HIBRU
Yagl ta pepa muno bogl Hibru yomba tongwa
Ka mongo yegl ende okuna ongwa
Yomba tau pirngi dingwa gugl sungwa i akeple dina pre pepa muno i boglkwa. Te God kongun pond Yesus Krais mina orkwa i ama ditongwa.
Pepa Hibru i muno boglkwa yagle yene kangiye dipene endekrukwa. Te yomba tau eremogl aposel Pol pepa i muno boglmedi pirkwa. Ana yomba tau eremogl yomba pere ta pepa i boglmedi pirkwa.
Ka mem kande yegl pangwa: God Wam ka di norkwa ya, te ye mogl mitna kaima ende enge engrukwa, te God no i ikine endungwa ya te Yesus wu kongun orkwa i ende mitna kaima pi ana Moses lomo engre tongwa. Te Yesus pris kande heven suna moglkwa ana nono God pirngi dindre andigl giglendi moramga.
1
God kamo yene Wam dinorkwa, ana Wam mogl mitna ende angelo engrukwa
1 Okuna imbo God enge merkinde taragl kanekane mina ka tau di nono neno kowano tongwa, i propet wagle drano mina yongo ditengwa.
2 Ba enge erme i dundinagledi orko God yene Wam mina ka kaima dipene ende norkwa, i yene Wam mina dumo makan ya taragl prapra ere yongwa. Ana God yene Wam pinde indre taragl prapra inambuka pre tongwa.
3 Yene Wam, Nem ambuglange i i-pene endungwa. Ana Wam yene Nem mere kuno yene kaima moglkwa, ye ka dumara i taragl prapra ake gidi pango yombuglo kande pangwa. Okuwo yomba prapra tandaglmeno koko ende kondo, ana ye ende heven suna pindre Nem yombuglo pond kaima pangwa moglmara ongo wokra amedi moglkwa.
God Wam Yaglkande kaima moglkwa
4 Nem kangiye kande yei Wam tongwa i pai mitna ende angelo wagle tongwa. Yeglpre, ye mogl mitna ende angelo wagle kangino engre atne ende tongwa.
5 Okuna God ka yegl ta di angelomo wagle tekrukwa ikra Yesus pre yegl dungwa,
“Ene na Wana, etne na ene Nen moglka.”
Te ka yegl ama ta dikrukwa,
“Okuwo na ye Nem
moglmbo te ye na wana morambuka!”
6 Kor dagl God Wam komuno ende makandle endungwa enge yegl dungwa,
“God angelomo prapra ye
dembiye karaugl ere tenaglkwa.”
7 Ye angelo wagle ditendre yegl dungwa,
“Ye angelomo wagle ir
mereyegl ere yei, te
kongunmo yomba i donga
bauglo mereyegl ere yei orkwa.”
8 Ba ye Wam pre yegl dungwa,
“God O, ene sia kingnen
aimande kamun yenambuka.
Ene kingdomnen embriye
mambuno du-yene mina sugl motnga.
9 Ene embriye mambuno
du-yene erikwa yomba wakai
kanga. Te mambuno kinde
erikwa ene kinde kanga.
Ene yegl etnga ipre, ene
Godnen, pinde indre kungo
ere tongo ene gun yendre
ana ene mogl-mitna ende
yombanma tau engre atne ende tenga.”
10 Ye ama yegl dungwa,
“Yaglkande okuna imbo
dumo makan mambuno bogl
ere yenga te kamun mitna
taragl prapra pangwa i ene
ongun mina ere yenga.
11 Ana taragl prapra i
dundinambuka ba ene
aimande aimande mogl
panatnga, te taragl i prapra
kungugl gagl goglo kinde
omere yegl enaglkwa.
12 Ene makan ya kamun
mitna gagl suna olto mereyegl
ake peratnga, te makan ya
kamkua i kungugl gagl gugl
ende kor endimere yegl kor
ere yenatnga. Ba ene motnere yegl motn buglayungun ta dundikrambuka.”
13 Okuna God ka yegl i angelomo suwarata ditekrukwa, ikra Yesus pre yegl dungwa,
“Ene wu na onguna wokra
amedo, mogl emin ana okuwo
ene kundano ikine prapra
i-wu katn mina atnekra endinaglka.”
14 Ana angelo wagle ye spirit wakai meglkwa pre, God eremogl yomba ta ere-inagledi prukwa mere, ana angelo wagle kongun tongo ye wu yombamo i akeple diteingwa.