4
1 Ti ‑hi la a ti 'yri, Nyɩsʋa pʋ la 'lɩ꞊ɩ nɩ, ‑ɛ mɔ, ɛ di ‑nyi la 'a nyibli 'hru, ʋ 'mʋ la 'lɩ 'a bʋnɩɩlɛ ‑mʋ' pa, ‑tɩtɛ ‑mʋ', ꞊haan‑wleelɛ nɩ 'lɩ. 'Lɩpʋdɛ a 'mʋ, ɛ 'tɩɛ kɔ 'klɩ, 'kɩ 'ʋ ‑a mʋ ‑mɔ. 'A ‑tɩ, ‑ba ꞊tu ‑aan dɩɔnʋ 'yie, ‑ɛ di꞊e nu, 'kɩ 'nɛ‑ ‑a mʋ 'nyɩ, nyiblo ꞊dʋ 'nɩ ꞊ha bʋ hie, 'kɩ 'ʋ ‑wleelɛ a 'mʋ a 'kwlipʋpa a ‑ta'.
2 ‑Tɛ ‑aan 'baɩnʋ nu la ꞊haantitie a 'mʋ 'a 'wɩnwɩɩn, kɛ‑ ‑aan 'mumu ‑a nu 'a 'wɩnwɩɩn. Kɛɛ, ꞊haantitie a 'mʋ, ɛ 'yɩ ꞊nʋ ‑hɛɛ ‑nɩ, 'kɩ bʋ pa 'lɩ Nyɩsʋa a ‑wleelɛ', ‑kɔ ‑tɩ, ‑tɛ ʋ 'wɩn꞊ɩ, ʋ 'yɩ꞊ɩ ꞊wlʋ yɩ ‑kuo ‑nɩ, 'ʋ 'yɩ 'ʋ Nyɩsʋa 'ʋ ꞊tuu ‑nɩ.
3 ‑A mʋ ‑mɔ ‑bɩ, ‑ʋ kuo ꞊haantitie a 'mʋ ꞊wlʋ yɩ, ‑a mʋ di 'lɩ ‑wleelɛ a 'mʋ pa. ‑Aan 'baɩnʋ ‑mɔ ‑bɩ, ‑ʋ 'yɩ titie a 'mʋ ꞊wlʋ yɩ ‑kuo ‑nɩ, kɛ‑ Nyɩsʋa pɩ, 'kɩ 'ʋ 'waa dɛ kɩ, ɛ wɛn:
«'Kɩ 'lɩ 'na yrʋ a pʋpʋʋ 'kwli, 'n 'sʋʋ ꞊nɛ nɩ,
‑ɛ mɔ, nyibli a 'mʋ, ʋ 'yɩ 'lɩ꞊ɩ 'lɩ ‑wɛ,
bʋ pa 'lɩ 'blʋgba ‑mʋ',
'n di 'na nyibli ‑nyi 'kwli,
‑tɛ ‑mʋ', ꞊haan‑wleelɛ nɩ 'lɩ.»
Dɛ a 'mʋ, ɛ 'yɩ 'nyrɛ ꞊hɛn, ‑ɛ mɔ, ‑wleelɛ 'yɩ 'ʋ Nyɩsʋa 'hʋɩ ‑nɩ, ‑ɛ nu꞊o, ‑tɛ Nyɩsʋa nu la 'klɔ, 'kɩ 'lɩ ‑nyrɔwɩ nɩ ꞊hlon‑do 'kwli, 'kɩ ɛ ‑wɛɛ la 'ʋ 'a ‑kʋan ‑mɔ, 'ɛ ‑wle la.
4 'Kɩ 'lɩ Nyɩsʋacrɩɛn a 'kʋtɩɔ ‑bɩ 'kwli, ʋ hla ‑tɩ, 'kɩ 'ʋ ‑nyrɔwɩ nɩ ꞊hlon'hʋɛn a ‑nyrɔwɔ a dɛ kɩ. ‑Tɩ a 'mʋ, ʋ 'crɩ la, ɛ nɔ‑ ‑bʋ: «Nyɩsʋa ‑wɛ la 'a ‑kʋan a pɛpɛ ‑mɔ, 'kɩ 'lɩ ‑nyrɔwɩ nɩ ꞊hlon‑do 'kwli, ꞊hlon'hʋɛn a ‑nyrɔwɔ, ‑ɛ ‑bɩ ɛ ‑wle la nɩ.» ('A ‑tɩ, ‑wleelɛ nɩ 'ʋ Nyɩsʋa 'hʋɩ.)
5 Kɛɛ, 'kɩ Nyɩsʋacrɩɛn a 'kʋtɩɔ ‑bɩ 'kwli, ʋ 'crɩ꞊ɩ nɩ, ‑ɛ mɔ: «Nyɩsʋa wɛn 'nɩ: ‑Pi, ʋ 'yɩ 'lɩ꞊ɩ 'lɩ ‑wɛ, bʋ pa 'lɩ 'na ‑wleelɛ'.»
6 Yɩ‑hɛnyibli ‑mʋ', ‑ʋ 'wɩn la Nyɩsʋa a ꞊haantitie a 'mʋ, ʋ 'yɩ la 'lɩ Nyɩsʋa a ‑wleelɛ a 'mʋ ‑pa, ‑ɛ nu꞊o, ʋ 'yɩ la꞊a ꞊wlʋ yɩ ‑kuo ‑nɩ, 'ʋ 'yɩ la 'ʋ Nyɩsʋa 'ʋ ꞊tuu ‑nɩ. 'A ‑tɩ, ‑a yɩ꞊ɩ 'nɩ 'ye, ‑ɛ mɔ, ‑tɛ nyibli ‑mʋ', ‑ʋ 'yɩ Nyɩsʋa ꞊wlʋ yɩ ‑kuo ‑nɩ, ʋ 'yɩ la 'lɩ ‑pa, nyibli ‑bɩ, nʋ‑ di 'lɩ pa.
7-8 ‑Aan 'baɩnʋ ‑mʋ', ‑ʋ 'yɩ la Nyɩsʋa ꞊wlʋ yɩ ‑kuo ‑nɩ, ʋ 'kʋkʋ la lɛ, 'kɩ 'lɩ 'blʋgba ‑mʋ', ‑ɛ kɔ kɩ nyiblo ꞊dʋ 'yɩ 'lɩ 'ti. Ti a 'mʋ 'yri, Nyɩsʋa a nyiblo ‑mʋ', ‑ɛ kɔ 'nyrɛ mɔ Sosue, ɛ nɔ‑ nɛɛ la Nyɩsʋa a dakɔ, 'ɛ gba la 'lɩ ꞊nʋ Kanaablʋgba ‑mʋ' 'kwli, Nyɩsʋa pʋ la lɛ, ‑ɛ di la ꞊nʋ ‑nyi. Kɛɛ, Sosue a 'mʋ, ɛ 'yɩ la ꞊nʋ ꞊haan‑wleelɛ ‑nyi, kɩ 'lɩ Kanaablʋgba a 'mʋ 'kwli. 'N hlɛ꞊ɛ nɩ, ‑ɛ nu꞊o, ‑a yi꞊e nɩ, ‑ɛ mɔ, ‑tɛ ʋ nyre la 'lɩ 'blʋgba a 'mʋ 'kwli, ɛ gba 'yrɩ ‑hʋɔhʋɩ, 'tɩ‑ Nyɩsʋa 'ɛ naa 'lɩ 'a ‑kʋannunyɔ Dafidɩ 'lɩ, 'ɛ lee nɛ 'a dakɔ, ɛ wɛn:
«Kɩkɛ ‑bʋ, 'bʋ mɔ, 'ba yɩ kɛ Nyɩsʋa a win nɩ 'wɩn,
ba 'ble꞊e kʋa.
'Aan ꞊wlɩ 'nɩ 'gboklo 'lɩ ‑nɩ.»
‑Tɛ Nyɩsʋa nu la 'pʋplɛ lɛ, ɛ tʋɛ la꞊a yɩ, ‑ɛ mɔ, ti a 'mʋ 'yri, 'a dakɔ 'yɛ la ꞊haan‑wleelɛ nɩ kʋɛ, 'kɩ 'lɩ Kanaablʋgba 'kwli. Ɛ nɔ‑ nu꞊o, 'ɛ yɩ la ꞊nʋ 'hru ‑nyi, 'kɩ bʋ 'wɩn la 'a win, ‑ɛ di꞊e nu, 'bʋ 'tɩɛ kuo la꞊a ꞊wlʋ yɩ, ɛ 'mʋ la ꞊nʋ ꞊haan‑wleelɛ ‑nyi.
9 Ɛ nɔ‑ kɔ ‑tɩ 'nɩ hlɛ꞊ɛ, ‑ɛ mɔ, ‑a mʋ ‑bʋ, ‑ʋ mɔ Nyɩsʋa a dakɔ, ‑a di 'lɩ ꞊haan‑wleelɛ a 'mʋ 'nɩ pa, ꞊wɩ yɩ, ‑tɛ ɛ ‑nu, 'ɛ ‑wle la, 'kɩ 'lɩ ‑nyrɔwɩ nɩ ꞊hlon'hʋɛn a ‑nyrɔwɔ 'kwli.
10 Nyiblo ‑bʋ, ‑ɛ pʋɛ 'lɩ 'klɔ yrayrʋ 'kwli, ‑tɛ ‑mʋ', Nyɩsʋa yɩ 'lɩ 'a nyibli ‑wleelɛ ‑nyii ‑nɩ, nyiblo a 'mʋ, ɛ 'nɩ nu꞊o 'kɩ ‑kʋandɛ ꞊dʋ. 'A ‑kʋan ‑yrɛ 'lu, ꞊wɩ yɩ, ‑tɛ Nyɩsʋa ‑nu, 'ɛ ‑wle la, ‑tɛ ɛ ‑yra la ‑kʋan 'lu.
11 Dɛ a 'mʋ, 'a ‑tɩ, ‑ba ꞊tu 'ʋ 'klɩ, ‑ɛ di꞊e nu, ‑a 'mʋ 'lɩ ‑wleelɛ a 'mʋ pa. ‑Ba ꞊tu꞊o 'yie, ‑ɛ di꞊e nu, 'kɩ 'lɩ ‑a mʋ 'nyɩ, nyiblo ꞊dʋ 'nɩ ꞊ha Nyɩsʋa a ‑tɩ lɛ ‑hɛɛ ‑nɩ, ɛ 'nɩ ꞊ha bʋ hie, ꞊wɩ yɩ ‑aan 'baɩnʋ, ‑ʋ ‑hɛɛ la Nyɩsʋa a ‑tɩ lɛ.
12 'A ‑tɩ, ‑ba 'ble Nyɩsʋa a win kʋa ‑tɛɛ. Nyɩsʋa a win a 'mʋ, ɛ nɔ‑ yɩ nyibli 'klɔ yrayrʋ ‑nyi. 'A win a 'mʋ, ɛ nɔ‑ kɔ 'kwli Nyɩsʋa nɛɛ 'lɩ, 'ɛ ni ‑kʋan. Nyɩsʋa a win a 'mʋ, ɛ 'wɩ꞊ɩ 'plɩɛn yɩ. Kɛɛ, ɛ nɩ 'klɩ kɩ, 'ɛ ‑hi 'ʋ 'plɩɛn a 'mʋ 'ʋ, 'ɛ pʋɛ 'lɩ ‑tonyiblo a 'hʋɩ 'kwli, 'ɛ yɩ 'a ꞊wlʋ lɛ ‑hrɛn. Ɛ 'wɩ꞊ɩ 'plɩɛn yɩ, ‑ɛ yɩ 'klɩ ꞊tɩɔ lɛ 'bɛ, 'kɩ 'ʋ ‑tɛ ‑mʋ', ʋ kʋkʋɛ 'ʋ yrɛ, 'ɛ mi ‑mimi, 'ɛ yɩ 'klɩ a 'mʋ 'a ‑hanmli kɩ yɛ. ‑Tɛblɩ ‑mʋ', ‑tonyiblo nɛɛ ꞊wlɩ klɛ, ɛ ‑hʋɛ bʋ nu, ɛ nɔ‑ Nyɩsʋa a win a 'mʋ, ɛ pɩ pepe'.
13 Ɛ 'yɩ ꞊dedede ‑kɔ, ‑bʋ ‑hli Nyɩsʋa 'yi kɩ. 'Kɩ Nyɩsʋa a nunu‑tɛblɩ a pɛpɛ nɩ 'ʋ꞊ʋ 'yi ꞊hlɔn. ‑Tɛblɩ a pɛpɛ ‑bʋ, ‑a ni, ‑a di ‑hɩhɩa꞊a klɛ, 'kɩ 'ʋ꞊ʋ ye'.
‑Yusu, nɔ‑ mɔ ‑aan ‑cɔhlʋnpinyɔ* gbagbʋ
14 ‑A kɔ ‑cɔhlʋnpinyɔ gbagbʋ, 'ɛ nɩ 'ʋ ‑tonyibli kɔ Nyɩsʋa 'hʋɛn‑ a ‑gbati. Ɛ nɔ‑ mɔ Nyɩsʋa a 'Yu ‑Yusu, ‑ɛ mu 'lɩ yakɔ 'kwli, 'kɩ 'ʋ Nyɩsʋa 'hʋɩ. 'A ‑tɩ, ɛ nɔ‑ ‑ba kuo ꞊wlʋ yɩ 'a ‑nɛ ti, ɛ kɔ, ‑ba lee nɛ 'a ‑tɩ nyibli a pɛpɛ.
15 ‑Aan ‑cɔhlʋnpinyɔ a 'mʋ, ɛ yru ‑aan 'kla‑wliye'yɩya a pɛpɛ lɛ, 'ɛ yi꞊e ‑wɛ, ‑ɛ mɔ, ‑a mʋ ‑tonyibli, ɛ kɔ ti, lɛ꞊tɛɛlɛ 'bʋ yɛ ‑a mʋ kɩ, ‑a 'yɩ 'klɩ ꞊dʋ ‑kɔ, 'kɩ ‑ba ‑wɔn lɛ꞊tɛɛlɛ a 'mʋ yɩ, ɛ kɔ, 'ɛ kɔ ‑aan nyaɩ, ‑ɛ nu꞊o, 'a 'mumu, ‑tɛ ɛ nɩ la 'nɛ‑ ‑tʋtʋ kɩ, lɛ꞊tɛɛlɛ a gblegble, ɛ nɔ‑ ɛ yɩ la 'ye, ‑ɛ 'wɩ꞊ɩ ‑a mʋ yɩ. Kɛɛ, ɛ nɔ‑ ‑mɔ ‑bɩ, ɛ 'yɩ dɛ 'kuku ‑nu.
16 ‑A yi꞊e nɩ, ‑ɛ mɔ, ‑Yusu a ‑tɩ, Nyɩsʋa 'ɛ kɔ ‑aan nyaɩ. 'A ‑tɩ, ‑a nɩ 'pie 'lɩ hʋannʋ, ‑ba 'yɩya 'ʋ꞊ʋ 'hʋɩ bʋ, 'kɩ 'lɩ ꞊wlʋ a yɩkuolɛ 'kwli, ‑ɛ di꞊e nu, ɛ 'mʋ ‑aan nyaɩ yru, ɛ 'mʋ ‑aan dɛ 'kuku 'wʋwla ‑nɩ, ɛ kɔ, ɛ 'mʋ ‑a mʋ ‑hɛɛ ‑nɩ, ti ‑mʋ' ‑kɔ 'yri 'kla‑wliye'yɩya di 'ʋ ‑a mʋ kɩ ‑yɛɛ ‑nɩ.