2
Paꞌalsuŋ la yela
1 Amaa yelimi ba line dol yelmeŋir paꞌalug.
2 Kel ka dap kuda da nu daam bedego, ka mor nimmua, ka a potenꞌer dim, ka a bane siakid pianꞌad suꞌuŋa, ka me mor noŋilim ne modigir suꞌuŋa.
3 Ka poꞌanyaꞌas me tum line dol naꞌasi suer, ka da bood yeesugo, ka da ke ka daam kuli baa. Ba paꞌalim line a suꞌum,
4 ka saꞌal poꞌab bane pu kudige, ka ba noŋi ba sidib ne ba biis,
5 ka mor yaꞌam, ka kaꞌ dianꞌad dima, ka zot nidib nimbaanlig, ka a yipoꞌa suma ka siakidi ba sidib noya, ye nidib da neꞌes Winaꞌam labasuŋ laa.
6 Ala men, saꞌalim dasam, ye ba a potenꞌesuŋ dim.
7 Ka paꞌali ba ne fu tuuma wusa line a tuumsuma ka ba me tuꞌas fu tuuma, ka paꞌali ba ne potenꞌesuŋ ne nimmua,
8 ne pianꞌasuŋ line ka ba ku nyaŋe zerige fu, ka bane kiꞌisidi ti di nyan, ka ku nye taale ti saꞌanee.
9 Kel ka bane a tumtumnib siakidi ba zugsobnam noya ka da zanꞌasi baa, ka tumi siꞌel wusa line na maꞌae ba sunya,
10 ka da zuudi ba laꞌade ka lee paꞌal ye ba sid ane sida dim, ka ba siꞌel wusa ni, nidib na baŋ ye Winaꞌam ti faangid paꞌalug la a suꞌuŋa.
11 Ka Winaꞌam popielim nie ye nidib wusa nye faangir
12 ka o paꞌani ti ye ti zanꞌas lin pu dol Winaꞌam suere, ne dunia boodim, ka ti dol Winaꞌam suer ne potenꞌer ne yelsida n be dunia nwa ni.
13 Ka ti mor tiꞌir suŋ ne Yesu Kiristo, one a ti kpiꞌeuŋ sob Winaꞌam ti faangid la, naꞌam ken saŋa la.
14 O noki o meŋ tisi ti ye ti nye yolisim ti tuumbeꞌed poogin, ka ke ka ti a nyain ka liebi o meŋ nidib bane bood hale ye ba tum tuumsuma.
15 Paꞌalimi neꞌenam ka saꞌali ba, ka kpeꞌeŋi ba sunya ne fu paŋ wusa. Da ke ka soꞌo soꞌ poꞌogi fu.