2
‑Tɛ Nyɩsʋa a ‑Hihiu* nu la didie
1 Ɛ kɔ la ‑Juukʋɛ* a lɛ'mimle ‑bɩ, 'ʋ dɛɛ ꞊nɛ Patɩkɔtɩ. ‑Tɛ lɛ'mimle a 'mʋ, 'a ‑nyrɔwɔ nyre 'ʋ, ‑ɛ ‑bɩ ‑Yusu a nyibli 'kukue lɛ, 'kɩ 'ʋ ‑tɛ nɩ ‑do, 'kɩ 'lɩ Jrusrɛdɩɔ 'kwli.
2 'Kɩ ʋ nɩ 'ʋ ‑tɛ nɩ ‑do a 'mʋ bʋ, ti nɩ ‑do a ti 'yri, ‑ɛ ‑bɩ ʋ 'wɩn win, 'ɛ ‑hɔn 'lɩ yakɔ 'kwli, ꞊wɩ yɩ ‑tɛ duduo bʋ 'yɛ nɩ ‑hi wɛn. Win a 'mʋ, ɛ kaa 'lɩ 'kayu a pɛpɛ ‑mʋ' blɛ, ‑ɛ kɔ bʋ ʋ 'kukue 'lɩ lɛ.
3 ‑Ɛ ‑bɩ ʋ 'ye ‑tɛblɩ ‑mʋ' nɩ, ‑ɛ 'wɩ‑ na a ‑huhli yɩ, 'ɛ pʋ dodoyo, 'ɛ ꞊tɩɩ 'ʋ ꞊nʋ 'lu.
4 Kɛ‑ ɛ ꞊ti 'mʋ, Nyɩsʋa a ‑Hihiu 'ɛ bi 'ʋ nyibli a pɛpɛ a 'mʋ ke', nyibli a 'mʋ 'ʋ ‑tʋa dakɔ a gblegble a win, 'waa 'mumu, ʋ 'yɩ ‑yi a pʋpʋʋ. Nyɩsʋa a ‑Hihiu a 'mʋ, ɛ nɔ‑ nu꞊o, 'ʋ pɩ win a 'mʋ.
5 ‑Ɛ ‑bɩ, 'kɩ 'lɩ Jrusrɛdɩɔ 'kwli, ɛ kɔ la ‑Juukʋɛ ꞊dʋ, ‑ʋ yɩ Nyɩsʋa ꞊wien kʋɛ. ‑Juukʋɛ a 'mʋ, nʋ‑ ‑hɔn la 'lɩ 'blʋgbɩ a gblegble klɛ, ‑ʋ nɩ 'nɛ‑ 'klɔ a pɛpɛ kɩ, 'ʋ di Jrusrɛdɩɔ 'kwli.
6 Nyibli a 'mʋ, 'tɩ‑ ʋ 'mʋ win a 'mʋ 'wɩn mɔ mu, 'waa ‑hʋɔhʋɩ ya cigbɛ, 'ʋ ‑di, 'ʋ 'kukue lɛ, 'kɩ 'ʋ ‑tuo a 'mʋ kɩ. Ɛ kɛɛ 'waa pɛpɛ a ꞊wlɩ lɛ, ‑kɔtɩ ʋ yɩ ‑Yusu a nyibli 'nɩ 'ye, 'ʋ pɩ 'bliwin a gblegble, 'tɩ‑ 'a ‑nɛ nyiblo, ‑ɛ di ‑tuo a 'mʋ kɩ, 'ɛ yɩ 'a dɩɔnʋ a 'bliwin 'wɩn.
7 Ɛ kɛɛ ꞊nʋ ꞊wlɩ lɛ dɩakɩ, ʋ wɛn: «'Bɩ nyibli ‑bʋ, ‑ʋ yɩ hle, 'kɩ 'waa pɛpɛ, ʋ kɔ 'lɩ Galileblʋgba 'kwli. 'Waa 'bliwin mɔ ‑Juukʋɛwin.
8 Dɛ‑ kɔ ‑tɩ 'ʋ pɩ ‑aan ‑nɛ 'bliwin 'lɩ, ꞊a yɩ꞊ɩ 'wɩn 'lɩ?
9 'Kɩ 'nɛ‑ ‑a mʋ 'nyɩ nyibli nɩ 'nɛ‑, 'ʋ ‑hɔn 'lɩ Patɩblʋgba 'kwli, ‑ʋ ‑bɩ 'ʋ ‑hɔn 'lɩ Mɛdɩblʋgba 'kwli, kɔ Elamʋ, kɔ Mesopotami, kɔ Sude, kɔ Kapadɔsɩ, kɔ Pɔn, kɔ Asi,
10-11 kɔ Flisi, kɔ Pafili kɔ Esipʋblʋgba 'kwli, kɔ Libi a 'blʋgbakʋtɩɔ ‑mʋ' 'kwli, ‑ɛ 'mʋɛ Silɛnɩdɩɔ yrɛ, kɔ Klɛtɩblʋgba kɔ Arabiblʋgba 'kwli, ‑ʋ ‑bɩ 'ʋ ‑hɔn 'lɩ Rɔmʋdɩɔ 'kwli. ‑Ʋ ‑bɩ nɩ 'nɛ‑ ‑a mʋ 'nyɩ, 'ʋ mɔ ‑Juukʋɛ, ‑ʋ ‑bɩ 'yɩ ‑Juukʋɛ 'pa‑, kɛɛ, ʋ ‑hɛ ‑Juukʋɛ. Kɛɛ, ‑aan pɛpɛ, ‑a yɩ 'nɩ 'wɩn, ‑tɛ ʋ pɩ ‑aan 'bliwin, 'ʋ nɛ Nyɩsʋa a nunu‑tɛblɩ gbagbɩ a ‑tɩ ‑mɔ lɛ.»
12 Ɛ kɛɛ 'waa pɛpɛ lɛ dɩakɩ. 'A ‑tɩ, dɛ bʋ di 'lu ‑mɔ lɛ ‑hie, ʋ 'nɩ 'ye꞊e lɩ꞊ɩ. Kɛ‑ ʋ pɩpɩ yrɛ: «Dɛ a 'dɩ ‑bɩ dɛ a 'mʋ, ɛ ꞊hɛn 'nyrɛ 'lɩ?»
13 Kɛɛ, ‑ʋ ‑bɩ nɩ 'ʋ, 'ʋ yɩ ‑Yusu a nyibli 'caa ‑nɩ, ʋ wɛn: «Nɔ ni ꞊nʋ nɩ.»
‑Tɩ ‑bʋ, Piɛlɩ lee dakɔ, 'kɩ 'lɩ Patɩkɔtɩ a ‑nyrɔwɔ 'kwli
14 Piɛlɩ kɔ 'a 'bio ‑Yusu a ‑mɔnanyʋ* nɩ ‑pu ꞊tu 'ʋ ‑do ‑mʋ' 'hʋɛn‑, 'tɩ‑ ʋ 'mʋ ‑tɩ a 'mʋ 'wɩn mɔ mu, ‑ɛ ‑bɩ ʋ 'du ye', Piɛlɩ 'ɛ 'yɛɛ 'lɩ win, 'ɛ yɩ 'lɩ nyibli ‑hʋɔhʋɩ ‑mʋ', ‑ʋ nɩ 'ʋ ‑mɔ ‑hlee ‑nɩ, ɛ wɛn: «'A mʋ ‑Juukʋɛ*, 'dagbɩ kɔ Jrusrɛdɩɔ a nyibli 'hʋɛn‑, ba pʋ 'mʋ nʋa yɩ bʋ, ‑tɩ 'n di ‑mɔ lɛ na, a 'mʋ꞊ʋ 'wɩn.
15 'Kɩ 'lɩ 'a mʋ 'nyɩ, ‑ʋ ‑bɩ wɛn 'nɩ, nyibli ‑bʋ, nɔ ‑ni ꞊nʋ. Kɛɛ, ɛ 'yɩ nɔ 'pa‑, ɛ 'nɩ ‑nu꞊o lɩ ꞊nʋ, ‑kɔtɩ 'yrʋ, nɔ‑ 'tɩɛ 'ya 'ʋ.
16 Kɛɛ, ‑tɛblɩ ‑bʋ, ‑ɛ mi 'lu ‑mɔ, Nyɩsʋa a winwlɔn‑hanyɔ* Sʋɛlɩ hla la꞊a nɩ, ti ‑bʋ, ‑ɛ nɛ, 'a 'yrɩ ꞊gbʋgbɛ klɛ. Kɛ‑ ɛ pɩ la:
17 Nyɩsʋa wɛn 'nɩ,
lɛ'bɔɔti 'yri, ‑tɛblɩ ‑bʋ,
‑ɛ di 'lu ‑mɔ mu, ɛ nɔ‑ ‑bʋ:
'N di 'na ‑Hihiu* dakɔ a pɛpɛ 'nɩ ‑nyi.
'Aan 'yonʋ di ‑hɛ 'na win wlɔn,
ʋ 'mʋ ‑tɛblɩ 'ye,
'aan kukunyʋ di 'ya yanie,
'kɩ 'ʋ Nyɩsʋa a ‑tɛblɩ kɩ.
18 'Na ‑Hihiu di bi 'ʋ 'na ‑kʋannunyibli a pɛpɛ ke',
nyɩbɛpʋ kɔ nʋgbɩ 'hʋɛn‑, ʋ 'mʋ 'na win wlɔn ‑hɛ.
19 'N di꞊e 'nɩ nu,
'kɩ 'lɩ yɔ' kɔ 'kɩ 'nɛ‑ ‑tʋtʋ kɩ,
a 'mʋ ‑tɛblɩ 'ye, ‑ɛ di 'a mʋ ꞊wlɩ lɛ ‑kɛɛ ‑nɩ.
A di 'ye ‑hlʋ, kɔ na‑huhli, kɔ nahlʋn 'hʋɛn‑.
20 'Yrʋ di 'nɩ jre, ꞊hɔnpʋ di 'nɩ ꞊hlu,
꞊wɩ yɩ ‑hlʋ,
'tɩ‑ Kʋkɔnyɔ a ‑nyrɔwɔ 'mʋ 'ʋ nyre,
‑ɛ mɔ ‑nyrɔwɔ gbagbʋ ‑mʋ',
‑ɛ kɔ 'kwli ɛ di 'ʋ 'a ‑tɩ 'yi 'bʋa ‑nɩ.
21 Ti a 'mʋ 'yri, ‑tonyiblo 'bʋ da Kʋkɔnyɔ,
Kʋkɔnyɔ a 'mʋ, ɛ di꞊e 'nɩ wa.»
22 Kɛ‑ Piɛlɩ pɩ de: «Yisraɛkʋɛ*, ba pʋ 'mʋ nʋa yɩ bʋ: Nasalɛtɩ a ‑Yusu, Nyɩsʋa, nɔ‑ lee 'nɛ꞊ɛ 'a mʋ 'nyɩ, 'ɛ naa 'lɩ꞊ɩ 'lɩ, 'ɛ nu ꞊wlɩlɛkɛɛ‑tɛblɩ a gblegble, 'kɩ 'lɩ 'a mʋ 'nyɩ, ‑ɛ di꞊e nu, a 'mʋ꞊ʋ yi, ‑ɛ mɔ, Nyɩsʋa, nɔ‑ lee 'nɛ꞊ɛ 'a mʋ 'nyɩ.
23 Kɛɛ, ‑Yusu a 'mʋ, ʋ pʋ 'a mɔ꞊ɔ ‑jɩ', 'a naa 'lɩ Romakʋɛ, ‑ʋ 'yɩ Nyɩsʋa ‑yi 'lɩ, 'a kɔ 'ʋ꞊ʋ tugbɛ 'yie, ‑ɛ di꞊e nu, a 'mʋ꞊ʋ 'la. Kɛɛ, ‑tɛblɩ a 'mʋ, Nyɩsʋa a ꞊gbɛtʋ, nɔ‑ ‑hʋa la꞊a, nɔ‑ ‑hie la꞊a 'lu ‑mɔ lɛ, ti ‑hi la a ti 'yri, 'tɩ‑ 'ɛ mu la 'lu ‑mɔ.
24 ‑Tɛ ‑Yusu 'kʋ, Nyɩsʋa ‑ha 'lɩ꞊ɩ 'kʋkʋʋ a 'klɩ bʋ, 'ɛ ‑ha꞊a 'klɔ, ‑kɔtɩ ɛ 'yɩ 'lɩ꞊ɩ 'lɩ ‑wɛ, 'kʋkʋʋ bʋ di꞊e 'klɩ kɩ ‑kɔɔ ‑nɩ.
25 'Ɛ mɔ ‑tɛɛ, kɛ‑ ‑aan 'baɩ gbagbʋ bodɩɔ Dafidɩ pʋ la, 'kɩ 'ʋ ‑Yusu a ‑ta', ɛ wɛn:
Kʋkɔnyɔ Nyɩsʋa, 'n yɩ꞊ɩ 'nɩ 'ye 'a ‑nɛ ti.
'Kɩ ɛ nɩ 'ʋ 'mʋ 'hʋɩ,
‑ɛ di꞊e nu, 'nɩ ꞊ha hʋannʋ pie.
26 Ɛ nɔ‑ nu꞊o, 'nɩ kɔ plɔ a bleelɛ, kɔ,
'na win 'ɛ mɔ dɔdʋwin.
'Ye ꞊bɩɩ 'n di 'kʋ, 'nɩ ‑pie꞊e 'kɩ 'kʋkʋʋ a hʋannʋ,
‑kɔtɩ 'n yi꞊e nɩ,
‑ɛ mɔ, Nyɩsʋa di nu 'mʋ ꞊haandɛ ‑mɔ,
27 'nɩ yi꞊e, ‑ɛ mɔ, ‑mɔ Nyɩsʋa,
꞊yɩ 'lɩ꞊ɩ 'lɩ ‑wɛ, ‑bʋ hie 'lɩ 'mʋ 'kuo a 'bli bʋ,
kɔ, ꞊yɩ 'lɩ꞊ɩ 'lɩ ‑wɛ, ‑bʋ ‑hɔn 'ʋ꞊ʋ ‑mɔ',
'mɔ ‑bʋ, ‑ɛ mɔ ‑na nyiblo,
'na ‑plahʋɩ bʋ ꞊hɔɔn 'lɩ 'dabio 'kwli.
28 ‑Tɔɔ 'mʋ 'hru, 'n kɔ ꞊bʋ na nɩ,
'tɩ‑ 'mʋ ꞊haan'klɔ kɔ.
'Kɩ 'ʋ 'mʋ 'hʋɩ, 'kɩ ‑di 'ʋ nɩ.
Ɛ nɔ‑ di꞊e nu, 'mʋ dɔdʋ nu dɩakɩ.»
29 ‑Ɛ ‑bɩ Piɛlɩ wɛn 'nɩ de: «'Na 'dɩayɩnʋ ‑na, ba kɔ 'a yiyie, ‑ɛ mɔ, ‑tɩ ‑mʋ', ‑aan 'baɩ gbagbʋ bodɩɔ Dafidɩ hla la, ɛ 'yɩ la 'a dɩɔnʋ 'nyrɛ ꞊hɛn, ‑ɛ nu꞊o, ɛ 'kʋ la nɩ, 'ʋ ‑ha la 'ʋ꞊ʋ 'ʋ. 'A 'dabio 'tɩɛ nɩ 'nɛ‑ ‑aan 'bli.
30 Kɛɛ, Dafidɩ a 'mʋ, ɛ mɔ la Nyɩsʋa a winwlɔn‑hanyɔ ꞊nɩɔ, 'tɩ‑ 'ɛ yi la꞊a, ‑ɛ mɔ, Nyɩsʋa 'sʋʋ la꞊a nɩ, ‑ɛ mɔ, Dafidɩ a 'mʋ, 'a 'yonʋ a 'yu ‑bɩ di ‑hɛ la bodɩɔ gbagbʋ, ‑ɛ mɔ Wanyɔ ‑mʋ', Nyɩsʋa pʋ la lɛ, ɛ di la 'a dakɔ yɩ ya.
31 ‑Tɛ Dafidɩ hla la꞊a, ‑ɛ mɔ:
Nyɩsʋa, ꞊yɩ 'lɩ꞊ɩ 'lɩ ‑wɛ, ‑bʋ hie 'lɩ 'mʋ
'kʋkʋnyibli 'nyɩ bʋ,
kɔ, ꞊yɩ 'lɩ꞊ɩ 'lɩ ‑wɛ, ‑bʋ ‑hɔn 'ʋ꞊ʋ ‑mɔ',
'na ‑plahʋɩ bʋ ꞊hɔɔn 'lɩ 'dabio 'kwli,
‑Tɛ Dafidɩ hla la ‑tɩ a 'mʋ, ‑Yusu 'Klɩsʋ bʋ ‑hɔn 'lɩ 'kʋkʋnyibli 'nyɩ, bʋ 'hrɩ 'klɔ, nɔ‑ kɔ ‑tɩ ɛ yɩ la 'ye, 'ɛ nɛ la꞊a ‑mɔ lɛ.
32 ‑Yusu ‑bʋ, ‑kɔtɩ 'n nɛ ‑mɔ lɛ, Nyɩsʋa ‑ha 'lɩ꞊ɩ 'kʋkʋnyibli 'nyɩ nɩ, 'ɛ ‑ha꞊a 'klɔ. Dɛ a 'mʋ, ‑aan pɛpɛ, ‑ʋ nɩ mɔ, ‑a 'ye꞊e nɩ, ꞊a hlɛ꞊ɛ.
33 ‑Tɛ dɛ a 'mʋ, ɛ ‑hi, Nyɩsʋa nu꞊o nɩ, ‑Yusu 'ɛ mu 'lɩ yakɔ 'kwli, 'ɛ nɩ 'ʋ꞊ʋ 'hʋɩ bʋ, Nyɩsʋa a ꞊gbɛtʋ 'ɛ ‑nyi꞊e 'klɩ, 'kɩ bʋ ya ‑a mʋ 'a ‑Hihiu yɩ, Nyɩsʋa pʋ la lɛ, ɛ di la ‑a mʋ yɩ ya, 'ɛ mɔ ‑tɛɛ, ‑Hihiu a 'mʋ, 'ɛ ya ‑a mɔ꞊ɔ yɩ, ꞊wɩ yɩ, ‑tɛ a ni 'a 'yiye ‑tɛ ti nɛ ‑bʋ.
34 ‑Tɛ ‑Yusu ‑nu, 'ɛ 'hrɩ 'klɔ, 'ɛ mu 'lɩ yakɔ 'kwli, Dafidɩ a 'mʋ, ɛ 'yɩ la lɛ ‑nu. Kɛɛ, ‑Yusu, nɔ‑ Dafidɩ ꞊hɛn 'nyrɛ, ‑tɛ ɛ pɩ la lɛ: Kʋkɔnyɔ Nyɩsʋa lee 'na Kʋkɔnyɔ nɩ, ɛ wɛn: Nɩ mɔ 'na diidɛkɩbɩa kɩ bʋ, ɛ 'mʋ꞊ʋ gba ‑gbagba,
35 'mʋ꞊ʋ nu, ꞊mʋ ‑na yraanyibli bʋɩ 'lu blɛ ꞊tu.»
36 Kɛ‑ Piɛlɩ pɩ de, ɛ wɛn: «'A mʋ Yisraɛkʋɛ a pɛpɛ, 'n yɩ 'a mʋ 'nɩ ‑lee ‑nɩ, ‑ɛ mɔ, ‑Yusu ‑bʋ, a kɔ 'ʋ tugbɛ 'yie, nɔ‑ Nyɩsʋa nu ‑aan Kʋkɔnyɔ, kɔ ‑aan Wanyɔ 'hʋɛn‑ ‑mɔ.»
37 Nyibli ‑mʋ', ‑ʋ nɩ 'ʋ, bʋ 'wɩn ‑tɩ a 'mʋ, ‑ɛ ‑bɩ ɛ ‑hrɛn 'waa ꞊wlɩ lɛ dɩakɩ, 'ʋ ‑tʋa Piɛlɩ kɔ ‑Yusu a ‑mɔnanyʋ ‑bɩ ‑mʋ' a lɛ'bɛtilɛ, ʋ wɛn: «'Dɩayɩnʋ ‑na, dɛ‑ ‑a di 'kɩ nu 'lɩ?»
38 ‑Ɛ ‑bɩ Piɛlɩ ꞊tu ꞊nʋ ꞊wɔn, ɛ wɛn: «'A ‑nɛ nyiblo 'bʋ nɩ 'ʋ, bʋ hie 'ʋ 'a ‑nɛ dɛ 'kuku bʋ, bʋ ‑nyi 'a 'klɔ a pɛpɛ Nyɩsʋa, bʋ ‑hʋa꞊a, 'kɩ bʋ pʋ꞊ʋ 'nie 'lu, 'kɩ 'lɩ ‑Yusu 'Klɩsʋ a 'nyrɛ 'kwli, ‑ɛ di꞊e nu, Nyɩsʋa 'mʋ 'a dɛ 'kuku a 'mʋ 'wʋwla ‑nɩ, 'tɩ‑ Nyɩsʋa 'mʋ꞊ʋ 'a ‑Hihiu ‑nyi.
39 Nɔ‑ mɔ dɛ, Nyɩsʋa pʋ la lɛ, ɛ di la nu, 'kɩ 'ʋ 'a mʋ kɔ 'aan 'yonʋ 'hʋɛn‑ ‑mɔ, kɔ 'kɩ 'ʋ nyibli ‑mʋ' ‑mɔ, ‑ʋ nɩ 'nɛ‑ 'klɔ a pɛpɛ kɩ, ‑ɛ ꞊hɛn 'nyrɛ, nyibli a pɛpɛ ‑bʋ, Nyɩsʋa di da, ʋ 'mʋ 'a nyibli ‑hɛ.»
40 Piɛlɩ na ‑tɩ ‑hʋɔhʋɩ ‑mɔ lɛ, ‑ɛ di꞊e nu, ʋ 'mʋ꞊ʋ ꞊han‑tɩ pʋ. Kɛ‑ ɛ ‑pʋ: «Ba wɛn, 'kɩ Nyɩsʋa bʋ wa 'a mʋ, 'a ‑bati 'nɩ ꞊ha 'a mʋ klɔ, ꞊wɩ yɩ, ‑tɛ ɛ di nu, ɛ 'mʋ nyibli ‑mʋ', ‑ʋ ni dɛ 'kuku klɔ.»
41 Nyibli ‑hʋɔhʋɩ 'kɩ 'lɩ ꞊nʋ 'nyɩ, nʋ‑ pʋ Piɛlɩ a win ꞊han‑tɩ, 'tɩ‑ nyibli a 'mʋ, 'ʋ pʋ ꞊nʋ 'nie 'lu lɛ. ‑Nyrɔwɔ a 'mʋ 'kwli, nyibli, ‑ʋ bi ‑Yusu a nyibli kɩ, ʋ ‑wɛ 'lɩ nyibli a 'miliwɩ nɩ ta nɩ.
42 'A ‑nɛ ti, nyibli a 'mʋ, ʋ ꞊mʋɛ꞊ɛ lɛ, 'kɩ ‑Yusu a ‑mɔnanyʋ bʋ tɔɔ ꞊nʋ Nyɩsʋa a ‑tɩ, 'ʋ yɩ dɛ ‑mɔ ‑didi ‑nɩ, 'ʋ yɩ ‑Yusu a lɛ'bɔɔdiidɛ di ‑wɛ, 'ʋ dɛ Nyɩsʋa.
‑Yusu a nyibli a nunuklɔ
43 'A ‑nɛ nyiblo 'bʋ nɩ 'ʋ, ɛ yɩ pie Nyɩsʋa, ‑kɔtɩ 'kɩ Nyɩsʋa nɛɛ 'lɩ 'a ‑mɔnanyʋ* 'lɩ, 'ɛ ni ꞊wlɩlɛkɛɛ‑tɛblɩ ‑hʋɔhʋɩ.
44 Nyibli a pɛpɛ, ‑ʋ kuo ‑Yusu ꞊wlʋ yɩ, ʋ ‑mʋɛ nɩ, ‑tɛblɩ a pɛpɛ, ʋ ‑kɔ, 'ʋ ꞊glɛ꞊ɛ,
45 'ʋ ple 'waa kʋkɔ‑tɛblɩ, 'ʋ ‑hɛ 'lɩ 'a 'wliyɛ 'lɩ, 'ʋ ꞊glɛ꞊ɛ ꞊hɩʋɛnnyibli lɛ, ‑ʋ nɩ 'lɩ ꞊nʋ 'nyɩ, ꞊wɩ yɩ, ‑tɛ 'waa 'kla‑wliye'yɩya ꞊ti 'mʋ.
46 'A ‑nɛ ‑nyrɔwɔ, 'kɩ ʋ yɩ 'lɩ Nyɩsʋa a 'kagbaʋ blɛ 'kukue ‑nɩ, 'kɩ 'ʋ Nyɩsʋa a dɩda a ‑ta', 'ʋ yɩ yɩ blɛ ‑bibi ‑nɩ ‑wɛ, 'kɩ 'lɩ 'waa 'kayo blɛ, 'ʋ yɩ ‑Yusu a lɛ'bɔɔdiidɛ di, kɔ, 'ʋ yɩ dii‑tɛblɩ ‑mɔ ‑didi ‑nɩ, 'kɩ 'lɩ ꞊wlʋ a 'ʋbʋ'wʋwlɛ 'kwli,
47 'ʋ pɩ Nyɩsʋa 'nyrɛ lɛ, dakɔ a pɛpɛ 'ʋ nʋɛ 'waa dɛ, kɔ, 'a ‑nɛ ‑nyrɔwɔ, Nyɩsʋa 'ɛ ni꞊e, nyibli ‑bɩ 'ʋ kue ‑Yusu ꞊wlʋ yɩ, nyibli a 'mʋ, 'ʋ yɩ ‑Yusu a nyibli kɩ bi.