10
Ashampa kwaikain
(Mt 19.1-12; Lc 16.18)
1 Suasne Jesúsne Capernaum pɨpuluras puz kit Judea surakima ɨrɨt. Jordán pi kwakara tuazi. Akkwan awane ussa mamasa wanmakkara. Suasne Jesúsne usparuza mamasa kamtanamɨzta.
2 Fariseo kamtamtuzne ussa kashara aat kit ka mɨmaara, us kwail paranpa:
—Ampune ashampa mɨjne, ¿Ussa kwaishina watki? kizara.
3 Suasne Jesúsne usparuza sɨnkanara:
—Ñamin Moisésne ¿Umɨza chima kizkwin? kiznara.
4 Uspane ussa sɨnkaara:
—Moisés ka kaizta, “Ashampa kwaishitne, kwairɨm pɨnkɨh pat kit ussa mɨlatpa, kwaina,” kizara.
5 Suasne Jesúsne usparuza kaiznara:
—Moisésne umɨza ka kiznara, u Diosta chi mɨashimtuchi akwa.
6 Ñamin Dios wan sarawane, usne ampukas ashampakas sara.
7 Katmizna ampu ashampara mɨltane, usne paiña papihshtakas paiña akkuhshtakas chɨhkatpa, paiña ashampakasa uzna.
8 Sun paas awane maza kwal namta. Suasmesa sun paasne mazakanain uznazi.
9 Katmizna Dios ampurakas ashamparakas wanmaktune, awane usparuza kwaikain, kiznara.
10 Yalta kaiyarawane, paiña kammuruzne mamasa ussa sunpa mɨmaara.
11 Jesúsne usparuza kaiznara:
—Mɨnpazha ashampa kwait kit mamazkasa kasara kitne, ampune Dios iztakin kwail kirɨm, mamaz ashampakasa uztu akwa.
12 Mɨnpazha ampu kwait kit mamazkasa kasara kitne, ashampane Dios iztakin kwail kirɨm, mamaz ampukasa uztu akwa, kiznara.
Jesúsne pashparuza paanara
(Mt 19.13-15; Lc 18.15-17)
13 Suasne awane pashparuza Jesústa karaara, paiña chihtɨkasa paananapa, Dios usparuza kiwainanapa. Paiña kammuruzne usparuza kaiznara:
—¡Jesúspakin karaman! kiznara.
14 Jesúsne sun iz kit usparuza aliz pat kit kaiznara:
—Usparuza karaman, “kaizman” kiznara.
Pashparuza kaiznara:
—Nawa azhain. Diosne sun pashpa nawa mɨamturuzkana akwanamtu, usparuza ɨninnana.
15 Watcha watsal kaiznamtus. Diosne umɨza ɨninnashimtu. Pashparuzne Diosta watsal mɨashimtu. Ukas pashpa Diosta mɨamtukana mɨrain. Kawarain Diosta mɨrain, Dios umɨza ɨninnanapa, kiznara.
16 Pashpara munat kit chihtɨ paanat kit Diosta uspa akwa akwannara, Dios usparuza kiwainanapa.
Maza musittune, kwazpa kultɨtmikane, Jesústa kwinta kit
(Mt 19.16-30; Lc 18.18-30)
17 Jesús miwara ɨmtuasmin, maza ampune azain at kit ussa wain kit ka kaizta:
—Nune wat kamtam i. ¿Chima kinpai, Dioskasa chiyura pailta payukima uzna? kizta.
18 Jesúsne ussa mɨmara:
—¿Nawane chitma wari kiztus? Diosmin wari, kizta.
19 Jesúsne ussa kaizta: Nune Dios manta kit aizpa pian: “Awara piantamun. Mamazpa ashampakasa pitmun. Walkumun. Awaruzpa kwail kizmun. Mamaz mɨj aizpa pashimun. Up taittawakas up akkwawakas wat kaiznari,” kizta.
20 Sun ampune Jesústa sɨnkara:
—Kamtam, pashpaasmin sunkana kirau, kizta.
21 Jesúsne ussa iz kit pashit kit kaizta:
—Maza tuntune kitchi. We. Ɨt kit wan mɨj aizpa painin kit sun pial puizaruza mɨlananaka, chiyura Dios nua mɨlamtu aizpa sapnapa. Tas ap kwizpa at kit nawa kanpazha, kizta.
22 Sun mɨrawane, usne tayalmɨzta. Paiña pampa pial akwa, sun ampune Jesústa mɨshitchi. Tas kailta.
23 Awaruza iznamtuasmin, Jesúsne paiña kammuruza kaiznara:
—Kwazpa kultɨttuzne Dios ɨnintukin wat nappasachi, kiznara.
24 Paiña kammuruzne paiña pit akwa iztaspaarɨt. Suasne Jesúsne usparuza mamasa kaiznara:
—Izmuruz, mɨzha. Kwisha sam i, Dios ɨnintura napna. “Pãn kultumikane Dios ɨnintura napnash,” minman.
25 Iyu chɨhku kulta tɨm. Maza kalpakanane, camello mun. Sun kalpane chɨhku kulta tɨsachi. Kawarain kwazpa kultɨtmikane paiña pial akwa Dios ɨnintura napsachi, kiznara.
26 Sunpa mɨarawane, uspane kwisha iztaspaat kit usparuzpain kaizara:
—Suasne mɨnminkas chiyura napsachi, kizara.
27 Jesúsne usparuza iznat kit kaiznara:
—Awane usmin watsat mɨlnasachi, Dios ɨnintura uzna. Diosmin awaruza watsat mɨlnashina, Dios wan chiwal kishimtu akwa, kiznara.
28 Pedro ussa ka kaizta:
—¡Izti! Aune wanta chɨhkat kit up kwizpa apuspas, piankamna, kizta.
29 Jesúsne sɨnkara:
—Watcha kaiznamtus. Mazantuzne ap akwakas Dios watsal pit akwakas paiña yalkas paiña aimpihshkas paiña kwampihshkas paiña akkuhshkas paiña papihshkas paiña pashpakas up sukas chɨhkaarɨt.
30 Diosne wan chɨhkarɨttuza an akkwan mɨlananazi. Chiwazha chɨhkarɨtne, Diosne usparuza an akkwankima apain mɨlananazi. Mamaz yalkas aimpihshkas kwampihshkas akkuhshkas pashpakas sukas mɨlananazi. Na uruza wat kinamtukas, mamaz awane umɨza naizninnanazi. Mamaz payura nane uruza chiyura pailta payukima uzninnanash.
31 An sukin uzamtuasmin, katsa mikwaruzne, apas awaruza ɨninnamtu. Katsa mikwaruzne an we katsa namanazi. Diosne apas kiwainamtuza katsa mikwakanain namninnanazi.
Jesúsne kaiznara: Mamaz payura inash
(Mt 20.17-19; Lc 18.31-34)
32 Jesúskas paiña kammuruzkas miwara Jerusalén pɨpulura nuarɨmtuazi. Jesúsne an ñancha ɨzi. Paiña kammuruzne iztaspaarɨt. An kwizta amturuzne ishkuara. Jesúsne doceruza paimpa mɨlnat kit mamasa kaiznara:
—Awane mamaz payura nawa kwail kianazi.
33 “¡Iztain! Jerusalén pɨpulura ɨamɨztumakpas. Suane Judío awane nawa, Ampu namtɨtmikara, pizanazi, katsa pariyaruzakas Moisés kaizta aizpa kamtamtuzakas chɨhkaanapa. Uspane nawa piantaana kizanazi. Tas uspane mamaz awara nawa chɨhkaanazi.
34 Mamaz awane nawa ishananazi. Nawa pashiamtuchi akwa, nawa ilpi kianazi. Nawa iyanazi. Nawa piantaanazi. Kutña payu pailtawane, nane mamasa kuhsnash,” kiznara.
Santiagokas Juankas Jesústa chiwazha paikumtu
(Mt 20.20-28)
35 Santiagokas Juankas, Zebedeo painkultuzne, Jesús turakima ɨilt kit ussa kaizpailta:
—Kamtam, au paasne nua chiwazha paikwashimtuas, chiwazha kinpa, kizpailta.
36 Jesúsne usparuza mɨmanara:
—¿Uruz akwa chima kinpai? kiznara.
37 Uspane ussa kaizara:
—Nu chiyura nukane, aune nu ɨnintukin nukasa uzshimtuas. Mazarane numal uzninti. Mamazta kwiyamal uzninti, kizpailta.
38 Jesúsne usparuza sɨnkanara:
—Une u paikumtu aizpa wat pianchi. Nane naiztɨnash. ¿Une nakana naizshinamakkiwas? Nane naiz kit tailchannash. ¿Une nakana naiz kit tailchashinamakkiwas? kiznara.
39 Uspane ussa sɨnkaara:
—Au paasne naizshinawas, kizpailta.
Jesúsne usparuza kaiznara:
—Une nakana naizpailnazi. Une nakana naiz kit tailchailnazi.
40 U nakana naizarakas, nane mazara up numal uzshina, mazara ap kwiyamal uzshina, kaiznasachish. Diosne narɨttuza paiña numalkin paiña kwiyamalkin uzninanazi.
41 Mamaz diez kammuruz sun mɨarawane, uspane Santiagorakas Juantakas aliz kulaara.
42 Jesúsne usparuza akwanat kit kaiznara:
—Une miza mamaz awa ɨninnamtu pianmai. Sun ɨninturuzne usmin katsa mikwakana namamtu, an akkwan awaruza ɨninnanapa. Awaruza ɨninnakane, kwisha tɨnta ɨninnamtu.
43 Uruzpain ɨninmikakana namman. U anza katsa mikwakana namashitne, kiwainmumikakanain namtain, pailta awara kiwainnanapa.
44 Katsa mikwakana namashitne, ñamin ussain kiwainmumikakana namtawa, wanta kiwainnana.
45 Nain, Ampu namtɨtmika ish. Nane atchish, awa nawa kiwainnapa. Nane apa arau, awara kiwainnana. Nane awa akwa inash, akkwan awa chiyura uzanapa.
Jesúsne kasu izsachimikara izkulnintu
(Mt 20.29-34; Lc 18.35-43)
46 Suasne Jesúskas paiña kammuruzkas Jericó pɨpulura pianaara. Uspane akkwan awakasa Jericó pɨpulura puzakane, izsachimikane mi mamin uzta. Puiza akwa usne chiwazha paikumtu azi. Usne Bartimeo mun. Usne Timeowa painkul azi.
47 Mɨnpazha ussa ka kizara:
—Jesúsne, Nazaret pɨpuluras, kasha amtui, kizara. An mɨkane, Bartimeone kwian kit ka kaizmɨzta:
—¡Jesús, Davidpa pampa, nawa kiwaincha! kizta.
48 Akkwanne ussa kaizara:
—Kwianmun. Puñain, kizara.
Sun akwa an tɨnta kwian kit kaizta:
—Davidpa pampa, nawa kiwaincha, kizta.
49 Jesúsne kun kit kaiznara:
—Ussa akwarain, kiznara.
Uspane Bartimeora akwat kit kaizta:
—Ishkumun. Kuhsakti. Usne nua akwantu, kizara.
50 Usne paiña ijmu kiakpɨn kit kuhsak kit Jesús turakima ɨra.
51 Jesúsne ussa mɨmara:
—¿Nu akwa chima kinpai? kizta.
Izsachimikane ussa kaizta:
—Kamtam, ¡Kasu izkulnincha! kizta.
52 Jesúsne ussa kaizta:
—Nune “Jesús nawa izkulninnazi” nɨjkulta. Katmizna nune wat parɨt. Ɨmɨzti, kizta.
Sun urain izkulninkwera. Kasu izkultawane, usne Jesústa kwizpa kanpara.