8
Saul n namis yadda niŋidib la yela
1 Ka Saul daa siak Sitivin kuꞌum la yela. Ka ba pinꞌil saŋkan la, n namis bane niŋ Yesu yadda ka be Jerusalem la, hale ka ba wusa zo widig n keŋ Juuda ne Samaria soꞌolim ni, ka Tumtumnib la gullim kpelim.
2 Ka nimbane zot Winaꞌam daa ze Sitivin keŋ mum o, ka maal susaꞌaŋ ka kum o kuur hale bedego.
3 Amaa Saul daa kpeꞌeŋ o meŋ ye o saꞌam bane niŋ Yesu yadda la wusa ka kpenꞌed yaan n gbanꞌad poꞌab ne dap n kpenꞌesid sarega ni.
Filip n mool Winaꞌam labasuŋ la Samaria ni la yela
4 Ka bane daa zo widig la daa kenne ka moon Winaꞌam labaar la zinꞌis wusa.
5 Ka Filip daa keŋ Samaria teŋ siꞌa n mool Kiristo labaar la n tisi ba.
6 Ka nidib bedego daa maal noor yinni ka kelisid Filip n tuꞌasidi ba siꞌel la, ban wum ka nye tuumnyalima ban ka o maal la.
7 Kikiris daa tans ne paŋ ka yi ka bas ban daa mor sieba la. Ka nidib bedego ban nuꞌus ne noba kpi la, daa nye laafe.
8 Ka sumalisim bedego daa be teŋ la poogin.
9 Ka dau soꞌ daa be teŋ la ni ka o yuꞌur buon Simon. O daa bugid baꞌakolug ka li lidigid Samaria teŋ nidib. Ka o duꞌosi o meŋ ye o ane nintitaꞌar.
10 Ka nidib wusa siakid o suꞌuŋa, tadimnam ne kpiꞌemnam wusa n yet ye, “Dau kaŋa mor Winaꞌam paŋ titaꞌar.”
11 Ka nidib siak o suꞌuŋa ka li yuug on daa ke ka ba lidigid ne o baꞌakolug bugib la zug.
12 Amaa Filip n mool Winaꞌam naꞌam ne Yesu Kiristo labasuŋ la, ba daa niŋ yadda ka o suu ba kuꞌom, poꞌab ne dap wusa.
13 Ka Simon meŋ me niŋ Yesu yadda, ka diꞌe kuꞌom suub ka be Filip saꞌan, ka nyet tuumnyalima line maan la, ka li lidig o.
14 Ka Tumtumnib bane be Jerusalem la n wum ye Samaria dim pun diꞌe Winaꞌam pianꞌad la, ka ba tum Piita ne Joon ba saꞌan.
15 Ka ban n paae anina la ba sos Winaꞌam tisi ba ye ba diꞌe Winaꞌam Siig Suŋ la,
16 Winaꞌam Siig Suŋ la daa nam pu sigi ba zutin la zug. Ba lee daa diꞌene kuꞌom suub ne Zugsob Yesu yuꞌur la gullim.
17 Ka ba zaŋi ba nuꞌus n paꞌal ba zutin ka ba diꞌe Winaꞌam Siig Suŋ la.
18 Simon n nye ka li ane Tumtumnib nuꞌus paꞌalug la zug ka ba diꞌe Siig Suŋ la, o daa bood ye o tisi ba ligidi,
19 ka yeli ba ye, “Tisi m paŋ kaŋa nwa ka on mekama ka m na paꞌal m nuꞌus o zug, na diꞌe Siig Suŋ la.”
20 Amaa Piita daa yel o ye, “Fun ne fu ligidi la na baꞌas yori, fun tenꞌes ye Winaꞌam piini la daꞌad ne ligidi la zug.
21 Fu baꞌatoog kaeꞌ tuuma nwa ni, bee fu poor kaꞌ li ni, bozugo fu suunr kaꞌa suꞌuŋa Winaꞌam saꞌane.
22 Tiakim fu suunr ne tuumbeꞌed kaŋa nwa, ka sos Zugsob la ka o yiisi fu tuumbeꞌed lin ka fu tenꞌesid fu suunrin la n bas;
23 ka man nyeya ka fu mor ne sutoog ka tuumbeꞌed lo uf.”
24 Ka Simon lebis n yel ye, “Sosim Zugsob la tisi m, ka bun line ka ya yel la baa yinni da paae ma.”
25 Piita ne Joon di kaset ka mool Zugsob Winaꞌam labaar anina. Ka daa lebid Jerusalem ka moon labasuŋ la Samaria teens bedego ni.
Filip ne Etiopia dau la yela
26 Ka Zugsob malek tuꞌas n tis Filip ye, “Duom n kpaꞌa nintaŋ dagobug n keŋ kidig pipirig suer kane yit Jerusalem n ken Gaza la.”
27 Ka o duꞌe n keŋ, ka nye Etiopia dau soꞌ ka o a nintitaꞌar Etiopia teŋin ka gur poꞌanaꞌab Kandase ligidi. Ka o keŋ Jerusalem n sos Winaꞌam,
28 ka lebidi n kun ka zinꞌi teroko kane ka widi teed la ni n karem Winaꞌam nodiꞌes Azaya gbauŋ.
29 Ka Winaꞌam Siig la yel Filip ye, “Kem n liꞌel teroko la, ka doli li.”
30 Ka Filip zo n paae n wum ka o karem Winaꞌam nodiꞌes Azaya gbauŋ. Ka Filip buꞌos o ye, “Fu baŋ fun karem siꞌel nwa gbin ne?”
31 Ka o lebis ye, “M na niŋ wala n baŋi li ka ninsoꞌ pu paꞌali ma?” Ka o sos Filip ye, “Dum na n zinꞌin m saꞌan.”
32 Winaꞌam gbauŋ zinꞌig kan ka o karem la da sob ne ye,
“Ba da mor o na wuu peꞌog kan ka ba ken kuub ne,
ka wenne pebil kan ka ba kiesidi o konbid,
ka o pu kaas ye o faaenn o meŋa.
33 Ka ba poꞌog o ka pu kat o saria la ka li dol suer suꞌuŋa.
Ka soꞌ kaeꞌ na yel o, o yaas yelaa,
o nyovur n naae dunia nwa ni la zug.”
34 Ka poꞌanaꞌab ligidgur la yel Filip ye, “M bood ye m baŋi, Winaꞌam nodiꞌes Azaya tuꞌasidi o meŋ yel bee ninsoꞌ yela?”
35 Ka Filip yaꞌae o noor n pinꞌil ne Winaꞌam gbauŋ kan ka o karem la, n mool Yesu labasuŋ la n tis o.
36 Ka ba dol suer n keŋ paae zinꞌisiꞌa ka kuꞌom be. Ka ligidgur la yel Filip ye, “Gosima, kuꞌom nwa kpela. Bo na viꞌi m suer ne kuꞌom suubo?”
37 Ka Filip yel o ye, “Fu yaꞌa niŋ yadda ne fu suunr wusa fu na tunꞌe diꞌe kuꞌom suub.” Ka o lebis n yel ye, “Man siak ye Yesu Kiristo la ane Winaꞌam Biig.”
38 Ka o ke ka teroko la ziꞌen. Ka Filip ne on babayi wusa sig kuꞌomin la ka Filip suu o Winaꞌam kuꞌom.
39 Ka ban du kuꞌomin na la, ka Zugsob Siig la daa zaŋ Filip n gaad. Ka ligidgur la pu lem nye o yaꞌase, ka gbanꞌe o suer n ken ne sumalisim.
40 Ka nidib nye Filip Azotus teŋin. Ka o gaad ka moon labasuŋ la teens la wusa ni, hale n paae Sizerea teŋin.