28
Jiisasnoŋ koomunoŋga waaro.
Maak 16.1-10; Luuk 24.1-12; Jon 20.1-10
1 Sabat kendoŋ ragi tegoro Sonda umugawodeeŋ waama gomaŋ ano Maria Magdalaga ano alia Maria moŋ yoronoŋ qasiriwaa jamo kobaa iibotiwaajoŋ keni.
2 Keni iikanondeeŋ naŋ somata kokaembaajoŋa mero: Pombaa gajoba moŋnoŋ Siwenoŋga kamaaŋ qasirinoŋ kaŋ qaa ootanoŋ jamo somata qetano keno qaganoŋ raro.
3 Gajobawaa kaitania ii pilisik kaaŋa kolooro malekuya ii koosu kaaŋa tualalakota kolooro.
4 Kaeŋ asugiro manjaqeqe eja qasiri galeŋ megiti, iyoŋonoŋ iwaajoŋ awawaliŋ jeneŋgia ororo komuŋ torigi.
5 Kaeŋ aŋgi gajobanoŋ emba woi ii qaa kokaeŋ irijoro, “Jiisas maripoonoŋ qegiti, oro iwaajoŋ moŋganjaoti, ii mojeŋ. Kawaajoŋ mono toroko mende mobao.
6 Aŋo jerotiwaa so mono koomunoŋga waaja. Kawaajoŋ koi mende eja. Mono kaŋ duŋ eroti, ii iibao.
7 Ii iima uulaŋawo gowokouruta yoŋoonoŋ kema buju qaa koi iŋijowao, Jiisasnoŋ koomunoŋga waaja. Mobu, iinoŋ mono waladeeŋ Galili prowinsnoŋ kembaa. Oŋo saanoŋ iikanoŋ kema ii iibu. Mobu, niinoŋ ii mono iŋijowe mogi.”
8 Kaeŋ irijoro uulaŋawodeeŋ qasiri mesaoŋ toroko moma kileŋ honombonoŋa mende aisooŋ buju ii meŋ gowokouruta iŋijowaotiwaajoŋ uulaŋawo keni.
9 Uulaŋawo keni Jiisasnoŋ ii kananoŋ asugiŋ oroma “Gomaambagara!” irijoro. Kaeŋ irijoro kosianoŋ kema usugoŋ kanianoŋ meragoŋ waeya meŋ mepeseeŋ muri.
10 Mepeseeŋ muri kokaeŋ irijoro, “Toroko mende mobao. Mono kema kourunanoŋ Galili kembutiwaa qaa iŋijori iikanoŋ kema nii niibuya.” Kiaŋ.
Qasiri galeŋ meme yoŋonoŋ sundugia jegi.
11 Embawoi yoronoŋ kana keni qasiriwaa jamo kobaawaa galeŋ meme manjaqeqe eja tosianoŋ sitinoŋ kaŋ jigo gawoŋ galeŋ iŋiima iwoi kuuya kolooroti, iikawaa sunduya iŋijogi.
12 Yoŋonoŋ ii moma Juuda yoŋoo jotamemeurugia horoŋ oŋoŋgi motooŋ ajoajoroo ama Jiisas waawaataa qaa mesaŋgowoŋatiwaa qaa areŋ mokolooŋ moneŋ somata totooŋ ii manjaqeqe eja oŋoŋgi.
13 Ii oŋoma kokaeŋ jeŋ kotoŋ oŋoŋgi, “Oŋo mono qaa kokaeŋ jewu: Nono gomantiiŋanoŋ gaoŋ eniŋ gowokourutanoŋ oloŋ kaŋ qamoya yoŋgoro meŋ keŋgi.
14 Qaa kaeŋ jegi qaa iikanoŋ gawanawaa gejianoŋ kemero mobaati eeŋ, lombo oŋoo qagianoŋ ubabotiwaajoŋ nononoŋ mono uuta meŋ looriŋ meŋ kamaaŋ aniŋ majakakaya qaa laligowu.”
15 Kaeŋ jeŋ kotoŋ oŋoŋgi iikawaa so otaaŋ moneŋ meŋ kema gawoŋ qaagia otaagi. Kaeŋ aŋgi Juuda yoŋonoŋ qaa ii batugianoŋ jeŋ seigi moma laligogi kema kambaŋ kokaamba kaaŋagadeeŋ ii toroqeŋ jegi momakejoŋ. Kiaŋ.
Misin gawoŋ mewoŋatiwaa jeŋkootoya
Maak 16.14-18; Luuk 24.36-49; Jon 20.19-23; Apo 1.6-8
16 Gowokouruta 11 yoŋonoŋ Jerusalem mesaoŋ Galili prowinsnoŋ kema Jiisasnoŋ baaŋanoŋ kawutiwaajoŋ iŋijoroti, iikanoŋ ugi.
17 Iikanoŋ uma Jiisas iima waeya meŋ mepeseeŋ mugito, tosianoŋ iwaajoŋ uuwoi mogi.
18 Mepeseeŋ mugi yoŋoonoŋ kaŋ kokaeŋ iŋijoro, “Siwewaa ano namowaa ku-usuŋ kuuya ii Anutunoŋ nonota noonoŋ eja.
19 Kawaajoŋ oŋo mono gomaŋ so kema ejemba tuuŋ kuuya kokaeŋ iŋijoŋ oŋoŋgi noo gowokouruna koloowu: Ii mono Maŋ, Mera ano Uŋa Toroya nonoo qanoŋ oomulu meŋ oŋombu
20 ano niinoŋ qaa otaawutiwaajoŋ jeŋ kotoŋ oŋombeti, ii kuuya teŋ kombutiwaajoŋ mono kuma oŋoma laligowu. Mobu, niinoŋ mono kambaŋa kambaŋa oŋowo laligoŋ kema laligowe namowaa kambaŋanoŋ tegowaa.” Kiaŋ.