Winaꞌam Gbauŋ (Ghana) JOON 4

Yesu ne Samaria dim poꞌa la yela

1 Yesu daa ti baŋ ye Farisee dim wum ya ka on, Yesu, daa suud nidib kuꞌom n gaad Joon. 2 Amaa Yesu nyaꞌandolib la daa suudi ba kuꞌom, ka kaꞌ Yesu meŋa. 3 On ti baŋ la, o yi Juuda soꞌolimin n keŋ Galilee soꞌolimin.

4 Ka li suꞌum ye o doli yi Samaria soꞌolim. 5 Ka o keŋ paae Samaria teŋ siꞌa ka ba buon ye Sikar, line kpiꞌe poog kane ka Jakob da tis o biig Josef la. 6 Ka Jakob bulug be anina, ka Yesu paae ani ka geenlis mor o ka o zinꞌin bulug la zug, ka li ane nintaŋ soog.

7 Ka Samaria dim poꞌa soꞌ kena ye o wik kuꞌom. Ka Yesu yel o ye, “Tisim kuꞌom ka m nu.” ( 8 Bozugo o nyaꞌandolib la gaadne teŋ poogin ye ba daꞌ diib na.)

9 Ka poꞌa la lebis n buꞌos o ye, “Bo ka fun one a Jew nid, sosid man one a Samaria dim poꞌa ye, m tis uf kuꞌom.” (Bozugo Jew dim ne Samaria dim neꞌesid taaba.)

10 Ka Yesu yel o ye, “Fu yaꞌa miꞌ Winaꞌam piini n a siꞌel, ka lem miꞌ one yet uf ye, tisi m kuꞌom la, fu naan sosin o ka o naan tisin uf vum kuꞌom.”

11 Ka poꞌa la lebis n yel ye, “M Zugsoba, fu pu mor lobidiŋ ye fu wike, ka bulug la me zulum. Yaa ni ka fu na paam vum kuꞌokaŋa? 12 Fu gat tinam yaab Jakobnee? one tis tinam bulug la, ka me nu bulug la kuꞌom ne o biis ne o bunkonbid laa?”

13 Ka Yesu lebis n yel o ye, “On wusa n nu bulkaŋa kuꞌom la, kuꞌonuud na lem gbanꞌ o. 14 Amaa one wusa na nu kuꞌokane ka m na tis o la, kuꞌonuud ku maligim gbanꞌe on soba. Amaa kuꞌokan ka m na tis o la, na ti kilim wenne bulug on sob ni, ka li na bul n tis o nyovur kane kaꞌ naare.”

15 Ka poꞌa la lebis n yel o ye, “M Zugsoba, tisim kuꞌokan, ka m na nu, ka kuꞌonuud ku lem gbanꞌe ma, ka m ku lem kenn kpela na n wik kuꞌom.”

16 Ka Yesu yel o ye, “Kem ti buol fu sid na.”

17 Ka poꞌa la lebis n yel o ye, “M pu mor sida.” Ka Yesu yel o ye, “Fu pianꞌ yelsida, fun yel ye fu kaꞌ sid la. 18 Fu kul ne sidib anu nwa. Ka one ka fu be ne o nannanna la kaꞌ fu sida. Li ane yelmeŋir ka fu yel.”

19 Ka poꞌa la yel Yesu ye, “M Zugsoba, m baŋ ka fu ane Winaꞌam nodiꞌes. 20 Ti yaanam da puꞌusid Winaꞌam zuekaŋa zug. Ka yanam Jew dim yet ye, li suꞌum ka ti puꞌus Winaꞌam ne Jerusalem.”

21 Ka Yesu yel o ye, “Poꞌaa, siakim m yelug ye, saŋa la kenna, ka ya ku puꞌus zuekaŋa zug bee Jerusalem poogin n tisidi ti Baꞌ Winaꞌam yaꞌase. 22 Yanam puꞌusidne tisid bun kane ka ya ziꞌ. Tinam puꞌusidne tisid bun kane ka ti miꞌ, bozugo faangir la yitne Jew dimin na. 23 Amaa saŋa la kenna, ka li paae ya, ka bane puꞌusid ameŋa n tisid ti Baꞌ Winaꞌam na puꞌus ne siig ne yelmeŋir. Ti Baꞌ Winaꞌam boodne bane puꞌusid puꞌuskan la buudi. 24 Winaꞌam ane siig. Ka li suꞌum ye bane puꞌusid n tisid o la, puꞌus o ne yelmeŋir ne ba siis la wusa.”

25 Ka poꞌa la lebis n yel o ye, “M miꞌ ye Messia, one ka Winaꞌam gaŋ la kenna, one ka ba buon ye Kiristo la. O yaꞌa ti kena, o na paꞌali ti siꞌelkam wusa.”

26 Ka Yesu yel o ye, “Man one pianꞌad n tisid uf la, a on sob.”

27 Ka ban sonsi naae la, ka o nyaꞌandolib la kena, ka li lidigi ba, on sonsid ne poꞌa la, ka soꞌ lee pu buꞌos ye, “Bo ka fun ne poꞌa la sonsida?”

28 Ka poꞌa la bas o yuur la, ka keŋ teŋ poogin la ni n yel nidib la ye, 29 “Kemi na gos dau kane yel man zugin yela wusa. One paꞌati a Kiristo la bee?” 30 Ka ba yi teŋ poogin la n ken o saꞌan na.

31 Saŋkan la ka o nyaꞌandolib la sos o ye, “Paꞌana, dim diib.”

32 Ka o yeli ba ye, “M mor diib na di, amaa ya ziꞌ.”

33 Ka o nyaꞌandolib la yel taaba ye, “Soꞌ mor diib na tis o bee?”

34 Ka Yesu yeli ba ye, “M diib ane ye m tum one tumi m la na boodim n naae. 35 Ya pu yet ye, ‘Li kpelim nwadisa anaasi ka ki bunib saŋa na kena?’ Gosimi, m yeti ya ye, godigimi ya nindaas n gos pood la. Ba sid peligne n gur ki bunub. 36 One bun diꞌedne yood, ka vaad zuud la ka li wenne nimbane niŋ yadda n kpenꞌed nyovur line kaꞌ naarin. Bozugo one bud ne one bun na laꞌas nye sumalisim. 37 Ala ka pianꞌuk la niŋ ameŋa ye, ‘Ayinni but ne. Ka ayinni me bun.’ 38 M tumi ya ne ye ya keŋ bun dine ka ya pu kuaa. Sieba daa kua. Amaa yanam diꞌe tuuma la yood.”

39 Samaria dim bedego bane be teŋkan la poogin daa niŋ Yesu yadda, poꞌa la yel siꞌel la zug, ye, “O yel man zugin yela wusa.” 40 Ka Samaria dim la n kenn o saꞌan na la, ba sos o ye, o be ne ba. Ka o kpelim ne ba dabayi.

41 Nidib bedego daa niŋ o yadda yaꞌas, o yelug la zug, 42 ka yel poꞌa la ye, “Li lem kaꞌ fun yel siꞌel la zug, ka ti niŋ o yaddaa. Tinam meŋ wum o yelug la, ka me miꞌ dau kaŋa a dunia faangir la ameŋa.”

Yesu n tiꞌeb niŋkpiꞌuŋ biig la yela

43 Ka o Samaria beilim daba ayi nyaꞌaŋ la ka o toomi anina n keŋ Galilee; 44 ka Yesu meŋ da yel ye, “Winaꞌam nodiꞌes ku nye naꞌasi o meŋ teŋin ne.” 45 Ka on paae Galilee la ba diꞌe o suꞌuŋa, ban nye on tum siꞌel Jerusalem teŋin kuꞌum malek gaadug tienr maluŋ la, bozugo ban me daa keŋ.

46 Ka o paae Kana line be Galilee soꞌolimin la, zinꞌikan ka o daa tiak kuꞌom ka li lieb daam la. Ka dau ayinni one a naꞌayir kpeenm n zinꞌi Kapeenum ka o biig benꞌed. 47 Ka on wum ye Yesu naam Juuda n kenn Galilee na la, o keŋ belim o ye o kena tiꞌebi o biig; ka o bood ne kuꞌum.

48 Ka Yesu yel o ye, “Ya yaꞌa pu nye zanbina ne bunnyalimaa, ya ku niŋ m yaddaa.”

49 Ka naꞌayir kpeenm la yel o ye, “M Zugsoba kem toꞌoto na ka biig la nam pu kpii.”

50 Ka Yesu yel o ye, “Kem, ka fu biig la na voe.”

Ka dau la niŋ pianꞌuk kan ka Yesu pianꞌ tis o la yadda ka keŋ. 51 Ka on gbanꞌe suere kun la ka tumtumnib tuꞌus o ka yel o ye, “Fu biig la tiligeya.” 52 Ka o buꞌosi ba saŋkan ka o biig la banꞌas la pinꞌili sonꞌe ya. Ka ba lebis ye, “Suꞌos nintaŋ ka winigi gbiꞌe biꞌela, ka o niŋtuulum la bas o.”

53 Ka o baꞌ la baŋ ye li ane saŋkan ka Yesu sa yel o ye, “Fu biig la na voe la.” Ka on ne o yidim wusa niŋ Yesu yadda. 54 Neꞌeŋa da a Yesu tuumnyalima zanbin ayi daan line ka o da niŋ on da yi Juuda n keŋ Galilee la.