4
Saꞌalug
1 Ala zug m baꞌabiise, yanam ban ka m noŋ hale ka bood ye m nye ya la, li ket ka m mor sumalisim ka lem a m nyood la. M zuanoŋa, ziꞌenimi kiŋ kiŋ yanam a yinni ne Zugsob la.
2 M belim ne poꞌabama, Yuodia ne Sintike ye ban a yinni ne Zugsob la, ba niŋim noor yinni ne taaba.
3 M zoongo ameŋa, m me sosid uf ye fu suŋ poꞌab la. Ba daa laꞌas ne man n tum Kiristo labasuŋ tuuma la ne Kelement ne tumtum taab bane kpelim ka ba yuda sob nyovur paal dim gbauŋin la.
4 More sumalisim saŋa wusa yanam a yinni ne Zugsob la. Ka m na lem yel yaꞌas ye, more sumalisim.
5 Kel ka nidib wusa nye ya suguru. Zugsob la kenna la liꞌelne.
6 Da ke ka siꞌel yela paki yaa, amaa puꞌusum Winaꞌam siꞌel wusa ni ne sosug laꞌam ne bareka puꞌusug, ka o baŋi ya sosug yela.
7 Winaꞌam na tisi ya sumalisim line gat din ka ninsaalib na baŋi li gbin ka na guri ya sunya ne ya tenꞌesa Yesu Kiristo ni.
8 M Baꞌabiise, li baꞌasug ane anwa. Keli ka ya yaꞌam kpenꞌe siꞌel mekama line a sida, ne line mor zunꞌor, ne line a yelsida, ne line a popielim ne line venl, ne tuumsuma ne siꞌel mekama ka li a suꞌum ka nar pianꞌasuŋ. Tenꞌesimi bama yela.
9 Niŋimi line ka ya zamis, ka diꞌe, ka wum, ka nye m saꞌan la, ka Winaꞌam one tisidi ti sumalisim na be ne ya.
Piini bareka puꞌusug
10 Li malisi m hale Zugsob saꞌan la ya baꞌa lem be ne man yaꞌas la. Ya baꞌa sid daa be ne mam, amaa ya daa kaꞌ suer siaꞌ na paꞌali lii.
11 Li kaꞌane m yel ye siꞌeli poꞌogi ma. M pun zamis ye m beilim yaꞌa a siꞌem wusa li ku paki ma.
12 M miꞌilim taduŋo a siꞌem ka lem miꞌ morem a siꞌem. M zamis ye m tunꞌe bei ne yela mekama wusa ni, li yaꞌa a tigir bee koꞌom bee kpanꞌam bee noŋ.
13 M tunꞌe tum siꞌel mekama wusa ne paŋ kan ka Kiristo tisidi m la.
14 Ka laꞌam ne wala sa ya maal suꞌum yaname laꞌam suŋi m ne m namisugin la.
15 Ka yanam Filipi dim miꞌ ye labasuŋ moolug pinꞌilugin ya teŋin la, mam daa yi Masedonia ka toom la, Winaꞌam nidibi be teŋ siꞌa pu tisi m bee diꞌe siꞌeli m saꞌane asee yanam maꞌaa.
16 Bozugo mam daa be Tesalonika teŋin la, ya daa tum n suŋim noor bedego.
17 Li kaꞌa piini ka mam booda, amaa m bood ye ya diꞌe li nyood.
18 M diꞌe piinbane wusa ka ya tis Epafroditus ye o mor na la ka li siaki m boodim. Li wen wuu bun line ka li nyuug malis ka ba nyuꞌe tis Winaꞌam ka o diꞌed ne sumalisim.
19 Ka m Winaꞌam on ka m siak na tisi ya line mekama nar ne ya, ka li dolne o kpaꞌam titaꞌar line be Yesu Kiristo ni la.
20 Ti Baꞌ Winaꞌam na nye zunꞌor saŋa kane kaꞌ benne. Ami.
Puꞌusug
21 Puꞌusum Winaꞌam nidib mekama wusa bane a yinni ne Yesu Kiristo la. Ti baꞌabiis bane laꞌam be ne m la puꞌusidi ya.
22 Winaꞌam nidib wusa puꞌusidi ya hale line gat ane naꞌab Kaisa yidim la.
23 Ti Zugsob Yesu Kiristo yelsum na be ne ya.