mare Ngonn bate ar danna mbɔr ngende-mbay te le, horo neje te sɔ ke toje kem baa le, ke horo tɔkuje te le. Ngonn bate le ar toke bate ke n̂-tɔle to ne-polo. Gaje ee siri, ngaa keme ee siri tɔ. Keme ke siri le toje to ndilje le Lubba ke siri ke Lubba ulade dɔ nange te tɔyn le.
7 Ngonn bate le nja ke kete aw taa maketuru le ji dew te ke isi ngende-mbay te le, jia te ke kɔl.
8 Kake n̂-taa maketuru le a, neje sɔ ke toje kem baa le, ke tɔkuje ke dɔjoo gire sɔ le ɔsuje mekeji gɔlde nangê nɔe te. Konde, ke engo-nareje ke yambo ddusu toje jide te kara kara tɔyn. Yambo le to duju le dewje le Lubba.
9 Daw dɔsuje pa ke siki na:
Ase ta taa maketuru le,
ta kɔru ne ke n̂-lete ne tae.
Mba n̂-toli to ne-polo.
Are e-ndoko dɔ dewje tɔyn ke mesi are Lubba,
dewje ke gelde to dang dang tɔyn, nje ke ndɔn-tarje lede to dang dang tɔyn,
ke nje ke isije nangeje te lede kara kara tɔyn.
10 E-ddade to dewje ke me Bbe-kɔn te le Lubba, ke nje-poleje, kare n̂-ddaje kula laa.
Da kɔn mbay dɔ nange te.
11 Maa lo bbay a, moo ndu anjije banya banya. Kɔrde ase doro doro ase tura ang. N̂-gukuje dɔ ngende-mbay le, ke dɔ neje sɔ ke toje kem baa le, ke dɔ tɔkuje le.
12 Dɔsuje pa ke singa na:
Ngonn bate ke n̂-tɔle le,
ase ta kinga singa-mɔngu, ne-kinga, ke kem-kare,
nase ta kinga singa, piti, kɔsu gaji,
nase kare dewje waleje.
13 Moo ndu neje tɔyn ke Lubba ddade ngaa toje me dara te, dɔ nange te, gel nange te, dɔ ba-kate te, ke me ba-kate te. Dɔsuje pa na:
«Maji kare piti, wal, kɔsu-gaji, ke singa-mɔngu,
toje to le ne ke nisi ngende-mbay te le ddem,
le Ngonn bate le ddem, ke ndɔ ke ndɔ.»
14 Neje ke sɔ ke toje kem baa le paje na: «Amem!» A tɔkuje le ɔsuje mekeji gɔlde nangê ngaa poloje ne ke nisi ngende-mbay te le ddem, Ngonn bate le ddem.