2
Poꞌadiir diꞌema Kana teŋin
1 Ka daba atanꞌ daar la ka poꞌadiir diꞌema daa be Kana teŋin Galilee soꞌolim ni. Ka Yesu ma be anina.
2 Ka ba buol Yesu ne o nyaꞌandolib ye ba kenn diꞌema la na.
3 Ka ban nu daam poꞌog la, ka Yesu ma yel o ye, “Ba daam naaeya.”
4 Ka Yesu lebis o ye, “M ma, bo ka fu yet man line ka m na maali? M saŋa nam pu paae.”
5 Ka o ma yel tumtumnib la ye, “Niŋim one yeli ya siꞌel wusa.”
6 Jew dim maluŋ line a nuꞌug pier la zug, ka ba mor kuga siins ayuobu n be anina.
7 Ka Yesu yeli ba ye, “Peꞌelim siins la ne kuꞌom.” Ka ba peꞌeli ba hale ti paae noya ben.
8 Ka o yeli ba ye, “Kabigumi li n tis one gosid diꞌema yela la.” Ka ba kabig n tis o.
9 Ka one gosid diꞌema yela la, pu baŋ lin yi siꞌel naa, amaa tumtumnib bane wik kuꞌom la miꞌ. Ka on lem daam la, ka o buol poꞌapaal sid la,
10 n yel o ye, “Soꞌ wusa tisidne damalisiŋ diꞌema pinꞌilugin, ka ba yaꞌa ti nu tig la, ka ba yuꞌun tisid danbeꞌed. Amaa fun kpiank ne damalisiŋ la, hale ti paae nannanna.”
11 Nwa a Yesu nyalima tuumkan ka o deŋim maal. Ka o maali li Kana teŋin, Galilee soꞌolim ni la. O nie paꞌal o paŋ, ka o nyaꞌandolib la niŋ o yadda.
12 Ka neꞌeŋa nyaꞌaŋ la, ka o keŋ Kapeenum teŋin ne o ma ne o mabiis ne o nyaꞌandolib. Ka ba zinꞌin anina dabisa biꞌela.
Yesu n niŋ siꞌel Winaꞌam puꞌusum yin la yela
(Mateo 21.12-13; Maak 11.15-17; Luuk 19.45-46)
13 Ka Jew dim maluŋ line a kuꞌum malek gaadug tienr la da liꞌelne ka Yesu keŋ Jerusalem
14 ka kpenꞌ Winaꞌam puꞌusum yin la ka nye ban kuosid niigi ne peꞌes ne dawana ka nidib be anina tiaꞌasid ligidi.
15 Ka o nok nwiisi maal wug kpaꞌasir n kadi ba wusa ne ba peꞌes ne niigi yiis puꞌusum yin la. Ka kpaꞌe nidib bane tiaꞌasid ligidi la laꞌabaanlug widig, ka lebigi ba teebulnam la n pibil.
16 Ka yel bane kuosid dawana la ye, “Nokimi bama nwa n toomi sa. Da ke ka m Baꞌ yir la liebi ya kukpiuŋ yire.”
17 O nyaꞌandolib la tienn ye li da sob ye, “M nini muꞌe ne Winaꞌam yir siꞌem la wenne bugum n dit man ne.”
18 Ka Jew dim buꞌos o ye, “Tuum nyalima zanbin bo ka fu na maal ka li paꞌal ye fu mor suer n na niŋ anwa?”
19 Ka Yesu lebisi ba ye, “Saꞌami Winaꞌam puꞌusum yir kaŋa nwa ka dabisa atanꞌ daar ka m na due li ziꞌel.”
20 Ka Jew dim yel ye, “Li nokne yuma piisnaasi ne ayuobu ka ba meꞌ yikaŋa ka fu na nyaŋe due li ziꞌel dabisa atanꞌ daaree?”
21 Amaa Yesu pianꞌadne Winaꞌam puꞌusum yir kane aa o niŋgbiŋ la.
22 Dinzugo, on da kpi ka vuꞌug kumin la o nyaꞌandolib tienn ye o deŋim yel neꞌ. Ka ba niŋ Winaꞌam gbauŋ yadda ne pianꞌakan ka Yesu pianꞌa la.
Yesu n miꞌ line be saalib sunya ni la yela
23 Ka on da be Jerusalem maluŋ la tienrin la, nidib bedego nye tuum nyalima zanbina ban ka o niŋ la, ka niŋ o yadda.
24 Ka Yesu pu pesigi o meŋ n tisi baa,
25 bozugo o miꞌ saalib wusa. O miꞌ line be saalib wusa sunya ni ka pu bood ye soꞌ yel o saalib yelaa.