3
Yesus Ihnan Lumwen Orngon Homou ile Huyen idu Sabat
(Matyu 12.9-14 pe Luk 6.6-11)
1 Yesus ile lon omwen surok yi. Orngon homou imin lenga’ sa lau ti lumwen hakai indrimat.
2 Sa se hodo omwen surok ti hapa hehreh sal odo hopo kotim Yesus, ile pe su mada’ su tis Tadan, kihne Iy kihnan lumwen orngon kuti kile huyen, odosa rang erti Sabat.
3 Ile pe Yesus ipe ile tan orngon ndre lumwen mo‑on ti ihpa, “Odo eleng pe esuto munen.”
4 Pe Yesus ihndremte su ihpa, “Lo tatidu ti ipe we tidu titpo sa kidu Sabat? Lo ipe tidu we titpo sane huyen or sane mo‑on? Tidu tidehnuwii ndramat kimet kolwii, or tidu tidahnan ndramat kimet?” Odoke homou indripa hangka‑an pwi.
5 Yesus indre‑et ile ta su pe lon ndrinen inei, odoke ikarundrum su, odosa su hapa we ha‑au hemin ke ndre tawene ta su munen tih. Pe Iy ipe ile tan orngon kuti ihpa, “Otlon lumwem.” Orngon ti itlon lumwen pe lumwen ile huyen ndresale.
6 Ile pe su Paraseo hatlang pe ha‑au hala kiu. Su ndresale kopwi hala ndroda su lau ta Herot pe helpunou odo we hapwi Yesus kimet.
Yesus Ililngan Puko‑on (Pawa) Tadan, Odoke Su Lau Odo Lonen Hondrupo Bilip Ile Tadan Pwi
(Sapta 3.7—6.6)
Sa Lau Sulo‑on Ho‑us Yesus
(Luk 6.17-19)
7 Yesus ndroda su disaipel Tadan ha‑au hala Ndras Galili pe sa lau sulo‑on hodo ndruwen. Kaunan sane ndre Yesus impo ti ihtot lon lok odo Galili Distrik, Judea Distrik,
8 odo taon Yerusalem, odo Idumea Distrik ndroda lok odo wo Yordan hodoh, pe odo taon Tair pe taon Saidon. Ile pe sa lau sulo‑on odo lok erti hasa ndrongon Iy.
9 Ile pe Yesus ipe ile ta su disaipel Tadan ihpa, “Sa lau pohpou pohpou hansa. Etpondrih sih ndrol ki‑in, kihne sa hoportai hasa mukehe pe horotawe Yu. Pe uh sa hapa heseporoh Yu, eri Yu we kundreh kile ndrol pe kule mahun odo ta sa.”
10 Yesus indrahnan sik ta sa lau sulo‑on munen kah, ile pe sa sik ti hentandrusuwi hapa hala mukehe pe hetkuni Iy, kile pe sik ta sa ha‑au.
11 Su sinel ti yi, into su heneltuwe Yesus, eri pandrulku‑u’ su illa poi pe hoyuw ihpa, “Ou ti Nedun Lapan!”
12 Odoke Yesus ineyahat ana’ su ile puko‑on, ipe su hapahran Iy ti si eri kolwii.
Yesus Ihlite Su Lau Sungoh-pe-Rumuu
(Matyu 10.1-4 pe Luk 6.12-16)
13 Yesus inek kuh ile malal, pe iyuwen su lau ndre Iy waso‑on su tih. Su hala ndrongon Iy,
14 pe Iy ihlite su sungoh-pe-rumuu. Su ti we honto ndrodan Iy, pe Iy we kinehtakalan su hompo maryan Lapan. Pe Iy ipe ile ta su ihpah, “Yu ukuni oduu we otto ndroda Yu. Yu we kuhtakalan oduu atlapehre Nolwo‑on Lapan.
15 Pe oduu we taduu puko‑on odo as sinel.”
16 Su lau sungoh-pe-rumuu ndre Yesus ihlitei ti Saimon (Yesus iduwe rangan handrai yi ti Pita),
17 Jems pe tinton ke Jon, tama’ horu Sebedi (Yesus iduwe ranga’ horu ile Boanerges. Mining odo rangai erti ihpa ndre ‘Nedun Kurur’).
18 Pe Yesus ihlite yi Andru, Filip, Bartolomyu, Matyu, Tomas, Jems (rangan taman Jems ti Alfius). Yesus ihlite yi Tadius, Saimon (iy odo lain ta su Selot),
19 pe Yudas Iskariot, iy ndramat ndre iduwe Yesus ile lumwe’ sa lau mo‑osa.
Sa Hapa Yesus ti Impo Marai Ndrodan Belsebul
(Matyu 12.24-32 pe Luk 11.14-23; 12.10)
20 Yesus ile yi ndre um ndre iy immin eriy tih. Pe sa lau sulo‑on yi hala haltahrung Iy, ile pe Iy ndroda su disaipel Tadan handranon hendreyo‑on song pwi.
21 Su murwon Yesus hehrungi sane Yesus impo kuti, pe su hala hapa haltakun Iy, odo sa sulo‑on hapa Iy ti ngungong idu Tadan.
22 Sa sape ndramat se odo Lo ho‑us Yerusalem hala pwoi, pe hapa ihpa, “Belsebul imin pule‑en. Iy ina‑as sa sinel ti ile puko‑on tam Belsebul, mandra‑an ta su sinel.”
23 Ile pe Yesus iyuwen su hala mukehe pe ipe ile palan nolou ihpa, “Ihpa kehe pe Satan we ki‑es Satan?
24 Uh sih kantri kitlangan iy kile kantri ruweh, pe sih kipu pahun kile pule‑en sih, eri kantri erti we kitpar.
25 Pe uh su lewen lonu‑um sim hetlangan su hala rimir pe hopo pahun kile ke ndre pule‑e’ su, eri lewen lon um erti we hatpar.
26 Pe uh Satan kipu pahun kile ke ndre pule‑e’ su lewen, eri puko‑on tadan we kinum, pe iy we kinum ndresale.”
27 “Homou lau kindranon kinna lon omwen homou ndramat puko‑on pe kikun sane kile reh tadan ti pwi. Iy we kihndrusi lau puko‑on erti kile osukei oh, kile pe iy ka we kenon kikun sane odo lon um ta lau puko‑on kutih.”
28 “Yu kupwe ndre ndrokene kile taduu. Lapan we ki‑es to‑ir ndre sulo‑on ndre sa ndramat hompo. Pe nolou mo‑on ndre sa ndramat hampa ile pule‑en Lapan, eri Lapan we ki‑es ke‑eu,
29 odoke iy si ndramat ndre kipe nolou mo‑on kile ta Lapan Mulwen, eri Lapan we kindra‑as to‑ir tadan erti pwi. To‑ir erti we kindrimin pe kindrimin.”
30 Yesus ipahran nolou kurti, odosa su sape ndramat odo Lo hapa sinel imin pule‑en.
Tinen Yesus pe Su Tinton
(Matyu 12.46-50 pe Luk 8.19-21)
31 Idu mundrun kurti, eri kah tinen Yesus pe su tinton hehir. Su hodo kiu pe heduwe nolou ile hu Yesus imin lon um. Su hapa Iy kise kiu ndrongo’ su.
32 Lau sulo‑on hemin pwoi hosokaltan Yesus, pe su hapa ile Tadan ihpa, “Yesus, tinem pe tintom su holto kiu pe hapa Ou ala.”
33 Pe Iy ipe ihpa, “Nino ti iy si, pe tinto ti su kehe?”
34 Inum pe Iy madan ile ta sa lau ndre hemin pwoi hosokaltan Iy ti pe ipe ihpah, “Su he‑en poi he‑en ti nino pe tinto.
35 Iy si ndre kimpo sane kile reh ta Lapan, eri iy ti tinto pe timsu‑u pe nino.”