15
Peꞌog kane bodig la yela
(Mateo 18.12-14)
1 Lampodiꞌesidib ne tuumbeꞌed dim daa kenn Yesu saꞌan na, ye ba kelis o pianꞌad.
2 Ka Farisee dim ne gbauŋmiꞌidib la nyon n yet ye, “Dau kaŋa diꞌesid tuumbeꞌed dim, ka dit ne ba.”
3 Ka o siilim ba siiliŋ nwa n buꞌos ye,
4 “Dau kane be ya sisoogin mor peꞌes kobuga ka arakonꞌ yaꞌa bodig, ka o ku ke peꞌes piiswai ne awai la moogin la, ka keŋ ia arakonꞌ kane bodig la hale n ti nye o?
5 Ka o yaꞌa nye o, o na buk o ne sumalisim.
6 Ka o yaꞌa kul yin, o na buol o zuanam ne o kpiꞌes n yeli ba ye, ‘Keli ka ti diꞌem ne sumalisim, bozugo m nye m peꞌog kane bodig la.’
7 Ala men ka m yeti ya ye, tuumbeꞌed sob yinni yaꞌa tiak o suunr, sumalisim na be arazana ni gaad popielim dim piiswai ne awai bane pu boodi ba sunya tiakere.”
Laꞌaf kane bodig la yela
8 Ka o lem buꞌosi ba ye, “Poꞌa kane be ka o yaꞌa mor anzurifa ligidi piiga, ka arakonꞌ bodig, ka o ku nyuꞌe fitla n piis yir la n ia laꞌaf la suꞌuŋa, hale n ti nye lii?
9 O yaꞌa nye li, o na buol o zuanam ne o kpiꞌes n yeli ba ye, ‘Keli ka ti diꞌem ne sumalisim, bozugo m nye m laꞌaf kane bodig la.’
10 Ala men ka m yeti ya ye, tuumbeꞌed daan yinni yaꞌa tiak o suunr, sumalisim na be Winaꞌam maleknam saꞌan.”
Biribiŋ one zo la yela
11 Ka o yel ye, “Dau daa be, ka mor o biribis ayi.
12 Ka pit la yel ye, ‘M baꞌ, pudugim fu faar n tisi man m din.’ Ka o baꞌ pudug o laꞌad wusa tisi ba.
13 “Li pu yuuge ka pit la laꞌas o laꞌad wusa n yi keŋ teŋ lalle sa n saꞌam o laꞌad la yori yori.
14 Ka on saꞌam laꞌad la wusa naae la, koꞌomtitaꞌar lu teŋ la ni, ka fara yuꞌun kpenꞌ o.
15 Ka o keŋ kpenꞌ teŋin biig yinni samkpanꞌasim. Ka o zaŋ o niŋ poogin ye o gur kukurnam.
16 Hale ka o kudum bood ye o poog peꞌel ne kukurnam diib la. Amaa soꞌ pu tis o siꞌela.
17 “Ka o yaꞌam ti zulug leb na la, ka o yel o meŋ ye, ‘M baꞌ mor tumtumnib ala ka ba dit n tigid ka nyaꞌali basid ka m be kpela kpiid ne koꞌom!’
18 Ka o yel ye, ‘M na due ken m baꞌ saꞌan n yel o ye, m tum tuumbeꞌed poꞌog Winaꞌam ne fun,
19 ka pu lem suꞌum ye ba buol m ye fu biiga. Kel ka m lieb fu tumtum yinni.’
20 Ka o due ken o baꞌ saꞌan.
“Ka on nam be lalle la, ka o baꞌ nye o, n zo o nimbaanlig, ka zo bibug o, ka selim o.
21 “Ka biig la yel o saam ye, ‘M tum tuumbeꞌed n poꞌog Winaꞌam ne fun, ka m pu suꞌum ye ba lem buol m ye fu biiga.’
22 “Ka o baꞌ yel o tumtumnib ye, ‘Kem toꞌoto n zaŋ fusuŋ la n mor na yeel o, ka pid baŋ o nuꞌubilin, ka pid o taꞌada,
23 ka gbanꞌe naꞌarazol na n ku, ka ti onb, ka ti diꞌem diꞌema.
24 Bozugo m biig nwa da wenne o kpine, ka lem vuꞌug. O da bodigne, ka ti lem nye o yaꞌas.’ Ka ba pinꞌili maan sumalisim.
25 “Ka o bikpeŋ la yi poogin n kun na. Ka on liꞌel yin na la o wum duudis n nweꞌed, ka ba waꞌad.
26 Ka o buol o baꞌ tumtum arakonꞌ n buꞌos o ye, ‘Bo yele maali?’
27 Ka tumtum la lebis o ye, ‘Fu pitu kul na. Ka fu baꞌ ku naꞌarazol, on nye o ne laafe la zug.’
28 “Ka kpeenm la suunr pelig hale. Ka o zanꞌas ye o ku kpenꞌ yin laa. Ka o baꞌ yi na n belim o ye, o kpenꞌem na.
29 Ka o lebis o baꞌ ye, ‘Gosima, yuma bedego ka m tumne fu tuuma, ka pu zanꞌas fu noor baa daar yinni. Amaa baa daar yinni fu pu tis m boog ye m ku ka man ne m zuanam maal sumalisim.
30 Amaa fu biig kane saꞌam fu laꞌad ne poꞌagoonda la, on kul la na, ka fu ku naꞌarazol n tis o.’
31 “Ka o baꞌ lebis o ye, ‘M biiga, man ne fun laꞌam be saŋa wusa. Ka man mor siꞌel wusa la ane fu din.
32 Li suꞌum ye ti diꞌem diꞌema, ka maal sumalisim, bozugo fu pitu la daa wenne o kpine, ka vuꞌug. O daa bodigne. Ka ti lem nye o yaꞌas.’ ”