3
1 M ye m buꞌos buꞌosa wuu ninsaalib yiti niŋid siꞌem la ka lebis m meŋ lebisa. Ka bo nyood ka Jew dim la nye n gaad bane kaꞌ Jew dim la? Ka ba baŋo kpenꞌeb la nyood a bo?
2 Li ane bedego. Yiiga daan, Winaꞌam da guꞌuli ba o noor pianꞌad.
3 Ka ba sieba yaꞌa da kaꞌane yelsida dima li na ke ka Winaꞌam ku a yelsida sob bee?
4 Ayei, baa biꞌelaa! Hale nidib wusa yaꞌa a ziri dim, Winaꞌam na kpelim a sida sob. Li dol ne lin da sob Winaꞌam gbauŋin siꞌem la ye,
“Li nar ka Winaꞌam a yelsida sob.
Ka on kat saria siꞌem la ziꞌenid.”
5 Winaꞌam tuumsoma la yaꞌa nie paꞌal tinam tuumbeꞌede, ti na yel ye Winaꞌam n tekidi ti tubor la o tum tuumbeꞌed bee? Ayei, baa biꞌelaa!
6 Winaꞌam yaꞌa kaꞌane sida soba, o naan ku nyaŋen kadin dunia nidib saria.
7 Ka m yaꞌa ane ziri sob ka man ziri la zug yaꞌa ke ka Winaꞌam yelsida la paasid, ka tisid Winaꞌam zunꞌor, ba mor suer na kad man saria ye m ane tuumbeꞌed daana?
8 Ka bo ka ti ku tum tuumbeꞌed n ket ka bunsuma doli li? Ninsieba tuꞌud man n yet ye mane yeli ala. Winaꞌam na koos ba yela beꞌed wuu lin nare ba siꞌem.
Soꞌ kaeꞌ n a popiel la yela
9 Aa, to. Tinam bane a Jew dim la a suꞌum gat bane kaꞌ Jew dim la bee? Ayei. M pun deŋim paꞌal ye tuumbeꞌed mor paŋ ne Jew dim laꞌam ne bane kaꞌ Jew dim wusa.
10 Li dolne lin da sob Winaꞌam gbauŋin ye,
“Baa nid yinni kaeꞌ a popiel soba.
11 Soꞌ kaeꞌ n baŋ Winaꞌam yelaa,
bee bood ye o miꞌ Winaꞌam.
12 Ninsaalib wusa kedigne
ka pu dol Winaꞌam suere ka me bodig.
Soꞌ kaeꞌ n niŋid line a suꞌum,
hale baa yinni mene.
13 Ba kukoya wenne yaug zaꞌanoor line ka ba pu yooda.
Ba more ba zilima pianꞌad ne damaꞌar.
Ba noor toe wenne yabigne.
14 Ba noor pianꞌad ane nopoor ne tuꞌud gullim.
15 Ba sunya duod toꞌoto ye ba ku nid.
16 Ka zinꞌikan ka ba gaad wusa susaꞌaŋ na be anina.
17 Ba ziꞌ sumalisim suere,
18 ka me pu zot Winaꞌam.”
19 Ti miꞌ ye wada la yaꞌa yel siꞌel, li yeti tisid bane doli li la. Linzug ka nidib wusa bane mor wada la ne bane kaꞌa li la, na sini ba noor. Ka ba wusa na tuꞌasi ba yela Winaꞌam tuon ka koꞌoŋ buod.
20 Ninsaal kaeꞌ na niŋ wada la yel siꞌem la, ka a popielim daan Winaꞌam tuone. Li ane wada la ni, ka ninsaalib baŋ ye ba ane tuumbeꞌed dim.
Winaꞌam n ket ka nidib a popielim dim o tuon la yela
21 Ka nannanna Winaꞌam nie paꞌal on niŋid siꞌem n ke ka ninsaalib a popielim dim o tuon. Ka Winaꞌam nodiꞌesidib ne wada la paꞌali ti li yela, ka li lee pu yine wada la dolim ni naa.
22 Winaꞌam ket ka ninsaalib bane wusa niŋ Yesu Kiristo yadda la a popielim dim o tuon ka li yine ba yadda niŋir Yesu Kiristo ni, ka pu mor baragaŋ ye Jew dim nwa, ka bane kaꞌ Jew dimi nwaa.
23 Ninsaalib wusa tum tuumbeꞌed ka koꞌoŋ Winaꞌam yelsum.
24 Ka diꞌe buod Winaꞌam tuon line a o piini n tisi ti, ka li yi ne Yesu Kiristo ni na, one faaenn ti la.
25 Winaꞌam zaŋ o n tis ye o kpi, ka o ziim yi, ye o ke ka Winaꞌam supeen naae ne ti. Ka ti naal noor ne o tinam niŋ o yadda la. O niŋ ala ye o paꞌal ye o ane popielim sob. Saŋa kane da gaad la, Winaꞌam da mor sumbugusum ne ninsaalib, ka pu geligidi ba tuumbeꞌede.
26 Ka nannanna, o niŋ neꞌ ye o paꞌal ye o meŋ ane popielim sob, ka me ke ka ninkane niŋ Yesu yadda la a popielim sob o tuon.
27 Dinzugo, siꞌel kaeꞌ ka ti na nweꞌe nyoꞌog ne lii. Li kaꞌane ninsaalib n dol wada la na ke ka ba nyaŋe nweꞌe nyoꞌogo. Li ane ban niŋ Yesu Kiristo yadda la zug.
28 Ti gbanꞌe ye soꞌ yadda niŋir Kiristo ni gullim na ke ka Winaꞌam ke ka o a popielim sob o tuon, ka kaꞌane on dol wada la zugo.
29 Ya tenꞌes ye Winaꞌam ane Jew dim la Winaꞌam maꞌanee? Ayei, o ane Jew dim ne bane kaꞌ Jew dim la wusa Winaꞌam.
30 Winaꞌam ane yinni, ka na ke ka Jew dim ne bane kaꞌ Jew dim la me a popielim dim o tuon, ba wusa yadda niŋir ni.
31 Ya tenꞌes ye tinam paꞌal ye nidib diꞌed popielim ba yadda niŋir zug la, ket ka wada la a zaalim bee? Ayei, baa biꞌelaa. Ti lee ke ka wada la ziꞌe suꞌuŋa.