11
Na ngwae ꞋosoꞋoso neꞋe kira saea kira na ngwae lifurongo mamana ki
1 Sui bore Ꞌana nau ku fia noaꞋa nia kasi totolia fuana ngwae ka fata sulia niaꞋa talana, nau ku oga muke mabetau basi faꞋi nau, kaidaꞋi nau ku fata suli nau talaku.
2 Nau ku manata Ꞌabera suli kaumulu, diꞋia logo neꞋe God manata Ꞌabera amuꞋa. Sulia kaumulu diꞋia ta kini sariꞋi laꞋulaꞋu ba nau ku alu fafia masia daolana maꞋi sa Jesus Christ. Aia, na sariꞋi neꞋe kira alu fafia fuana na ꞋafeꞋa, nia ka tua faꞋasia na ngwae matamata ki.
3 Nau ku manata Ꞌabera suli kamu, Ꞌasu mu kata faꞋamamana ana faꞋamanataꞋanga ti ngwae, ma na alafeꞋanga kamu fuana sa Jesus Christ ka takalo, diꞋia ba Ꞌi Eve Ꞌua naꞋa maꞋi nia faꞋamamana ana sokeꞋa na loi.
4 Nau ku manata Ꞌabera amuꞋa, Ꞌasu Ꞌubani ꞋaliꞋali mu kata faꞋamamana ana na faꞋamanataꞋanga neꞋe matamata faꞋasia na faꞋamanataꞋanga kaimili. Sulia diꞋia ta ngwae leka kwau siaumulu, ma nia ka faꞋarongo Ꞌani faꞋarongoꞋanga matamata sulia sa Jesus, kaumulu kata fiꞋi faꞋamamana goꞋo Ꞌaumulu ana. Ma kaumulu ka maꞋudi Ꞌuana ngalilana ta mangoꞋi ru neꞋe matamata faꞋasia na AnoꞋi ru Abu neꞋe kamu ngalia ana kaidaꞋi kaimili faꞋarongo Ꞌani.
5 Aia, ma na ngwae neꞋe kira leka kwau siaumulu ki, ma kika saea kira na lifurongo talingaꞋi ki, nau kusi manata goꞋo fasi kira talingaꞋi ka liufi nau.
6 Sui bore Ꞌana noaꞋa naisi saiana alaꞋanga leꞋa, nau ku saiana ru Ꞌoro ki ana FaꞋarongoꞋa LeꞋa. Kaumulu saiana na ru neꞋeri, osiꞋana kaimili faꞋamanata kamu ana kaidaꞋi Ꞌoro ki.
7 Ana kaidaꞋi nau ku faꞋarongo Ꞌani FaꞋarongoꞋa LeꞋa God fuaumulu, noaꞋa naisi gani kaumulu Ꞌuana ta folifoliꞋa, ma ta taꞋi maga mani bore ka noaꞋa goꞋo. Ma ana kaidaꞋi nau ku tua siaumulu, nau ku faꞋatiꞋitiꞋi nau fasi Ꞌiri kaumulu ka ngalia ꞋinotoꞋanga. FaꞋuta, kaumulu fia fasi nau ku sasi rora neꞋeriꞋa?
8 Ana kaidaꞋi nau ku faꞋamanata kaumulu, ti ngwae neꞋe kira faꞋamamana saena fanoa matamata ki, kira foli nau. Nia neꞋe, nau ku ngalia ru ki faꞋasida, fasi Ꞌiri nau ku Ꞌafi kaumulu.
9 Ma ana kaidaꞋi nau ku tua faꞋi kaumulu, diꞋia nau ku oga ta mani, noaꞋa naisi gani kaumulu goꞋo Ꞌuana. Ma na ngwae asina ki neꞋe kira leka maꞋi faꞋasia Ꞌi Masedonia neꞋe kira kwatea ru neꞋe nau ku ogaꞋi ki. NoaꞋa naisi gani kaumulu Ꞌuana ta ru, ma noaꞋa naisi baꞋa gani.
10 Ma nau ku fata lafu nau sulia nau kusi gani kaumulu Ꞌuana ta ru. Ma ru neꞋeri, nia ꞋafitaꞋi ka rokisi ana ta kaidaꞋi, sulia nau kusi baꞋa ngalia ta mani faꞋasia ta ngwae saena abaꞋi kula Ꞌi Gris taꞋifau. Na ru neꞋeri nia mamana diꞋia logo na fatalana sa Jesus Christ neꞋe nia mamana.
11 Sali kamu manata rora fasi nau kusi alafe fuamuꞋa sulia nau kusi ngalia mani faꞋasi kaumulu. Bore ma God saiana neꞋe nau ku alafe liu fuamuꞋa.
12 Nai baꞋa inaꞋu goꞋo Ꞌaku ana falafala neꞋeri, fasi Ꞌiri na ngwae neꞋe kira saea kira ngwae lifurongo ki, noaꞋa kira kasi bolo faꞋinia saelana na raoꞋa kira neꞋe leꞋa ka diꞋia na raoꞋa kaimili.
13 Kira saea kira na lifurongo ki, bore ma kira noaꞋa laꞋu na lifurongo mamana sa Jesus Christ ki. Kira soke kaumulu Ꞌani raoꞋa kira ki, Ꞌiri kamu ka manata fasi kira neꞋe lifurongo ki.
14 Ma noaꞋa nau kusi Ꞌarefo goꞋo ana ru neꞋe, sulia sa Saetan bore, nia saiana ka rokisi fasi Ꞌiri ka lia diꞋia ta Ꞌainsel ana madakoꞋanga.
15 Nia neꞋe, noaꞋa kulu kasi Ꞌarefo diꞋia na ngwae rao sa Saetan ki logo, kira kwate ma kira talada ka lia diꞋia ngwae rao mamana God ki. Kike baꞋa ngalia naꞋa kwaꞋikwaꞋinga doe neꞋe bolo faꞋi kira sulia na abula taꞋangaꞋa kira ki.
Sa Paul fata lafua sulia ru ki faꞋataꞋinia nia ngwataꞋutaꞋu
16-17 Sui bore Ꞌana nau noaꞋa kusi oga fata baꞋalafeꞋa, niniꞋari nai baꞋa fata lafu nau suli nau talaku. KaidaꞋi nau ku fata suli nau talaku ꞋunaꞋeri, ti ai aumulu fia fasi nau ku alaꞋa diꞋia ngwae boleboleꞋa ki, nama nau noaꞋa kusi alaꞋa sulia tae neꞋe na Aofia saea. Sui bore Ꞌana muka manata ꞋunaꞋeri, rongo basi sulia tae neꞋe nai saea.
18 Buri Ꞌana kaidaꞋi neꞋe ti ngwae kira fata lafu kira talada, kamu ba roꞋo logo sulida. ꞋUnaꞋeri kaumulu taꞋifau muke fafarongoa basi ru neꞋe nai saea fuamuꞋa sulia nauꞋa talaku.
19 Ma kaumulu fia fasi kamu saiꞋi ru liu, bore ma kamu ka maꞋudi fuana rongolana ngwae neꞋe alaꞋalada noaꞋa kasi bolo.
20 Kaumulu ka alaꞋanida goꞋo amuꞋa fuana kira ka ꞋaꞋana fafi kaumulu, ma kira ka ngalia na ru kaumulu ki, ma kira ka soke kaumulu, ma kira ka fata lafuda talada, ma kira ka faꞋa ꞋekeꞋa kaumulu Ꞌani kwaꞋi bokotalana maamuꞋa.
21 Kaimili noaꞋa kasi sasi ꞋunaꞋeri amuꞋa. Ma faꞋuta neꞋe kaumulu ka fia fasi kaimili rora, sulia kami kasi sasi ꞋunaꞋeri aumulu?
Na ngwae neꞋe fia kira ta lifurongo talingaꞋi ki, kira fata lafu kira talada. Ma nauꞋa logo, nai fata lafu nau ka diꞋida logo, sui bore Ꞌana noaꞋa kasi leꞋa fuana fataꞋa ꞋunaꞋeri.
22 Aia, kira saea kira ngwae Ꞌi Jiu ki. Ma nauꞋa ta ngwae Jiu logo. Kira saea kira kwalafa sa Israel faꞋinia sa Abraham. Ma nauꞋa ta ngwae logo ana kwalafa sa Israel faꞋinia sa Abraham.
23 (Nau naisi oga fata lafu laku sulia nauꞋa talaku Ꞌuri.) Kira saea kira ngwae rao sa Jesus Christ ki. Bore ma nauꞋa naꞋa neꞋe ngwae rao leꞋa sa Jesus Christ ka liufida. Sulia nau ku rao ngasingasiꞋa ka liufida, ma ngwae ki kika alu nau saena luma ni lokafo ana kaidaꞋi Ꞌoro ki ka liufida, ma ngwae ki ka nangasi nau ana kaidaꞋi Ꞌoro ki ka liufida, ma karangi nau ku mae ana kaidaꞋi Ꞌoro ki ka liufida.
24 Lima kaidaꞋi ki na ngwae doe Jiu ki kira nangasi nau Ꞌania uulu akwala ma siko faꞋi kwaꞋinga.
25 Ma uulu kaidaꞋi ki na ngwae doe Ꞌi Rom ki kira nangasi nau Ꞌani maꞋe Ꞌai. Ma ana taꞋi kaidaꞋi, ti ngwae kira iliili Ꞌuana saungilaku Ꞌani Ꞌuilaku Ꞌani fau ki. Ma uulu kaidaꞋi ki na faka neꞋe nau ku leka Ꞌani ka kuru faꞋi nau, ma ana taꞋi kaidaꞋi nau ku tua saena asi sulia taꞋi rodo ma taꞋi asoa.
26 Ma ana lekaꞋa Ꞌoro nau ki, nau ku dao toꞋona ꞋafitaꞋiꞋanga Ꞌoro ki ana kafo afe ki, ma ana ngwae bilibili ki, ma sulia na ngwae Jiu ki, ma na ngwae kwaita ki neꞋe kira malimaeꞋa aku. Ma nau ku dao toꞋona ꞋafitaꞋiꞋanga saena fanoa doe ki, ma saena abaꞋi kula kwasi, ma saena asi logo. Ma ti kaidaꞋi na ngwae neꞋe soke ma kira ka saea kira ngwae faꞋamamana ana sa Jesus ki, kira kwatea logo na ꞋafitaꞋiꞋanga doe ki fuaku.
27 Nau ku rao ngangata liu, ma ti rodo noaꞋa nau kusi maliu. Ma ti kaidaꞋi nau kusi toꞋo ana fanga ma noaꞋa nau kusi kwaꞋu. Ma ti kaidaꞋi nau ku gwari sulia nau ku olidoko liu ana toro.
28 NoaꞋa laꞋu na ru neꞋeri ki goꞋo Ꞌana, sulia ana faꞋi asoa ki taꞋifau goꞋo nau ku toꞋo ana ꞋafitaꞋiꞋanga osiꞋana nau ku manata Ꞌabera sulia na fiku taꞋi ngwae faꞋamamana ki taꞋifau.
29 Ma diꞋia ta ngwae neꞋe faꞋamamana ma ka dao toꞋona ꞋafitaꞋiꞋanga sulia ilitoꞋonga doe, nau ku toꞋo ana ꞋafitaꞋiꞋanga logo, sulia nau ku manata Ꞌabera ana niaꞋa. Ma diꞋia ta ngwae ka sasia ta ru taꞋa, nau ku kwaimanatai.
30 DuꞋungana kira suꞋumaꞋi nau ku fata lafu nau suli nauꞋa talaku, nau ku fata sulia na ru ki neꞋe faꞋataꞋinia nau ta ngwae ngwataꞋutaꞋu.
31 God na MaꞋa na Aofia kia sa Jesus, nia saiana tae neꞋe nau ku saea nia mamana. Nau ku oga ngwae ki taꞋifau kira ka baꞋatafea God tua tua firi.
32 Ana kaidaꞋi nau ku tua Ꞌi Damaskas, na ngwae neꞋe sa Aretas na tatalafaꞋa filia Ꞌuana gwaungaꞋinga fafia fanoa neꞋeri, nia ka kwatea ngwae ana fuani oro ki kika folo Ꞌafia na maꞋe tafa ki ana maꞋe fanoa neꞋeri, fasi Ꞌiri kira ka dau nau ana kaidaꞋi nau ku ruꞋu Ꞌi maa.
33 Bore ma ti ngwae kira kwaiꞋafi aku, kira ka alu nau saena kukudu doe, ma kira ka faꞋakoso nau sulia na maa Ꞌolofolo ana Ꞌodoa neꞋeri Ꞌuana Ꞌi maa, ma nau ku tafi.