ପ୍ରେରିତ ମାନଙ୍କ କାର୍ଯ୍ୟ
ପାଣ୍ତ୍ୱି ଆ଼ହାମାନାରି କାମା
ମୂଲୁ ହା଼ଡା
ପାଣ୍ତ୍ୱି ଆ଼ତାରି କାମାତି ପତି କୁଲମିକା ମା଼ଟ୍ହି କାତା ଅ଼ଡ଼େ ଜୀସୁ ଲାକପୂରୁ ହାନି ନ଼କେଏ ତାନି ସୀସୁୟାଣି ୱେସାମାଚି ଲେହେଁ, ଏ଼ନିକିଁ ଜିରୁସାଲମଟିଏ ଜୀହୁଦା, ସମିରଣ, ଅ଼ଡ଼େ ସା଼ରିୱାକି ଏତେ, ଏ଼ କାତାତି ପୁସ୍ପନି ୧:୮ ଈ ପତି ଲୂକ ରା଼ଚାମାଚେସି, ଆମ୍ବାଆସି ଲୂକ ରା଼ଚାମାନି ନେହିଁ କାବ୍ରୁ ରା଼ଚାମାଚେସି । ଏ଼ୱାସି ଡାଙ୍କାଦର ମାଚେସି ଇଞ୍ଜାଁ ବାରେ କାତା ଜାତ୍ନୁ ତଲେ ରା଼ଚାମାଚେସି । ଏ଼ୱାସି ତାନି ଲୂକ ନେହିଁ କାବ୍ରୁ ପାଣ୍ତ୍ୱି ଆ଼ହାମାନାରି କାମା ଈ ରୀ ପତିତା ଜିକେଏ ତିୟପିଲ ଇଞ୍ଜିଁ ୱେସାମାନେସି, ଏ଼ୱାସି ଗ୍ରିକ୍ ଲ଼କୁ ମାଚେସି, ସାମା ଗ୍ରିକ୍ ଅ଼ଡ଼େ ଜୀହୁଦି ଲ଼କୁଣି ଆଟ୍ହି କ୍ରୀସ୍ତାନା ଲ଼କୁକି ଜିକେଏ ଈ ପତି ରା଼ସ୍କି ଆ଼ହାମାଚେ ୧:୧ ।
କ୍ରୀସ୍ତ ଜାର୍ନାଆ଼ତି ଡା଼ୟୁ ୬୦-୬୪ ବାର୍ସା ବିତ୍ରା ପାଣ୍ତ୍ୱିଆ଼ତି ପତି ରା଼ସ୍କି ଆ଼ହାମାଣ୍ମ୍ବିନେ, ଏ଼ନାଆଁତାକି ଇଚିହିଁ ପା଼ୱୁଲ କାୟିଦିଟି ପିସ୍ପିଆ଼ତି ନ଼କେଏ ପତି ରା଼ଚାଲି ରା଼ହାମାଚେ । ଲୂକ ଜିକେଏ ପାଣ୍ତ୍ୱିଆ଼ତି ପା଼ୱୁଲ ତଲେ ରେ଼ଜିମାଚେସି ଅ଼ଡ଼େ ଆନ୍ତିୟକତି ଗା଼ଡ଼ାତା ଈ ପାଣ୍ତ୍ୱି ଆ଼ହାମାନାରି କାମା ପତି ରା଼ଚାମାଚେସି । ପାଣ୍ତ୍ୱି ଆ଼ତାରି କାମା ପତି “ଲୂକ ରା଼ଚାମାନି ନେହିଁ କାବ୍ରୁ” ରା଼ଚିତି ଜେ଼ଚ ଜେ଼ଚ ଜୀସୁ ଲାକପୂରୁ ହାଜାଲିଏ ରା଼ଚାଲି ମା଼ଟ୍ହା ମାଚେସି । ଲୂକ ତାନି ନେହିଁ କାବ୍ରୁ ଏ଼ନାଆଁତାକି ରା଼ଚାମାଚେସି, ଏଲେକିହିଁଏ ଈ ପାଣ୍ତ୍ୱି ଆ଼ହାମାନାରି କାମା ପତି ରା଼ଚାମାଚେସି । ଏ଼ୱାସି ତିୟପିଲ ଅ଼ଡ଼େ ଗାଡି ଜାନା ଆ଼ହିମାନି କ୍ରୀସ୍ତାନା ଲ଼କୁଇଁ ଏ଼ନାଆଁ ଜା଼ପ୍ୱି ଆ଼ହାମାଚେ, ଏମ୍ବାଆଁ ତୀରି ଆ଼ହାଲି ଅଣ୍ପିମାଚେସି, ଏ଼ଦାଆଁତାକି ଜୀସୁତି ବାରେ କାତା ଅ଼ଡ଼େ କ୍ରୀସ୍ତାନା ଲ଼କୁ ବାରେୱାକି ଆ଼ହିମାନି କାତା ରା଼ଚାମାନେସି ।
ପାଣ୍ତ୍ୱି ଆ଼ହାମାନାରି କାମା ପତି ମୂଲୁଏ ଆ଼ତି କୁଲମିକାତି କାତା ଅ଼ଡ଼େ ଜୀସୁ ତା଼ଣା ନାମୁତଲେ ନୀଡିନାୟି ଏ଼ନିଆ଼ହିଁ ତ଼ଞ୍ଜା ଆ଼ନାୟି ଏ଼ଦାଆଁ ମାଙ୍ଗେ ୱେସ୍ତାନେ । ସୁଦୁଜୀୱୁତି ବା଼ଡ଼୍ୟୁ ତଲେ ଏ଼ନିକିହିଁ ଏଟ୍କା ଲ଼କୁତା଼ଣା ନେହିଁ କାବ୍ରୁ ଏପ୍ନାୟି ପାଣ୍ତ୍ୱି ଆ଼ତାରି କାତା ୱେସ୍ତାନେ ।
ପତିତା ମାନାୟି
୧. ମୂଲୁଏ ସୀସୁୟାଁ ଲାକ ସୁଦୁଜୀୱୁ ୱା଼ନାୟି ଅ଼ଡ଼େ କୁଲମି ପାଡାଆ଼ନାୟି । ୧:୧–୮:୧
୨. କୁଲମି ସା଼ସ୍ତି ବେଟାଆ଼ନାୟି ଅ଼ଡ଼େ ଜିରୁସାଲମ ସା଼ରିୱାକି ଏ଼ନାୟି । ୮:୨–୧୨:୨୩
୩. ପା଼ୱୁଲ ମୂଲୁଏ ତାନି ସେ଼ବା କାମାତାକି ହାନାୟି । ୧୨:୨୪–୧୪:୨୮
୪. ଜିରୁସାଲମତା କୁଟମି କୁଗିନାୟି । ୧୫:୧-୩୫
୫. ପା଼ୱୁଲ ରୀ ପା଼ଲି ତାନି ସେ଼ବା କାମାତା ହାନାୟି । ୧୫:୩୬–୧୮:୨୨
୬. ପା଼ୱୁଲ ତୀନି ପା଼ଲି ତାନି ସେ଼ବା କାମାତା ହାନାୟି । ୧୮:୨୩–୨୦:୩୮
୭. ପା଼ୱୁଲ ଜିରୁସାଲମତା ଦସ୍ପି ଆ଼ନାୟି । ୨୧–୨୬
୮. ର଼ମ୍ତା ପା଼ୱୁଲଇଁ ପାଣ୍ତିନାୟି । ୨୭–୨୮
୧
ସୁଦୁଜୀୱୁ ତାକି ଆ଼ଞ୍ଜିନାୟି
୧ ଏ଼ ଜୀୱୁତି ତିୟପିଲ, ନା଼ ମୂଲୁତି ପତିତା ଈ ବାରେ କାତା ରା଼ଚାମାଇଁ, ଜୀସୁ ଏମିନି କାମା ମା଼ଟ୍ହେସି ଅ଼ଡ଼େ ଜା଼ପ୍ହେସି,
୨ ଏ଼ ଦିନା ପାତେକା ଏ଼ୱାସି ପାଣ୍ତ୍ୱି ଆ଼ତାରାଇଁ ଆ଼ଚାମାଚେସି, ସୁଦୁଜୀୱୁ ତଲେ ହୁକୁମି ହୀହାନା ଲାକପୂରୁ ଅ଼ୱି ଆ଼ହାମାଚେସି ।
୩ ଏଚେଟିଏ ଜୀସୁ ତାନି ଦୁକୁ ବେଟାଆ଼ତି ଡା଼ୟୁ ହା଼ରେକା ଦିନା ଏ଼ୱାସି ଜୀୱୁତଲେ ମାଚେସି ଈଦାଆଁ ପାଣ୍ତ୍ୱି ଆ଼ହାମାନାରି ତା଼ଣା ପାର୍ମାଣା କିତେସି, ଇଞ୍ଜାଁ ରୀ କ଼ଡ଼ି ଦିନା ପାତେକା ହା଼ରେକା ଦେବା ତ଼ଞ୍ଜାଆ଼ହାନା ମାହାପୂରୁ ରା଼ଜିତି କାତା ଜା଼ପ୍ହେସି ।
୪ ର଼ ଦିନା ଏ଼ୱାରି ରଣ୍ତିଏ ତା଼ଣା ତିଞ୍ଜାଲି କୂଡ଼ା ଆ଼ହାମାଚି ବେ଼ଲାତା ଜୀସୁ ଏ଼ୱାରାକି ଈ ହୁକୁମି ହୀତେସି; “ମୀରୁ ଜିରୁସାଲମ ପିସାଁ ଆମ୍ବିୟା ହାଲାଆଦୁ, ସାମା ମୀରୁ ମାହାପୂରୁ ଆ଼ବାତି ଆ଼ଞ୍ଜାମାନାଣି ନା଼ ତା଼ଣାଟି ୱେଞ୍ଜା ମାଞ୍ଜେରି, ଏ଼ଦାଆଁ ପା଼ଣ୍ନି ପାତେକା କା଼ଚାନା ଡ଼ୟାଦୁ;
୫ ଇଚିହିଁ ଜହନ ଏ଼ୟୁତା ବାପ୍ତିସ୍ମ ହୀତେସି ସାତା, ସାମା ମୀରୁ ଏଚରଦିନା ଜେ଼ଚ ସୁଦୁଜୀୱୁ ତଲେ ବାପ୍ତିସ୍ମ ବେଟାଆ଼ଦେରି ।”
ଜୀସୁ ଲାକପୂରୁ ହାନାୟି
(ମାର୍କ ୧୬:୧୯-୨୦; ଲୂକ ୨୪:୫୦-୫୩)
୬ ର଼ ଦିନା ପାଣ୍ତ୍ୱି ଆ଼ତାରି ରୁଣ୍ତା ଆ଼ହାମାଚି ବେ଼ଲା ଜୀସୁଇଁ ୱେଚେରି, “ପ୍ରବୁ, ନୀନୁ ଏ଼ନାଆଁ ନୀଏଁ ଇସ୍ରାୟେଲ କେୟୁତା ଅ଼ଡ଼େ ୱେଣ୍ତେ ଈ ରା଼ଜିତି ହେର୍ପିଦି ?”
୭ ଜୀସୁ ଏ଼ୱାରାଇଁ ଏଲେଇଚେସି, “ଆମିନି ଦିନା ଅ଼ଡ଼େ କା଼ଲା ନା଼ ଆ଼ବା ତାନି ଅଦିକାରାତା ଇଟାମାନେସି, ଏ଼ ବାରେ ମିଙ୍ଗେ ପୁଞ୍ଜାଲି ଲ଼ଡ଼ା ଆ଼ଏ ।
୮ ସାମା ସୁଦୁଜୀୱୁ ମୀ ତା଼ଣା ୱା଼ତିସାରେ, ମୀରୁ ବା଼ଡ଼୍ୟୁ ବେଟାଆ଼ଦେରି, ଇଞ୍ଜାଁ ଜିରୁସାଲମ ବାରେ ଜୀହୁଦା ଦେ଼ସା ଇଞ୍ଜାଁ ସମିରଣତା ଅ଼ଡ଼େ ବୂମି ମୁଟ୍ପେ ତାକି ନା଼ ସା଼କି ଆ଼ଦେରି ।”
୯ ଏ଼ୱାସି ଈ ବାରେ କାତା ୱେସ୍ତି ଡା଼ୟୁ ଏ଼ୱାରି ମେସ୍ପନିଏ ଜୀସୁ ଲାକପୂରୁ ହାଚେସି, ଅ଼ଡ଼େ ଇଚାୟି ଦୂନ୍ଦ୍ରା ଏ଼ୱାଣାଇଁ ଏ଼ୱାରି ତା଼ଣାଟି ଅ଼ହିଁ ହାଚେ, ଏ଼ୱାରି ଅ଼ଡ଼େ ଏ଼ୱାଣାଇଁ ମେହ୍ଆତେରି ।
୧୦ ଏ଼ୱାସି ଲାକପୂରୁ ହାଜାଲିଏ ଜିକେଏ ଏ଼ୱାରି ହା଼ଗୁୱାକି ମୂମ୍ବୁ କିହାନା ସିନିକିହି ମାନେରି; ଏଚିବେ଼ଲା ଦବ୍ଲା ହିମ୍ବରିକା ହୁଚାମାନି ରିଆରି ଦେବୁଣିଏ ଏ଼ୱାରି ନ଼କିତା ନିତେରି,
୧୧ ଇଞ୍ଜାଁ ଏ଼ୱାରି ଏଲେଇଚେରି “ଏ଼ ଗାଲିଲିତି ଲ଼କୁତେରି, ଏ଼ନାଆଁତାକି ହା଼ଗୁୱାକି ମୂମ୍ବୁ କିହାନା ନିଚାମାଞ୍ଜେରି ? ଈ ଆମିନି ଜୀସୁ ମୀ ତା଼ଣାଟି ଲାକପୂରୁ ଅ଼ୱିଆ଼ତେସି, ଏ଼ୱାଣାଇଁ ଏ଼ନିକିଁ ଲାକପୂରୁ ହାଚାଣି ମୀରୁ ମେସ୍ତେରି, ଅ଼ଡ଼େ ଏଲେକିହିଁଏ ୱେଣ୍ତେ ୱା଼ନାଣି ମେହ୍ଦେରି ।”
ଜୀହୁଦା ଟା଼ୟୁତା ମାତିୟୁଇଁ ଆ଼ଚିନାୟି
୧୨ ଏମ୍ବାଟିଏ ଡା଼ୟୁ ଏ଼ୱାରି ଜୀତ ଇନି ହ଼ରୁ ଲାକଟି ଜିରୁସାଲମତା ୱେଣ୍ଡାୱା଼ତେରି, ଏ଼ ଜୀତ ହ଼ରୁଟିଏ ଜିରୁସାଲମ ର଼ କିଲମିଟର ହେକ ମାଚେ ।
୧୩ ଇଞ୍ଜାଁ ଏ଼ୱାରି ପିତର, ଜହନ, ଜାକୁବ, ଆନ୍ଦ୍ରିୟ, ପିଲିପ, ତ଼ମା, ବାର୍ତଲମି, ମାତିୟୁ, ଆଲେପି ମୀର୍ଏସି ଜାକୁବ, ଦେ଼ସାତି ଜୀୱୁ ନ଼ନି ସିମନ ଅ଼ଡ଼େ ଜାକୁବ ମୀର୍ଏସି ଜୀହୁଦା, ଗା଼ଡ଼ାତା ଏଜାନା, ଏମିନି ଲାକନି ଇଲୁତା ବାସା ଆ଼ହାମାଚେରି, ଏମ୍ବାଆଁ ହାଚେରି ।
୧୪ ଏ଼ୱାରି ବାରେଜା଼ଣା ଇୟାସିକା ତଲେ ଇଞ୍ଜାଁ ଜୀସୁତି ଇୟା ମରିୟମ ଅ଼ଡ଼େ ତାମି ତାୟିୟାଁ ତଲେ ରଣ୍ତିଏ ଅଣ୍ପୁ ତଲେ ପ୍ରା଼ତାନା କିହିଁ ରୁଣ୍ତା ଆ଼ହାମାଚେରି ।
୧୫ ଏଚରଦିନା ଡା଼ୟୁ ନାମିତାରି କୂଡ଼ା ଆ଼ହାମାଚେରି, ଏମ୍ବାଆଁ ସ଼ କ଼ଡ଼ି ଜା଼ଣା ଲ଼କୁ କୂଡ଼ା ଆ଼ହାମାଚେରି, ପିତର ତାୟିୟାଁ ବିତ୍ରାଟି ନିଚାନା ଏଲେଇଚେସି,
୧୬ “ଜୀୱୁତି ତାୟିୟାଁ ଅ଼ଡ଼େ ତାଙ୍ଗିସ୍କା, ଆମିନି ଇସ୍କାରିୟତ ଜୀହୁଦା ଜୀସୁଇଁ ସାତ୍ରୁୟାଁ କେୟୁତା ଆସ୍ପି କିହାଲିତାକି ଜିରୁ ତ଼ସାମାଚେସି, ଏ଼ୱାଣି ତାକି ସୁଦୁଜୀୱୁ ନ଼କେଏ ଦାୱୁଦ ଗୂତିଟି ଏ଼ନାଆଁ ୱେସାମାଚେସି, ଏ଼ ଦାର୍ମୁ ସା଼ସ୍ତେରି ପୂରା ଆ଼ନାୟି ମାଚେ;
୧୭ ଇଚିହିଁ ଏ଼ୱାସି ମା଼ ବିତ୍ରାଟି ରଅସି ଇଞ୍ଜିଁ ଏଜିକିୱି ଆ଼ହିମାଚେସି, ଅ଼ଡ଼େ ଈ ସେ଼ବା କାମାତା ପା଼ଣା ବେଟାଆ଼ହା ମାଚେସି ।”
୧୮ ଈ ଇସ୍କାରିୟତ ଜୀହୁଦା ଲାଗେଏ କାମା କିତି ଡାବୁୟାଁ ତଲେ ରଚାଣି ବୂମି କଡ୍ୱି ଆ଼ହାମାଚେ, ଅ଼ଡ଼େ ଏ଼ୱାସି ହା଼ତି ତା଼ଣା ତା଼ର୍ୟୁଁ ଡ଼଼ଇ କିହିଁ ତର୍ଗାଲିଏ ତାନି ବାଣ୍ତି ଡ଼ାୟାହାଚେ ଇଞ୍ଜାଁ ୱାହିୟାଁ ହ଼ଚାହାଚୁ ।
୧୯ ଅ଼ଡ଼େ, ଈଦାଆଁ ଜିରୁସାଲମ ଗା଼ଡ଼ାତା ବାସା କିହିମାନି ଲ଼କୁ ବାରେ ପୁଞ୍ଜାଲିଏ ଏ଼ ବୂମିତି ଏ଼ୱାରି ହା଼ଡାତଲେ “ହକଲ୍ଦାମା” ଇଚିହିଁ “ନେତେରି ବୂମି” ଇଞ୍ଜିଁ ୱେ଼ଙ୍ଗିତେ ।
୨୦ ଅ଼ଡ଼େ ପା଼ଚୁ ପତିତା ରା଼ସ୍କି ଆ଼ହାମାନେ,
“ଏ଼ୱାଣି ବାସାଟା଼ୟୁ ୱାର୍ଆୟି ଆ଼ପେ;
ଏମ୍ବାଆଁ ଆମ୍ବାଆରି ବାସା କିଆପେରି ।”
ଅ଼ଡ଼େ ଜିକେଏ ରା଼ସ୍କି ଆ଼ହାମାନେ;
“ଏ଼ୱାଣି କାମାତି ପା଼ଣା ଅ଼ର ରଅସି ବେଟା ଆ଼ପେସି ।”
୨୧ “ଏ଼ଦାଆଁତାକି, ପ୍ରବୁ ଜୀସୁ ୱେଣ୍ଡେ ନିଙ୍ଗିତି କାତା ସା଼କି ଆ଼ହାଲି ଅ଼ର ରଅସି ମା଼ ତଲେ ଆଣ୍ଡାନାୟି ମାନେ ।
୨୨ ଜୀସୁ ଜହନ ତା଼ଣାଟି ବାପ୍ତିସ୍ମ ଅ଼ତି ବେ଼ଲାଟିଏ ଲାକପୂରୁ ହାନି ପାତେକା ପ୍ରବୁ ଜୀସୁ ମା଼ ତଲେ ନୀଡାମାଚି ବେ଼ଲାତା, ଆମିନି ଲ଼କୁ ମା଼ ଗଚିତା ମାଚେରି, ଏ଼ୱାରି ତା଼ଣାଟି ରଅସି ୱେଣ୍ତେ ନିଙ୍ଗିନି ସା଼କି ଆ଼ନାୟି ମାନେ ।”
୨୩ ଏଚେଟିଏ ଏ଼ୱାରି ରିଆରାଇଁ ଇଚିହିଁ ଜସେପଇଁ, ଆମ୍ବାଆରାଇଁ ବର୍ସବା ଇନେରି ଅ଼ଡ଼େ ଆମ୍ବାଆରି ହା଼ଟା ଦ଼ରୁ ଜୁସ୍ତ ଏ଼ୱାଣାଇଁ ଇଞ୍ଜାଁ ମତିୟଇଁ ବାଚି କିହାନା,
୨୪ ଈ ପ୍ରା଼ତାନା କିତେରି, “ପ୍ରବୁ ନୀନୁ ବାରେତି ହିୟାଁତି ଅଣ୍ପୁ ପୁନାତି, ଜୀହୁଦା ଏମିନି ଟା଼ୟୁତା ଡ଼ୟିନାୟି ମାନେ ଏ଼ୱାସି ହାଜାଲିଏ, ଏ଼ୱାଣି ଟା଼ୟୁତା ଈ ରିଆରି ବିତ୍ରାଟି ନୀ ତା଼ଣାଟି ଆ଼ଚିତାସି ଆମ୍ବାଆସି,
୨୫ ଏ଼ ପାଣ୍ତ୍ୱି ଆ଼ହାମାନାରି ସେ଼ବା କାମା କିହାଲି ଆମ୍ବାଆରାଇଁ ଜୀହୁଦା ପା଼ଣାତା ବାଚି କିହାମାଞ୍ଜି ତ଼ସ୍ତାମୁ ।”
୨୬ ଅ଼ଡ଼େ ଏ଼ୱାରି ଏ଼ ରିଆରି ତାକି ପାଦି କିହାଲିଏ ମତିୟ ଦ଼ରୁତଲେ ଆ଼ତେ; ଅ଼ଡ଼େ ଏ଼ୱାସି ଏଗାର ଜା଼ଣା ପାଣ୍ତ୍ୱି ଆ଼ହାମାନାରି ଗଚିତା ଆଣ୍ଡିତେସି ।