9
Pab Tummad Israel-tulemal-chus egadga kugal
1 Imi an Cristobal-naidbal an chunchunnad pemalga chogdo: an kwen kakanzhejul. Imi Pab Purpa Nued an-ulubgin-maidbal an itomodo, an chunchunnad chunma.
2 Imi Israel-tulemal-pel-kwapa Jesucristo-abingejulmal-choggu, al an naga ulubgin pukib-itogedbal an nunma-ito. Tenal an pukib-itoged keg-pel-chulgubal.
3 Tenal an naga itodo, an Pabzhe pul ukapchalegelen, pul nabirin, tegin an Cristo-maidzhe melle pal omogelen, pul nabirbalin, an-kwenamalad-sanaled-Israel-tulemal an-anal Cristoje abonolenonimalgal.
4 Imi Israel-tulemal igal-nikamal Pab-nuskanga kunonigal, tegin Pab-yer-takleged ampa Israel-tulemalgadmo. Tegin Pab Tummad Israel-tulemalbak aga kaka-ukchamal. Tegin Pab Tummad Moisésbal Israel-tulemalga igal-mezhisbal. Tegin Israel-tulemal igal-nikabal Pabzhe-koled-neggin Pab-otummomalgal. Tegin Pab Tummad Israel-tulemalga kaka-ukchabal immal imagal.
5 Tegin tadgan-Pab-Tummad-tar-chusmalad ampa Israel-tulemalmo. Tegin Israel-tule-e-tadgan-akar, Cristo sanal nonibal. Imi Cristo Pab-chunchunnad, tegin Cristo pel-kwapa-immalmal e-tummadga maibal. Al Cristo pane-pane ilagwen-nadgu otummoledi-kuelen, nabirin. Pitogua.
6 Imi pemal keg chogmalal, Pab Tummad e-kaka-ukchad-pallí keg immal ima. Tenal Pab Tummad e-chogzhad-pallí pél immal imada. Imi Israel-tulemal pel-kwapa Israel-tule-chunchunnad chul, pinche wal-walgwen Israel-tule-chunchunnadmalad.
7 Teginbal tule-Abraham-akar-tanimalad pel-kwapa Abraham-e-wagwagan-chunchunnad-chulbal, tenal tule pinche wal-walgwen Abraham-e-wagwagan-chunchunnad. Tenal Pab Tummad Abrahamga chogzhado:
Isaacbal pe-wagwagan-chunchunnadga kunoniko.
Gn. 21:12
8 Imi wedin choglejundo, tule-Abrahambal-sanal-mimmilenonimalad Abraham-wagwagan-chunchunnad-chul. Tenal tule-Pab-Tummad-kaka-ukchadbal-mimmilenonimaladbi Pab-nuskanga kunonimal.
9 Imi Pab Abrahamga kaka-ukchadbal Abrahamga chogzhado:
Imi an wegiidzhe kannan peje nonibalil,
an taknoniko pe-ome-Sara machi-nika.
Gn. 18:10,14
10 Teginbal, Rebeca-nuskan-walbo-nikaddin pab-walkwénnagwadgad. Tenal we machimal-e-pabdin anmal-tad-Isaacgad.
11 Imi Isaac-machimal ampayo mimmilegeddu, tegin ampayo immal-akaloeddu o ampayo immal-nuegan imakeddu, Pab Tummad oyos ede kusgu e-itolegedbal tule-chu.
12 Al Pab Tummad e-chogzhadbal Rebeca-machi-walgwen-chus, tenal machi-immal-nuegan-imakedbal-chul. Tenal Pab Tummad iktualeba Rebecaga chogzhado:
Pe-machi-tummad e-urpa-mosga kuo.
Gn. 25:23
13 Imi Pab-kartagin ampa nermakal-maimodo:
Pab Tummad chogzha:
“Antin napírra Jacob-pilalgus,
tenal antin istar Esaú-taknoni.”
Mal. 1:2-3
14 Imi Pab-chogzhadyob Isaac-machimalgin kus-choggu, ¿tegil anmal igi Pab Tummadgin chogmojun? ¿Tegil Pab Tummad nuekwá tulegin kwen pinzhejuldé? Chulá.
15 Imi Pab Moisésga chogzhado:
Imi an wilejakwa tule-takpiel,
an wilejakwa tule-takodo.
Tenal an wilejakwa tule-takpijulil,
an wilejakwa tule-kwen-takojul.
Tegin an tule-pentabiel, an tule-pentakodo.
Tenal an tule-pentabijulil,
an tule-kwen-pentakojul.
Ex. 33:19
16 Tenal Pab wilejakwa tule-takedbal yer tule-tako, tenal tule-itolegedbal chul tegin tule-e-immal-imakedbal chulbal.
17 Imi Pab-kartagin nermakal maido, Pab Tummad Faraónga chogzhado:
Imi antin tule-tummadga pe-odos,
an-kannaleged pebal mag taklenonigal,
tegin tulemal napa-naid-ugakche
an-nug otummomalgal.
Ex. 9:16
18 Al Pab Tummad e-itolegedbal wilejakwa toa-tule-takpídin, wilejakwa tule-takodo. Tenal Pab Tummad e-itolegedbal egin-melle-ibzhegal toa-tule-imabídin, egin-ibzhejulgal tule-imabalodo.
19 Al an wisdo, pemal-wal-walgwen chogdamalo: “Imi Pab egin-melle-ibzhegal tule-imakel, ¿tede ibiga Pabde ankin chognejun iskued ankin tani? Pab ankin weob choged-wilubzhulin. Imi Pab Tummad an-okannos-choggu melle egin ibzhegal, ¿tede an igi Pabga chogojun Pab-anka-imajadyob an melle nanegal? Chulá. Keg kue.”
20 Tenal pe Pabzhul-choggu, ¿tede pe igi Pab Tummadgin chogo: “Pedin noal immal imas?” Chulá. Keg kue. Imi Pab-kartagin chogdo:
¿Mete tule-e-chobzhadga chogo pe ebinzhe: “Ibiga pe weob an-chobzha?”
Chulá. Keg kue.
Is. 29:16; 45:9
21 ¿Imi tule-napchagin-arpaged igal-nikajulzhí napcha-choggwénnagwadgin e-itoleged akal-akal mete chobgal, kwéntin immal-nuedga ebugal, kwéntin immal-polega ebugal? Teobdo.
22 Imi Pab Tummad wal-walgwen-tule-opinnis e-itolegedbal tule-opelogal. Tenal Pab melu tulemal-abintadi-kus tulemalbal e-kannaleged oyogal. Tegin Pab tulemal-abintadi-kusbal sapejul-tule-oturdaked oyogalbal. Tenal Pab tule-opinnijadbal igal-nika tule-opelogal o tule-pentagal.
23 Tenal Pab Tummad untar tule-iskana-abintadi-kujadbal Pab wilejakwa-tule-takmaladga kep oyononijun, ede pela-pela kannaleged nika. Tenal Pab Tummad iktualeba kuakwa tule-wilejakwa-taklesmalad-urpis, e-neggin otummolegal.
24 Imi Pab anmalzhe-kochadbal ampa wilejakwa anmal-taknonimalmo. Tenal Pab Tummad anmal-Judiomalzhe-kochamaladbijul, tenal Judiojulmaladzhe-kochamalad ampamo.
25 Imi Pab Tummad e-kaka-palchoged-Oseasbal weob chogzhado:
Imi antin, an-tulejulmaladzhe kolo,
an-tulega kugal.
Tegin an-istar-tule-takedzhe an kolnoniko:
“An pemal-pilal.”
Os. 2:23
26 Tegin Oseas chogzhabaldo:
Imi Pab Tummad ampa
aka-we-neggin-tulemalgin chogzhado:
“Pemal an-tulejulmal.”
Tenal Pab Tummad ampa aka-we-neggin
we tulemalgin chognonibalo:
“Pemal Pab-Tummad-Tulad-e-nuskan.”
Os. 1:10
27 Tegin Pab-kaka-palchoged-Isaías Israel-tulemalgin chogzhamodo:
Imi Israel-tulemal ichejul nika,
termal-kakpal ukub-nikadyob unnijul pel epised.
Tenal Israel-tulemal
yabli walpókwa wis abonolenoniko.
28 Tenal Pab Tummad sapejul
iti-napkin-tulemal-oturdanonikidgin,
ilgwen tulemal-opelononiko.
Is. 10:22-23
29 Imi akpene Pab-kaka-palchoged-Isaías chogzhadyob kunonido. Tenal teun Isaías chogzhado:
Imi Pab-Pela-Pela-Kannaleged-Nikaddin
anmalga mimmigan-kwen-ebeszhulilen,
anmal-tule-pukmalad-kwen-nikchulin,
anmal Sodoma tegin Gomorra-neg-kweburganyob
pelgusmogan.
Is. 1:9
Israel-tulemal Pab-kaka-nuegangin kwen ibzhejulmalad
30 Imi Israel-tulemalgin weob kus-choggu, ¿tegil anmal igi chognemojun? Nabir. Imi akpene Judiojulmalad kwen alamaszhulmal napírra nanegal. Tenal Judiojulmalad Pab-Jesúsgin-penzhulidbal tule-iskued-nikchulmaladga kunonimal.
31 Tenal Israel-tulemal pela-pela alamasmalan igal-napírragwadgin nanegal. Tenal Israel-tulemal kwen unnijulgus tule-iskued-nikchulmaladga kunonigal.
32 ¿Imi Israel-tulemal, ibiga tule-iskued-nikchulmaladga kunonijulmaldé? Imi Israel-tulemal Pab-Jesús-penzhulidbal kwen nanaszhulmaladbal tule-iskued-nikchulmaladga kunonijulmal. Tenal Israel-tulemal sanal alamajadbal tule-iskued-nikchulmaladga kubimal.
Al Israel-tulemal nosmal, tule akwa-mulgin-yolejadbal agladedyob. Tenal we akwa choglege, Jesucristo.
33 Imi Pab-kartagin ampa weob nermakal maimodo:
Imi Pab Tummad chogdo:
“Imi pe takto,
antin neg-kwebur-Sióngin
akwa-mul-tummad chis.
Tenal tule we akwa-mul-tummadgin
yolenonimalal, agladamal.
Tenal tule we akwagin pengunonijulmalal,
kwen pinkeguojulmal.”
Is. 28:16