ଗାଲାତିୟ ମଣ୍ତଳୀ ନିମନ୍ତେ ପାଉଲଙ୍କ ଲିଖିତ ପତ୍ର
ଗାଲାତିୟ କୁଲମିତାକି ପା଼ୱୁଲ ରା଼ଚାମାନି ଆ଼କୁ
ମୂଲୁ ହା଼ଡା
ଗାଲାତିୟ ଆ଼କୁ ପାଣ୍ତ୍ୱିଆ଼ହାମାନି ପା଼ୱୁଲ ତା଼ଣାଟି ରା଼ସ୍କି ଆ଼ହାମାନେ ୧:୧ । ଈ ଆ଼କୁ ଜୀସୁ କ୍ରୀସ୍ତ ଜାର୍ନାତି ଡା଼ୟୁ ୪୮ ଟିଏ ୫୭ ବାର୍ସା ବିତ୍ରା ଗାଲାତିୟ କୁଲମିତି ନାମିତି ତାୟିୟାଁକି ରା଼ସ୍କି ଆ଼ହାମାଚେ । ଗାଲାତିୟ ଲ଼କୁ ରମିୟ ଦେ଼ସାତି ଗାଲାତିୟ ଇନି ଟା଼ୟୁତା ବାସା କିହା ମାଣ୍ମ୍ବିନେରି । ପା଼ୱୁଲ ଈ ଆ଼କୁ ରା଼ଚିତି ବେ଼ଲା ଆମ୍ବିୟା ମାଚେସି ଈଦାଆଁ ବୁଦିଗାଟାରି ଜିକେଏ ପୁଞ୍ଜାହିଲଅରି । ସାମା ଏପିସିୟ ଆ଼ଆତିଁ କରନ୍ତି ଈ ରୀ ଟା଼ୟୁତା ମାଞ୍ଜା ଡ଼ୟିନେସି ଇଞ୍ଜିଁ ଇନେରି ।
ପା଼ୱୁଲ ଗାଲାତିୟ କୁଲମିତି ଜୀହୁଦି ଅ଼ଡ଼େ ଜୀହୁଦିଆ଼ଆତି କ୍ରୀସ୍ତାନା ଲ଼କୁଣି ଟା଼ୟୁ ପୁଣ୍ମ୍ବି କିହାନା ଆ଼କୁ ରା଼ଚିମାନେସି । ଏ଼ୱାସି ମିଚି ଜା଼ପ୍ନାରି ତା଼ଣାଟି ହେକ ଆ଼ହାଲି ରା଼ଚାମାନେସି, କ୍ରୀସ୍ତାନା ଲ଼କୁଣି ପ୍ଣାଃଇ ମେ଼ରାତି ଜୀହୁଦି ହୁକୁମିତି ମା଼ନୱି ଆ଼ହାଲି ଅ଼ଡ଼େ ବାରେକିହାଁ ତ଼ଲୁ ଦା଼ପିଆ଼ନି ମେ଼ରା ୱେସିମାନେସି, କ୍ରୀସ୍ତାନା ଲ଼କୁ ବିତ୍ରା ଏଚେକା ମାଚେରି ଏମିନିଗାଟାରି ଜୀହୁଦି ଦାର୍ମୁତି ଆବିତାରି । ଏ଼ୱାରି ଜିକେଏ ପା଼ୱୁଲତି ପାଣ୍ତ୍ୱିଆ଼ହାମାନି ଅଦିକାରାତି ୱେଞ୍ଜିମାଚେରି । ପା଼ୱୁଲ ଏଚେକା ପୁସ୍ପନିକା ତଲେ ତାନି ପାଣ୍ତ୍ୱିଆ଼ହାମାନି କାତା ୱେସାନା ଏ଼ୱାରାଇଁ ମୁଦା କିହାମାଚେସି ୧:୧୧; ୨:୧୪ ଅ଼ଡ଼େ ଜୀସୁ କ୍ରୀସ୍ତଇଁ ନାମିସାରେ ଗେଲ୍ପି ଆ଼ନାୟି ଈ କାତା ୱେସାନା ନେହିଁ କାବ୍ରୁତି ଗେଲ୍ପି ମାନେସି ୨:୧୬ । ମାଣ୍ସି ଏ଼ନାଆଁ କିନେସି ଏମ୍ବାଟି ଆ଼ଏ ସାମା ମାହାପୂରୁତି କାର୍ମାଟି ଆ଼ନେ ।
ପତିତା ମାନାୟି
୧. ପା଼ୱୁଲତି ଜହରା । ୧:୧-୫
୨. ପା଼ୱୁଲତି ତଲିତି ଜୀୱୁ ଅ଼ଡ଼େ ଜା଼ପ୍ନି ଅଦିକାରା କାମା କିନାୟି । ୧:୬–୨:୨୧
୩. ମେ଼ରାତି କାମା ଅ଼ଡ଼େ ମାହାପୂରୁ କାର୍ମାଟି ଗେଲ୍ପି ଆ଼ନାୟି । ୩:୧–୪:୩୧
୪. ନେହିଁ କ୍ରୀସ୍ତାନା ଆ଼ହାନା ନୀଡାଲି ୱେହ୍ନାୟି । ୫:୧–୬:୧୦
୫. ପା଼ୱୁଲ ଜହରା କିହାନା ଆ଼କୁତି ରା଼ପ୍ନାୟି । ୬:୧୧-୧୮
୧
ପା଼ୱୁଲତି ଜହରା
୧ ନା଼ନୁ, ପାଣ୍ତ୍ୱିଆ଼ତି ସୀସୁ ପା଼ୱୁଲତେଏଁ, ପାଣ୍ତ୍ୱି ଆ଼ହାଲିତାକି ନା଼ନୁ ମାଣ୍ସି ତା଼ଣାଟି ଆ଼ଏ, ସାମା ଜୀସୁ କ୍ରୀସ୍ତ ତା଼ଣାଟି ଇଞ୍ଜାଁ ଆମିନି ଆ଼ବା ମାହାପୂରୁ ଏ଼ୱାଣାଇଁ ହା଼ତାରି ତା଼ଣାଟି ନିକ୍ହାମାନେସି ଏ଼ୱାଣି ତା଼ଣାଟି ବେଟାଆ଼ହାମାଇଁ,
୨ ନା଼ ତଲେ ମାନି ନାମୁତି ବାରେ ତାୟି ତାଙ୍ଗିସ୍କା ଗାଲାତିୟା କୁଲମିତି ଜହରା କିହିମାଞ୍ଜାନେରି ।
୩ ମା଼ ଆ଼ବା ମାହାପୂରୁ ଇଞ୍ଜାଁ ପ୍ରବୁ ଜୀସୁ କ୍ରୀସ୍ତ କାର୍ମାମେହ୍ନାଣି ଅ଼ଡ଼େ ହିତ୍ଡ଼ି ଜୀୱୁ ମିଙ୍ଗେ ହୀୟାପେସି ।
୪ ନୀଏଁତି ଈ ପା଼ପୁତି ଦାର୍ତିତା ମାଙ୍ଗେ ଗେଲ୍ପାଲିତାକି, ମା଼ ଆ଼ବା ମାହାପୂରୁତି ଅଣ୍ପୁତି ମା଼ନି କିହାନା, କ୍ରୀସ୍ତ ମା଼ ପା଼ପୁ ତାକି ଜାହାରାଇଁ ହେର୍ପାକଡିତେସି;
୫ କା଼ଲାକା଼ଲାତାକି ମାହାପୂରୁଇଁ ଗାୱୁରମି ଆ଼ପେ । ଆ଼ମେନ୍ ।
ରଣ୍ତିଏ ନେହିଁ କାବ୍ରୁ
୬ କ୍ରୀସ୍ତିତି କାର୍ମାତଲେ ଆମ୍ବାଆସି ମିଙ୍ଗେ ହା଼ଟା ମାଞ୍ଜାତେସି, ଏ଼ୱାଣାଇଁ ମୀରୁ ଗା଼ଡ଼େକେଏ ପିସାନା ଏଟ୍କାତି ନେହିଁ କାବ୍ରୁତି ଆସାମାଞ୍ଜେରି, ଏ଼ଦାଣିତାକି ନା଼ନୁ କାବା ଆ଼ହିମାଇଁ ।
୭ ସାତାତଲେ, “ଏଟ୍କାତି ନେହିଁ କାବ୍ରୁ” ଆ଼ଏ, ସାମା ଏଚରଜା଼ଣା ମିଙ୍ଗେ ତୀରି ମାଞ୍ଜାଲି ହୀଆନା, କ୍ରୀସ୍ତତି ନେହିଁ କାବ୍ରୁତି କିଲିବିଲି କିହାଲି ଅଣ୍ପିମାନେରି ।
୮ ସାମା ଆମିନି ନେହିଁ କାବ୍ରୁ ମା଼ମ୍ବୁ ମୀ ତା଼ଣା ୱେ଼କ୍ହା ମାଚମି, ଇଞ୍ଜାଁ ମା଼ମ୍ବୁ କି ଲାକପୂରୁତି ଦୂତୁୟାଁ ଜିକେଏ ଏ଼ଦାଣି ପିସ୍ପେ ଏଟ୍କାତି ନେହିଁ କାବ୍ରୁ ୱେ଼କ୍ନେସି, ଆତିହିଁ ଏ଼ୱାସି ବା଼କା ବେଟାଆ଼ପେସି ।
୯ ଏ଼ନିକିଁ ମା଼ମ୍ବୁ ତଲିଏ ୱେସାମାନମି, ନୀଏଁ ଜିକେଏ ନା଼ନୁ ଏଲେକିହିଁଏ ଅ଼ଡ଼େ ୱେଣ୍ତେ ୱେସିମାଞ୍ଜାଇଁ, ଆମିନି ନେହିଁ କାବ୍ରୁଇଁ ମୀରୁ ଆସାମାଚେରି, ଏ଼ଦାଣି ପିସ୍ପେ ଆମିନି ଲ଼କୁ ଏଟ୍କାତି ନେହିଁ କାବ୍ରୁ ମୀ ତା଼ଣା ୱେ଼କ୍ହାନେସି ଏ଼ୱାସି ବା଼କା ବେଟାଆ଼ପେସି ।
୧୦ ନୀଏଁ ନା଼ନୁ ମାଣ୍ସିୟାଁ ନ଼କିତା କି ମାହାପୂରୁ ନ଼କିତା ନେହିଁ ତ଼ଞ୍ଜାଆୟାଲି ଅଣ୍ପିମାଇଁ, ଏ଼ଦି ଏଚେଲା ଜିକେଏ ଆ଼ଏ । ଇଚିହିଁ ମାଣ୍ସିୟାଁଇଁ ରା଼ହାଁ କିହାଲି ଅଣ୍ପିମାଇଁ, ନା଼ନୁ ନୀଏଁ ପାତେକା ମାଣ୍ସିୟାଁଇଁ ରା଼ହାଁ କିୱିକିହାଲି ଅଣ୍ପି ମାଚିହିଁମା ନା଼ନୁ କ୍ରୀସ୍ତତି ହ଼ଲେଏଣାତେଏଁ ଆ଼ଆତେଏଁମା ।
ପା଼ୱୁଲ ଏ଼ନିକିଁ ଆ଼ଚ୍ୱି ଆ଼ନାୟି
୧୧ ତାୟି ତାଙ୍ଗିସ୍କାତେରି ଆମିନି ନେହିଁ କାବ୍ରୁ ନା଼ ତା଼ଣାଟି ୱେସ୍ପି ଆ଼ହାମାନେ, ଏ଼ଦାଣି ମିଙ୍ଗେ ନା଼ନୁ ୱେସିମାଞ୍ଜାଇଁ ଏ଼ଦି ମାଣ୍ସିୟାଁ ତା଼ଣାଟି ଆ଼ଏ;
୧୨ ନା଼ନୁ ଏ଼ଦାଆଁ ମାଣ୍ସି ତା଼ଣାଟି ବେଟାଆ଼ହା ହିଲଅଁ କି ଜା଼ପାହିଲଅଁ, ସାମା ଜୀସୁ କ୍ରୀସ୍ତ ତ଼ସାମାଞ୍ଜାନି ତା଼ଣାଟି ବେଟାଆ଼ହାମାଇଁ ।
୧୩ ନା଼ନୁ ତଲି ଜୀହୁଦି ଦାର୍ମୁତା ମାଚିବେ଼ଲା ଏ଼ନି ମାଣ୍କିତା ମାଚେଏଁ ମୀରୁ ୱେଞ୍ଜାମାଞ୍ଜେରି, ନା଼ନୁ ମାହାପୂରୁତି କୁଲମିତି ହା଼ରେକା ସା଼ସ୍ତି ହୀହିମାଚେଏଁ, ଅ଼ଡ଼େ ଏ଼ଦାଆଁ ମ୍ଣେକ୍ହାଲି ଅଣ୍ପିମାଚେଏଁ ।
୧୪ ଅ଼ଡ଼େ ମା଼ ଆକୁ ଆ଼ବାୟାଁ ପା଼ଣାପା଼ଟୁ ମେ଼ରା ତାକି ରା଼ହାଁଟି ମା଼ନି କିହାଁ ନା଼ ତଲେତି ହା଼ରେକା ଲ଼କୁ ବିତ୍ରାଟି ଜୀହୁଦି ଦାର୍ମୁତି ହା଼ରେକା ମା଼ନି କିହିମାଚେଏଁ ।
୧୫ ସାମା ମାହାପୂରୁ ନା଼ନୁ ଜାର୍ନା ଆ଼ଆ ନ଼କେଏ ତାନି କାର୍ମାମେହ୍ନାଣି ତଲେ ଆ଼ଚାନା ତାନି ସେ଼ବା କିହାଲି ହା଼ଟାତେସି,
୧୬ ଅ଼ଡ଼େ ଜୀହୁଦିଆ଼ଆତି ଲ଼କୁତା଼ଣା ନେହିଁ କାବ୍ରୁ ୱେ଼କ୍ହାଲି ତାକି ଏଚିବେ଼ଲା ନାଙ୍ଗେ ଏ଼ୱାସି ତାନି ମୀର୍ଏଣାଇଁ ତ଼ସ୍ତାତେସି, ଏ଼ କାତା ପୁଞ୍ଜାଲିତାକି ନା଼ନୁ ଏଟ୍କା ମାଣ୍ସି ତା଼ଣା ହାଜା ହିଲାଆତେଏଁ ।
୧୭ ଇଲେକିହିଁ ନା଼ ନ଼କେଏ ଆମିନି ଗାଟାରି ପାଣ୍ତ୍ୱିଆ଼ତି ସୀସୁ ଆ଼ହାମାଚେରି, ଏ଼ୱାରାଇଁ ଆଣ୍ତାଲି ତାକି ଜିରୁସାଲମତା ଜିକେଏ ହାଜା ହିଲାଆତେଏଁ । ସାମା ନା଼ନୁ ଦେବୁଣିଏ ଆରବ ଦେ଼ସାତା ହାଜାମାଚେଏଁ; ଅ଼ଡ଼େ ଡା଼ୟୁ ଦମେସକତା ୱେଣ୍ତା ୱା଼ତେଏଁ ।
୧୮ ତୀନି ବାର୍ସା ହାଚି ଡା଼ୟୁ ନା଼ନୁ ପିତରଇଁ ଆଣ୍ତାଲି ତାକି ଜିରୁସାଲମତା ହାଚେଏଁ, ଇଞ୍ଜାଁ ଏ଼ୱାଣିତଲେ ପନ୍ଦର ଦିନା ଏମ୍ବାଆଁ ମାଚେଏଁ ।
୧୯ ସାମା ପ୍ରବୁତି ତାୟି ଜାକୁବ ପିସ୍ପେ ପାଣ୍ତ୍ୱି ଆ଼ହାମାନାରି ବିତ୍ରା ଆମ୍ବାଆରାଇଁ ମେହ୍ଆତେଏଁ ।
୨୦ ନା଼ନୁ ମିଙ୍ଗେ ଏ଼ନାଆଁ ରା଼ଚିମାଞ୍ଜାଇଁ, ମାହାପୂରୁ ନ଼କିତା ସାତା ୱେସିମାଞ୍ଜାଇଁ, ମିଚି ୱେସିମାଞ୍ଜଅଁ ।
୨୧ ଡା଼ୟୁ ନା଼ନୁ ସିରିୟା ଅ଼ଡ଼େ କିଲିକିୟାତି ହା଼ରେକା ଟା଼ସ୍କାଣା ହାଚେଏଁ ।
୨୨ ଜୀହୁଦା ରା଼ଜିତା ମାନି ନାମିତି କ୍ରୀସ୍ତାନା କୁଲମିତି ଲ଼କୁ ନାଙ୍ଗେ ନେହିଁକିଁ ପୁଞ୍ଜାମାଞ୍ଜାଆତେରି ।
୨୩ ଏ଼ୱାରି ଏଟ୍କା ଲ଼କୁ ତା଼ଣାଟି ୱେଞ୍ଜାମାଚେରି, “ଆମିନି ମାଣ୍ସି ତଲି ମାଙ୍ଗେ ସା଼ସ୍ତି ହୀହି ମାଞ୍ଜାତେସି, ଇଞ୍ଜାଁ ମା଼ ନାମୁତି ମ୍ଣେକ୍ହାଲି ଅଣ୍ପିମାଚେସି, ଏ଼ୱାସି ନୀଏଁ ନାମୁତି କାତା ୱେ଼କ୍ହି ମାନେସି ।”
୨୪ ଇଞ୍ଜାଁ ଏ଼ୱାରି ନା଼ ତାକି ମାହାପୂରୁଇଁ ଗାୱୁରମି କିହିମାଚେରି ।