7
Dap ne poꞌab wada la paꞌali ti siꞌel la yela
1 M baꞌabiise, ya wusa miꞌ wada la yela. Dinzugo ya na gbanꞌe man ye m yel siꞌel la gbin. Wada la soꞌene nid, o vum saŋa maꞌaa.
2 Dinzugo, wada la poogin, li mugusne ye poꞌa laꞌas ne o sid, o sid vum saŋa. Ka o sid yaꞌa kpi, poꞌa la soꞌe o meŋ ne sid kulug wada la.
3 Dinzugo, o yaꞌa laꞌas ne dau soꞌ, ka o sid la nan voe, ba na yel ye o saꞌam dau. Ka o sid yaꞌa kpi, o soꞌe o meŋ ne sid kulug wada la. Ka o yaꞌa kul dau soꞌ, o pu saꞌam dau.
4 M baꞌabiise, yanam me ane ala. Yaname a Kiristo niŋgbina lua la zug, ya daa kpi ka wada la pu len soꞌe yaa. Ka nannanna Kiristo one ka Winaꞌam vuꞌug o kumin ye ti niŋ line maꞌae Winaꞌam sunf la, yuꞌun soꞌe ya.
5 Saŋkan ka ti daa yiti dol ti ninsaalib boodim la, ka wada ke ka ti yaꞌamleog beꞌed due ka li tum ti niŋgbina ni ye ti niŋ line dol kum.
6 Ka nannanna ti soꞌe ti meŋ wada la saꞌan. Ti daa kpi, ka wada la pu len soꞌe tii. Linzug ti dol Winaꞌam ne vumpaal line ka o Siig Suŋ tisi ti la, ka li kaꞌane wadakudug line da sob la ke ka ti dol oo.
Wada ne tuumbeꞌed la yela
7 Ti na yel ye bo? Ti na yel ye wada la ane bunbeꞌed bee? Ayei, baa biꞌelaa. Laꞌam ne lin a sida ye wada la ane bunsuŋ la, wada la yaꞌa da kaꞌanee, m naan ku baŋin tuumbeꞌede a siꞌela. Wada la yaꞌa da pu yelin ye, “Da mor fufume,” m naan ku baŋin fufum a siꞌela.
8 Ka tuumbeꞌed nyee li suer noyelug la ni, ka ke ka fufum buudi bedego due m sunfin. Wada la yaꞌa kaꞌanee, ti naan ku miꞌin tuumbeꞌede.
9 Kudum sa ka m da voe, ka da ziꞌ wada la gbin ne, ka yuꞌun baŋ noyelug la gbin, ka tuumbeꞌed yuꞌun due m sunfin ka m kpi.
10 Ka wada kane da ken ne vum la, m nye ka li mor ne kuꞌum na.
11 Tuumbeꞌed nyee suer wada la ni, ka maꞌ m, n kpenꞌesi m kumin.
12 Wada la meŋ ane suꞌum nyain. Ka noyelug la me a sida, ka a suꞌum nyain.
13 Ka li ane line a suꞌum la mor kuꞌum na tisi m bee? Ayei, baa biꞌelaa. Li ane tuumbeꞌed la niŋi li, ka nok noyelug line a suꞌum la n kuu m ye li nie ye li sid ane tuumbeꞌed. Ka linzug ka tuumbeꞌed yuꞌun lieb line a bunbeꞌed titaꞌar.
Boodim ayi line be ninsaal ni la yela
14 Ti miꞌ ye wada la ane Winaꞌam Siig Suŋ din. Ka man ane ninsaal, ka wenne yamug one ka ba kuosi tis tuumbeꞌed.
15 Man pu gbanꞌe man niŋid siꞌel la gbin ne. M pu niŋ man bood siꞌela, ka lee tum man pu bood siꞌel la.
16 M yaꞌa tum man pu bood ye m tum siꞌel la, li paꞌal ye m siak ye wada la a suꞌum.
17 Dinzugo, li kaꞌane mane niŋid neꞌeŋa, ka lee ane tuumbeꞌed line bee m ni la.
18 M miꞌ ye bun line a suꞌum kaꞌ m nii. M ye m yel ye, bun line a suꞌum kaꞌa man ninsaal boodim saꞌane. Laꞌam ne tuumsuma yaꞌamleog bee m saꞌan la, m pu nyaŋedi niŋidi lii,
19 ka pu niŋid suꞌum wuu man bood ye m niŋ siꞌem laa, ka lee tum tuumbeꞌed line ka m pu bood ye m niŋ la.
20 M yaꞌa tum line ka m pu booda, li paꞌal ye li kaꞌane mane niŋidi lii, ka lee ane tuumbeꞌed line bee m ni la.
21 Dinzugo, m nyet ka mugusug kaŋa be. Li ane ye, m yaꞌa bood ye m niŋ dine a suꞌum, m ku nyaŋe. Asee line a beꞌed maꞌaa ka m na tunꞌe niŋ.
22 Winaꞌam wada la ket ka m sunf maꞌed.
23 Ka m nyet wada siꞌa line tum m niŋgbina ni ka zabid ne wada line ka m potenꞌer bood la, ka loo m wuu m ane sarega nid ye m siak tuumbeꞌed line kuli m niŋgbina la.
24 Oi, bo susaꞌaŋu nwa ka m nyeta! Anoꞌon na faaenn m, ka m niŋgbina nwa ku doli m n keŋ kumine?
25 Winaꞌam gullim na faaenn m, ka li yi ne ti Zugsob Yesu Kiristo ni. M puꞌus Winaꞌam bareka.
M miꞌ line a suꞌum ye m tum Winaꞌam boodim, amaa m niŋgbina boodim nyaŋe m ka m tum line kaꞌa suꞌum.