43
Su Nedun Yakop Hala Isip Petsih Yi
1 Song pwi odo Kenan eri ke ile mo-on lakopwi,
2 pe song ndre su hokuni odo Isip ise eri Yakop pe su ndramat tadan handrani indrinum. Ile pe Yakop ipe ile tan nedun su, “Atla ndre Isip pe atlasihsih ana' tidu hepe song yi.”
3 Judah ipe ile tadan ihpa, “Ndramat kuti idemumoi pe ipe we odu etndrela ndrongon iy pwi yi kenon ndre tinto’ odu lehyen ti ki-us.
4 Ipe ye ou eduwe tinto’ odu ti ki-us, eri odu we atla pe atlasih anam song.
5 Pe uh, ou endretawe iy kindru-us odu pwi, eri odu we etndrela pwi yi, odosa ndramat eti ipe we odu etndrela purmadan pwi kenon ndre odu atukuni tinto' odu lehyen ti ki-us.”
6 Yakop ihpah, “Ihpa kehe pe oduu etninen ndralngan orongon kiti atpa oduu tinto’ oduu homou yi? Oduu edentawe pede-en hudut ile mundre.”
7 Su hahpah, “Orongon ti iduwe ke iseu ile hehndremte odu. Iy impa ihpah, ‘Tama’ oduu ti mapwi ilmin? Odu homou tinto’ oduu yi ndre pwi?’ Iy inehndremte ke odu, ile pe odu atpahran ile tadan. Si tunon ipe ye iy we kipe kile tadu pe atakuni tinto’ odu ki-us odu kile?”
8 Judah ipe ile tan taman ihpah, “Eduwe anah ti ki-us yu, pe odu etportai atla, kile we ou pe odu pe nedu' odu we titndremat pwi.
9 Hangka-an kihrut kidu mundren eri we yu kumwet kile nuhen. Uh, odu atsa pe iy kindru-us odu pwi, eri pede-en odo eriy ti kile ngondru.
10 Lehpe ou andritakulkulen odu pwi, eri lehpe odu etndrela kah pe etndresa yi kihpa ndre peruweh kindrinum.”
11 Israel ipe ile tasu ihpa, “Uh kihpa ndre oduu atpa, eri we atakun se ndruwon sane huyene odo lok kerti kile presen tan Gavena. Atakun hepe resin, hepe wayen pakok, spais, mbrwen pastesio, pe almon.
12 We atakun moni ti rundreh, odosa moni ndre idu lon ndrop pe ise yi eri we atakuni kile yi. Kihne erti su ha-amelyen su.
13 Atakuni tinto' oduu pe atla sowin kopwi.
14 Lapan Mandra-an kihnan ndramat eti pe kikarndrum oduu, kile pe Iy kiduwe Benjamin pe tinto' oduu homou yi ti harsa ndrodan oduu yi. Yu ti konan. Uh su nedu halla ke hepe kihpa kudu, eri poh kidu todo kolwii. Iy erti kawe kinahpa eriy ea.”
15 Ile pe su madan tintoi hokuni presen, pe hokuni moni eri rundreh, pe halla ile Isip ndrodan ndre Benjamin. Su hehir Isip ti pe ndresale hala hu Yosep.
16 Idu ke ndre iy indroni Benjamin idu lenga' su, eri pe ipe ile ta lewen marai madan iso um tadan ihpah, “Ekuni su ndramat kurti hala um todo. Su we hoyo-on song ndroda yu kidu worohnuw. Ala pe olroh homou ka-an pe alahnan kile misen.”
17 Lewen marai ihnan ihpa ndre Yosep ipe ile tadan ti pe ikuni su madan tintoi ile um ta Yosep.
18 Su mapwi halila ile um eri pe hantawene hutun ihpa, “Su hantakun tidu titlalih um kurti pwi ti we odo moni munen tidu titsa pe heduwe halla ndre lon ndrop tatidu ti ndreh? Tidu we tidehretek pe su heseroroput hasa pule-e’ tidu, hekuni donki ta tidu, pe hahnan tidu titla lewen marai tadan.”
19 Su mapwi hodo madan pohngkiu odo um ta Yosep, eri pe hala hu lewen marai madan iso um ta Yosep pe hapa ihpa,
20 “Oh lau il, odu atsasihsih song petsih kah odo kertih.
21 Odu ada-au ile yi eri pe etmetir otso sal, pe etiper ndropo song tadu ti pe etureh moni tadu ti ndre sulo-on, hendrek indra-au pwi. Idu ke ndre madan ndrop.
22 Ile pe odu atakuni moni ti ise yi, ile ndrodan ndre moni hondroh yi odo sihsih ana' odu song kile eriy tih. Odu tuno' odu si iduwe moni ile ndre lon ndrop tadu ti pwi.”
23 Lewen marai ihpa, “Atawene kolwii pe nombrun otnoh. Moni eri oduu atawe ise lumwe. Kihne Lapan taduu, Lapan tan tama' oduu, ti kindretawe moni ti hala ndre lon ndrop taduu yi.” Inum pe iy ikuni Simeon odo lon kou ise hu su.
24 Lewen marai ikuni su madan tintoi ti hala lon um. Iy iduwe wo odo singi ndrike' su. Pe su donki eri iy itou song ile ta su.
25 Su hokuni presen ndre su hopo ta Yosep ti hasa moleu, pe hodo hengkeli-iy Yosep kise um worohnuw. Su hendretahrungi ihpa ndre su ti we hoyo-on song ndrodan iy worohnuw.
26 Idu Yosep ihir ise um ti pe su hokuni presen tasu idu hu su idu um ti ile hun iy, pe hopo ruru ile ndre poi he-en purmadan.
27 Inum pe iy ihndremte su odo sik pe horut, pe su hapa huyen ke su, ile pe iy ihndremte yi tama' su, “Tama’ oduu lopun pihe oduu etninen ndrolngo ti mapwi ilmin?”
28 Su hahpah, “Mandra-an, tama' odu eri mapwi ilmin pe mapwi puko-on.” Inum pe su heduwe pandrulku-u' su ndre rukei ile pwoi pe hopo ruru ile tadan.
29 Yosep indroni tinton ke Benjamin, tine' horu homou, eri pe ihpah, “Iy kurti tinto' oduu lehyen omur ndre oduu etninen ndrolngo ile eriy tih? Lapan ipu blesim ou, nedu.”
30 Yosep indroni tinton ti pe kolon isup. Iy ihndrepet iy tahit, ile pe iyeu ile lo rum sih yi pe iltang.
31 Iy ideng oh pe inuhen purmadan pe ise ndre rang. Kolon mapwi insop odoke ititsan ke iy pe ipe ile ta lewen marai kide ana' su song.
32 Yosep tepolon sih pe tinton su ndre tepolo' su sih. Su Isip hana-an song honto um ta Yosep eri ndre tepolo' su yi, odosa su Isip henehmbore su iy ndre su pe su Hibru hoyo-on song hodo hondroh tih.
33 Su madan tintoi hodo pwoi eri mada' su ile hu Yosep ea. Sa hesehen su he-en sia ti ile pahndran krismas tasu ea. Kom ndrihou imin ndre mune, inum pe iy omur tadan, inum pe homou yi, ilto ndre kom omur. Su heltuwe kurti pe hehretek ile eriy.
34 Song ti idu tepol ta Yosep, pe lewen marai ide ana' su. Song anan Benjamin ti ihluwen tasu ndre sulo-on, ihpa ndre ana' su ndramat limuu. Su hoyo-on song pe he-ing ndrodan Yosep uu pe ilta ndre su ile mo-on.