8
Jesús masgin milibake-tulemal-okuchad
(Mateo 15:29-39)
1 Imi teun takalgu, tulemal íchejul kannan Jesúszhe ampagunonimalbal. Imi teun tulemal mas-kunned pel nikchul kudimal. Tenal Jesús takchagu tulemal mas-kunchul kudimal, e-chapinganzhe kocha ka chogal:
2 —Imi antin wilejakwa we tulemal-tak. Tenal we tulemal ibapágus anmalbak pukwamo, mas-kunned kwen nikchulmal.
3 Tenal we tulemal-wal-walgwen tikajul-akar tanimal. Al anmal masgin-okuchajul e-negzhe palmismalal, we tulemal igalbal ukul metamalo.
4 Tegin e-chapingan Jesúsga chogal:
—¿Anmal pia mas-kunned amio, unnigualedzhe tulemal-okunkal? Imi anmal neg-kweburgin pukchulmal, itigin tule-immal-uked kwen nikchul.
5 Tegin Jesús aga e-chapinganzhe ekichial:
—¿Pemal, walbigwa madu wis nikmal-ade?
Tegin e-chapingan Jesúsga chogal:
—Anmal walakugle madu wis nikmal.
Tegin Jesús aga e-chapinganga chogal:
—Tegil nabirdo.
6 Tegin Jesús tulemalga chogal:
—Pemal napkin ampagumalo mas kunmalgal.
Tegin Jesús walakugle madu chusgu, Jesús Pab Tummadga tog-nuedi chogzha. Tegin Jesús purwi-purwi madu pipichisgu madu Jesúsga melgud. Tegin Jesús aga e-chapinganga madu ukcha tulemalga mimigal. Tegin e-chapingan pel-kwapa tulemalga madu mimiszhun.
7 Tegin Jesús-e-chapingan ua-purwigana wis nikmalbal. Tegin e-chapingan Jesúsga ua-ukchamalgu, Jesús Pab Tummadga tog-nuedi chogzhabal, tegin ua Jesúsga melgudbal. Tegin Jesús aga e-chapinganga ua-ukchabal tulemalga mimigalbal. Tegin e-chapingan pél ua-mimismalbalzhun.
8 Tegin tulemal-pel-kwapa immedzhe mas kuchamal. Tegin tulemal mas-kuchamalad-cholbal Jesús-e-chapingan karpa-kwakugle mas-okpitchad wesmal.
9 Imi teun macherganbi milibake-kuchale mas kuchamal, tenal omegan, nuskan pel choglejul. Tegin tulemal-mas-kuchad-cholbal, Jesús tulemalga chogal:
—Imidin pemal akalzhul negzhe nemalzhunno.
10 Tegin tulemal nadgu, Jesús aga e-chapinganbak ulgin nadmalmo, Dalmanuta-neg-kwebur-tikalzhe.
Pariseomal Jesús-wilub-takchad
(Mateo 16:1-4; Lucas 12:54-56)
11 Tegin Jesús Dalmanuta-neg-kwebur omosgu, Pariseomal Jesúsbak chunmanonimal, Jesús-wilub-takegal. Tegin Pariseomal Jesúsga chogalmal:
—Imi pedin Pab Tummadzhe wis ekiso, anmal-wagin immal-taktijulid imagal, anmal wismalgal, Pab Tummad chunchunnad pe-palmialid o chul.
12 Tegin Jesús Pariseomal-chogzhad itosgu, chowi-pannos. Tegin Jesús tule-pukmaladga chogal:
—Imi antin pudar-itogus tule weob an-imaked. ¿Tenal pemal-imisgwamalad, igi itomal-wede, anche immal ekiseddé? Imi pemal anche immal-taktijulid ekisnaid pemalga kwen oyolegojul-kuo.
13 Tegin Jesús aga e-chapinganbak ilgwen ulgin nakwis, tegin mata-opakal nadmalzhun. Tenal Pariseomaldin aka pukwa-pesmal.
14 Tegin Jesús-e-chapingan ulgin-natapidgin madu amialmal. Tenal Jesús-e-chapingan aga madu igesmal chedagal, unnila walkwénna madu wis cheinatapmal.
15 Tegin Jesús aga e-chapinganga chogal:
—¡Wijira! Pariseomal-madu-inagin, tegin wijirbal Herode-madu-inaginmo.
16 Tegin Jesús-e-chapingan aga emal-emal chunmakalmal:
—¿Imi anmal-madu-cheinonijulidbal, al Jesús anmalga weob chogalyé?
17 Tegin Jesús chunmanani e-chapingan-itosgu, chogal:
—¿Ibiga pemal madu-cheinonijulidgin pal chunmananimal-wede? ¿Pemal ampa aku itomaldé, pemal ampa mag takchulmaldé, akpene an igi immal imajad, tegin an igi madu omelos? ¿Pemal nono-akpurrusmalmodé?
18 Tenal pemal takmalan, tenal pemal yabli aku takmal, tenal pemal itomalan, tenal pemal yabli aku itomal. ¿Pemal pato igesmaldé?
19 ¿Akpene an madu-walatalgin miliatal-tule-okuchadgin, karpa-kwabigwa pemalga okpis-chogna?
Tegin e-chapingan Jesúsga chogal:
—Karpa-kwaambe-kakabogde.
Tegin Jesús chogalbal:
20 —¿Tegin an madu-walakuglegin, milibake-tulemal-okuchagu, karpa-kwabigwa pemalga okpis-chogna?
Tegin e-chapingan Jesúsga chogalbal:
—Karpa-kwakuglede.
21 Tegin Jesús aga e-chapinganga chogalzhun:
—¿Pemal yabli aku itomaldé?
Tenal e-chapingan Jesús-pal-kwen-abin-imaszhulmal. Tegin Jesús Betsaidaje omosmalzhun.
Jesús Betsaidagin tule-aku-ataged-nudajad
22 Tegin Jesús aga e-chapinganbak Betsaidaje omosgu, tulemal Jesúszhe tule-aku-ataged-cheinonimal. Tegin tulemal Jesúsgin wilenaigualmal tule-ebugedgin ega we tule-nudagal.
23 Tegin Jesús chunkalgin tule-aku-ataged-kasgu, neg-kwebur-tikalzhe tar-ches. Tegin Jesús tule-aku-ataged imiagin kwi imas, tegin chunkalgin tule-aku-ataged-ebusbal. Tegin Jesús tule-aku-atagedzhe ekichial:
—¿Pe nabir immal wis tak?
24 Tegin tule-aku-ataged nuu Jesús-taktegu, Jesúsga chogal:
—Tenal antin tule-wis-takendo, tenal chapimal pirpirmanaidyob.
25 Tegin Jesús kannan kogin tule-imia-ebusbalgu, tule-aku-ataged ilgwen nuguszhun, tule-imia-nueganyob pes.
26 Tegin Jesús aga negzhe tule-nugujad-palmijogalgu, chogal:
—Pe ilgwen negzhe nao. Pe melle neg-kweburgin pal togo tulemal melle pe-wisgumalgal pedin nugus.
Pedro Jesúsga chogzhagujad: “Pedin Pab-Machi-chunnad”
(Mateo 16:13-20; Lucas 9:18-21)
27 Tegin Jesús aga e-chapinganbak Cesarea-Filipobal nadmal, neg-kwebur-purwiganaje. Tegin Jesús igalbal-natapidgin, aga e-chapinganzhe ekichial:
—¿Tulemal, igi ankin chogmal, ante toa-tule?
28 Tegin e-chapingan Jesúsga chogalmal:
—Tule kwen chogmal, pede Juan Bautista; kwen chogmalbal, pede Elías; kwen choge, pede Pab-kaka-palchoged-pid.
29 Tegin Jesús aga e-chapinganzhe ekichialmo:
—¿Anná, pemalde igi ankin chogmalmode, ante toa-tule?
Tegin Pedro Jesúsga chogalzhun:
—Pedin Cristo-Pab-akpene-chogzhad-palmidagoed-tule.
30 Tegin Jesús aga e-chapinganga chogal:
—Teobdo. Tenal pe melle tule-pimaladga pe palchogo, antin Pab-akpene-chogzhad-palmidagoed-tule.
Jesús aga chogzhagujad ede purkweenab
(Mateo 16:21-28; Lucas 9:22-27)
31 Tegin Jesús aga e-chapinganga chogal:
—An-Te-Tule-Chunna peyedzhe wilegenab. Tegin Judio-chelegan-tummagan tegin tule-irwal-Pabzhe-kolmalad-e-tummagan, tegin Moisés-igalgin-tulemal-oturdamalad an-kwen-abingaojulmalbal. Tegin tulemal an-mesmalo tenal Pab ibapágin kannan an-otulononibalo.
32 Imi teun Jesús aga pakal-pud chogzha ede purkweenab. Al Pedro pidzhi Jesúszhe kocha chogal:
—¿Ibiga pe weob chogzha-wede? Pe melle weob chogzhagalan.
33 Tegin Jesús akpiridgu, e-chapingan-pimalad-wagin Pedroga chogal:
—Nia-Satanás, pe we-akar pe nema. Pedin igal-puledgin an-egwanbi-kual. Tenal pedin Pab-igalgin kwen pinzhejul, pe tule-igalgin pinzhenai.
34 Tegin Jesús tule-pimaladzhe kochamo. Tegin Jesús aga e-chapinganga tegin tule-pimaladga chogal:
—Meke-ibi-tule anpal naigubiel, aga tukingabi pal kwen pinzhejulinab. Tenal we tule kuakwa kudiinabbal anka purkwegal, tule-nakrusgin-aga-purkwe-natapidyob. Imi tule an-chogzhadyob naneel, kep an-chapinga kunoniko ankin turdagal.
35 “¿Ibiga an teob chog? Imi meke-ibi-tule anpal-naidbal yapa purkwejogel, we tule yabli pelgunoniko. Tenal meke-ibi-tule anpal-naidbal, tegin Pab-kaka-nuegangin chunmakedbal, akalzhul purkwejogel, we tule kannan tullenoniko.
36 “Imi tule iti-napkin pel-kwapa immalmal nikunonikilen, tenal Pab purpa-abonoged kwen nikchulil, ¿ibi-nued we tulega kunoniko pe ebinzhe? Chulá.
37 ¿Tenal tule ibi-immalmal-ukedgin unnio aga purpa abonogal melle sapejul oturdalegal? Chulá. Keg kue. Tenal immal kwen nikchul tule aga purpa abonogal.
38 “Imi meke-ibi-tule, tule-iskued-nikmalad-wagin, tegin tule-Pab-ebesmalad-wagin, ankin chogzhal: ‘Ante wichí, we Jesúsde toa-tule,’ tegin an-chogzhadgin chogzhabalil: ‘An we kaka wichul,’ an-Te-Tule-Chunna nugu-taklegedgin, tegin an naga-kannalegedgin tegin Pab-Tummad-kannalegedgin tegin angelmal-kannalegedgin iti-napche an kannan tanikil, an we tulegin chogmogo: ‘An wichí wedin toa-tule.’ ”