8
Jesús anmal-irwal-Pab-Tummadzhe-koled-pul-tummadga mai
1 Imi anmal chunmananimaldo: anmal tule-irwal-Pabzhe-koled-pul-tummad-nikamal. Wedin Jesús, tenal Jesús nikpa-neggin Pab-Pul-Tummad-kan-nuedzhik pato tule-tummadga chii.
2 Tenal Jesús Pab-maid-neggin arpamai. Tenal we negdin Pab-maid-neg-chunchunnad, tenal Pab Tummad we neg opinnis, tulemal kwen chobzhajulmal.
3 Imi tule-irwal-Pabzhe-koled-pul-tummagan-pel-kwapa nugzhales Pab Tummadga immal ukegal, tegin Pabga immal-okuggalbal. Al Jesús Pab Tummadga immal uked-wilubmo.
4 Tenal iti-napkin tule-irwal-Pabzhe-kolmalad íchejul nika Moisés-igal-mamikidbal Pabga immal ukegal. Al Jesús imis iti-napkin mailen, tule-irwal-Pabzhe-koledga kwen kuszhulin.
5 Tenal tule-irwal-Pabzhe-kolmaladdin iti-napkin Pab-Tummad-megwed-neggin arpananimal. Tenal we negdin pinche wilub-oyonai, nikpa Pab-maid-neggin igi arpale. Al Moisés Pab-megwed-neg chobbi-kualgu, Pab Tummad Moisésga chogzhado:
Tenal pedin nue taker,
imi an akpene pega yalgin oyojad-yopí
pe an-neg chobmogo.
Ex. 25:40
6 Tenal Jesúsdin tule-irwal-Pabzhe-kolmalad-pimaladga pul arpaged-nued nika. Tenal Pab Tummad pul kaka-nuegan-ukcha-choggu, al Pab Tummad Jesúsbal pul igal-nued mezhis, Pab-akpene-Moisésbal-pul-igal-mezhijadga.
7 Imi Pab kepegin tulemalbak aga igal-mezhijad nuedilen, igal-kwapid pal kwen mezhiszhulin.
8 Tenal Pab Tummad takchagu tulemal kwen unnijulmal nuekwa nanegal, al Pabdin chogalzhun: “Antin igal-pid mesnebal.”
Imi Pab-kartagin chogdo:
Pab Tummad chog:
“Imi ibe noniko,
an Israel-tulemalbak
tegin Judá-tulemalbak igal-pin mesnebal.
9 Tenal an-Egipto-akar tadgan-onosmaladgin
an igal-mezhijadyob an igal pal kwen mesnejul.
Imi teun tadgan an-igal-mezhijadyob
inniki kwen nanaszhulmal.
Al an we tulemal-ebeszhun.
Al tegidbal an igal-pin mesnejun.”
10 Tegin Pab Tummad chogbal:
“Imi an Israel-tulemalbak igal mesne.
Tenal te-cholbal,
antin igal-mezhijadgin pinzhedi-kugal
Israel-tulemal-imako.
Tegin an Israel-tulemal-imabalo
aga ulubgin-akar we igalgin nued nanegal.
Tegin antin Israel-tulemalga
e-Pab-Tummadga kunoniko.
Tegin Israel-tulemal an-tulemalga kunonimalbalo.
11 Tenal te ibegin Israel-tulemalgin
an-chogzhadyob kunonikil,
Israel-tule e-neg-tikalbal-mamimalad-keg-pal-oturdakel,
tegin e-kwenadganga keg palchogbalil:
‘Pedin Pab-Tummad-wisguenab.’
Imi tulemal-pel-kwapa an-wisgunonimalo
tule-tummagan-ugakche
tegin tule-polgana-ugakchemo.
12 Tenal antin Israel-tulemal-iskued elio,
tegin antin Israel-tulemal-iskuedgin
pinzhedii pal kwen kuojul.”
Jer. 31:31-34
13 Imi Pab-igal-pin-mezhijadbal, choglenaido, we igal-chereddin pato ibga keg pal ku. Al Pab-Tummad-igal-chered-mezhijad pulejul pelgunoniko.