3
Lin To-ir Ihir Lokpoi
1 Lapan Petngendrei ihnan su ka-an ndre sulo-on, odoke mot eri tawene tadan elwe-en lakopwi, iyin pule-e’ su ndre sulo-on. Mot ihndramtan iy pedih ihpah, “Erih? Petngendrei ipe we oruu erndreyo-on mbrwen kei odo lok keti pwi?”
2 Pedih ipe ihpa, “Oru we oryo-on mbrwen kei ndre sulo-on,
3 tapake mbrwen kei idu ndrokoron lok, eri Petngendrei ipe we oru erndretukunii pe erndreyo-on pwi. Uh oru ortukunii ndre pwi oryo-on, eri oru we armat.”
4 Mot ipe ihpah, “Iy intaheweh, we erndremat pwi.
5 Petngendrei tunon, ipe kihne oruu oryo-on eri we arahpa ndre Iy, pe we orohtuno oruu sane huyen pe sane mo-on.”
6 Pedih indre-et ile kei kuti pe kei ti rahyen lakopwi, pe mbrwen ti mandran pe huyen odo yo-on. Iy ipe kihtunon sane posingat, ile pe iy iyehi mbrwen kei se pe iyo-on. Inum pe iy itou se ile tan mbrulun pe mbrulun iyo-on yi.
7 Horu harani mbrwen kei inum ti pe mada’ horu ipahar lakopwi, pe horu horohtuno horu ihpa ndre horu tih ndrihi’ horu kopwi. Ile pe horu hersokopet ndrokei ile ndrih pe hertese.
8 Lok ndre ipiyeh ti horu hertahrungi ngasan Lapan Petngendrei inelila ipei. Ile pe horu hortudong Tadan harla siliyen kei.
9 Odoke Lapan Petngendrei iyuw iy kamal, “Ou anna kehe?”
10 Iy isomwi ihpa, “Yu uhrungi ngasam enelila pe yu unuh pe utong Tadam, odo yu ndrihi pwi tih.”
11 Ile pe Lapan Petngendrei ihndremte, “Ou tunom ihpa ndre ou ndrihim kopwi ti ihpa kehe? Si ipahran ile tadam? Ou ti kihne andrani mbrwen kei ndre Yu upwe ou oyo-on kolwii tih.”
12 Kamal ipe ihpah, “Pedih ndre Ou eduwe iy imin ndroda yu, eri ihngahang yu pe yu uyo-on.”
13 Lapan Petngendrei ihndramtan pedih ihpah, “Ou opo erti ile homosa?”
Iy ipe ihpah, “Mot ipusahi yu pe yu uyo-on.”
Petngendrei Itou Pede-en
14 Inum pe Lapan Petngendrei ipe ile tan mot ihpah, “Ou we okun pede-en odo homosa ou opo kitih.
Ou kopwi odo lenga’ su ka-an pe nenka-an,
idu mahkele pe ile,
eri we enelila kile ke mburndrinem,
pe ana-an wambruhen poi.
15 Yu we kuhnan ou pe iy pedih, we erehmbore oruu oruu.
Su nedun pe su nedum eri we hompo ke pahun
kile pule-e’ su.
Su nedun pedih ti we hantatawe palam pe
ou we eneti kambrulke’ su.”
16 Lapan Petngendrei ipe ile tan iy pedih ihpah,
“Yu we kuduwe pede-en kile mundrem kidu ou ndriyem,
pe ngendre-en mandra-an we kile tadam,
kidu ou otou nedum.
We elnget ngendre-en, odoke reh tadam we kinto
ke ndre tan mbrulum,
pe ou we emmin ke ndre pahndran mbrulum.”
17 Pe Lapan Petngendrei ipe ile tan Adam ihpa, “Ou ohrung mbrulum pe oyo-on mbrwen kei ndre Yu upwe ou we onyo-on pwi tih.
Ile pe Yu we kuhnan poi kihmo-on, pe song we hendrerenge huyen pwi.
Ou we ndre opo marai puko-on, pe anam song kenon ou.
18 Mundriu pe osukei pudon we hernge pe hosorohe lok,
pe ou eri we oyo-on sane henerenge odo langah.
19 Ou we opo marai kile puko-on pe panohyum kihir,
iyenon ndre ou ala yi ndre poi ndre ou ehir eriy.
Ou ehir odo poi pe we ala yi ndre poi.”
20 Adam iyuwen rangan mbrulun eri Ewah odo iy we kile tinen ndramat ndre sulo-on.
21 Pe Lapan Petngendrei ihnan ndrihi’ horu odo kalatun ka-an, pe Adam horu mbrulun hertasan.
Petngendrei Iyes Adam pe Ewah odo Iden
22 Inum pe Lapan Petngendrei ipe ihpa, “Ndramat ke indrahpa ndre homou ta tidu. Iy kah tunon sane huyen pe sane mo-on. Ile pe iy we ke-eu odo Iden. Kihne iy kimin ti pe kiyo-on mbrwen kei odo hasamat pwi, pe kindrimat pwi.”
23 Ile pe Lapan Petngendrei iyes Adam iyeu odo Iden, pe ilpo marai ile poi ndre Iy ihnan iy ihir odo eriy.
24 Lapan Petngendrei iyes horu odo Iden inum oh pe iduwe su engel hala ndram. Pe Lapan Petngendrei iduwe semel hondrou inehnelem ihpa ndre ndremleh idu sal ise wuron rai odo Iden. Kile pe homou ndramat kindranon kinna mukehe kei odo hasamat pwi ti pwi.