15
1 Li nar ka tinam bane yadda niŋir Yesu Kiristo ni zuꞌe la suŋ nimbane ka ba yadda niŋir pood ka ba nye sukpiꞌem ba yadda niŋir ni.
2 Ti yinni yinni niŋim dine na maꞌae o baꞌabiig sunf, ka kaꞌ o meŋ sunfo, ka li ane o baꞌabiig suꞌum nyeeb zug ye li suŋ o ka o yadda niŋir kpiꞌem.
3 Ka Kiristo da pu niŋ dine maꞌed o meŋ sunfo, ka lee niŋ ka li dolne lin sob Winaꞌam gbauŋin ye,
“Bane tuꞌud Winaꞌam la tuꞌudne man.”
4 Lin wusa ka ba da sob Winaꞌam gbauŋin la, da sobne ye li zamisi ti, ye Winaꞌam gbauŋ la na ke ka ti modig ka mor sukpiꞌeuŋ, ka li na ke ka ti mor tiꞌir ye ti na ti be Winaꞌam saꞌan.
5 M sos Winaꞌam one tisidi ti modigir ne kpeꞌeŋir la ye o na ke ka yaname dol Yesu Kiristo la na ke ka ya mor potenꞌer yinni,
6 ka dinzug ka ya wusa na mor noor yinni n zunꞌe Winaꞌam one aa ti Zugsob Yesu Kiristo Baꞌ la.
Bane kaꞌ Jew dim la zunꞌod Winaꞌam la yela
7 Gbanꞌami noor yinni ne taaba ka naꞌas Winaꞌam, wuu Kiristo da diꞌe yanam siꞌem la.
8 M yeli ya ye Kiristo da lieb Jew dim la tumtum ye o paꞌal ye Winaꞌam a sida sob, ka me ye o ke ka Winaꞌam da ziꞌel ti yaanam noor la lieb sida,
9 ka me ye bane kaꞌ Jew dim la na zunꞌe Winaꞌam on zoti ba nimbaanlig la zug. Li da sob Winaꞌam gbauŋin ye,
“Dinzugo, m na puꞌus fun Winaꞌam bareka bane kaꞌ Jew dim la ni,
ka me na yuum n zunꞌe fu yuꞌur.”
10 Ka li len sob ye,
“Yanam bane kaꞌ Jew dim la laꞌam ne Jew dim la,
more sumalisim.”
11 Ka len sob ye,
“Nimbane kaꞌ Jew dim la zaꞌa,
zunꞌomi Zugsob la.
Buudi wusa, zunꞌom o bedego.”
12 Ka Winaꞌam nodiꞌes Azaya me sob ye,
“Jese yaaŋ na kena,
ka Winaꞌam na ke ka o soꞌe buudi wusa.
Ka bane kaꞌ Jew dim la na mor tiꞌir o ni.”
13 M sos Winaꞌam one tisidi ti tiꞌir, ye o na ke ka ya mor sumalisim bedego, ya yadda niŋir Kiristo ni la zug. Ka Winaꞌam Siig Suŋ paŋ na ke ka ya tiꞌir nobug bedego.
Lini ke ka Paul sob ne sukpiꞌeuŋ la yela
14 M baꞌabiise, m suunr kpiꞌem bedego ne yaname a siꞌem ye ya potenꞌer nie ya siꞌel wusa ni ka ya na nyaŋe saꞌal taaba.
15-16 Mam mor sukpiꞌeuŋ ka deŋi sob yelsieba ye m tienn ya li yela, Winaꞌam tisi m popielim piini siꞌa ka m a Yesu Kiristo Tumtum ye m tum o tuuma bane kaꞌ Jew dimin la zug. M tum wuu maalmaanib yiti tisid Winaꞌam piini siꞌem la ka moon Winaꞌam labasuŋ la ye bane kaꞌ Jew dim la na a piini tis Winaꞌam line na malis o, ka o Siig Suŋ ke ka ba a suꞌum nyain.
17 Mam a yinni ne Yesu Kiristo la ke ka m nyaŋedi nweꞌed nyoꞌog ne tuum kan ka m tumme tisid Winaꞌam la.
18 M na nweꞌe nyoꞌog ka pianꞌ neꞌe yela maꞌaa ye Kiristo ke ka bane kaꞌ Jew dim la siak Winaꞌam ka li yine mam saꞌan. Li ane m pianꞌad ne m tuuma
19 ne paŋ kane ke ka m nyaŋedi maan bunnyalima ne Winaꞌam Siig Suŋ paŋ la ke ka Kiristo niŋidi li. Ka ala ka m yi Jerusalem n gilig n keŋ paae Illirikum teŋin ka mool Kiristo labasuŋ la zinꞌis bama wusa.
20 Ka yiti bood hale ye m mool Kiristo labasuŋ zinꞌis ban ka ba nam pu wum o yela laa, ka kaꞌa ye m dolis soꞌ nobaa, ka ane mane pinꞌili li paꞌalug.
21 Li dolne lin da sob Winaꞌam gbauŋin ye,
“Nimbane ka ba pu yeli ba o yela la,
na baŋi li.
Ka bane nam pu wum o yela la
na gbanꞌe li gbin.”
Paul n gbanꞌe ye o keŋ kaae Room dim la yela
22 Lina giŋim saŋa bedego ka m pu nyaŋe keenn ya saꞌan naa.
23 Ka nannanna ka m yuꞌun naae m tuuma teens bama ni, ka me da bood yuma bedego ye m kena kaae ya,
24 ka lin zug ka m mor potenꞌer ye m na nyee ya, saŋkan ka m ti gati ken Spain teŋin la, ka na be ya saꞌan saŋa biꞌela ka li na malis m, ka ya nyaan suŋi m ka m gaad.
25 Ka nannanna m ye m keŋne Jerusalem n suŋ Winaꞌam nidib bane be anina la.
26 Winaꞌam nidib bane be Masedonia ne Akaia teensin, tenꞌes ye li a suꞌum ka nok piini n tolim tis tadimnam bane a Winaꞌam nidib ka be Jerusalem ni la.
27 Ba meŋi tenꞌes ye li a suꞌum ka niŋ ala. Ka li me nar ye ba sid niŋ ala. Jew dim la da ke ka bane kaꞌ Jew dim la laꞌam diꞌe Winaꞌam yelsum line suŋidi ba siis. Ka lin zug ka li a suꞌum ka bane kaꞌ Jew dim la suŋ Jew dim ka ba diꞌe yelsum line na suŋi ba niŋgbina.
28 M yaꞌa tolis ligidi kan ka Winaꞌam nidib bane be Masedonia ne Akaia laꞌas la wusa n tis Winaꞌam nidib bane be Jerusalem la naae, m na kena kaae ya ka naan n gaadi keŋ Spain.
29 Ka m miꞌ ye m yaꞌa paae ya saꞌan na m na mor Kiristo yelsum bedego na.
30 M baꞌabiise, m belimini ya ne ti Zugsob Yesu Kiristo maꞌasim zug ne Siig Suŋ noŋilim zug ye ya laꞌam ne man moꞌ sos Winaꞌam man yela.
31 Sosimi Winaꞌam ka m nyaŋe pons ne bane kaꞌa Winaꞌam nidibi n be Juuda teŋin la saꞌan, ka tuum kan ka m ye m tum Jerusalem ni la malis Winaꞌam nidib bane be anina la.
32 Ka dinzug ka li yaꞌa a Winaꞌam boodim, m na keenn ya saꞌan na ne sumalisim, ka nye nimmaꞌasim ya saꞌan.
33 Winaꞌam one tisid sumalisim na be ne ya wusa. Ami.