3
Puꞌusum Winaꞌam tisi ti
1 Baꞌasugo, ti baꞌabiise, sosimi Winaꞌam tisi ti, ye ti Zugsob labaar la na kpelim yadigid toꞌoto ka nye naꞌasi wuu lin daa niŋ yanam ni siꞌem la.
2 Ka sos o ye o na faann ti nimbeꞌednam saꞌan, ka li kaꞌ nidib wusa siak Winaꞌam labaar laa.
3 Ka Zugsob la lee a yelsida daan, ka na tisi ya paŋ ka guri ya, ka Sutaana da nyaŋe yaa.
4 Ka Zugsob la ke ka ti miꞌ ya poog, ka miꞌ ye ya niŋid tiname yeli ya siꞌel la, ka na kpelim niŋid ala.
5 Ti sosid Zugsob la ye o na ke ka ya sunya noŋ Winaꞌam, ka ya modig wuu Kiristo modig siꞌem la.
Saꞌalug
6 Ti baꞌabiise, ti yeli ya ne ti Zugsob Yesu Kiristo paŋ ye ya basi ya baꞌabiis sieba bane zinꞌi ka mor gbanyaꞌam, ka pu dol paꞌalug kane ka ti tisi ya laa.
7 Yanam meŋ miꞌ suꞌuŋa ye li nar ka ya tuꞌas tinam daa tum siꞌem la. Tinam daa be ne ya la, ti daa kaꞌ gbanyaꞌanama,
8 ka pu dit soꞌ diib zaalim ka pu yoo, ka lee tum bedego nintaŋ ne yuꞌuŋ, ka ti yela da daami yaa.
9 Ti daa niŋid ala, ka li kaꞌ ye ti pu mor li suere, ka lee ane ye ya nye tinam tum siꞌem la ka tuꞌasi li.
10 Tinam daa nam be ne ya la, ti daa yeli ya ye, “One pu tum, on da dii.”
11 Ti wum ye sieba be ya saꞌan n zinꞌi ka mor gbanyaꞌam ka kpenꞌed nidib yela ni, ka pu tum na.
12 Linzug ka ti yel nimbama, ka saꞌali ba ne Zugsob Yesu Kiristo paŋ ye ba tum ba tuuma baanlim, ka diisi ba meŋ.
13 Ti baꞌabiise, da genn ka bas tuumsuma maalugo.
14 Soꞌ yaꞌa zanꞌas ka pu siak line ka ti yeli ya gbauŋ kaŋa ni laa, yanam baŋim o, ka luak ne o ka ke ka nyan di o.
15 Da niŋ o wuu o ane ya dataa, ka lee saꞌal o wuu ya baꞌabiig.
16 Ti Zugsob one a sumalisim daan la na tisi ya sumalisim saŋa wusa ne siꞌel wusa ni, ka na be ne ya wusa.
17 M sobid ne m meŋ nuꞌug ye, man Paul puꞌusidi ya. Anwa ka m sobid ka zanbin m gbana ni wusa.
18 Ti Zugsob Yesu Kiristo yelsum na be ne ya wusa.