9
Israel dim la yela
1 M ane Kiristo nid ka pu maꞌada. Ka Winaꞌam Siig Suŋ soꞌe m potenꞌer, ka li me yeti m ye m pu maꞌada. Man ye m yel siꞌel la ane sida,
2 ye m mor susaꞌaŋ bedego m meŋ buudi zug.
3 Li yaꞌa naan keen ka m buudi nyeen suꞌum ka Winaꞌam poon noor tisini m ka m bakin ne Kiristo, m naan boodine li.
4 Ba ane buudi ban ka Winaꞌam da gaŋ la. O da ke ka ba aa o biis ka nye o naꞌam paŋ. Ka o naa noor ne ba ka tisi ba o wada la ne o suer ye ba doli li ka zunꞌe o. Ka ba diꞌe o noorziꞌelug,
5 ka ane Abraham ne Isaak ne Jakob yaas. Ka Kiristo n da lieb ninsaal la, o ane ba buudi. Winaꞌam one soꞌe siꞌel wusa la, na nye zunꞌor ka li kaꞌ naare. Ami.
6 M pu yet ye, Winaꞌam pu dol on yet siꞌel laa. Li kaꞌane Israel dim wusa a nimbane ka Winaꞌam gaŋ laa.
7 Ka li kaꞌane Abraham yaas wusa sid tuunn o tituunlii. Winaꞌam da yel ye, o na gos Isaak biis gullim ka ba a Abraham yaas.
8 Dinzugo biis bane ka Abraham duꞌa wuu ninsaalib yiti duꞌa biis siꞌem la, kaꞌa Winaꞌam biise. Ka bane ka ba duꞌa ka li yine Winaꞌam noorziꞌelug ni wenne Isaak la, sid ane Abraham yaas ne Winaꞌam biis.
9 Winaꞌam da ziꞌel noor n yel ye, “Saŋkan ka m na leb na la, Sara na duꞌa biig.”
10 Ka li kaꞌ zaꞌa nwaa. Ti yaapoꞌa Rebeka da zaŋ liiba puug, ka ba mor saam yinni, one a Isaak.
11-12 Ka saŋkan ka ba daa nam pu duꞌa ba la, ba nam pu niŋ siꞌel ka li a suꞌum bee beꞌed la, ka Winaꞌam da yel ye, “Kpeenm la na lieb o pitu la tumtum.” Ka yel ala ye o boodim la na keŋ tuon. O boodim la ane ye o gaŋ nidib, ka li kaꞌ ban niŋ siꞌel la ke ka ba aa o nidiba, ka lee ane o gaŋir zug.
13 Li sob Winaꞌam gbauŋin ye Winaꞌam yel ye, “M daa noŋ Jakob ka kis Esau,” ban wusa ane Isaak biis.
14 Dinzugo, bo ka ti na yele? Ti na yel ye, Winaꞌam kaꞌa sida daan bee? Ayei, baa biꞌelaa.
15 Winaꞌam da yel Moses ye,
“M na zo nimbane ka m gaŋ ne m boodim la nimbaanlig.”
16 Ka li pu dol ninsaalib boodim bee ba niŋire, ka lee dolne Winaꞌam nimbaanlzoor.
17 Li da sob Winaꞌam gbauŋin ye, Winaꞌam yel Egipiti naꞌab Faaro ye, “M ke ka fu a naꞌab ye m paꞌali m paŋ zem siꞌem, ka ke ka dunia wusa baŋ m yela”
18 Dinzugo, Winaꞌam zot nimbane ka o gaŋ ne o boodim la nimbaanlig, ka ket ka nin sieba bane ka o gaŋ ne o boodim la mor zugkpiꞌeuŋ.
Winaꞌam supeen ne o nimbaanlzoor la yela
19 Aa to. Ya yinni na buꞌosi m ye, “Li yaꞌa a wala, bo ka Winaꞌam nyet nidib taale? Anoꞌon na nyaŋe zanꞌas Winaꞌam boodim?”
20 M zua, fu a anoꞌon na nyaŋe lebis Winaꞌam pianꞌade? Duk ku buꞌos one yaꞌab o la ye, bo ka fu yaꞌab man wala?
21 One yaꞌabid la mor suer n na nok yaꞌagbil n yaꞌab on bood siꞌel ka me mor suer na yaꞌab duk kan ligidi zuꞌe ne one ligidi pu zuꞌe ne yaꞌagbil yinni.
22 Ala men ka Winaꞌam da tum. O da bood ye o paꞌal o supeen ka ke ka nidib wusa baŋ o paŋ. Dinzugo o da gbanꞌe o meŋ ka modig ne bane ka o supeen na luu ba zug ka nar ye o saꞌami ba la,
23 ka me bood ye o nie paꞌal paalo ni o naꞌam paŋtitaꞌar, dine ka o pesigi tinam bane ka o zo nimbaanlig ka da tiꞌebi ti ye ti ti diꞌe o naꞌam la.
24 Li ane tinam bane ka o gaŋ la, ka kaꞌ Jew dim la ni gullimnee, ka ane bane kaꞌ Jew dim la ni men.
25 Li dolne Hosea da sob Winaꞌam gbauŋin siꞌem la ye, Winaꞌam yel ye,
“Nimbane da kaꞌ m nidib la,
ka m na noki ba ka ba aa m nidib.
Ka buudi kan ka m pu noŋ la,
ka m na gaŋi ba ka ba lieb buudi kan ka m noŋ la.”
26 Ka
“Zinꞌig kan ka m yeli ba ye,
‘Ba kaꞌ m nidib la,’
anina ka m na gaŋi ba ka ba a man, Winaꞌam one voe la biis.”
27 Winaꞌam nodiꞌes Azaya da yel paalo ni Israel dim yela ye,
“Hale ne Israel yaas a bedego wuu titanbiꞌisug line dig moꞌar noorin la,
ba biꞌela maꞌaa na nye faangir.
28 Zugsob na kad dunia saria toꞌoto.”
29 Li dolne Azaya me da deŋi yel siꞌem la ye,
“Zugsob one soꞌe siꞌelnam wusa la yaꞌa da keen yaas biꞌela tisini tii,
ti naan liebin wuu Sodom ne Gomorra teens dim,
bane kaꞌ yaas la ne.”
Israel dim ne labasuŋ la yela
30 Aa to. Bo ka ti na yele? Buudbane kaꞌ Jew dim la da pu mood ye ba a popielim dim Winaꞌam tuone, ka Winaꞌam lee ke ka ba a popielim dim o tuon ba yadda niŋir poogin.
31 Ka Israel dim bane bood wada kane na ke ka ba a popielim dim Winaꞌam tuon la, lee pu nyee lii.
32 Bo ka ba pu nyee li? Li ane ba boodim la pu laꞌas ne ba yadda niŋir la zug, ka ba lee tenꞌes ye ba na diꞌe li ba tuuma zug. Ba tuꞌug kugir n lu, kugkane ka ba sobi li yela Winaꞌam gbauŋin ye,
33 “Winaꞌam yel ye,
‘Gosima.
M digil kugir Zion Zuer zug,
line na ke ka nidib tuꞌug ka lu.
Li ane kugtitaꞌar ka ba na bilig n lu.’
Kiristo nwaasne kugir la.
Ka one niŋ o yadda la,
ku di nyan o zugo.”