16
Yesu kum vuꞌugir la yela
(Mateo 28.1-8; Luuk 24.1-12; Joon 20.1-10)
1 Ka Jew dim vuꞌusum daar gaad, ka Meeri one yi Magdala ne Jemes ma Meeri, ne Salome daꞌ siꞌelnam dine nyuusid wenne tudaare ne, ye ba keŋ misig Yesu niŋgbiŋ la.
2 Ka Alasidaar bekenkeung, ka ban ken yaugin la,
3 ka buꞌos taaba sueren ye, “Anoꞌone na bilig kugir la yaug la noorin n tisi ti?” Bozugo kugir la a kugtitaꞌar.
4 Ka ba godig gos ka kugir la pun bilig sa.
5 Ka ba kpenꞌ yaugin la, ka nye dasaŋ, ka o yeꞌ fupielig n zinꞌi datiuŋ. Ka li lidigi ba.
6 Ka o yeli ba ye, “Da ke ka li lidigi yaa. M miꞌ ye ya iedne Yesu one yi Nazaret na la, on ka ba daa kpaꞌ dapuudir zug la. O vuꞌug kumin ka kaꞌa kpeeꞌ. Gosim zinꞌikan ka ba daa digil o la, o kaꞌa aninaa.
7 Kem ti yel o nyaꞌandolib la ne Piita ye, ‘O na deŋi ya tuon n keŋ Galilee. Ani ka ya na nye o, wuu on daa yeli ya siꞌem la.’ ”
8 Li daa lidigi ba, ka dabiem kpenꞌe ba. Ka ba zoo yi yaugin la, ka pu yel soꞌ siꞌela.
Yesu n nie o meŋ ninsieba saꞌan la yela
(Mateo 28.9-10; Joon 20.11-18)
9 Yesu daa vuꞌug kumin, ka Alasidaar bekenkeung, o nie o meŋ paꞌal Meeri one yi Magdala yiiga, on ka o daa kad kikiris ayopoi o ni la.
10 Ka o keŋ yel nimbane daa dol Yesu la. Ka ba fabin ka kaasid.
11 Ban daa wum ye Yesu vuꞌugiya la, ka Meeri one yi Magdala nye o la, ba daa pu siaki lii.
(Luuk 24.13-35)
12 Lin nyaꞌaŋ ka Yesu tiak o meŋ ka nie paꞌal nidib ayi bane ken teŋkpeŋ la.
13 Ka ba leb yeli ba taaba sieba. Ka ba pu siaki lii.
(Mateo 28.16-20; Luuk 24.36-49; Joon 20.19-23; Tuuma 1.3-8)
14 Lin nyaꞌaŋ, ka o nyaꞌandolib piinayinni la daa dit, ka o nie o meŋ paꞌali ba. Ka zab ne ba, ban daa pu niŋ yadda, ka maal zukpiꞌeuŋi pu siak bane daa nye o ka o voe la pianꞌad la.
15 Ka yeli ba ye, “Kemi dunia zinꞌig wusa ka mool labasuŋ la tis nidib wusa.
16 Ka on mekama niŋ yadda, ka diꞌe Winaꞌam kuꞌom suub na nye faangir. Amaa on wusa pu niŋ yadda Winaꞌam na koosi o yela beꞌed.
17 Bane niŋ yadda na nyaŋe tum tuumnyalim bama. Ba na kat kikiris bas m yuꞌur zug, ka na pianꞌad pianꞌazuna.
18 Ba na gbanꞌe wiigi bee nu yabid ka li ku niŋi ba siꞌela. Ba na noki ba nuꞌus paꞌal banꞌadnam zut, ka ba nye laafe.”
Yesu n du arazana ni la yela
(Luuk 24.50-53; Tuuma 1.9-11)
19 Ka Zugsob Yesu daa tuꞌasi ba naae la, ka Winaꞌam zank o keŋ arazana ni. Ka o zinꞌin o datiuŋ.
20 Ka o nyaꞌandolib la keŋ mool labasuŋ la zinꞌis wusa. Ka Zugsob la tum ne ba, ka ke ka ba tum tuumnyalima ka li paꞌal ye ba moolug la a sida.