12
Emba ano jewenaŋ waŋa iliawo
1 Siwenoŋ aiwese somata damuyawo moŋ kokaeŋ asugiro iibe: Emba moŋ weeŋ jaayanoŋ malekuya kolooro koiŋnoŋ kana tamboya baatanoŋ asariro seŋgelao 12 ii ila wage kaaŋa waŋanoŋ koŋgi kokobilibiligiawo ragi.
2 Koroyawo laligoŋ mera memetaa kambaŋanoŋ dodowiro bimooro masu qero siimbobolo moma qa gigilaaro.
3 Kawaa gematanoŋ aiwese moŋ Siwenoŋ kokaeŋ asugiro iibe: Jewenaŋ nemuŋa iliawo (dragon), mundaya oso popolaŋ, waŋa 7 ano ilia 10. Waŋa 7 iikanoŋ ila wage 7 koŋgi raro.
4 Jewenaŋ nemuŋa iikanoŋ daayanoŋ sombiŋ qewagoŋ seŋgelao iyoŋoonoŋga bakaya karooŋ horoŋ giliro namonoŋ kamaagi. Kamaagi emba iyaŋa mera memambaajoŋ anoti, iwaa batanoŋ nano. Kaeŋ nama meria mewaati, ii iikanondeeŋ gogomambaajoŋ moro.
5 Emba iikanoŋ mera ejaga mero. Iinoŋ kantria kantria kuuya aeŋ taa gbarunoŋ galeŋ koma oŋoma laligowaa. Embanoŋ mera meroti, gajobanoŋ ii mono iikanondeeŋ uulaŋawo meŋ kema Anutuwaa jiŋkaroŋ duŋ kooroŋanoŋ ano.
6 Iikanoŋ ano embanoŋ aŋodeeŋ mesaoŋ kok koma keno. Anutunoŋ emba ii weeŋ 1,260 kawaa so baloŋ qararaŋkoŋkoŋanoŋ kalaŋ koma mugi laligowaatiwaajoŋ gomaŋ miri moŋ mozozoŋgoroti, iikanoŋ kok ama keno.
7 Siwe uutanoŋ manja juno kokaeŋ aogi: Siwe gajoba waŋa Maikel ano iwaa gajobauruta yoŋonoŋ jewenaŋ nemuŋa tuarenjeŋ ama ii ano iwaa gajobauruta yoŋowo aogi.
8 Aoŋ jewenaŋ nemuŋa ano iwaa gajobauruta yoŋoo esuŋgianoŋ mende sokono haamo mende ama oŋoma gomaŋgia mesaoŋ Siwe uutanoŋ toroqeŋ laligowombaajoŋ amamaagi.
9 Amamaagi jewenaŋ nemuŋa iliawo ii mono konjoma Siwenoŋga otaagi. Jewenaŋ nemuŋa iikanoŋ monowaa monoyanoŋga mokoleŋ kolooŋ Iiw (Eewa) manambato meŋ muro. Qata moŋ Kileŋaa Toya ano Satan. Iinoŋ kantria kantria kuuya kuuŋ oŋono jinjauŋ kema laligogiti, ii ano iwaa gajobauruta ii mono iwo Siwenoŋga konjoma hagoŋ oŋoŋgi namonoŋ kamaagi.
10 Kamaagi Siwenoŋ qa somata moŋnoŋ kokaeŋ jero mobe, “Selenoŋ kuukuu Toyanoŋ asaga gomantiiŋa Anutunanaa batanoŋ nama uumeleeŋ alaurunana jenoŋkuukuu qaa jeŋ oŋoma laligoroti, ii mono yakariŋ hagoŋ mugi seleeŋgeŋ kamaaro otokoriaŋ maajoŋ. Ananaa Anutunananoŋ mono kambaŋ kokaamba ejemba hamo qeŋ oŋoma ku-usuŋaa qaganoŋ galeŋ koma oŋono bentotoŋaa hoŋanoŋ mono kolooja. Hamoqeqe Toyaa esuŋmumuyanoŋ mono koloodaboroja.
11 Iinoŋ momalaari alaurunana qaanoŋ ama oŋoma laligoroto, Toya ii kokaeŋ haamo ama mugi: Lama meriaa sayanoŋ ii hamo qeŋ oŋono kotiiŋ Buŋa qaa hoŋaboŋa naŋgoŋ jeŋ seiŋ laligogi. Kaaŋa laligoŋ jojoriŋ selegia togoŋ boŋ nama manja qeŋ haamo aŋgi.
12 “Kawaajoŋ Siwe gomanoŋ laligojuti, oŋonoŋ mono korebore aisooŋ otokoriaŋ maama laligowu. Kaaŋa laligowuto, namonoŋ ano kowenoŋ laligojuti, oŋo mono lombo kanjaŋawo bosimbutiwaajoŋ mono ‘Yei!’ jeŋ saajeŋ. Kileŋaa Toyanoŋ luguŋ kamaaŋ riiŋ oŋoonoŋ kaŋ gawoŋ meme kambaŋa torodaamoŋ ero mojiwaajoŋ mono kazi somata amakeja.”
13 Jewenaŋ nemuŋa iliawo yakariŋ hagoŋ mugi namonoŋ kamaaroti, ii iima asariŋ emba mera meroti, ii kazi ama muŋ otaaro.
14 Otaaroto, embanoŋ kok kono Anutunoŋ tuu somataa eŋgaŋa woi muro kanoŋ elelaoŋ uulaŋawo keno. Anutunoŋ baloŋ qararaŋkoŋkoŋanoŋ iwaajoŋ gomaŋ miri moŋ mozozoŋgoroti, mono iikanoŋ keno. Iikanoŋ kema asaŋgoŋ laligoro gbani 3 ano bakaya moŋ ii kalaŋ koma mugi mokolenoŋ ii mende mokolooŋ qelanjiŋ mewaa.
15 Embanoŋ elelaoŋ keno mokolembaa iriŋa soondabororo qaa ootanoŋga embawaa gematanoŋ apu gboulu furugoro apu gowoya kolooro. Apu iikanoŋ emba ii kisama meŋ somoŋgoŋ mubaatiwaajoŋ moma kaeŋ furugoŋ lono.
16 Kaeŋ lonoto, namonoŋ emba ii ilaaŋ muŋ riiro roŋ kolooro. Jewenaŋ nemuŋanoŋ qaa ootanoŋga apu furugoro apu gowoya kolooroti, iikanoŋ mono roŋ iikanoŋ kemeŋ juguŋ qaono.
17 Kaeŋ kolooro jewenaŋ nemuŋaa iriŋa emba kawaajoŋ ama soono mesaoŋ emba iikawaa gbiliuruta tosaaŋa qetama manja qeŋ oŋomambaajoŋ keno. Gbiliuruta yoŋonoŋ Anutuwaa jojopaŋ qaa teŋ koma Jiisaswaa Buŋa qaa pondaŋ naŋgoŋ jeŋ seiŋkejuti, mono iyoŋowo kareŋ aowombaajoŋ keno.
18 Aowombaajoŋ kema kowe sakasiŋanoŋ keuma nano. Kiaŋ.