12
Namisug yaꞌas
1 Saŋkan la ka naꞌab Herod daa namisid Winaꞌam nidib la sieba,
2 ka ke ka ba ku Jemes, Joon baꞌabiig la ne suꞌuraug.
3 Ka on nye ka li malis Jew dim sunya la, ka me ke ka ba gbanꞌe Piita men. Neꞌeŋa daa niŋne bodobodo lin kaꞌ dabin diib saŋa.
4 Ban gbanꞌe o n kpenꞌes sarega la ka o ke ka sogianam piina ayuobu pudug anaas naas gur o suꞌuŋa, ka bood ye kuꞌum malek gaadug tienr maluŋ nyaꞌaŋ ba mor o yi nidib saꞌan na.
5 Ka Piita daa kpelim be sarega ni. Amaa ka Winaꞌam nidib la daa sosid Winaꞌam o zug hale ka pu basida.
Malek n yiis Piita sarega ni la yela
6 Herod n daa ziꞌel dabisir kan ka o na yiis o niŋ nidib nuꞌusin la, yuꞌun kan ka dabisir la nam pu paae la, Piita daa gbisidne sogianama ayi soogin. Ka ba lo o ne bana ayi. Ka bane gur la n be zaꞌanoorin n gur sarega la.
7 Ka Zugsob malek kpelim nie o meŋ. Ka bugum nie on be doog siꞌa la ni. Ka malek la nweꞌ Piita lugir n nie o n yel ye, “Duom toꞌoto.” Ka bana la lu ka ke o nuꞌus.
8 Ka malek la yel o ye, “Gaꞌalimi fu senbidiŋ, ka pid fu taꞌada.” Ka o niŋi ala. Ka malek la lem yel o ye, “Loomi fu fugobug ka dol m.”
9 Ka Piita dol o yi yiiŋ ka nam pu baŋ ye malek la niŋid siꞌel la ane ameŋaa, ka tenꞌes ye li wenne o zaansim ne.
10 Ka ban gaad gurib yinni ne ayi zinꞌig la n ti paad kunt zaꞌanoorin line ken teŋ poogin la, ka li yoꞌog li tuꞌer ka ba yi yiiŋ n dol suer. Ka malek la kpelim bas Piita.
11 Ka Piita potenꞌer yuꞌun nie ka o yel ye, “Nannanna m baŋi ameŋa ye Zugsob la n tum o malek ka o faaenn m Herod nuꞌusin ne bun lin wusa ka Jew dim la boodin ye ba niŋ m la.”
12 On baŋ neꞌeŋa nwa la, ka keŋ Joon Maak ma Meeri yin. Anina ka nidib bedego laꞌas taaba n sosid Winaꞌam.
13 Ka o paae n nweꞌ yaŋir zaꞌanoor ka bipuŋ one yuꞌur buon Roda la kena ye o gos.
14 Ka o baŋ Piita kukor. Ka sumalisim zug ka o pu yoꞌog yaŋir laa, ka zo n kpenꞌ n yel ye, “Piita ziꞌe yaŋirin la.”
15 Ka ba yel bipuŋ la ye, “Fu geenm ne.” Ka o zanꞌas ka yel ye, “Li ane on la.” Ka ba lebis ye, “Li ane o malek.”
16 Amaa ka Piita kpelim n nweꞌed yaŋir la. Ka ba yoꞌog n nye ka li a on la. Ka ba lidig hale.
17 Ka Piita yibisi ba ne o nuꞌug, ye ba a baanlim. Ka o tuꞌasi ba Zugsob la niŋ siꞌem n yiis o sarega ni la. Ka o yeli ba ye, “Yelimi Jemes ne yadda niŋidib bane kpelim la.” Ka o yi n keŋ toom zinꞌig.
18 Ka beog nie ka damugtitaꞌar be sogianam la sisoogin, ban bood ye ba baŋ line niŋ Piita la zug.
19 Ka Herod n ia Piita n guꞌuŋ la ka tuꞌa bane gur sarega la antuꞌa, ka bas noor ye ba kuu ba. Ka lin nyaꞌaŋ ka o yi Juuda n keŋ Sizerea teŋin n kpelim anina.
Herod kuꞌum la yela
20 Ka naꞌab Herod suunr daa pelig hale ne nidib bane be Taya ne Sidon teensin. Ka ba laꞌas taaba n deŋi nye Blestus one a naꞌab Herod samannaꞌab la n maal suer ye o nweꞌ naꞌab nuꞌug, ba diib n yit naꞌateŋ la na zug.
21 Ka Herod gaŋ dabis siꞌer la n paae la, ka o ye o naꞌam kparib n zinꞌi o naꞌam gbauŋ zug ka pianꞌ n tis nidib la.
22 Ka nidib la tans n yel ye, “Nwa ane Winaꞌam kukor ka li kaꞌ ninsaal din ne.”
23 Ka Zugsob malek kpelim nweꞌ o, on pu duꞌos Winaꞌam yuꞌur la zug. Ka zunzunya di o, ka o kpi.
24 Amaa ka Winaꞌam pianꞌad la yadig n paas.
25 Ka Barnabas ne Saul n daa naae ban ye ba tum siꞌel Jerusalem la, ba daa piꞌe Joon Maak n leb Antiok.