2
Ziri paꞌanib la yela
(Juud 4-13)
1 Ka ziri nodiꞌesidib me da be nidibin la wenne ziri paꞌanibi na be ya saꞌan la. Ba na suaꞌ mor ziri paꞌala line ken ne saꞌuŋ, hale n ti kiꞌisid Zugsob one daꞌa ba la ka li ke ka ba nye saꞌuŋ toꞌoto.
2 Ka yadda niŋidib bedego na doli ba tuumyaalis la ka line na ke ka nidib pianꞌad beꞌedne yelsida la.
3 Ba kpianꞌasug na ke ka ba tisi ya ziri paꞌala ye ba nye nyood. Kudumin la sa ka ba koosug pun da deŋim guri ba ka ba saꞌuŋ me nie guri ba.
4 Ka Winaꞌam da pu tis maleknam bane tum tuumbeꞌed la suguru, ka lobi ba bas bugum teŋin niŋi ba bumbok zuluŋ line a zibisug guri saria kadib daar.
5 Ka me pu niŋ suguru ne kudumin dima ka lee tilig Noa one da moon yelsida la ne o yidim babayopoi, saŋkan ka Winaꞌam da ke ka kuꞌom uak dunia wusa ne nidib bane pu dol Winaꞌam.
6 Ka me koos Sodom ne Gomorra teens beꞌed ka ke ka bugum dii ba, ka ba lieb tampeligim ka li a saꞌalug n tis bane pu dol Winaꞌam suer la.
7 O tilig Lot one a yelsida sob, amaa o sunf da saꞌam hale ne tuumbeꞌed dim ne ba tuumyaalis la.
8 Lot one a yelsida sob la n da be ne ba daar wusa ka nyet ka wum ba tuumbeꞌed la, ke ne ka li saꞌam o popielim sunf la.
9 Li yaꞌa a wala Zugsob la miꞌ on na niŋ siꞌem faaenn bane dol o ameŋa, ba makir puugin, ka niŋ tuumbeꞌed dim la namisugin n gur saria kadib daar.
10 Ka li kas kas ane bane dol dianꞌad yaꞌamleog boodim ka neꞌes Winaꞌam kpiꞌeuŋ laa.
Ba mor nyeesim ne titaꞌalim ka pu zot dabiem ne ban na tuꞌu bane mor paŋ n bei agol la,
11 hale ka maleknam bane mor paŋ n kpiꞌemi gati ba la pu tuꞌudi bane be agol la Zugsob la tuon.
12 Ka nimbama nwa lee wenne bunkonbid ne. Ba miꞌilim bee ba niŋgbiŋin ka ba pu tenꞌesida, ka be ne ye saalib gbanꞌe ba ku. Ba pianꞌad beꞌed ne lin ka ba ziꞌ, ka na saꞌam wuu bunkonbid la ne.
13 Ba na nye yelbeꞌed ba tuumbeꞌed la yela. Ba sunya malis ne lin ka ba niŋid ka li a ba niŋgbina boodim, paalo ni. Ba ane gbada ne dianꞌad dim ban diꞌemid ka me laꞌam dit ne ya la.
14 Ba yaꞌam gbanꞌene poꞌasaꞌuŋ ka pu tigid ne tuumbeꞌede. Ba panꞌasid bane sunya pu kpiꞌema, ka miꞌ hale ban na niŋ siꞌem n diꞌe ba fufum beꞌed boodim. Winaꞌam po noor ne ba.
15 Ba bas suesuŋ la ne ka bodig, ka dol Balaam one a Beor biig la suer, one bood tuumbeꞌed yood la.
16 Amaa Balaam da nye saꞌalug o tuumbeꞌed la yela. O buŋ pianꞌ o ne ninsaal kukor ka ke ka o bas zolim tuuma la.
17 Nimbama wenne bulnoya bane pu bun kuꞌom, ka wenne kpaandug line ka sisiꞌem daꞌad. Ka Winaꞌam tiꞌeb zinꞌig kane a lik titaꞌari n guri ba.
18 Ba mor ne pianꞌa yood nweꞌedi nyoꞌod ka mor tuumyood yaꞌamleogo panꞌasid nimbane pinꞌil ye ba yi nimbane ka ba beilim a tuumyood zinꞌigin la.
19 Ba yeli ba ye ba na nye yolisim amaa ban bane yel la tum line ke ka saꞌuŋ kuli ba ka ke ka ba a yamis, bozugo line mekama kul soꞌ ket ka o liebidi li yamug.
20 Ba yaꞌa baŋ Yesu Kiristo one a ti Zugsob ne ti Faangid la ka baŋir la yiisi ba line ket ka saalib a dianꞌad dim la ka ba lem kpenꞌe li ni, ba beilim na maligim saꞌam hale n gaad yiigin la.
21 Li naani aan suꞌum n tisi ba ka ba pu baŋin popielim suere, n gat ban baŋi li ka lem bas Winaꞌam noyelug kan ka o tisi ba la.
22 Li niŋi ba wuu siilis la yel siꞌem la ye, “Baa yaꞌa tinn, o lebidne dit,” ka lem ye, “Kukur kane ka ba suu o nyain la leb bianꞌar nweꞌebin.”