16
Tjiitju Mirritjanu Kanarringulpi Pakarnu
Matthew 28.1-10, Luke 24.1-12, John 20.1-10
1 Karrputjarra Tjatiti miil-miilpa ngarangu. Katji-ya warakparni nyinama tjirntu-ya maa tjarrpatjunu. Tjiingkalpi Mary Matalan kamu Tjalumi kamu Mary Jamesku yipi pakara-ya yanu parnti-parnti palyaminyirri manu miku-ya Tjiitju mirri nyitilkuwa.
2 Tjiinpa ngarringu-ya Tjantingka raakarralpi pakara-ya yanu pirnkikutu.
3 Katji-ya maa yanama wangkama-ya, “Nganalu-lampa pamarrpa tjarlu pirnkitjanu yurntulku?” (Pamarrpamarntu tjarluminyirri.)
4 Tjiintu tutjulu maa nyangu-ya pamarrpa kurralkakili yurnturnu wantijunu ngarama.
5 Katji-ya maa tjarrpangu nyangu-ya karratarringu puntu kulyarri tjarntu tjina-tjinayurrukulu kuru-kurukulu tjungarnikati nyinama.
6 Puntu kulyarri wangkangu-tjananya, “Wiya nyurra ngurlurrimalpa. Milyapunginpa-rnantaya tjiitjalta-ran Tjiitjuku Natjuratjanuku nyanginpa, yangka-ya wartangka waralytjunu. Wiya paluru ngaangka. Paluru mirritjanu kanarringulpi pakara yanu. Nyawa-ya ngaangkatuka-ya ngarritjunu.
7 Marlaku-ya yarra watjala-tjananyaya palurukurnu wanalpayingka laltungka kamu Piitangka. Tjiitju kurranyurriku Kalalikutu. Tjiingkalpi-ya nyaku-ya. Palurulu kurralkakili wangka watjarnu wantitjunu.”
8 Tjiinpa tutju pirnkitjanu pakara-ya marlaku tarrputjunu karrata tiltirryanama-ya. Tjiitjanulpi wiya-tjananyaya watjarnu. Ngurlu wangkaparni nyinama-ya.
Tjiitju Yutirringu-lu Mary Matalanta
Matthew 28.9-10, John 20.11-18
9 Tutju Mary Matalan kurralka kukurrkulu wilkikulu nyinama. Tjiitjulu kukurrpa laltu-tjananya yiyarnu. Ngulampa Tjiitju Tjantingkalpi raakarra mirritjanu pakarnu. Paluru kurranyu yutirringu-lu tutju palurungka.
10 Tutju paluru yanu kutjungkarringu-tjananya palurukurnu wanalpayi laltungka. Tjuni-ya luyurrminyirri nyinama kamu yulama.
11 Marylu watjarnu-tjananya, “Kulila-rniya! Nyangu-rna Tjiitju mirritjanu pakarnu kanalpi ngarama.” Wiya-luya kulirnu.
Tjiitju Wanalpayi Kutjarrangka-pulanya Yutirringu
Luke 24.13-35
12 Tjiitjanu Tjiitju-pulanya puntu kutjupayuru yutirringu wanalpayi kutjarrangka tjiitja-pula ngurra kutjupakutu maa yanama.
13 Puntu kutjarralu-pula ngulampalpi milyapungu. Marlaku-pula yanu watjarnu-tjananyaya wanalpayingka kalkinta. Wiya-pulanyaya kulirnu.
Tjiitju Wanalpayingka 11ta-tjananya Yutirringu
Matthew 28.16-20, Luke 24.36-49, John 20.19-23, Acts 1.6-8
14 Ngulampa Tjiitju-tjananya yutirringu palurukurnu wanalpayingka 11ta nyinama-ya mangarri ngalkunma. Palurulu-tjananya watjarnu kurntatjunu, “Nganaku wiya-tjananyayan kulirnu tjitjalta-ya watjarnu ngayu-rniya nyangu mirritjanu pakarnu-rna?”
15 Palurulu-tjananya watjarnu, “Yarra-ya ngurra kutjupakutu ngurra kutjupakutu kamu tjukurrpa palya ngayukurnu parra-tjananyaya watjanmalpa puntu laltungka.
16 Puntulu nganalu-rni ngayu mularrtuminyirri kulilku. Tjiitjalta-tjananyaya kalyungka tupurltjunamalpa. Mamalulpi wulu kana kanyilku. Katji puntulu nganalu-rni wiya kulilku Mamalulpi warukutu yiyalku.
17 Katji puntulu nganalu-rni mularrtu kuliku ngayukurnu maya-rnatjanampa yungku miku-ya ngayukurnu yiningka kukurrpa puntungka-tjananyaya yiyalku. Kamu wangka kutjupalpi-ya wangkamalpa.
18 Katji-ya lingka ngurrpalu manku. Wiya-ya mirrirriku tjiitjanu. Katji-ya kalyu kara tjikilku. Wiya-ya mirrirriku tjiitjanu. Katji-tjanayaya marumpulu nyurnu pampulku, tjiitjanulpi-ya puntu nyurnutjanu palyarringku.”
Tjiitju Marlaku Yanu Yalkirikutu
Luke 24.50-53, Acts 1.9-11
19 Tjarlu Tjiitju-tjananya wangkangu wiyarringulpi Mamalu kankarramanu katingulpi yalkirikutu. Kamu paluru Mamangkalpi-lu tjungarnikarti nyinatingu.
20 Tjiitjanu palurukurnu wanalpayi-ya yanu parra-tjananyaya tjukurrpa watjanma. Tjarlu Tjiitjulu-tjananya marrkarrmanu palurukurnu warakpa-ya palyanma. Puntu laltulu-ya nyangu kulirnu, “Yuwayi, ngaantu-ya tjungarnilu watjarninpa.”