3
Poposun Su Ndramat Hene-en Munen Lotu
1 Iy nolou kuti ndrokone: Iy si lau irih ipe ki-in pohon marai odo lotu eri huyen, odosa marai erti huyen lakopwi.
2 Iy lau erti hangka-an kihrut kidu tadan kelwii, mbrulun homou koson, huyen kila ta sa lau, kinta mangsahan iy kila huyen pe kinnus ke iy, waso-on sa lau halla omwen pe iy tunon tatuhne sa lau ile nolou ta Lapan ile huyen.
3 Iy ti ndramat odo ing pwi, lorohon pwi, ndrinen ewehen killa ta sa ndramat pe eden moni pwi.
4 Madan kisso ta mbrulun pe nedun su kile huyen pe kimpunuwon nedun su kile huyen, kile pe su hohrung nolou tadan pe heneyoman iy.
5 Iy madan kinso ta mbrulun pe nedun su pwi eri we kindroni sios ta Lapan kihpa kehe?
6 Iy ndramat ndre ile Kristen tapa eriy ti ki-in pohon lotu kolwii, kihne kissap ke iy pe Lapan kililyan iy kihpa ndre Satan.
7 Sa ndramat Kristen pwi eri henehwaso-o' sa punowon, kihne iy punowon mo-on ti pe su hahyan rangan kihmo-on, pe iy kise rikin ta Satan.
Ndramat Odo Henuwii Marai Odo Lotu
8 Su ndramat odo henuwii maryan lotu ti hahpa ke su ndramat hene-en pohon marai odo lotu ti yi. Su ndramat huye' su, hesentaheweh pwi, heseni-ing wain sulo-on pwi pe ede' su kisela moni pwi.
9 Su hadakorwe Kristen bilip kehe ndre indrihir insa moleu ti kile tawene huyen.
10 Timothy, oduu edehkelmene marai pe punou tasu kehii oh. Etndre-et uu ndre hangka-an horut kindrihir kindrito ta su pwi, eri etawe su hopo marai.
11 Mbrulu' su ndramat odo henuwii ti punou ta su kile ke huyen, pe hadaninen sane mo-on kelwii, tawene ta su killa ke huyen, pe hopo marai ndre sulo-on killa ke huyen.
12 Ndramat lewen henuwii marai kuti mbrulun homou koson, pe kindroni mbrulun pe nedun su kehii.
13 Iy ndramat lewen henuwii marai kehe ndre impo marai huyen, eri sa Kristen ndramat we hotlon iy, pe iy ndre iy ti we kindrerengreng odo ninen bilip tadan idu ta Yesus ti pwi.
Nolou Mandra-an Ndrokene Odo Kristen Bilip
14-15 Yu urih upwe kuse pe kusendre-et ou sowin. Odoke yu untatorou pas kuti ise ndrongon ou, kile pe uh yu kunsa sowin pwi eri pas kuti we kipahran punou kehe ndre taha lewen Lapan, Lapan ndre isemat pwi, ti we tihmin kile eriy. Tidu ndramat erti sios ta Lapan. Sios erti ihpa ndre ndruwen ndrokornu-um, intakorwei pe impuko-on bilip ndrokone.
16 Ndre ndrokene, taheweh pwi, lin nolou ndrokene iyin tunge ihir ile moleu odo mandro huyen odo madan Lapan ti kutih:
Yesus ile ndramat pe ise lokpoi,
Lapan Mulwen ipaninyan Iy ti Lau Kapin,
su engel hendroni Iy,
ninen Iy isini lok ndre sulo-on,
pe ndramat sulo-on odo lokpoi hopo bilip ile Tadan.
Lapan ikuni Iy inna ndre heven.