12
Zam dim saꞌalug la yela
(Mateo 10.26-27)
1 Ka saŋkan la ka nidib maligim laꞌase mik hale ka ba nood taaba noba, ka Yesu yeli o nyaꞌandolib la ye, “Guꞌusimi ne ya meŋ ne Farisee dim dabin line a zam tuuma la.
2 Line wusa ka ba pibil la na ti pibig, ka line wusa me suaꞌ la na ti nie paalo ni.
3 Ka lin wusa ka ya pianꞌa likin la, ba na wumi li nintaŋin, ka lin ka ya nyaꞌam doodin la, ba na ti pianꞌ li bedego nidib wusa ni.”
One ka ya na zot la yela
(Mateo 10.28-31)
4 “M zuanama, m yeti ya ye, da zoti dabiem ne bane kuud niŋgbin maꞌaa ka lee ku nyaŋe niŋ siꞌel paꞌas laa.
5 Amaa m na paꞌali ya one ka ya na zo. Li ane Winaꞌam one na nyaŋe ku, ka li nyaꞌaŋ ka o lem mor paŋ kane na tunꞌe kpenꞌesi ya bugum teŋin la. Eenn, asida zomini Winaꞌam.
6 Ba pu kuosid niimbibisa ayiꞌiŋa ne kobiree? Hale Winaꞌam pu tamidi yinni yelle.
7 Hale ne ya zuobid men, Winaꞌam miꞌ ba wusa kalli a siꞌem. Dinzugo da zoti dabiem; ka Winaꞌam noŋi ya n gat niis la babiga.”
Kiristo siakir ne o kiꞌisug la yela
(Mateo 10.19-20, 32-33; 12.32)
8 “Ka m yeti ya ye, one mekama siak yel nidibin ye man Yesu Kiristo one a Ninsaal Biig la soꞌe o, m me na niŋ o ala Winaꞌam maleknam la tuon.
9 Ka one mekama kiꞌisi m nidibin, m me na kiꞌis o Winaꞌam maleknam la tuon.
10 Ka one mekama poꞌog mam Ninsaal Biig la, Winaꞌam na di suguru ne o ka yiis o tuumbeꞌed la n bas, amaa one mekama n saꞌam Winaꞌam Siig Suŋ la yuꞌur, Winaꞌam ku yiis o tuumbeꞌed la base.
11 “Ba yaꞌa gbanꞌe ya keŋ laꞌasug doodin ne naꞌanam tuon laꞌam ne kpiꞌemnam tuon na, yanam da ke ka yaname na lebis siꞌel bee yaname na pianꞌ siꞌel yela paki yaa.
12 Bozugo Winaꞌam Siig Suŋ na paꞌali ya yaname na pianꞌ siꞌel saŋkan la.”
Arazak daan one kaꞌ yaꞌam la yela
13 Ka nid yinni one be nidib bedego la sisoogin, yel Yesu ye, “Paꞌana, yelim m bier la, ka o pudug faar la n tisi man m din.”
14 Ka Yesu lebis n buꞌos o ye, “Anoꞌon tisi m noor ye m tuꞌa antuꞌa ka pudug faar n tisi ya?”
15 Ka Yesu yeli ba ye, “Baŋimi, ka guꞌusi ya meŋ ne line a fufum wusa, bozugo li kaꞌ ye nid naan mor arazaꞌas bedego la zug ka o na mor nyovure.”
16 Ka o siilimi ba siiliŋ nwa ye, “Dau daa be, n a arazak daan. Ka o poog zood maal bedego.
17 Ka o tenꞌes o potenꞌerin ye, ‘Paalo kaeꞌ ka m na su m zood laa. Dinzug m na niŋ wala?’
18 “Ka o yel o meŋ ye, ‘M miꞌ man na niŋ siꞌem. M na nwaꞌe m buya la n me buya line yalim n su m ki la ne m siꞌelnam la wusa,
19 ka yuꞌun na yeli m meŋ ye, m sunf maꞌeya. M na di ka nu bedego, bozugo m mor diib bedego dine na diis m yuma bedego.’
20 “Ka Winaꞌam yel o ye, ‘Zoluga, yuꞌuŋ kaŋa nwa m na buol fu siig ka li yi fu ni. Ka anoꞌon na soꞌe laꞌad bane ka fu maal la? ’ ”
21 Ka Yesu lem yel ye, “Ala men ka li na niŋ ne bane bood arazaꞌase digin ba meŋ yela, ka lee pu mor Winaꞌam yir arazaꞌase.”
Winaꞌam n gosi ti yela siꞌem la yela
(Mateo 6.25-34)
22 Ka Yesu yeli o nyaꞌandolib la ye, “Dinzug ka m yeti ya ye, da ke ka ya beilim yela paki ya ne lin ka ya na di yela, bee fuud lin ka ya na yeꞌ n lusi ya niŋgbina yelle.
23 Nyovur yela gat diib, ka niŋgbiŋ yela me gat fuud.
24 Tenꞌesimi gosi niise. Ba pu but bee buna, ka me pu suaꞌad diib zinꞌisiꞌa bee suud buya nii, ka laꞌam ne wala, ka Winaꞌam diisidi ba. Ka tinam pu gat niis la noor piiga ne abuyi bee?
25 Ka anoꞌone be ya soogin ka o nyovur yela pak o ka neꞌe na tunꞌe ke ka o tugisi o nyovur dabisir biꞌela?
26 Ka o yaꞌa ku nyaŋe niŋ bun line pu toe nwa, o ye o niŋ wala ne bane kpiꞌem la?
27 “Tenꞌesimi tipuum venla la yela, ban nobugid siꞌem. Ba pu tumma bee wugid fuud n yeeda, amaa m yeti ya ye, hale baa naꞌab Solomon naꞌam laꞌad n venl siꞌem la wusa, li pu venne paae tipuum la yinni mene.
28 Yanam bane ka ya yadda niŋir pu zuꞌe, Winaꞌam yaꞌa ket ka mood venl suꞌuŋa wenne li yene fuvenliŋ ne, ka li be zina maꞌaa ka beug ka ba vaa li n los bugumin, o ku gosi ya suꞌuŋa n gaad ala bee? Ya yadda niŋir pood hale.
29 Da iedi line ka ya na di bee line ka ya na nuu, bee more potenda ka li yela paki yaa.
30 Dunia dim wusa ied neꞌenam, ka ya Baꞌ Winaꞌam miꞌ ye ya boodi ba.
31 Line gaad wusa, iemini Winaꞌam naꞌam soꞌolim la, ka o na zaŋ bamanami n paꞌasi ya.
Kpaꞌam line be arazana ni la yela
(Mateo 6.19-21)
32 “Yanam yadda niŋidiba, da zot dabiem; ka li ane ya Baꞌ boodim ka o na tisi ya o soꞌolim la.
33 Kuosimini yaname mor siꞌel wusa, n tod bane a noŋdim, ka iene ligidi buoris bane ku kudug ka aanse n tisi ya meŋ ne kpanꞌam line be arazana ni ka pu mor saꞌuŋ la, ka naꞌayiis ku paae zuu, ka yala me ku paae saꞌam.
34 Bozugo, ya kpanꞌam n be siꞌela, anina ka ya potenꞌer me be.
Tumtumnib bane ziꞌe ka guꞌusid la yela
35 “Tiꞌebime n nyuꞌe ya fitlanam n ziꞌel,
36 wenne dap bane gur ye ba zugsob naan poꞌadiir diꞌema zinꞌigin kul na n buol ka ba yoꞌog gam toꞌoto siꞌem la.
37 Yelsum na be ne tumtumnib bane ka ba zugsob paae na ka ba ziꞌe gur o la. Asida ka m yeti ya ye, o na ke ka ba zinꞌin ka o meŋ kena n todi ba diib.
38 O yaꞌa ti kul na hale ka li ane yuꞌuŋ tisoose bee beugo bood niere, ka nye ka o tumtumnib la kpelim gur o, ba na nye yelsum.
39 Ala men, baŋimi neꞌ, ye yidaan yaꞌa miꞌin saŋa kan ka naꞌayiig naan zuun o, o naan tiꞌebin hale gurin o yir ka ku gbise ka naꞌayiig la ku nyaŋe kpenꞌe zuun oo.
40 Yanam meŋ me tiꞌebimi ka ziꞌe suꞌuŋa, ka Ninsaal Biig la kenne saŋa kane ka soꞌo soꞌ ziꞌisige.”
Sida bee ziri tumtum la yela
(Mateo 24.45-51)
41 Ka Piita buꞌos o ye, “Zugsoba, fu siilim ne tinam bee soꞌ mekama wusa?”
42 Ka Zugsob la lebis ye, “Ka anoꞌone a yisob tumtum kpeenm ka a yaꞌam ne sida soba? Li na ane on ka o zugsob na zaŋi o yir ben wusa n guꞌul o ye o tisi tumtumnib la ba diib saŋa kan nar wusa.
43 Yelsum na be ne tumtum kpeenm kan ka o zugsob la yaꞌa kul na nye ka o tum wenne on yel siꞌem la.
44 Asida ka m yeti ya ye, o zugsob la na ke ka o tumtum la lieb kpeenm n guri line wusa ka o soꞌe la.
45 Amaa tumtum kpeenm kan yaꞌa yeli o sunfin ye, o zugsob ku kul toꞌo naa, ka pinꞌili buꞌud dap ne poꞌab bane a tumtumnib n be yin la, ka dit ka nuud hale n ti kool,
46 o zugsob la na kul saŋkan ka o ziꞌ ka li na libig o. Ka o zugsob la na saans o hale ka laꞌas o ne bane pu niŋ yadda la.
47 “Ka tumtum kane miꞌ o zugsob boodim ka pu niŋi dolisi o boodim la ka pu tiꞌebe, ba na buꞌ o hale.
48 Amaa tumtum one pu baŋ o zugsob boodim ka lee tum line pu nara ba na buꞌ o ne biꞌela. One ka ba tis o ka li zuꞌe, ba me mor potenꞌer ye o na lebis line zuꞌe, ka one ka ba guꞌul bedego, ba me na mor potenꞌer ye o na lebis hale bedego men.”
Yesu na mor nwaꞌasug na la yela
(Mateo 10.34-36)
49 “M kena ye m zaŋne bugum lob dunia nwa zugin, ka m bood ye li pun ditin sa.
50 Amaa yiiga asee m namis hale ti paae li ben ka nyaan paam sumalisim.
51 Ya tenꞌes ye m more sumalisim kenn dunia ni naa? Ayei, m yeti ya ye, m lee more weligir na.
52 Ka nannanna kudum waꞌae sa, yir yinni ni, nidiba anu yaꞌa be, weligir na be. Ka nidiba atanꞌ na kis nidiba ayi, ka nidiba ayi na kis nidiba atanꞌ la.
53 Ka dau na kisi o dakoonr, ka o dakoonr me na kisi o saam. Ka poꞌa na kisi o poꞌayua, ka poꞌayua me na kisi o ma. Ka bipoꞌa na kisi o dayaam, ka o dayaam me na kisi o bipoꞌa la.”
Saŋa baŋir la yela
(Mateo 16.2-3; Maak 8.11-13)
54 Ka Yesu yel nidib la ye, “Ya yaꞌa nye saŋgbauŋ ya tuon ka li sobugi okidi tuꞌae ya, ya yetne ye saa na ni, ka li sid ni.
55 Ka yaꞌa lem nye ka pebisug daꞌad ya dagobug baba na ya yetne walusug na kena, ka li sid niŋ ala.
56 Zam dima! Ya maki dunia ne saŋgbauŋ, ka miꞌ li saa beilim ne li kaꞌalim saŋa, ka lee niŋ wala n ziꞌ nannanna nwa yela?”
Yela koosug la yela
(Mateo 5.25-26)
57 “Bo ka ya meŋ ku tunꞌe baŋ ye neꞌeŋa nwa dol suere?
58 Soꞌ yaꞌa mor antuꞌa ne uf ka ya dol taaba n waꞌae koto ni, kpeꞌeŋimi fu meŋ ka ya koos yel la sueren, ka li yaꞌa kaꞌ ala ka li paae saria kat la saꞌan on me na tolis uf n tis poluŋ ka on me mor uf n keŋ kpar sarega ni.
59 Asida ka m yet uf ye, fu ku nyaŋe yi naa, asee ka fu yo fu sam la wusa hale ka kobir ku kpelim, ka fu naan nye suer.”