JOON
n sob gbauŋ atanꞌ daan la nwa
1
1 Man one a kpeenm n sobid neꞌeŋa n tisid fun Gaius, on ka m sid noŋ ameŋa la.
2 M zua noŋire, m sos Winaꞌam ye fu siꞌel wusa na a suꞌum, ka fu na be laafe, ka miꞌ ye fu siig mor laafe Winaꞌam tuon.
3 Li daa malisi m bedego ti zuanam sieba daa paae na ka yel fun dol yelsida la suꞌuŋa siꞌem la. Ti miꞌ ye fu beilim wusa fu a yelsida daan.
4 Siꞌel pu niŋi m malisim gaad man wum ye m biis dol yelsida laa.
5 M zua noŋire, fun a yelsida sob la, ne fun niŋ siꞌel n suŋ yadda niŋidib la hale laꞌam ne ban a saam la.
Gaius la yela
6 Ba tuꞌasi fu noŋilim yela n tis Winaꞌam nidib bane be kpela. Suŋim ba ka ba keŋ tuon. Kel ka fun suŋi ba siꞌem la malis Winaꞌam.
7 Bozugo Kiristo tuuma yela, ka ba yi ken, ka zanꞌas suŋir din ka nidib bane pu dol Kiristo la bood ye ba tisi ba la.
8 Dinzugo li suꞌum ka ti suŋ ti tumtum taaba bama nwa ka ba mool sida pianꞌad la n tis nidib.
Diotrefes ne Demetrius la yela
9 M daa sob siꞌel n tis Winaꞌam nidib bane bee fu teŋin la. Ka Diotrefes one bood ye o niŋi ba tuongat la pu siak man sob siꞌel la.
10 M yaꞌa kena m na tuꞌasi ya on tum siꞌel ka maꞌad tisidi ti la. Ka lin pu siaꞌal oo. O me zanꞌas ti taaba diꞌer ka viꞌid bane bood ye ba diꞌe ba, ka kadi ba yiis Winaꞌam nidib saꞌan.
11 M zuasuŋ, da tuꞌas line a bun beꞌede. Tuꞌasim line a suꞌum. On mekama tum dine a suꞌum ane Winaꞌam nid. On mekama tum dine a bunbeꞌed pu miꞌ Winaꞌam.
12 Soꞌ wusa pianꞌad Demetrius yela suꞌum, hale yelmeŋir dim la me pianꞌade o yela suꞌum. Ka tinam me di o yelsida kaset. Ka fun meŋ miꞌ ye ti kaset la a sida.
Puꞌusug
13 M mor pianꞌad bedego na yel uf, ka pu bood ye m sobi niŋ gbauŋine,
14 ka tenꞌes ka m na kena kaae uf dabisa ayi nwa ni, ka ti pianꞌa tis taaba.
15 Sumalisim be ne uf.
Fu zuanam wusa puꞌusid uf. Puꞌusimi ti zuanam yinni yinni tisi ti.