2
Paul n daa tum siꞌem Tesalonika ni la yela
1 Ti baꞌabiise, yanam miꞌ ye tinam daa kena kaae ya la, li daa kaꞌa zaalim,
2 ka miꞌ ye hale ba daa namisi ti, ka diisi ti nyan Filipi teŋin, ka ti nyaan kenn yanam saꞌan Tesalonika teŋin na. Winaꞌam daa tisi ti sukpiꞌeuŋ ka ti tuꞌas labasuŋ dine yi o ni na la tisi ya, hale laꞌam ne sieba daa daami ti bedego la.
3 Ti saꞌalug pu yi damaꞌarin bee potenꞌebeꞌedinee. Ka li kaꞌ ye ti bood ye ti zam nidiba.
4 Winaꞌam gosi ti ka ti nar ye o guꞌul ti o labasuŋ la zug, ka ti yiti pianꞌad wuu on bood siꞌem la. Ti pu mood ye ti maꞌae ninsaalib sunfo, ka lee mood ye ti maꞌae Winaꞌam one kpansi ti potenꞌer la sunf.
5 Ya miꞌ suꞌuŋa ye ti daa pu tuꞌas damaꞌar zunꞌor pianꞌad bee pianꞌad line suaꞌ maal ne fufum ne. Winaꞌam miꞌ ye li a sida.
6 Ka ti daa pu bood ye ti diꞌe zunꞌor ya saꞌan bee sieba saꞌanee, hale tinam a Kiristo Tumtumnib la zug ka ti mor suer ye ti daa sosidin siꞌel wusa ya ni, amaa li lee daa pu niŋid alaa.
7 Ti daa a baanlim ya saꞌan, wuu bima gosid o biis siꞌem la.
8 Tinam noŋi ya la zug, ka ti daa siak ye ti tisi ya labasuŋ line yi Winaꞌam ni na la, ka laꞌam pesigi ti meŋ tisi ya. Ti daa noŋi ya bedego.
9 M baꞌabiise, ya tenr tiname daa tum siꞌem la. Ti daa tum tuuma yuꞌuŋ ne nintaŋ ye ti yela da daami yaa, tinam daa moon labasuŋ dine yi Winaꞌam ni na tisi ya la.
10 Yanam ne Winaꞌam nye tinam niŋid siꞌem yanam yadda niŋidib saꞌan, ka ti a suꞌum nyain ka a popielnam ne buod dim.
11 Ya miꞌ ye ti daa saꞌali ya yinni yinni wuu dau saꞌan o biis siꞌem la,
12 ka kpeꞌeŋ ya sunf ka yeli ya ye ya dol suer kane na maꞌae Winaꞌam sunf, one buoli ya ye ya kpenꞌ o soꞌolimin ne o naꞌamin la.
13 Tiname daa mor labaar line yi Winaꞌam ni na tisi ya la, ya daa wum ka diꞌe li ka baŋ ye li ane labaar line pu yi ninsaalib ni naa, ka baŋ ye li ane labaar line yi Winaꞌam ni na. Ka li sid aa ala, ka be yanam yadda niŋidib sunya ni n tum. Ka dinzug ka ti me puꞌusid Winaꞌam bareka saŋa wusa.
14 Ti baꞌabiise, li daa niŋid yanam saꞌan, wuu lin daa niŋid Winaꞌam nidib bane a yinni ne Yesu Kiristo ka be Juuda teŋin la siꞌem la. Ya nye namisug ya meŋ buudi ni wuu ban nye Jew dim saꞌan siꞌem la.
15 Ba da ku Zugsob Yesu ne Winaꞌam nodiꞌesidib men, ka kadi ti yiis, ka li due Winaꞌam sunf,
16 ka viꞌi ti ye ti da pianꞌad ne bane kaꞌ Jew dim ye ba nye faangir. Linzug ka ba a ninsaalib dataas. Tuumbeꞌed kaŋa kena paas ba tuumbeꞌed wusa ka li yuꞌun galis. Ka Winaꞌam supeen yuꞌun lu ba zug.
Paul n daa bood siꞌem ye o kaae ba la yela
17 Ti baꞌabiise, tinam daa yi ya saꞌan saŋa biꞌela la, ti daa bakne ne niŋgbina ka kaꞌane suunrin bakire. Dinzug ka ti daa bood ka mood hale ye ti kena kaae ya yaꞌas.
18 Ti daa bood ye ti leb ya saꞌan na. Ka man Paul daa mood ye m leb ya ni na noorin siꞌem, ka Sutaana viꞌi ti.
19 Saŋkan ka ti Zugsob Yesu na ti leb na, ka ti be o tuon, ya yela ka ti nweꞌed nyoꞌog ka mor tiꞌir ne sumalisim. Kaꞌa ala bee?
20 Yanam zug ka ti na nye naꞌasi ne sumalisim.