18
Gowoko batugianoŋ moronoŋ uuta kolooja?
Maak 9.33-37; Luuk 9.46-48
1 Kambaŋ kanoŋ gowoko yoŋonoŋ Jiisaswaanoŋ kaŋ kokaeŋ ijogi, “Siwewaa bentotoŋ uutanoŋ moronoŋ uuta kolooja?”
2 Kaeŋ ijogi merabora melaa moŋ qaro karo batugianoŋ ano nano.
3 Nano kokaeŋ jero, “Niinoŋ qaa hoŋa moŋ kokaeŋ iŋijowe mobu: Uugia mende meleema merabora kaaŋa mende koloowuti eeŋ, oŋo mono kambaŋ moŋnoŋ Siwewaa bentotonoŋ mende keubuya.
4 “Kawaajoŋ moŋnoŋ iyaŋa meŋ kamaaŋ aoŋ merabora kokaaŋa koloowaati, iinoŋ mono Siwewaa bentotoŋ uutanoŋ uuta kolooja.
5 Moŋnoŋ merabora koi kaaŋa moŋ noo qananoŋ koma horoŋ kalaŋ kombaati, iinoŋ mono nii koma horoŋ nombaa.” Kiaŋ.
Siŋgisoŋgowaa koŋgoro mono qotogowu.
Maak 9.42-48; Luuk 17.1-2
6 Jiisasnoŋ toroqeŋ kokaeŋ jero, “Merabora koi kaaŋa moma laariŋ nonjuti, moŋnoŋ iyoŋoonoŋga moŋ koŋgoro ama muro siŋgisoŋgo ambaati, eja iikanoŋ mono lombo uuta mokoloowaa. Anutunoŋ lombo iikawaa iroŋa nomaeŋ muro soyanoŋ koloonaga? Kemuŋ kowonjiŋ aroyanoŋ somoŋgoŋ kowe biiwianoŋ giligi kemenagati, iikanoŋ mono afaaŋkota koloonaga.
7 “Siŋgisoŋgowaa siipatitianoŋ mono afaaŋagadeeŋ kolooŋkeja. Kawaajoŋ baloŋ ejemba oŋoojoŋ ‘Yei!’ wosobiri mojeŋ. Moŋnoŋ siipatiti aŋgoŋ komambaajoŋ amamaaŋkejato, moŋ moronoŋ tosaaŋa koŋgoro ama oŋono siŋgisoŋgo ambuti, iwaajoŋ mono ‘Yei!’ qama wanjinjiŋgoŋ saajeŋ. Siimbobolo uutanoŋ mono iwaa qaganoŋ ubaa.
8 “Boroganoŋ me kanaganoŋ siŋgisoŋgo ambaatiwaa koŋgoro ama gombaati eeŋ, ii mono kotoŋ giliwa. Kotoŋ giliŋgo borodomoŋ me kanadomoŋ laligoŋ laaligo kombombaŋa mokolooŋ oompeleleŋ mokoloowagato, kana boroga woiwo laligona kanageŋ gere sianoŋ giligi kemebabo. Sia gereya ii tetegoya qaa jewaa.
9 “Kaaŋiadeeŋ jaaganoŋ siŋgisoŋgo ambaatiwaa koŋgoro ama gombaati eeŋ, ii mono qonjoma giliwa. Qonjoma giliŋgo jaakoga motooŋgowo laligoŋ laaligo kombombaŋanoŋ keuma oompeleleŋ mokoloowagato, jaaga woiwo laligona gere siawaa gerenoŋ giligi kemebabo. Kiaŋ.
Lamanoŋ soorotiwaa sareqaa
Luuk 15.3-7
10 “Ejemba melaa koi yoŋoonoŋga moŋ meŋ kamaaŋ mububotiwaajoŋ mono galeŋgia mewu. Niinoŋ qaa kokaeŋ iŋijowe mobu: Yoŋoo kokojiji gajobaurugianoŋ Siwe gomaŋ iikanoŋ noo Siwe Amanaa kosianoŋ laligoŋ jaasewaŋa suulaŋ iimakeju. Kawaajoŋ jejewili mono mende ama oŋombu.
11 (Siwe gomambaa Eja hoŋanoŋ mono ejemba soogiti, ii meŋ letoma oŋono oyaŋboyaŋ koloowutiwaajoŋ kamaaro.)
12 “Oŋo qaa koi kawaajoŋ nomaeŋ romoŋgoju? Eja mombaa lamauruta 100 laligogi yoŋoonoŋga moŋnoŋ sooŋ jiŋjauŋ keno toyanoŋ nomaeŋ ambaa? Iinoŋ mono 99 ii baaŋanoŋ oŋomesaoŋ kema motooŋgo jiŋjauŋ kenoti, iikawaajoŋ moŋgama kembaa.
13 Moŋgama kema laligoŋ mokoloowaati eeŋ, niinoŋ qaa hoŋa moŋ kokaeŋ iŋijowe mobu: Iinoŋ 99 jiŋjauŋ mende keŋgiti, iyoŋoojoŋa kambaŋ iikanoŋ mamaga mende aisoowaato, motooŋgo iikawaajoŋ honombonoŋaga mende aisooŋ laligowaa.
14 Iikawaa so oŋoo Maŋgia Siwe gomanoŋ laligoji, iinoŋ mono ejemba melaa koi yoŋoonoŋga moŋnoŋ sooŋ gere sianoŋ mende kemebaatiwaajoŋ momakeja.” Kiaŋ.
Alaganoŋ siŋgisoŋgo ama gono kokaeŋ amba:
15 “Uumeleeŋ alaganoŋ siŋgisoŋgo ama gombaati eeŋ, gii mono iwaanoŋ kema jaasewaŋ qeŋ muŋ kana soŋgiroti, ii qendeema muba. Kaeŋ ana qaaga moma baatanoŋ kembaati eeŋ, giinoŋ mono alaga haamo ama muna mombo uumotooŋgo ama laligowao.
16 Kaeŋ ana qaaga moma iikawaa baatanoŋ mende kembaati eeŋ, giinoŋ mono toroqeŋ ala motooŋgo me woi uruama iwaanoŋ kembu. Buŋa Terewaa qaa kokawaa so mono kaeŋ amba, ‘Qaa kuuya ii ejemba woi karoonoŋ naŋgoŋ jegi kotiiwaa.’
17 “Kaeŋ aŋgi qaagia moma iikawaa baatanoŋ mende kembaati eeŋ, giinoŋ mono uumeleeŋ kanagesowaa jotamemeya ii iŋijona iwo amiŋ mobu. Amiŋ mobuto, iyoŋoo qaa baatanoŋ kaaŋagadeeŋ mende kembaati eeŋ, ii mono asuganoŋ jegi jawo kolooro uumeleembaa gadokopa kaaŋa ama muŋ laligowa. Takis tiliqiligiawo megi sisigia meŋkejuti, iikawaa tani kaaŋa ii mono mesaona seleeŋgeŋ laligowaa.
Siŋgisoŋgowaa soomoŋgoya ano iisaŋa
18 “Niinoŋ qaa hoŋa tooŋ moŋ kokaeŋ iŋijowe mobu: Oŋonoŋ siŋgisoŋgo namonoŋ somoŋgowuti, ii kuuya mono Siwe gomanoŋ kaaŋagadeeŋ soomoŋgoya ewaa ano siŋgisoŋgo balonoŋ mesaoŋ isambuti, ii kuuya mono Anutunoŋ mesaoro Siwe gomanoŋ kaaŋagadeeŋ ewaa.
19 “Toroqeŋ qaa kokaeŋ iŋijowe mobu: Namonoŋ oŋoonoŋga woiyanoŋ qaa ii me ii kawaajoŋ uumotooŋ ama qama kooliwaotiwaa qaa somoŋgowaoti, noo Maŋna Siwe gomanoŋ laligoji, iinoŋ mono ii orono buŋa qeŋ aowaota.
20 Ii kokaembaajoŋ: Ejemba woi me karoonoŋ noo qananoŋ iikanoŋ me kanoŋ ajoroowuti, niinoŋ mono iikanoŋ yoŋoo batugianoŋ laligomaŋa.” Kiaŋ.
Weleŋqeqe kiaŋkomuya qaa iwaa sareqaa
21 Kambaŋ kanoŋ Piitonoŋ Jiisaswaanoŋ kaŋ qaa kokaeŋ ijoro, “Poŋ, alananoŋ siŋgisoŋgo ama nomakeji, niinoŋ ii indiŋ dawiwaa so mesaowe sokombaa? Indiŋa 7 ii mamaga. Iikawaa so mesaowe sokombaa me qaago?”
22 Jiisasnoŋ ii moma kokaeŋ meleema muro, “Indiŋa 7 qaagoto, 70 taims 7 ii mesaona sokombaa. Niinoŋ kaeŋ gijojeŋ.
23 Iikawaa kania ii kokaeŋ jeŋ asarimaŋa. Siwewaa bentotoŋa ii kiŋ eja pombaa so ambe kokaeŋ kolooja: Kiŋnoŋ weleŋqeqeuruta oŋoono moneŋgia galeŋ koŋgiti, iikawaa areŋ papiaya qendeeŋgi mindiŋgowaatiwaajoŋ kaparaŋ kono.
24 “Kaeŋ kanaiŋ moneŋa iikawaa sunduya gosiŋ mindiŋgogi kanoŋ eja moŋ wama kagi iwaa jaanoŋ nano. Tosaya ii 10 milyon Kina iwaanoŋ ero.
25 Ii eroto, tosaya ii kumambaajoŋ moneŋa mende sokono amamaarotiwaajoŋ ama somatayanoŋ nama kokaeŋ jeŋ kotoro, ‘Esuhinaya eji, ii kuuya mono sewaŋa mewutiwaajoŋ ambu. Ii ano embameraaŋa ii kaaŋagadeeŋ mono sewaŋgia mewutiwaajoŋ aŋgi moneŋ karo iikanoŋ tosaya ii kumbu.
26 “Kaeŋ jeŋ kotoro weleŋqeqeyanoŋ batanoŋ kamaaŋ simiŋ kuma usugoŋ kokaeŋ welema muro, ‘Gii mono uugere mende ama mokosiŋgoŋ mamboma nona goonoŋ tosaga kuuya ii saanoŋ kuma gomaŋa.’
27 Kaeŋ welema muro somatayanoŋ weleŋqeqeyaajoŋ wosomomo ama tosaya ii kotoŋ mesaoŋ isano kamaaro.
28 Kamaaroto, seleeŋgeŋ kema kanoŋ weleŋqeqe alia moŋ mokolooŋ iiro. Iwaa tosaya ii weeŋ 100:waa tawaya (Kina 2,000) kawaa so iwaanoŋ ero. Ii iima aroya kotakota meŋ mosoma kokaeŋ ijoro, ‘Noonoŋ tosa goonoŋ eji, ii mono kuma nombaga me?’
29 “Kaeŋ ijoro weleŋqeqe alianoŋ batanoŋ kamaaŋ simiŋ kuma usugoŋ kokaeŋ welema muro, ‘Gii mono uugere mende ama mokosiŋgoŋ mamboma nona goonoŋ tosaga ii saanoŋ kuma gomaŋa.’
30 “Kaeŋ ijoroto, iinoŋ ii togoŋ kema jenteego eja majistreit ijoro meŋ somoŋgoŋ kapuare mirinoŋ ooŋgi raro tosaya kundaborogi kamaawaa.
31 Iwoi ii kolooro weleŋqeqe alaurutanoŋ tani ii iima uugia kobooro wosobiri moma kema iikawaa sunduya kuuya ii somatagia ijogi moro.
32 “Ii moma somatagianoŋ weleŋqeqe mutuya ii qaro jaayanoŋ karo kokaeŋ ijoro, ‘Gii gawoŋ meme eja bologa! Gii tosaga kotoŋ mesaomambaajoŋ qisiŋ nona niinoŋ ii kuuya mesaoŋ gonjeŋ.
33 Niinoŋ giima kobooŋ kiaŋkomuŋ gombe giinoŋ kaaŋagadeeŋ iikawaa so weleŋqeqe alaga kiaŋkomuŋ muna sokonaga.’
34 “Somatayanoŋ kaeŋ ijoro iriŋa soono weleŋqeqe iikawaa qaaya jeŋ tegoŋ kasa miriwaa galeŋ yoŋoo boronoŋ ama muro siimbobolo mamaga moma rabaa. Iikanoŋ rama tosaya kiŋ pombaanoŋ eroti, ii kuuya kundabororo kamaawaa.
35 Sareqaa kokawaa hoŋa ii kokaeŋ: Oŋo motomotooŋ alagiaa siŋgisoŋgoya uugianoŋ mende mesaowuti eeŋ, noo Siwe Maŋnanoŋ mono kaaŋagadeeŋ qaa iikawaa so ama oŋombaa.” Kiaŋ.