4
1 Zugsobnama, niŋimini line a suꞌum ne line zemis tisi ya yamis. Ka baŋi ya potenda ni ye ya me mor Zugsob one be arazana ni.
Saꞌalug
2 Kpen sosimi Winaꞌam saŋa wusa ka tis o bareka puꞌusum.
3 Laꞌam sosi tisi ti ye Winaꞌam na tisi ti suer ka ti mool o labaar la, n nie o yelsuaꞌadir line a Kiristo la. Ka li yela, ka m be sarega ni.
4 Sosimi Winaꞌam ye m nyaŋe pianꞌ n nie li nyain, bozugo li nar ka m niŋi ala.
5 More yaꞌamsuŋ ne yaname niŋid siꞌem n tisid bane kaꞌ yadda niŋidib la, ka noki ya saŋa la n tum line a suꞌum.
6 Keli ka ya noor pianꞌad more mimilim wuu yaarum ne, ka baŋ yaname na lebis line nar n tis soꞌ mekama.
Puꞌusug
7 Tikikus one a ti baꞌabinoŋir ne ti sida suŋid ne ti tumtum tiraan n a yinni ne Zugsob la na yeli ya m yela.
8 Lin yela ka m tum o ya saꞌan na, ye ya baŋ tiname a siꞌem, ka kpeꞌeŋi ya sunya.
9 Ka m tum on ne Onesimus one a ti sida baꞌabinoŋir ka aa ya teŋ nid la. Ba na yeli ya line wusa naamid kpela.
10 Aristarkus one ka ti laꞌam be sarega ni la puꞌusidi ya. Maak one a Barnabas ansiŋ me puꞌusidi ya. M pun deŋim paꞌali ya o yela, ka o yaꞌa kena yanam on diꞌem o ne nuꞌusa ayiꞌiŋa.
11 Ka Josua one ka ba buon Justus la me puꞌusidi ya. Nidib atanꞌ bama maꞌaa a Jew dim bane laꞌam tum ne man ye Winaꞌam soꞌolim la yela keŋ tuon. Ban niŋid siꞌem la bugun ne m suunr.
12 Epafras one a ya teŋ nid ka a Yesu Kiristo tumtum la me puꞌusidi ya. O tenꞌesidi ya yela saŋa mekama ka sosid Winaꞌam ne nimmua, ye ya ziꞌe kiŋ kiŋ ka biꞌ ka baŋ suꞌuŋa line ka Winaꞌam bood.
13 M nye on tum namisi ya yela ne Laodisea dim ne Hierapolis dim la.
14 Luuk one a duꞌata kan ka ti noŋ la ne Demas puꞌusidi ya.
15 Puꞌusimi ti baꞌabiis bane be Laodisea teŋin, ne Nimfa ne Winaꞌam nidib bane laꞌased o yin la.
16 Ya yaꞌa karem gbauŋ kaŋa nidibin n naae, keli ka ba karemi li n tis Winaꞌam nidib bane be Laodisea men. Ka yanam me karem Laodisea dim gbauŋ la.
17 Yelimi Arikipus ye on a yinni ne Zugsob la, o gosimi o tuuma line ka o diꞌe Zugsobin la ka tum li naae.
18 Mam Pauli sob puꞌuskaŋa ne m meŋ nuꞌug. Tenꞌesimi man be sarega ni la yela.
Winaꞌam yelsum na be ne ya.