22
1 “M saamnam ne m zuanama, kelisimi ka m yiisi m meŋi ya tuon.”
2 Ban wum ka o pianꞌade tisidi ba ne Hibiru pianꞌad la ka ba sin baanlim, ka o ye,
3 “Mam ane Jew nid ka ba duꞌa m Tarsus line be Silisia teŋgbauŋin. Amaa ba ugus man ne teŋ kaŋa. Ka Gamaliel zamisi m ka m zaꞌaŋi ti yaanam wada la suꞌuŋa. M tiꞌa Winaꞌam suꞌuŋa wenne yanam niŋid siꞌem zina nwa.
4 M da namis bane dol suekaŋa hale ye ba kpi, ka gbanꞌe dap ne poꞌab n kpenꞌesi ba sarega ni.
5 Winaꞌam maalmaan kpeenm ne kpeenmnam wusa na nyaŋe di man kaset ye m pianꞌad sida. M da diꞌe gbana ba saꞌan n tis Jew dim bane be Damaskus, ka waꞌae anina ye m gbanꞌe suekaŋa nyaꞌandolib bane be anina n baꞌ ba ne bana n more ba leb Jerusalem na n namisi ba.”
Paul n tuꞌas o tiaker la yela
(Tuuma 9.1-19; 26.12-18)
6 “Man da waꞌae ka tuaꞌe Damaskus na nintaŋ sisoos la, ka neesimtitaꞌar yi saazug na nie nyain n gilig m.
7 Ka m lu teŋin ka wum ka kukor buol m ye, ‘Saul, Saul, bo ka fu namisidi ma?’
8 “Ka m lebis ye, ‘Naa, fu a anoꞌone?’
“Ka o lebis ye, ‘M ane Yesu, one a Nazaret nid, on ka fu namisid la.’
9 Ka nimbane daa be m saꞌan la nye neesim la, amaa ka pu gbanꞌe kukor kane pianꞌad la gbine.
10 “Ka m buꞌos ye, ‘Zugsoba, m na niŋ wala?’
“Ka Zugsob la yel m ye, ‘Duom, n keŋ kpenꞌ Damaskus. Ka anina ba na yel uf lin wusa ka Winaꞌam ziꞌel tis uf ye fu niŋ.’
11 Ka m pu nyeta, neesim la zug. Ka bane dol m la veꞌ m. Ka ti keŋ kpenꞌ Damaskus.
12 “Dau daa be anina, ka o yuꞌur buon Ananias, ka siaki ti wada la. Ka Jew dim bane be Damaskus wusa pianꞌade o yela suꞌuŋa.
13 Ka o kenn m saꞌan na ziꞌeni kpiꞌen m, ka yel ye, ‘M baꞌabiig Saul, lakim.’ Ka m nini lak saŋkan la yim ka m nyet.
14 “Ka o yeli m ye, ‘Winaꞌam one ka ti yaanam da puꞌusid la gaŋ uf ye fu baŋ o boodim ka nye one a popielim sob, ka wum ka o pianꞌ ne o meŋ kukor.
15 Fu na yel nidib wusa fun nye ka wum siꞌel la.
16 Fu gur bo? Duom ka diꞌe kuꞌom suub, ka buol Yesu yuꞌur ka o pie fu tuumbeꞌed bas, fu kuꞌom suub diꞌer nwa yela.’
17-18 “M da leb Jerusalem ka daa puꞌusid Winaꞌam puꞌusum yin. Ka Zugsob la nie o meŋi m saꞌan na wenne zaansuŋ ne, yel m ye, ‘Niŋim toꞌoto ka yi Jerusalem; ka nidib bane be kpela nwa ku siak fun na yeli ba m yela siꞌem laa.’
19 “Ka m lebis ye, ‘M Zugsoba, nimbama miꞌ suꞌuŋa ye m daa keŋ laꞌasug doodin wusa n gbanꞌad bane niŋ uf yadda la, n buꞌu ba ka kpenꞌesi ba sarega ni.
20 Ka saŋkan ka ba daa ku Sitivin one tuꞌas nidib fu yela la, m daa be anina n tenꞌesid ye ba niŋ suꞌum, ka gur bane ku o la fuud.’
21 “Ka Zugsob yel m ye, ‘Kem, ka m na tum uf bane kaꞌ Jew dim n be lalle sa la saꞌan.’ ”
Nidib n bood ye ba ku Paul la yela
22 Ka nidib la kelis Paul hale ka o pianꞌ neꞌeŋa. Ka ba pinꞌil tansid ye, “Kuumi no ka o pu nar ye o be dunia nii.”
23 Ka ba tansid ka more ba fuudi yuulum agola ka gbenꞌesid titan n yaarid agol.
24 Ka sogia kpeenm tis sogianam noor ye ba nokim Paul n kpenꞌes o ba yin, ka yeli ba ye ba fiꞌebim o ka buꞌos baŋ lin yela ka ba tansid o yela la.
25 Amaa ban lo o ye ba fiꞌeb o la, ka o buꞌos sogia kpeenm one ziꞌe anina la ye, “Suer be ya wada ni ye ya fiꞌeb Room teŋ nid, ka ba nam pu kad o saria?”
26 Ka sogia kpeenm la n wum ala la, ka o keŋ one soꞌe ba wusa la saꞌan n buꞌos o ye, “Fu ye fu maal bo? Dau nwa ane Room teŋ nid.”
27 Ka sogianam la kpeenm keŋ Paul saꞌan n buꞌos o ye, “Fu ane Room teŋ nida?”
Ka o lebis ye, “Eenn.”
28 Ka sogia kpeenm la yel ye, “M meŋ yo ligidi bedego ka lieb Room teŋ nid.”
Ka Paul ye, “Ba duꞌa man ne Room nid.”
29 Ka bane paꞌa ye ba fiꞌeb o la leb nyaꞌaŋ toꞌoto. Ka sogianam kpeenm la zo dabiem, on baŋ ye Paul ane Room teŋ nid ka o lo o la zug.
Paul n ziꞌe Jew dim kpeenmnam tuon la yela
30 Ka beog nie ka o bood ye o baŋ li sida lin zug ka Jew dim ziꞌe o yela, ka o yidig Paul, ka tis noor ye Winaꞌam maalmaan kpeenmnam ne kpeenmnam wusa laꞌasem. Ka ba laꞌas. Ka o mor o keŋ ziꞌel ba tuon.